نعم .. السيارة جاها صبغ .. وين المشكلة؟

[جاسم الدوحة]

السلام عليكم
معظم السيارات قد يتعرض لحوادث بسيطة داخل المدينة
.. احتكاك من هنا أو خبطة من هناك .. فيضطر الناس لتصليحها
في الوكالة أو في أي كراج ممتاز ومعروف بحيث يكاد لا يوجد
أي أثـر للحادث وتعود السيارة إلى شكلها الرائع والبراق ..

لكن هناك من ينتقد هذا الأمر بشدة ، ويرفض بشكل قاطع
مجرد التفكير في شرائها ، أو تذهب به الظنون كل مذهب ..

سؤالي لكافة الإخوة من باب التحاور والمناقشة :

إذا تأكدنا أن الأجزاء المرشوشة من السيارة كانت علاجــًا لحوادث
بسيطة جدًا أو احتكاكات لا بد من إصلاحها ، وتم ذلك في كراجات
متخصصة وممتازة .. فما هو جوابك إذا قيل لك :

نعم .. السيارة جاها صبغ .. وين المشكلة؟

راجيــًا من الأعضاء المشاركة لفائدة الجميع .. مع الشكر

[aziz4z]

هو صح معاك حق السيارة تعدلت , بس في فرق بين صبغ الوكالة و صبغ الكراج , صبغ الكراج يستمر 6 شهور أو بالكثير سنة وبعدين بتحصله يتقشر , فواحد مب فاضي يصبغها مرة ثانية 6000 ريال
وبعدين أغلب الناس ماتحب تشتري سيارات مضروبة , وهو خايف من أن هيكل السيارة قد يكون مضروب , وإذا كان الضرب من الامام في عندك خوف من تأثير الحادث على المكينة أو أجزاء حساسة ثانية , و بعدين أنت ممكن مركب قطع تجارية , مب أصلية
فنصيحة , عندما تحب تبيع أي شيء أطلع البائع على حقيقته , حتى لا يحدث غرر , بكرة بيدعي عليك , واتق دعوة المظلوم

[ضليع التبريد]

موتر تِصَّلح ورجع مثل ماكان ... شنهو المشكلة؟؟!!!

فهو في الأصل مصبوغ ثم صبغ وكأن شياً لم يكن...ولي يبي له موتر مابعد صبغ يشتري من الوكالة "ويدفع لهم بالأكياس" ومبروك علية !!

موضوعك يستحق النقاش فهذا الموضوع الكل يتحدث عنه فإن كانوا شرايه يكسرون سعر موتر البياع بهل حجه مبسوطين، وأن كانوا بياعين الله يعينهم بتسير لهم أذى رغم أن موضوع الصبغ ليس الأصل !!

"لكنها لعبة الشريطية في بيع وشراء السيارات"
سووها بورصتهم، يرفعون السعر وينزلونه على كيفهم!!

[حسن]

فعلا مادري هذه من وين جايه ماخبرها الاول يجوز السعوديين اللي طايحين في سوقنا هم اللي بدوها علشان يطيح لك سعر الموتر

وفعلا في بعض الاحيان تشوف الموتر في ضربه بس صاحبها مايصبغها علشان مايقولون انصبغت اي عق هذا:rolleyes2:

الموتر بكبره مصبوغ

:eek5:

كان الموتر مرتكبين فيه جريمه زنا تقول اذا سمع انك مغير مثل صدام ولا رفرف جديد ومصبوغ ذاك الصبغ اللي مايحتاج

وش المشكله

[مضارب دوسري]

كل الموضوع رغبه في تنزيل سعرها
مثلا سياره تسوى لها 150الف مثلا
جاك شراي ب 140الف
وفي الفحص طلع انها تحتاج امور بسيطه سعرها لا يتجاوز ال1000ريال
تلقاه يجيك يقولك سعري 135000
لو ما يبيها كان ماقال انه يبيها ب 135000

وتقس الموضوع يصير مع الصبغ
الرغبه في التنزيل من السعر لا اكثر

[H H]

حسن ههههههههههههههههههههههههههههههههههههههههه

صادقين وين المشكله اذا كنت صابغه (فالوكالة)
اذا كانت في ضربه فالشاصي اوكي تنزل من قيمة السياره كثير غير كذا مافي اي داعي
ان الواحد يعيّب على الموتر لانه مصبوغ, طيب واذا انصبغ ؟ يعني السياره المصبوغه
بتتسبب في حوادث والا السيارات الثانيه بتعرف ان سيارتك مصبوغه وبتجي تصدمك بهالسبب؟

وبعدين ماشالله من الي بيقعد ثلاث سنين مايحك بموتره ابدا ابداً !! ادري ان في ناس تقعد عشر سنين
لكن نادراً جداً فالدوحة تلقى سيارة ثلاث سنين ماجتها ولاحكه ! والله يبعدنا عن الحوادث والحكات


شكراً

[@north_star@]

أصلا نادر جدا تحصل موتر مب مصبوغ وحتى اللي يحافظ على موتره تحصل واحد وقف جنبك وفتح الباب وحك بابه بصبغ سيارتك والا واحد خلى عربانة الجمعية تتمشى صوب موتر ...... بس مثل ما ذكروا الاخوان هي صح تنزل من قيمة السيارة بس على حسب الصبغ وللاسف بعض الناس وخاصة التجار ياخذونها حجة علشان ينزلون سعر السيارة بالارض

[khalid Qtr]

في قطر صعب تحصل سيارة ما جاها صبغ ، ولكن مثل ما قالوا اللي قبلي هذي نقطة يستغلها البعض للمساومة على سعر السيارة ..

[شبح الصمت]

شوف اخوي زبدة الكلام

الي بيستعمل غير الي يبي يبيع ويشتري !!!

انا كمستعمل ما تفرق عندي مضبوغه والا لا لو افكر ابيها اتم معاي
بس الي يبي يبيع ويشتري اعرف انها بتفرق معاه مليون

والله يهدي البعض يوم تعرض موترك يقصبك مب شريطي والا معرض قصاب

[طير حوران]

حسن ههههههههههههههههههههههههههههههههههههههههه

صادقين وين المشكله اذا كنت صابغه (فالوكالة)
اذا كانت في ضربه فالشاصي اوكي تنزل من قيمة السياره كثير غير كذا مافي اي داعي
ان الواحد يعيّب على الموتر لانه مصبوغ, طيب واذا انصبغ ؟ يعني السياره المصبوغه
بتتسبب في حوادث والا السيارات الثانيه بتعرف ان سيارتك مصبوغه وبتجي تصدمك بهالسبب؟

وبعدين ماشالله من الي بيقعد ثلاث سنين مايحك بموتره ابدا ابداً !! ادري ان في ناس تقعد عشر سنين
لكن نادراً جداً فالدوحة تلقى سيارة ثلاث سنين ماجتها ولاحكه ! والله يبعدنا عن الحوادث والحكات


شكراً

:nice::nice::nice:

[tawareq]

فيه ناس تتقبل وفيه ناس ما تتقبل

وشرايكم سيارات جديده من الوكالة وفيه ضربات تم تصليحها في الوكالة

وشفت هالشي بعيني

سيارات تتصلح في كراج الوكالة بدون ارقام وجديدة بقراطيسها

من رفرف او صدام خلفي او صدام امامي

ويتم بيع السيارة على الزبائن انها سيارات جديدة بدون حوادث

المفروض من باب الامانه انهم يذكرون للشاري ان بعض السيارت جديدة للبيع بسعر اقل نظرا والسبب حدوث بعض الحوادث البسيطة في الوكالة .

[وطن]

أنا سيارتي
طلعت لقيت واحد حافرها بمفتاح
جنب كامل

ما اصبغها مثلا !!

صبغتها
واللي يبي يشتريها يقدر يروح الوكالة يتأكد وين تم الصبغ
وليش


واللي مب عاجبه
كيفه يروح يدور له سيارة مجرحه :secret:

هم عادة يخافون ان تكون السيارة متعرضة لحادث قوي
او منقلبه

يقدرون يتأكدون من الوكالة اللي انصبغت فيها

مب صعبة

[شبح الصمت]

بقولكم قصتي

انا توني خذت لي سيارة مصبوغه كامل ..

الموتر ماشاء الله عليه طبعا عند واحد كبير ابو عيال ..

زلق فيه جمب يسار وداه اصبغه ما اعجبه الصبغ قام ورشه كامل

الموتر موديل 2007 قاطع 170 ممشى شركة ..
بعد الفحص ما طلع فيه والا شيء غير الصبغ

الموتر قيمته في المعارض من 115 لين 120 الف

الرجال الي جابه لي لاني اعز عليه جابه لي بسعر 80 الف

شليته وانا اضحك بعد اسبوع جاب لي 100 الف ما بعته

لانه الحمد لله .. الله وفقني فيه وموتر يمشيني 5 الى 10 سنين قدام لو ابي

السالفة سالفة قناعة واني استعمل مش اتاجر ...

لانه في فرق ورد وقول بين المستعمل والتاجر

التأجر 500 ريال تفرق معاه

[أبوفهد666]

معليش خلونا نكون واقعيين

سيارة قيمتها 100 الف وماجها صبغ ولاشي يعني شد بلد

وسيارة اخرى بنفس القيمة وفيها صبغ جنب او واجهة سواء حادث بسيط او قوي

ايهما تختار ؟؟؟

[مشاكل]

بالنسبة لي مافي امل اشتري سيارة جاها صبغ حتى لو رشة بسيطة
حلاة الموتر شد شركة :nice:

[تحداني]

فعلا مادري هذه من وين جايه ماخبرها الاول يجوز السعوديين اللي طايحين في سوقنا هم اللي بدوها علشان يطيح لك سعر الموتر

وفعلا في بعض الاحيان تشوف الموتر في ضربه بس صاحبها مايصبغها علشان مايقولون انصبغت اي عق هذا:rolleyes2:

الموتر بكبره مصبوغ

:eek5:

كان الموتر مرتكبين فيه جريمه زنا تقول اذا سمع انك مغير مثل صدام ولا رفرف جديد ومصبوغ ذاك الصبغ اللي مايحتاج

وش المشكله


أصلا نادر جدا تحصل موتر مب مصبوغ وحتى اللي يحافظ على موتره تحصل واحد وقف جنبك وفتح الباب وحك بابه بصبغ سيارتك والا واحد خلى عربانة الجمعية تتمشى صوب موتر ...... بس مثل ما ذكروا الاخوان هي صح تنزل من قيمة السيارة بس على حسب الصبغ وللاسف بعض الناس وخاصة التجار ياخذونها حجة علشان ينزلون سعر السيارة بالارض


بالنسبة لي مافي امل اشتري سيارة جاها صبغ حتى لو رشة بسيطة
حلاة الموتر شد شركة :nice:




على هالطاري .. سيارتي وكاله ألمانيه .. كل ما جى للسياره شي من شمخ ولا شي بسيط
قاموا وبدلوا القطعه ابقطعه ثانيه
راح لهم مره الوالد قال لهم اشفيكم اتغيرون القطعه
الا صبغ وانحلت السالفه
يردون عليه عشان اتحافظ عليها واتجيب لك شي
لازم تتغير كامل .. وانت من حقك دام هي جديده وعليها تأمين شامل
ما عمرهم اصبغوا لي شي
كله تبديل في تبديل



بعرضها للبيع خل اشوف كلامه صح ولا لا
6 سنوات شاريتها توها محتفله بالــ 61 الف كيلو مشي :shy:


جملكم الله برضاه

[rayyani4ever]

شوف اخوي زبدة الكلام

الي بيستعمل غير الي يبي يبيع ويشتري !!!

انا كمستعمل ما تفرق عندي مضبوغه والا لا لو افكر ابيها اتم معاي
بس الي يبي يبيع ويشتري اعرف انها بتفرق معاه مليون

والله يهدي البعض يوم تعرض موترك يقصبك مب شريطي والا معرض قصاب



جبتها يالذيييييييييييييييب :nice:

[شبح الصمت]

جبتها يالذيييييييييييييييب :nice:




واحلى شيء شريطي يبيع لشريطي وشريطي يبيع لشريطي وشريطي يبيع لمستعمل


الله يرزق الجميع بس لاحدن يغش احد

رفيجي خذ له موتر 2011 قاطع 20 ألف على كلمة رجال نعده رجال شنب قاله الموتر شركة مسكين خذه بـ 185 يوم قطع الموتر 50 الف جاء يبي يبيعه جاء رجال وفحصة طلع الموتر مركبين له جانبينات حقت المقناص وفيه صبغ جمب كامل ويبيله كمن شغلة ..

الله يسامح البعض

:secret:

[ممنوع اللمس]

انا مستغرب صراحه لان فعلا لو كانت السياره مصبوغه ينزل من سعرها حول 10 او 5
بس لو صبغ وكاله غير
المفروظ ان الموتر اهم شي فيه قير ومكينه وشاص
وفي كراجات يصبغ السياره نفس الوكاله واحيانا الفحص ما يطلع شي
وبعض محلات الفحص ما يعرفون شي انا فحصت سيارتي مرتين فحص يقولي الموتر فيه صبغ رفرف والثاني يقولي مافيه شي

اشكرك عالموضوع ووجهات النظر تختلف من شخص لآخر

[Riku3]

من حقي كشخص بشتري سيارة ان ابحث عن الافضل .. ومثل ما الممشى يتحكم بسعر السيارة وحكمي عن نظافتها اكيد صبغها يقولي مثل هالشي ..

انا من فترة كنت بشتري سيارة فيها صبغ بابين بس قالي ان الحادث في مواقف دوامه والحادث بسيط جداً والسيارة كانت جديده فصبغها .. بس غلطته ان قالي وين صلحها وانا رحت اتأكد بحكم معرفتي بالمكان الي صلح فيه ..

طلع حادث خشن ومصلح الموتر بأكثر من 20 الف والايرباج طالع ومغير كل القطع والفحص الفني ما اكتشف هالشي .

[qatari911]

أنا سيارتي
طلعت لقيت واحد حافرها بمفتاح
جنب كاملما اصبغها مثلا !!

صبغتها
واللي يبي يشتريها يقدر يروح الوكالة يتأكد وين تم الصبغ
وليش


واللي مب عاجبه
كيفه يروح يدور له سيارة مجرحه :secret:

هم عادة يخافون ان تكون السيارة متعرضة لحادث قوي
او منقلبه

يقدرون يتأكدون من الوكالة اللي انصبغت فيها

مب صعبة

:weeping:
نفس الحاله
مصار لي اسبوع من طلعت السياره
وكان عندي موعد في مستشفى حمد
واقف في المواقف المخصصه
حصلته حافرها بمفتاح او شي حاد
بس والله ليومج هذا وانا ادعي عليه كل مااتذكر السالفه:(

[ناصر الصلاحي]

السلام عليكم

يعني الحين تقولي الموتر اللي فيه صبغ نفس الموتر اللي مافيه صبغ غلطان
مثلا اذا الحين واحد جاته ضربه خفيفه عند الباب و الباب ينصبغ و تتعدل ربلاته فا صعب اي مكان يضبط لك انه ما ينسم
و انا حصلت موترين نفس الشي و نفس اللون و نفس السعر الفرق اللي بينهم ان واحد فيه صبغ و الثاني مافيه شي اكيد باخذ اللي مافيه صبغ

[أبوفهد666]

واحلى شيء شريطي يبيع لشريطي وشريطي يبيع لشريطي وشريطي يبيع لمستعمل


الله يرزق الجميع بس لاحدن يغش احد

رفيجي خذ له موتر 2011 قاطع 20 ألف على كلمة رجال نعده رجال شنب قاله الموتر شركة مسكين خذه بـ 185 يوم قطع الموتر 50 الف جاء يبي يبيعه جاء رجال وفحصة طلع الموتر مركبين له جانبينات حقت المقناص وفيه صبغ جمب كامل ويبيله كمن شغلة ..

الله يسامح البعض

:secret:

مرحبا ياشبح :nice:

انا صارت لي نفس القصة اعلاه بس السيناريو مختلف شوي

كان في شايب اطلبه مبلغ كبير .. وجلس يماطل فيني ..مع انه بخير وعنده خير

وجا يوم وكلمني وقال تعال ابي اخلصك .. هنا انا فرحت وقلت تمام زهب القهوة.

جيته وقال ياولدي عندي موتري ابيك تاخذه وتثمنه واطرحه من المبلغ اللي علي والباقي ابي منك مهلة .. طبعاً موتره في اكس ار 2011 ستين عام وارد السعودية مكينة 570
قال الموتر ماشي فقط 66 الف .. انا شفت الموتر الصراحة شبه جديد
قال ابيك تاخذه عن 230 الف .. قلت غالي ومايسوى في السوق المبلغ هذا .
المهم بعد شد وجذب قبلت على مضض وقلت توكل على . ابي افتك منه
اخذت الموتر وقلت لخوي الصغير دخله للمعارض .
جاه زبون وبعد شيل وحط بعته 192 الف ريال تخيل بعد ماكانت 230 الف ريال:anger1:
المهم راحو لمركز الفحص الكمبيوتر وطلع الموتر ماشي 166 الف كيلو .
والمجرم منزل العداد 100 الف كيلو اللي مايخاف الله .:anger1:
الشاهد من القصة اعلاه :
انك اذا اخذت موتر مستعمل ..شيك على الممشى كم ..
لان اللي مايخافون الله واجد:)

[بو خليفه 123]

موضوع يستحق النقاش و سؤال فعلاً وجيه ..


أنا اذكر كانت عندي سياره انشمخ صدامها الامامي شمخ بسيط و خليتها للبيعه بدون تعديل عشان اذا الشاري مايشوف انه فيه صبغ و يبتدي الفلم الهندي الدرامي و يوم جاني الشاري شاف الشمخ قال ياخي صدامك مشموخ بنزل من سعر الموتر 15 ألف هاهاها

المهم اني هونت عن البيعه نحاسه في هذا الشخص تحديداً و بعتها في دبي باكثر من الاسعار الي انعرضت علي في الدوحه .


بالنسبه للشاري (المستعمل خصوصاً) اهم الأمور هم المكينه والشاصي والقير و اذا كان يرغب بالموتر بيشتريه سواء كان مصبوغ او مدهون بدهن تاتا

[القيادي]

لازم تفرق يالغالي واعطيك مثال وضربه على نفسك لو سياراتين نفس الموديل ونفس السعر ولكن الثانية مصبوغة بالكامل وحتى لو في الوكالة والثانية صبغ الشركة الام اي سيارة بتختارها ؟ وعلى فكرة لو السيارة مصبوغة في الوكالة راح يبين

[شبح الصمت]

مرحبا ياشبح :nice:

انا صارت لي نفس القصة اعلاه بس السيناريو مختلف شوي

كان في شايب اطلبه مبلغ كبير .. وجلس يماطل فيني ..مع انه بخير وعنده خير

وجا يوم وكلمني وقال تعال ابي اخلصك .. هنا انا فرحت وقلت تمام زهب القهوة.

جيته وقال ياولدي عندي موتري ابيك تاخذه وتثمنه واطرحه من المبلغ اللي علي والباقي ابي منك مهلة .. طبعاً موتره في اكس ار 2011 ستين عام وارد السعودية مكينة 570
قال الموتر ماشي فقط 66 الف .. انا شفت الموتر الصراحة شبه جديد
قال ابيك تاخذه عن 230 الف .. قلت غالي ومايسوى في السوق المبلغ هذا .
المهم بعد شد وجذب قبلت على مضض وقلت توكل على . ابي افتك منه
اخذت الموتر وقلت لخوي الصغير دخله للمعارض .
جاه زبون وبعد شيل وحط بعته 192 الف ريال تخيل بعد ماكانت 230 الف ريال:anger1:
المهم راحو لمركز الفحص الكمبيوتر وطلع الموتر ماشي 166 الف كيلو .
والمجرم منزل العداد 100 الف كيلو اللي مايخاف الله .:anger1:
الشاهد من القصة اعلاه :
انك اذا اخذت موتر مستعمل ..شيك على الممشى كم ..
لان اللي مايخافون الله واجد:)




صدقني ما يتوفق ..

شوف سالفة واحد من الشباب والله اني نصحته راح وقلب عداد موتر له في الامارات وجاء وباع السيارة حلو عقب ما باعها ..

خذ له موتر وتخبط ماكينته طلعه ويضرب عنده القير الموتر للامانة جديد الي باعه بس ليش تلعب بعداده انبه ضميره قام وتصل في الشاري وقاله يا ولد الناس انا تراني نزلت العداد وممشى السيارة كذا كذا قاله يالشيخ انا شريته منك ومرتاح وقاله انه باح الله منك ..

المقصد في ناس تخاف الله وفي ناس ما تخاف الله ..

الله يعوضك خير ياخوي

[al-obaidly]

يبى هاي شغل تجار مهب نالس تستعمل

[MAZEN37]

ذكرتني بشخص يبي يشتري سياره كانت عندي عمرها يمكن 15 سنه
وحالتها ممتازه وصبغها زين
المهم سئلني ها مدعومه السياره مصبوغه ؟
قلت له شتبيني اقولك يعني سياره عمرها 15 سنه!!!
اكيد مدعومه ومليون دعمه بعد ومصبوغه من كل طرف
يا عمي تبي تشتري افحص ما تبي ما تضيع وقتي

والله سياره قديمه يبونها طالعه من الوكاله لكن المقصد لو المكينه والقير والشاصي اوكي لا تحاتي بتحصل الي يبيها

[مراد2015]

هذا الكلام تحصلة عند الشييحة اللي في شارع عشرة في الصناعية معرض بدل

من تجي تبيع سياراتك قال جاها صبغ




واهل بعض المعارض في شارع سلوى اللى حاطين طاولة واربع كراسي بلاستيك ودلة شاي وقهوة

مختصين في السوال هذا جاااااااااها صبغ


انا بعت سيارتي وفيها صبغ عادي

[لاجل QT]

اعتقد الهدف ان الكل اللى يبي يشتري سيارة .. يفكر اذا بيبيع السيارة مستقبلا ان مايطيح سوقها

انا اشوف السيارة صادها صبغ امر عادي

ولكن جرت العادة ان السيارة المصبوغة ماعليها اقبال عند البيع

ليش مدري

عسى ماشر اصبغت افضل من تتم شلحة ملحة

قانوون فكري مانقدر نغيرة

ولهذا تحصلهم اصحاب السيارات المصبوغة مضطرين ينزلون من سعرها

[لاجل QT]

سيارتى اندعمت من الباب الامامي جنب السائق

ركبت باب يديد من الوكالة

عند البيع يقولك لا مهب بابها الاصلي مركبين باب يديد:rolleyes2:

يه:eek5:

بعد يديد مهب عاجب اشلون جذي

هذا يعتبر بعد عيب في السيارة :(

من وين جايبين هالمنطق في البيع والشراء


هو غباء ...ولاسوقنا جذي:(

[أبوفهد666]

سيارتى اندعمت من الباب الامامي جنب السائق

ركبت باب يديد من الوكالة

عند البيع يقولك لا مهب بابها الاصلي مركبين باب يديد:rolleyes2:

يه:eek5:

بعد يديد مهب عاجب اشلون جذي

هذا يعتبر بعد عيب في السيارة :(

من وين جايبين هالمنطق في البيع والشراء


هو غباء ...ولاسوقنا جذي:(

لاهو غباء ولا يحزنون

بس السيارة اذا كانت مصبوغة .. الواحد يكش منها

يخاف جاتها صدمة قوية

فلذلك يشتري السيارة السليمة لو يدفع زيادة بس يكون مطّمن

وبقولك شغلة :
السيارة اللي بويتها شد الشركة
مرغوبة وفي نفس الوقت مايخاف عليها من نزول سعرها
وزباينها على قفى من يشيل

[حفيد الأنصار]

معليش خلونا نكون واقعيين

سيارة قيمتها 100 الف وماجها صبغ ولاشي يعني شد بلد

وسيارة اخرى بنفس القيمة وفيها صبغ جنب او واجهة سواء حادث بسيط او قوي

ايهما تختار ؟؟؟




وهذا رأيي أيضا ..

كلامكم صحيح ياخوان ان بعض الصبغ مايأثر خاصة للي يبي يستخدم الموتر ولا يبغى يبيعه ..
ولكن لا بد أن يضل سعر الموتر الوكالة أفضل من اللي جاها صبغ .. شي بديهي

[بوخالد911]

هلا
البعض ما يرغب بالموتر اللي جاه صبغ
ويفضل النظيييف جداً

[khaldoon]

الحين يا اخوي انت ممكن تشتري سيارة مصبوغة لانك اقتنعت انه الحادث اللي حصل لها بسيط ....بس يوم تيجي تبيع تعال اقنع المشتري بنفس قناعتك.......

مرة شفت كروزر عليه بقع كبيرة على كل اجزاء السيارة خاصة البانة ....اقول لراعيها اشلون تبي تبيعها و هي هالشكل.... اصبغها لانه اول شي بيسويه المشتري انه يصبغها لانها مستحيل تكون مقبولة لاحد .....قالي لو صبغتها كامل (لانها فعلا تحتاج صبغ كامل) راح يطيح سعرها و يظن المشتري انها سيارة قالبة من قبل....خله يشوفها على حقيقتها و الصبغ سعره معروف و ما يقدر يطيح وايد من سعرها بهالحالة

[جاسم الدوحة]

شكرا من الأعماق لكل من شارك
برأيه وساهم في إثراء الموضوع .

من جانبي أرى أن شراء سيارة (جاها صبغ)
من أي صديق أو قريب هو أفضل حلّ ، وذلك لتوافر
عنصر الثقة التامة ومعرفة احوال السيارة أصــًلا
لأنك تشوفها وياه كل يوم مثــًلا .

بمعنى آخر ، الابتعاد عن شراء مثل تلك السيارات
عن طريق المعارض ، يصبح أفضل وأسلم من جميع النواحي .

أما بعض (الشريطية) فمستعدّ يخسر دينه وعياله
في سبيل بيعة السيارة من كثر ما يحلف ، ويقول المثل :
(قالوا للحرامي إحلف .. قال جالك الفرج).

مرة أخرى شكرًا للجميع بدون استثناء
ويبـقى الموضوع مفتوحــًا للاستزادة
من أرائكم النيــّرة .. ودمتم بخير .

[مخطط قطري]

المشكله سعرها يطيح بس !

[حبر وقرطاس]

جاتني حكه

ههههههههههههههههههه

ياشوارع مدينه الحكه ومواثق مجمعاتها ههههههه

[تاجر كشخة]

اشكرك أخوي جاسم على الموضوع الحلو صحيح الشريطية يستغلون هالنقطة علشان يطيحون من قيمة السيارة ويحسسونك انها ما تسوى ذاك السعر الفلاني هذا اذا افترضنا انها مصبوغة من الوكالة صبغ فرن اما اذا كانت مصبوغة رش فانا مع الشريطي ينزل في سعرها لان مع الوقت الصبغ يبين وتروح لمعته

[تاجر كشخة]

:weeping:
نفس الحاله
مصار لي اسبوع من طلعت السياره
وكان عندي موعد في مستشفى حمد
واقف في المواقف المخصصه
حصلته حافرها بمفتاح او شي حاد
بس والله ليومج هذا وانا ادعي عليه كل مااتذكر السالفه:(

الله يعينك بس أخوي ممكن صاف السيارة غلط و ماخذ موقفين لانه ما في أحد منيه والطريق يشدخ سيارتك مع اني ضد هالعمل الحقير بالمرة بس عاد الواحد لازم يتقي شر هالنفسيات

[حمد (بوعلي)]

يختلف وين الصبغ باب والا رفرف والا بانه والا صدام لو صدام شي طبيعي تقريبا لتعرضه للشموخ والخدوش والافضل صبغه اما لو بانه بتقولي تجميلي ؟ الغالب حادث ويمكن خشن بعد تحياتي

[حماد الدغيمان]

ربنا يوفق ويسلموا الايدين

[الفا برافو]

للاسف نقطة ضعف صارت للي يبي يبيع سيارته ... ونقطة ايجابيه للي يبي يبخس بقيمة السياره

[hxamad]

والله الصراحة أشكر راعى الموضوع على الطرح الصراحة لأنه الواحد مادري ليش يهمه البدى إذا جير ومكينه ودفرنش مافيهم شى بس أتفق معاه فى نقطة غذا البدى مب مصلح عدل يعنى شغل أي كلام يبين المعجون والصراحة أنا مشوف هذا عيب فى السيارة وسلامتكم