مشورتكم ,,,والله محتار

[محب الخيل]

السلام عليكم ورحمة الله وبركاته ,,,,

يا أخواني ,,, مشورتكم ورأيكم ,, أنا بنيت دور ثاني على الدور الأرضي . وبعد ما أكتمل البناء

لأحظت تصدعات خفيفة بدأت تظهر على سقف بعض الغرف في الدور الأرضي , وجاية بشكل خط من البداية الى النهاية والغرفة اللي جنبها نفس المكان .

جبت لي نفس الإستشاري اللي أشرف على الدور الثاني ,, وشافها وقال ( ياعم ماتخفش دي حاقة طبييعة ,, لأن البيت الأول كان ما أخذ وضعية معينة ,, وبعدين جاه حمل عليه فلازم يصير كده ) انا الصراحة ما أني مرتاح لكلامه ,, ويش رأيكم هل هذا شي طبيعي
وهل صار مع حد منكم ,
أرجوكم لا تبخلون علينا بالرد .

[العربية نت]

السلام عليكم ،،،
انت في البداية ما سويت فحص للبيت قبل البناء لمعرفة قوة الدور الارضي :rolleyes2:
واذا كانت تشققات كبيرة وواضحة انصحك تشوف لك مكتب استشاري ثاني بس حاول انه يكون الافضل وذو خبرة وعطه الي يبغي فلوس اهم شئ يعطيك الراي المناسب انت الحين بنيت وخلصت لازم تتاكد علشان ترتاح وإن شاء الله مابه الا الخير لكن الحذر واجب :shy:

اما سالفة متخفش ياعم هههه هذا حال كل المصريين خاصة النصابين منهم :eek5:

بالتوفيق اخوي .. :)

نصيحة : المكاتب الاستشارية الخاصة بالتصميم للخرائط والاشراف الهندسي هم اهم نقطة في موضوع البناء يجب على الواحد انه يروح للافضل ولايسترخص ..

[محب الخيل]

أخوي ( العربية نت)

بارك الله فيك على شورك ,,,

نعم أنا قبل البناء أخذت فحص عن طريق مختبر التيسير اللي بدورهم عطوني تقرير أن المبنى يتحمل دور ثاني
بالراحة ,,

وعلى رأيك بأشوف إستشاري ثاني بس ياليت أدلني على إستشاري ( خبرة ويخاف الله )

[معماري قطري]

شوف اخوي كقاعدة البنيان الخرساني المسلح بالحديد يعطي انذارات قبل السقوط لا قدر الله، وتلاحظ تصدع قوي وانحناء .. شلوخ بسيطة ممكن شيء عادي لكن يخوفني في كلامك إنها بطول السقف، فإذا كان فيه جدار فوق هالشلخ فالسبب الجدار ووزنه الزايد وانتبه لأي تطورات .. مشكلة البناء القديم يكون الحديد غير متماسك مع الخرسانة بسبب الصدأ ويكون انسلاخه سريع ومفاجيء.

رايي تشوف مختبر ثاني أو مكتب هندسي جيد .. وإن كان ولا بد من حل جذري ممكن تركيب عمود أو 2 لتدعيم السقف في الدور الأرضي .. وممكن يكونون الأعمده حديد بقواعد حديد عريضة وملحومة .. والعمود الحديد ينخفي ببلاستر عليه أو جبس ويكون حل رخيص وعملي، وإن شاء الله ما تحتد عليه وبالتوفيق لك.

[محب الخيل]

أخوي معماري قطر
شكرا على الرأي
بالنسبة للدور الثاني جاي على نفس المخطط اللي تحت العمود على العمود والطوفه على الطوفه
والتصدعات اللي اقول عنها جايه في نص الغرف

[معماري قطري]

زين هل هي تصدعات واضحة ومفتوحة ل 2 ملم وأكثر ولا بس خط طولي؟ وهل يوجد انحناء في السقف لأسفل؟

محتمل يكون تأثير وزن شيء ثقيل من الأثاث .. أو وزن إضافي كأرضية ثقيلة فوق الغرفة أثرت على قوة تماسك الحديد .. في هذي الحالة واجب الإنتباه ومراقبة أي انحناء أو زيادة تشققات ووضع حلول انشائيه لها مثل العمود والعارضة الحديد .. أو عمود مثبت على قطعة حديد مربعة ومن فوق قطعة حديد مربعة تحمي السقف وتمسكه ليضعف أكثر.

إخوي شوف المهندس فوزي اسماعيل في مكتب ام زد اند بارتنرز هو خبرة كبيرة في الإنشائي وممكن يساعدك .. أو جرب حظك مع شيفا مدير اتحاد قطر للتخطيط وهو بعد من خبراء التصميم الانشائي .. بس حاول تشوف حد منهم وجه لوجه وتشرح له المشكله مع صور لأن الإثنين مشغولين وايد ولا يلتفتون لأشياء صغيره .. وغيرهم أكيد وايد بس الإثنين حسب معرفتي بهم خبرتهم قوية .. وان ما حصل حد منهم عندي لك مهندس تونسي .. المشكله ما اضمن وجودهم في قطر بسبب الإجازات.

[معماري قطري]

معليش أضيف

دوم منطقة وسط الغرفة أو الصاله هي اللي عليها تأثير وزن السقف ومن عليه وما عليه من أوزان - قصدي التأثير الأكبر، وهي الأضعف.

أتمنى لو كنت في قطر كنت شفت شصاير معاك لكن للأسف إحتمال ما احصل فرصه للعودة لقطر الا في نص رمضان الله يبلغنا ويبلغكم اياه.

[محب الخيل]

أخوي / معماري قطر
بيض الله وجهك وترجع بالسلامة
بأحاول أتواصل معهم وان شاء الله احصل الحل عندهم