ابحث عن عقد عمل موظفين وعاملين لشركة مقاولات

[jassimqtr]

السلام عليكم ورحمة الله وبركاته
اخواني الكرام اصحاب شركات المقاولات ... ابحث عن عقد عمل لموظفين وعاملين لاني افكر في تغيير بنود عقد العمل كي اضمن حق الشركه من العماله وهروبهم من الشركه .
هذا الشيء اللي جعلني اغير او اضيف بعض البنود في عقد العمل .
ارجو من ذو الخبره الافاده
ولكم جزيل الشكر والتقدير

[شموخ دائم]

,

,


مرحبا


اخوي الكريم

عقد العمل للعمال والموظف موحد في اكثر شركات المقاولات
الي هو عقد وزاره العمل
موضح فيه الراتب الاساسي
علاوه
والعلاج
والتذكره
والاجازات
والحقوق والواجبات للطرفين

بالنسبه لهروب العمال
هذا ماتقدر تعمل اي شي فيه نهائيا للاسف
لو هرب شخص ونمسك او سلم نفسه
( انت بتدفع التذكره )

وراح تعطيه اخر راتب الى اخر يوم كان عندك

حتى لو حطيت عكس هذا الامور في العقد
ما راح يفيد

لان هذه الامور اصبحت عرف بين ( الدوله ) وبين سفارات هذه الدول
وحتى تتخلص الدوله من الاحراج مع قوانين حقوق الانسان

لو الابعاد صار متروس عمال وما عندهم فلوس للتذاكر
وتموا عالقين هناك واعدادهم كبيره
هذا يحط الدوله في مشاكل كثيره مع الدول الاخرى

لان العامل ما بيقول هربت عشان احصل راتب احسن او اكسب اكثر

بيقول هربت لان في ( تعسف ) في العمل ويشغلوني ساعات كثيره
بدون اجر
ويمنعوني من السفر والسكن تعبان ووسخ ومافي علاج
والراتب يتاخر ومافي زياده راتب


اعرف كلامي ما بيعجب احد بس هذا الحقيقه الان وهذا هو الوضع الراهن
وما تقدر تغير فيه لمجرد انك حطيت فقره ان التذكره عليه
او اي شرط اخر

في الاخير انت لازم تدفع تذكره هذا الشخص

بختصار تجيبه على حسابك وترحله على حسابك
:)

ذهاب وعوده لبلده الاصلي

هذا الان اصبح شرط من كل المكاتب العامله في اسيا
وتم تطبيقه على ( النيبال ) لازم الشركه تتحمل تذكرته من النيبال الى الدوحه والعكس


الموضوع هذا الحديث يطول فيه
وفي الاخير النتيجه وحده
:)

كمل سنتين او ما كمل للاسف عليك التذكره

او

:)

جرب ما تدفع وشوف النتيجه

بيحطون شركتك بلاك لست في وزاره العمل


,

,


اخوك


شموخ دائم

[ولدالريان]

جزاك الله ألف خير اخوي شموخ دائم

[بن غيث]

مبارك عليكم الشهر

كلام شموخ صحيح . . بالنسبة لعقود العمل

لكن . . تستطيع كتابة لوائح داخلية خاصة بشركتك
وهذه اللوائح يوجد منها نماذج عند السيد /صالح بن سعيد الشاوي
مدير علاقات العمل
بوزارة العمل
رجال فيه الخير . . أقعد معاه وبيشرح لك كل التفاصيل الي تحتاجها لشركتك حسب نشاطها وامكانياتها وعدد عماله ..

وهذه اللوائح الداخلية مفيدة جدا
وراح تساعدك في تنظيم العمل

تقبل تحياتي

[PRO-VISION]

ابعثلي ايميلك في الخاص بعطيك بعض العقود اللي ان شاء الله بتساعدك

[عضو نشيط]

كلام اخوي شموخ دائم مضبوط ..

بس في نقطه اني ادفع راتبه وهو هارب من هروبه الين يصيدونه ولا يسلم نفسه ،،
( وراح تعطيه اخر راتب الى اخر يوم كان عندك )
إذا هذا المقصد
فاعتقد انه من تاريخ هروبه ماله إلا السلال اللي يسل بطنه ولا له حق وأنا مبلغ عليه ...

لكن للأسف
ادارة البحث والمتابعه
يلعبون بك لعبه
لأنك عصفور في اليد ولا عشره على الشجره

[jassimqtr]

يعطيكم العافيه اخواني على مشاركتكم في الموضوع
انا كل شهرين احجز نص راتب واوقات اخر رواتبهم لين نص الشهر لاضمن العامل وامسك عليه كثر ما اقدر وعندي بند فالعقد في حاله هروب العامل تسقط جميع مستحقاته .
انا احجز على العامل تذكرت العوده اذا شرد , واذا كمل السنتين انزل جميع مستحقاته مع بوسه بعد
ومثل ما تفضل اخوي شموخ دايم جربت اني مادفع تذاكر للعمال اللي اهربو من الشركه وللاسف مالقيت حد ينصف دفعت الذاكر غصب ومجبور على هالشي لاني بنحط بلوك لست وعشان الغي الحظر ادفع غرامة على كل عامل 3000 ريال + التذكره .
ماقول الا الله المستعان