## محتاجة ارائكم في توزيع قطع الاثاث ## [الأرشيف]

ضوى

25-06-2013, 12:20 AM

الموضوع ومافيه اني لفيت شارع سلوى ولقيت غرفة نووم ايطالية عجيبة عجيبة وبسعر ولا في الاحلام سعر خيالي بصراحة على الايطالي والكواليتي والديزاين ، وهي عبارة عن سرير طول مترين وعرض متر و80 سم ، واثنين كوميدينو 60 سم وخزانة ثلاثة امتار وتسريحة متر و40 سم ، الغرفة جميلة جدا ولا تعوض ، المهم الغرفة اللي ابي لها هالقطع مساحتها 4*5 بس المشكلة في توزيع الاثاث مب عارفة اشلون ممكن اوزع الاثاث
الغرفة فيها بابين وشباك ومحتارة اخاف تنحكر الغرفة عموما راح تستخدم للنوم فقط ماراح يكون فيها غير هالقطع بس التوزيع عذبني
شوفوا الغرفة ونوروني بارائكم

http://3inain.com/upfiles/Bt308666.jpg (http://3inain.com/) عينين (http://3inain.com)

النهار

25-06-2013, 12:40 AM

هههههههههه
انا افتكرت بتوزعين علينا قلت اول واحد اخذ من هالتوزيعه :(
التوزيعات شغل الحريم

يستحسن ان الريول ماتكون مقابل الجبله

لاجل QT

25-06-2013, 05:17 AM

دائما اذا الغرفة صغيرة نوعا ما..مافي الا تحطين السرير عند النافذة يعنى تكون خلف السرير الدريشة

ووزعي باقي القطع في المكان المناسب

انا خاطري اتعلم كيف توزيع القطع في الصالة والزوايا

وحيد-الشوق

25-06-2013, 08:55 AM

ان شاء الله يفيدونج الاخوان

لقافه ممكن نعرف كم سعر الغرفة ووين المحل المقصود لأني شفت غرف ايطاليه ب70 الف ووحده اذا ماخاب ظني ب30 الف والاسعار غير مناسبة كلش :(

هدوء العاصفة

25-06-2013, 10:47 AM

الغرفة كبيرة على مساحة الغرفة .. والمشكلة الرئيسية هو الكبت .. حطي السرير في المكان المناسب وبعدين شوفي وين تحطين الكبت والتسريحة ..

NINA RICCI

25-06-2013, 10:59 AM

في الغرف الصغيره يفضل لو انج تاخذين السرير بروحه .. وتفصلين له التسريحه والكبت بحيث يكونون صغار ومناسبين لسايزز الغرفه ..
والله يعينج لان اتعب شي توزيع الاثاث ..

ضوى

25-06-2013, 12:04 PM

شاكرة لكم حسن تفاعلكم

اخوي وحيد السعر ٨٠٠٠ بس خل توصل الغرفة وباقولك عن المحل ان شاء الله اخاف تكون اخر حبة

ضوى

25-06-2013, 12:06 PM

في الغرف الصغيره يفضل لو انج تاخذين السرير بروحه .. وتفصلين له التسريحه والكبت بحيث يكونون صغار ومناسبين لسايزز الغرفه ..
والله يعينج لان اتعب شي توزيع الاثاث ..

للاسف ماقدر افصل الغرفة كاملة ووايد عاجبتني لدرجة ممكن اخذها واخزنها

بومحمد86

25-06-2013, 12:16 PM

خلي السرير وراه الدريشه والكبت مشاهد السرير احذى الباب والتسريحه على اليمين مشاهده الباب الثاني....

ابومبارك

25-06-2013, 12:23 PM

نصيحه اهربي من الاثاث الايطالي يتفكك وخساره الواحد يشتريه

captin

25-06-2013, 12:39 PM

مرحبا ضوى

شكلج توهقتي عاجبتج الغرفة ومحتارة شلون ترتبين الأثاث

مبدئيا مساحة 5*4 وبابين ودريشه بتكون الغرفة ضيقة بالقطع
الإيطالية اللي ذكرتيها .

نبي اذا قدرتي تحطين رسم للغرفة مبين فيها موقع البابين والدريشة عشان
نقدر نفكر وياج شلون نوزع القطع.

عندنا أكثر من اختيار

نخلي السرير والكومودينو في الغرفة ونحط الكبت والتسريحة في غرفة جنبها او اذا الممر كبير يسمح او اذا فيه غرفة ملابس كبيرة نحطهم فيها مع بعض وفي هالحالة ماراح تبين الغرفة ضيقة لان ما فيها الا السرير والكومودينو على الاطراف.

الاختيار الثاني تاخذين كتالوج الغرفة وتفصلين نفس تصمميها عند منجرة معروفة يجيون
وياخذون المقاسات الصحيحة بحيث تطلع القطع متناسقة وضمن مساحة الغرفة.

ضوى

25-06-2013, 12:47 PM

خلي السرير وراه الدريشه والكبت مشاهد السرير احذى الباب والتسريحه على اليمين مشاهده الباب الثاني....

هلا ياخوي

انا عندي مبدأ وايد متعبني ماحب اي شي جدام الشباك احب اشوف النور والاضاءة والزرع وراس السرير مرتفع نوعا ما بيحجب الشمس اللي احبها تضرب في الغرف ، الباب الثاني مفتوح عالماستر على اساس بنتي الصغيرة اتطمن عليها وهي تتنقل بسهولة بين غرفتها وغرفتنا ، تقريبا وصلت لحل بس اتأكد من مقاس التسريحة اذا اوكي تكون انحلت المشكلة ان شاء الله وبيصير عندي وسع في الغرفة اليوم باتأكد ان شاء الله

ضوى

25-06-2013, 12:48 PM

نصيحه اهربي من الاثاث الايطالي يتفكك وخساره الواحد يشتريه

بالعكس روعة الايطالي ، اخذت غرفة من 89 وماشاء الله كثر مانقلت ماصادها ولا خدش ولا تخلصت منها الا قريب لاني جددت كل شي وماكان لها مكان وتحسفت عليها

ضوى

25-06-2013, 12:50 PM

اخوي كابتن

الغرفة خلاص دشت خاطري وماظن بافرط فيها ، التفصيل متعب ومايكون بهالجودة باصورها وباحطها لكم ومتأكدة بتعجبكم ان شاء الله وبتقدرون تعلقي فيها ،
تقريبا اني وصلت لحل وباتأكد اليوم العصر ان شاء الله

بومحمد86

25-06-2013, 01:05 PM

عندج حل ثاني بعد تخلين السرير يساره الدريشه ويمينه الباب والكبت مشاهد السرير والتسريحه بين البابين ومع هل حل الغرفه بتكون مسفره :nice:

ضوى

25-06-2013, 01:44 PM

باقولكم عالحل المغرب ان شاء الله

أسد الجزيرة

25-06-2013, 02:44 PM

الدولاب في الزاوية عند الدريشة
الكمدينوا في الزاوية الثانية جمبه السرير و جمبه الكمدينو
التسريحة بين البابين

ضوى

25-06-2013, 05:50 PM

الحمد لله اخذت الغرفة من مفروشات الشروق ب٧٠٠٠ ، اكيد مب الايطالي التوب كواليتي لكن جودة مقبولة وتفي بالغرض لاربع او خمس سنين خاصة انه اللي عندي نظامين ومب من النوع المدمر وراح تكون لبنتي العليا ان شاء الله اهم شي فيها الخزانة دثرتنا ماتخلص

المهم الخزانة قررت احطها اول مادخل من الباب الاولي عاليسار ، والسرير مقابله عالجهة الثانية والتسريحة جنب الشباك بس بشكل زاوية او سيده لانه راح يكفي ان شاء الله

شاكرة لكم مساعدتكم وماقصرتوا بارائكم وافكاركم

لبيبة

25-06-2013, 05:57 PM

الله يبارك لكم في الغرفة الجديدة ويعطيكم خيرها ويكفيكم شرها.
حسب اللي فهمته من الوصف بيكون توزيع موفق بإذن الله.

ضوى

25-06-2013, 05:57 PM

http://3inain.com/upfiles/nld72221.jpg (http://3inain.com/) عينين (http://3inain.com)

لبيبة

25-06-2013, 05:59 PM

ما شاء الله تبارك الله، ذوق جميل وألوان جميلة

ضوى

25-06-2013, 06:08 PM

تسلمين لبيبة حبيبتي شكرا على ذوقج

افكر البق عالغرفة ستارة فيها درجات الازرق والوردي واكسسورات بنفس الطريقة وسجادة هاي بروحها حوسه

وحيد-الشوق

25-06-2013, 06:18 PM

ضوى

25-06-2013, 06:23 PM

هل المحل جنبه معارض سيارات اتوقع دشيته من فتره قريبة :rolleyes2:

ماشاء الله تبارك الله حلوة الغرفة وايد بالمبارك وتتهنون فيها ان شاء الله

لكن اتوقع انها شغل صيني مب ايطالي والله اعلم سعرها ممتاز ومناسب للاسعار الي شفتها الايطالي وايد يكون اغلى او يمكن يكون درجات الله اعلم بس والله حلوة بدون مجامله :nice:

شكلي بمر عالمحل وباخذ وحده :shy:

ايه صح جنبه معرض سيارات ، بس مب صيني ايطالي درجة اقل من اللي نعرفهم بوايد ، الصيني عنده اغلى منها 😄
عموما بنشوف على استعمالنا كم بتعيش معاي اتوقع خمس سنين اقل اكثر شوي بس خشبها مقبول المسكات مبين اي كلام باغيرها وباخذ شي جودة اكثر

ضوى

25-06-2013, 06:23 PM

وسعر الايطالي اغلى بوايد طبعا التوب كواليتي انا اخذت غرفتي من ديانا ب٤٥

رهج السنابك

25-06-2013, 08:46 PM

dream~qa

25-06-2013, 09:30 PM

أختي ضوى لا تحاتين الطقم مقاساته مناسبة وراح تكفي الغرفة وممكن بعد تزيدين شيزلونج .

خلي السرير والتسريحة في جهة وحدة مثل ما هو معروض في المحل وراح تزيد عندج مساحة كافية .

ضوى

25-06-2013, 11:04 PM

عرفت هالمحل الي فيه مصري طويل وضعيف

حسبي الله عليه نصب علي ولين الحين منقهره منه

سرق علي عربوني :(

المهم اختي مب الصناعه

الخشب هل هو خشب ولا ام دي اف ؟؟ خشب مضغوط

حاولي تتاكدين بس من نوعيه الخشب

مع اني اشك انها خشب

هلا اختي

راعي المحل من العمادي ونعرفه شخصيا وهو اللي كان موجود شخصيا والمصري اللي عنده دقس شمتنه وقصير مهب طويل والخشب خشب ايطالي مش دي اف لاني اعرف الدي اف مسوية منه ديكورات لبيتي الخشب خشب متأكدة والصناعة مقبولة مش توب توب بس تمشي الحال كم سنة

w.qatar

26-06-2013, 06:56 AM

اختي اهم شي الكبت يكون في طوفة ما فيها لا باب ولا مكيف و باقي القطع بسهوله ترتبينها لان الكبت هو المشكله

ضوى

26-06-2013, 07:58 AM

أختي ضوى لا تحاتين الطقم مقاساته مناسبة وراح تكفي الغرفة وممكن بعد تزيدين شيزلونج .

خلي السرير والتسريحة في جهة وحدة مثل ما هو معروض في المحل وراح تزيد عندج مساحة كافية .

هلا اختي

اتوقع راح تكفي الغرفة وبتشيل القطع براحة بس مشكلتي الباب الثاني هو اللي مسبب لي أزمة ، بس الحمد لله الوضع صار اوكي ان شاء الله واذا ركبت الغرفة باصورها حتى تستفيدون بتوزيع الاثاث بالغرف الصغيرة نوعا ما

ضوى

26-06-2013, 07:59 AM

اختي اهم شي الكبت يكون في طوفة ما فيها لا باب ولا مكيف و باقي القطع بسهوله ترتبينها لان الكبت هو المشكله

للاسف وين ماباحطه بيكون فيه باب عشان يناسب حجم الكبت بس الحمد لله الكبت مو وايد عود وان شاء الله بيتضبط

معماري قطري

27-06-2013, 02:40 AM

المسئله بسيطة إخت ضوى

للكل المفروض لتوزيع الغرفة ناخذ في اعتبارنا كل شيء من أساس التصميم

بس في حالتج ألحين الغرفة موجوده ومساحتها وأبعادها ودرايشها متحددة وممكن ترسمينها بمقياس رسم .. مثلاً على ورقة كبيرة إختاري كل متر يمثله على الورق 10 سم أو كل ما صغرت الورقة تقدرين تخلين حتى كل متر = 2سم أو 1 إنش أو حتى حسب حجم الورقة بحيث رسمة الغرفة تبين واضحة .. الشغلة لغرفة وحده شغلة دقايق وبسيطه جداً .. نجي لمكونات غرفة النوم ومقاساتها واضحة .. كوين سايز 180 سم في 200 سم تسوينها حسب مقياس الرسم على قطعة ورق غير أو كرتون بلون غير وتحطينها في كم مكان وتتخيلين كيف تترتب الغرفة.

حتى مكان الباب وبمقياس رسم تحطينه ومكان أي مفتاح كهربه.

ضوى

01-07-2013, 09:45 AM

ماشاء الله عليك معماري كلامك كله في الهندسة

الامر ابسط من جذي بوايد لا تعقدني

هذي التوزيع اللي صار

http://www7.0zz0.com/2013/07/01/06/672177782.jpg (http://www.0zz0.com)

http://www7.0zz0.com/2013/07/01/06/517921458.jpg (http://www.0zz0.com)

لبيبة

01-07-2013, 09:54 AM

ما شاء الله قدرتي توزعين الأثاث وطلع المكان يكفي الحمدلله، الله يجعلها غرفة مباركة ويعطيكم خيرها ويكفيكم شرها يا رب

ضوى

01-07-2013, 12:36 PM

ما شاء الله قدرتي توزعين الأثاث وطلع المكان يكفي الحمدلله، الله يجعلها غرفة مباركة ويعطيكم خيرها ويكفيكم شرها يا رب

الحمد لله ، مشكورة فديتج ، بس تدرين مب عاجبني مكان الكومدينو بس مالقيت الا هالمكان ، باقي اشياء بسيط وان شاء الله تترتب مع الستارة والاكسسوارات

تسلمين لبيبة

لبيبة

01-07-2013, 01:40 PM

الله يسلمج يا ضوى، عندي بس ملاحظة بسيطة وهي اتجاه المكيف على السرير، ممكن يكون متعب والهوا البارد بيكون مباشر حتى لو حركتوه فوق او تحت، يمكن لو حركتوه وايد فوق بيكون اوكي، ما احب المكيف المباشر :(
الكوميدينو مكانه زين ومافيه شي، والله يبارك لكم.

معماري قطري

01-07-2013, 06:35 PM

توزيع صح وغرفه حلوه الله يوفقكم .. باقي نعرف اسم المحل

لبيبة

01-07-2013, 07:19 PM

توزيع صح وغرفه حلوه الله يوفقكم .. باقي نعرف اسم المحل
تفضل اخوي معماري قطري

الحمد لله اخذت الغرفة من مفروشات الشروق ب٧٠٠٠ ، اكيد مب الايطالي التوب كواليتي لكن جودة مقبولة وتفي بالغرض لاربع او خمس سنين خاصة انه اللي عندي نظامين ومب من النوع المدمر وراح تكون لبنتي العليا ان شاء الله اهم شي فيها الخزانة دثرتنا ماتخلص

المهم الخزانة قررت احطها اول مادخل من الباب الاولي عاليسار ، والسرير مقابله عالجهة الثانية والتسريحة جنب الشباك بس بشكل زاوية او سيده لانه راح يكفي ان شاء الله

شاكرة لكم مساعدتكم وماقصرتوا بارائكم وافكاركم