استفسار عن جورجيا (تبليسي وباتومي)

[قطري شايب]

السلام عليكم جميعا

قريت عن جورجيا في منتديات المسافرون العرب واكاني ناوي عليها

حد منكم ياخوان ( اهل قطر) راحها ولا سمع بها ؟؟؟ ياليت تفيدونا

الصراحة ملينا من زحمة السياح في الاماكن المعروفة والبلادين المعتادة ودنا نجرب شي جديد

[Umsultan]

أهم شي انها بدون فيزا للقطري

[ماجد البدر]

باتومي اقرب نقطه ن تركيا تقدر تدخل من تركيا تنزل من مطار طربزون وتكمل على جورجيا ساعتين بسيارة تقريبا وتلاقي علامتها واضحة في شارع البحر الاسود من تركيا اعتقد هناك باصات سياحية تطلع من تركيا او تسافر مباشرة من جورجيا لهذه المنطقة

[AL-MAYSTRO]

أخوي راح تبليسي ويقول المدينه حلوة وهاديه
ورخيصه وشعبها طيب ..
هو سكن في رد سن بلو هو تيل .. يقول موقعه جيد
وفيه فنادق غير أحسن كموقع مثل الماريوت
والفنادق يقول شوي غاليه بالنسبة لجورجيا


وإذا بغيت رقم مرشد سياحي بطرش لك رقمه
باكستاني كان عايش في قطر والحين هو هناك

[عالي مستواة]

أخوي راح تبليسي ويقول المدينه حلوة وهاديه
ورخيصه وشعبها طيب ..
هو سكن في رد سن بلو هو تيل .. يقول موقعه جيد
وفيه فنادق غير أحسن كموقع مثل الماريوت
والفنادق يقول شوي غاليه بالنسبة لجورجيا


وإذا بغيت رقم مرشد سياحي بطرش لك رقمه
باكستاني كان عايش في قطر والحين هو هناك

ابي رقم المرشد السياحي ولاتهون

[قطري شايب]

لاهنتوا جميعا

توني راجع من جورجيا الصراحة بلاد حلوه شعب طيب اجرت لي سيارة من المطار وفريتها فر في اسبوع مع العيال

اي استفسار حاضر بالي اعرفه

[ذكي جدااا]

الله يجزاك خيرا ياليت تكتب لنا تقرير مبسط تذكر فيه الاشيا اللي تستحق الزياره الاماكن السياحيه اشلون الصرفيه غالية البلد ولا لا المطاعم الاسواق هل تنصح بزيارتها وجزاك الله خير

[حياتي روايه]

يا ريت تنزل صور وتحت كل صوره معلومه

[قطري شايب]

بالنسبة لجورجيا

اولا الاسعار البلاد رخيصة مقارنة بأوروبا بس بعد مب رخيصة كلش اللاري عندهم يساوي 2,2 ريال قطري بس بشكل عام اسعارها مقبولة جدا لين تقارنها في اوروبا وبريطانيا

بالنسبة للاسواق عندهم شارع مشهور يسمى رستيفلي الي يوصل لميدان الحرية فية بعض الماركات العالميه مثل ديور بربري والاسماء المعروفة احنا مامدنا ندخل الا بربري وشرينا منه اغراض اسعاره عادية نفس قطر وبشكل عام بالتسوق البلاد مهب ذاك الزود عندهم مول واحد كبير وجديد ومهب كل المحلات فاتحة فية

المطاعم الله مكثر المطاعم التركية والايرانية واسعارها جيده نوع ما وفيها كم مطعم وجبات سريعه مثل ماقدونلدز

بالنسبة للفنادق فيها فنادق وايد وبرخص التراب وفيها تقريبا 3 فنادق خمس نجوم انا عن نفسي سكنت فنادق خمس نجوم وهي بالفعل مثل ماقال احد الاخوان فوق انها غالية بالنسبة لجورجيا

انا جدولي كان 3 ايام العاصمة تبليسي 1 يوم جبال القوقاز منطقة تسمى كزبقي و 3 ايام بتومي ع البحر قريب حدود تركيا

الاماكن الترفيهيه في تبليسي عندهم تلفريك ياخذك لجبل حلو يطل ع المدينة وفية قلعه قديمة وتمثال ضخم وفية تلفريك ثاني ياخ\ك لجبل ثاني لبرج التلفزيون وفي ايضا ملاهي العاب حلوه فوق الجبل تصلح للاطفال فيها بعد قرية اثريه يسمونها مسخيتا تبعد عشرين كيلو وحلوه تستاهل الزيارة وفيها شارعين مشهورين واحد اسمة روستفيلي الي فية التسوق والثاني شارديني بعد حل كله قهاوي وشيش وفي شارع بعد مادري شسمه يعتبر الحي العربي لكثرة المطاعم التركية ةالعربية فيه في الجهه الثانية من النهر الي يقطع المدينة

جبال القوقاز روعه الصراحة وشي حلو تنافس زلامسي وانترلاكن وخرابيط اوروبا ولكن تبقى ضعيفه نوع ما لانها بلاد فقيره واقتصادها رايح فيها والله واعلم

باتومي منطقة ساحلية ع البحر ترد الروح حبيتها الصراحة وبالنسبة لي تذكرني في ميامي الساوث بيتش تحديدا للي راحوا ميامي ومنطقة فروت رودلديل في امريكا

فيها حديقة النباتات رحتها حلوه وفيها عرض الدلافين وفي اكوا بارك مارحتها وفي اكوا بارك تبعد ساعتين حلوه رحتها انا والعيال واستأنسنا في منطقه ينقال لها انكيلي

عن نفسي عجبتني لان مافيها عرب واجد والحلو فيها انها تراثية وقديمة جدا يعني الي يدور الحداثة والتطور العمراني والمولات والمطاعم الفخمه فهي ماتصلح

تصلح لواحد يبي هدوء يبي يشوف اوروبا قديما

سواقتهم غريبة اشوي بس سهله بس عيب خطوطهم الخارجية رايح جاي يعني الواحد لازم يكون حذر جدا عند التجاوز

بالنسبة للصور عندي فوق الالف صورة والصراحة ماعرف شلون ينزلون اصور ولا كان اعلوم

واي استفسار حاضرين وسامحونا ع التقصير

[قطري شايب]

بضيف شغله

في منتدى العرب المسافرون في اخوه سعوديين نزلوا تقارير مصوره لجورجيا وهالي شجعني اروح لها