رقم فودا فون ،،،،يزعجني وش الحل تكفون ...

[vip8]

مرحباً إخواني




صارت لي مشكله من فتره والحين رجعت وهو يجيني إزعاج من رقم فودافون
مسجات سب وتشهير وكلام عن الأهل ماهو فيهم حسبي الله هو نعم الوكيل من كان ورا مضره الناس وتشويه سمعتهم المهم أن قدمت بلاغ في الرقم وطلع الرقم بدون اسم وبيانات والمشكله قالو لي الشرطة لو كان رقم أوريدو. كان جبناه اليوم بس فودافون صعبه ولو كان مب مسجل ما نقدر نسوي شي أنا الحين موقفي وين أخذ حقي لو رقم مب مسجل وعيال بليس يشترون كروت ويلعبون فيها في فتره السماح مالت الشركه وهي 60 يوم وعقب لو ماسجل الرقم فيقطعون الخدمه وش استفيد بيطلعون غيره وبيسوون نفس السالفة أنا أبي اعرف وش اقدر أسوي تكفون أبي أخذ حقي ومن يقدر يساعدني في شي منكم ،،، تكفون أنا مقهور من الي يصير ومابيدي شي ،،


حسبي الله عليهم الله يأخذ بحقي منهم في هالايام ،، ويكشف أمرهم لي يارب ،،



اسمحولي طولت من حر مابي

[teef3beer]

الله المستعان ويبعد عنكم عيال الحرام

[مليت]

بسيطه كلمهم يشيكون على تاريخ الشريحه والارقام الاخيره الي صدرت من الجوال اكيد مكلم فيه حد من ربعه اصحابه الموضوع سهل بامر الله واسئل الله انه يستر على اهلنا و اهلكم جميع

[وحيد-الشوق]

شالمصخره هذي وشدعوه الشرطة ماتقدر تسوي شيء !!!

اخوي روح لفوادفون وتفاهم معاهم لازم تلاقي حل والله يعينك

[Qt.1]

لاحول ولاقوة الاا بالله , يعني اللحين الشخص هذا شنو استفاد من اذية خلق الله , لتسكت عن حقك وانا اخوك خلك ورى المتصل لين تاخذ حقك ,

[vip8]

اشكر ردودكم ودعائكم للجميع الله يجزاكم كل خير وأكيد مراح اسكت بس جد شركه تشجع على الأذية للخلق بستهتارها بعدم تسجيل البيانات ،،

[فرفوش]

هذا الظاهر واحد حقود عليك

المهم لاتسكت عن حقك ولاتتهاون وان شاء الله ربي يكشفهم وتاخذ حقك

[vip-30003]

هذا كلام فاضي المفروض الموضوع يوصل للنيابه

او ترفع قضيه على فودافون وين قاعدين رقم مب مسجل

لازم يتكنسل وبالقانون ولازم لك تعويض ولا تسكت عن حقك

شوف لك محامي وارفع قضيه وبشرنا

[بوليد]

المفروض انت تعرفه دام على كلامك يسب الأهل بالاسامي
فشوف مين الي تتوقع يطلع منه هالكلام

والله يعينك

[بصمة قطرية]

حسبي الله ونعم الوكيل عليهم
الله ينتقم منهم في هالشهر الفضيل

لا تسكت عنهم أخوي
رد روح للشرطة و قول لهم لازم تشوفون لي حل
مب الشرطة في حماية الشعب
هذاني جيتكم
و أبيكم تشوفون لي حل
أما يقولون لك ما نقدر إلا عقب ما يتسجل الرقم
معناته ما راح يوقف هالشي و مثل ما قلت بيتكرر هالشي
و بيطلعون أرقام ثانية ..!!!!
المفروض الشرطة يتخذون إجراء عاجل مع فودافون
تلزمهم بتسجيل الرقم مباشرة
و كل رقم غير مسجل يفصل عن الخدمة ..
ليش أوريدو يقدرون يطلعون صاحب الرقم
لأن الرقم مسجل
خلاص ريحوا العالم و أجبروا فودافون إنها تسجل كل رقم مباشرة ..
ما أعتقد المسألة صعبة ..!!

[abo0o0od QtR]

فودافون ما تتعاون في هالمواضيع

بعكس اوريدو الي الي قاعدة بيناتها مربوطة دايركت ع العاصمة

يعني الضابط واهوا في مكتبه يقدر يشيك على كل شي


اانا بعطيك طريقة حلوه خل اي حد من خارج البلاد تعرفه يتصل على الرقم وكانه مغلط ودام المكالمه من الخارج يمكن يرد وخله يسجل الصوت يمكن تقدر تعرفه من صوته

[النهار]

يالطيب الشخص الي قال لك انه مافي اي بينات صحيح حتى ارقام كيوتل
لوخذت الرقم من بقاله واتصلت من الخط البينات ماتكون نزلت في السيستم
لان الي يبيعك الخط يأخذ منك صورة البطاقه وتعبي الطلب يمكن سبوع اواكثر لين مايتسجل
بس في الاساس في سجل موجود عند الموزع
احسن حل الشرطه توقف الخط بالاتفاق مع مع فودا فون
ويمكن يطلبون لسته بالارقام الي اجراها المتصل وعن طريقها بينعرف
او ينتظرون لين ماينزل الاسم في السيستم

[برشلوني قطر]

هل ممكن يطلع الرقم من فودافون من غير مايتسجل بأسم شحص ؟؟

شي غريب

اول مره ادري

[تاجر كشخة]

اااااااه لو يطيح في يدي أشهد أني ببرد خاطري

[وليف قطر]

انا كان عندي خط عقب سنه اكتشفت انه مو مسجل بإسم
وكنت ماخذه من كارفور .

بس لاني رحت ابي اخذ بدل فاقد
طلب من صورة بطاقتي وسجل الكرت بإسمي

الحين فيه تشديد عليهم ومحد يقدر يعطي كرت بدون تسجيل

كل اللي تسويه .. تنسق معاهم انهم يوقفون الكرت
يجوز يروح يراجع على الكرت أو يسإل عن سبب القطع وينصاد

لازم يكون فيه تنسيق بين الجهات والموضوع بسيط
لو تحول نيابه صدقني يجيبوه

وما بيقدر ياخذ كرت ثاني
واذا فكّر يصير ذكي بينصاد
الدوحه صغيره واحنا في شهر خير

الله يبرد قلبك ياخوي ..

[الكلدي]

الحل عندي,,,

اذا لك بارض اتبع الخطوه التاليه

دز عليه وحده او قلد صوت بنت

بالفيت انك اتصلت او طرشت مسج بالخطا

الحبيب مايصدق ...يشبك

كلمتين فاموعد ..والباقي عليك

من واقع تجربه كنت اقوله باعلم الشرطه
يقولي شرطه خلي يولي ,,,, اجنبي

سويت معاه هل طريقه وتليته من اذنه

طرش الرقم وانا اجيبلك ابو ابوه

[ضوى]

اتذكر من فترة صارت لزميلة لنا حسبي الله ونعم الوكيل ، سب وتشهير واتصالات من تلفونات شارع ، ورسايل بالبريد لمقر الزوج والمكتب ، عشنا بدوامة اعوذ بالله وتدخلوا الداخلية لكن ماعرفنا من وهالسالفة من اكثر من سبع سنين وللحين بخاطري اعرف من بس عشان ارد حق هالبنت اللي طلعت من شغلها لهالسبب، حسبي الله ونعم الوكيل

ناس حاقدة زناس ضارة اعوذ بالله ، وفودافون موقفها وايد غريب شنهو يعني تبيع للناس شرايح من غير ماتعرف لمن ومنهو اللي اشترى عيل الكل بيلعب بحسبة الثاني اذا كان الموضوع بهالشكل ؟

[R 7 A L]

ارفع قضية على فودافون
وراح تكسبها ان شاء الله

[محمد 1977]

المسئول عن الموضوع المجلس الأعلى للاتصالات

[Aaziz]

موضوعك اكبر من مسئله ازعاج .

موضوعك ثغره امنيه


المسئول عن الموضوع المجلس الأعلى للاتصالات

اعتقد ذلك ايضا

[شبح الصمت]

لين الحين في عقليات كذى ..

حسبي الله ونعم الوكيل ..
ناس مرضى والله مرضى نفسيين يبيلهم علاج من أول وجديد ..

مرد نفس هالاشكال اطيح في شر اعمالها ..
خلهم يراجعون الارقام الي متصل فيها من الكرت قول حق الشرطة انا مابي اطلعون لي باسم من والا مسجل ..

ابي الارقام الي متصله فيه والي اهو متصل فيها ..

واتصلوا على كل رقم ويسألونهم ويخوفونهم لين يدلونهم على هذا الشخص أو ملامحه ..

مالكم إلا هالحل ياخوي
والله يستر على الجميع

[CH Engineer]

اتصل على هالرقم 2347444

[شبح الصمت]

اتصل على هالرقم 2347444




ممكن توضح لنا شنو هالرقم
لانه مبين عليه من بدايته تابع للداخلية !!

لأجل العالم توعى وتعرف ..

..

[وجه السعد 2]

هذا كلام فاضي المفروض الموضوع يوصل للنيابه

او ترفع قضيه على فودافون وين قاعدين رقم مب مسجل

لازم يتكنسل وبالقانون ولازم لك تعويض ولا تسكت عن حقك

شوف لك محامي وارفع قضيه وبشرنا

رد منطقي

[BoAof]

الحل بسيط اقطع تلفونك وخذلك رقم ثاني وما راح يعرف رقمك الجديد

[نور الحور]

الحل بسيط اقطع تلفونك وخذلك رقم ثاني وما راح يعرف رقمك الجديد


وليش الهروب ؟
لكن المشكلة حتى لو لقوه مسجل باسم .. ممكن يكون باسم شركة، أو عامل آسيوي.. أو ..أو ..الخ .. يعني السالفة يبيلها تحريات بصراحة

أنا عانيت من نفس المشكلة .. رقم غريب يدز مسجات وقحة .. حسبي الله ونعم الوكيل !

[معماري قطري]

يعني أي عصابة مجرمين فودا فون تسهل اجرامهم وممكن ارهابيين يخططون لأعمال ارهابية ولا ينعرفون .. صراحة شيء غريب وثغرة اأمنية خطيرة.

[معماري قطري]

الحل عندي,,,

اذا لك بارض اتبع الخطوه التاليه

دز عليه وحده او قلد صوت بنت

بالفيت انك اتصلت او طرشت مسج بالخطا

الحبيب مايصدق ...يشبك

كلمتين فاموعد ..والباقي عليك

من واقع تجربه كنت اقوله باعلم الشرطه
يقولي شرطه خلي يولي ,,,, اجنبي

سويت معاه هل طريقه وتليته من اذنه

طرش الرقم وانا اجيبلك ابو ابوه

خطير يالكلدي :nice: تسوي خير في شهر الخير نبي نعرف نهايته القذر

[أم علي 2010]

حقك مب ضايع أخوي أن شالله

أنا اللي اعرفه مستحيل تأخذ رقم من وأريدوا ولا فودا فون و مايكون مسجل

لازم عندهم صوره من الطلب إلا اذا ماخذه من محل صغير مثل محلات التلفونات وشفت مره بعيوني الهندي اللي في المحل يعطي خدمات شرائح بدون ما يعبون طلب !!

اللي عليك الحين تروح مركز العاصمة عندهم قسم خاص بالجرائم الالكترونية ويقدرون يطلعون لك الاتصال من وين

والله يبعد عنك عيال الحرام

[اللوز]

المشكلة يا اخوان
ان المحلات الصغيرة تبيع الكروت واحتمال بدون صورة من البطاقة الشخصية
الحل يجب ان
يصدر تعميم من المجلس اﻷعلى للاتصالات بعدم بيع كروت جديدة الا من قبل الشركة فودافون واوريدو

[l0o0rd-qtr]

الحل تروح المجلس الاعلى للاتصالات وتشرح لهم المشكله وهم بيطلبوا من فودافون بيانات الشخص او اغلاق الخط

[alsoq]

في ها الحاله ترفع قضيه على فودا فون وتطالب بتعويض
لانه ما يصير رقم بدون بيانات وهذا حقك الشرعي الخطاء من فودا فون ولا تسكت عن حقك ارفع قضيه وخلها تاخذ مجراها

عيبنا اننا ما نسوي مثل الاجانب ونطالب بتعويض من ضرر

نصيحتي شوف لك محامي شاطر واح تكسب القضيه لانها شركه اتصالات ما عندها كنترول على ارقامها وشلون تسرب ها الرقم بدون بيانات

[monatee]

اشتك على فودافون وشوف اشلون الموضوع بينحل

[vip8]

قسم بالله ردودكم تهون علي الله يجزاكم خير أجمعين ولا تنحطون في هالمواقف وأنا لو مالقيت اي خيط يوصلني للمجرم هذا أكيد ساعتها بتفرغ الشركه وأنا حاط محامي لان لو مب تسيبها ما خطط ابن الحرام لهاسوالف وتجرا وراح أراجع بكره العاصمة وشوف لو ين وصل والمشكله أن اشتغل لي على رقم خارجي اليوم وسكر فودافون القطري ،،، حسبي الله عليهم وهو نعم الوكيل

[kuwari]

نفس مشكله صديقي اشتكى في وطني الحبيب على مركز الخور بسبب ان الرقم بدون اسم يعني بسيطه اقطعوه دام بدون بيانات

والله لو من فوق كان اقطعوه وبهدلوه

[نتفـه]

الله ياخذ حقك من هالاشكال الوصخه ان شاء الله .. حسبي الله عليهم ..

[Adhoc]

أنا لو منك أروح للمجلس واشرح لهم تراني مثلك بس انحلت .. اتصل لهم 103 أو روح لهم في المجلس الدور 19 أظن وقابل رئيسة القسم وسهل تلقاها بدون عراقيل وبتساعدك وايد ... حسبي الله عليهم يسوونها عيال الحرام

[السحابة]

فودافون ما تتعاون في هالمواضيع

بعكس اوريدو الي الي قاعدة بيناتها مربوطة دايركت ع العاصمة

يعني الضابط واهوا في مكتبه يقدر يشيك على كل شي


اانا بعطيك طريقة حلوه خل اي حد من خارج البلاد تعرفه يتصل على الرقم وكانه مغلط ودام المكالمه من الخارج يمكن يرد وخله يسجل الصوت يمكن تقدر تعرفه من صوته
اخوي هذول مايردون اهما مخليين الرقم هذا مخصصا لهذا الشخص صدقني مايفتحونه إلا للاذيه فقط صارت معي واحده حاقده كانت تسوي نفس الشئ وكان خط اوريدو والشرطه اكتشفت ان الرقم غير مسجل باسم شخص وماوصلنا لحل وزوجي قاللي طنشي واقهريها وفعلا الله نزل في قلبي برود ووقفت اهييا رسايل والاتصالات اخوي صاحب الموضوع هذا انسان حاقد اوانسانه حاقده علي زوجتك واعمل بالمثل الكلاب تنبح والقافله تسير

[السحابة]

قسم بالله ردودكم تهون علي الله يجزاكم خير أجمعين ولا تنحطون في هالمواقف وأنا لو مالقيت اي خيط يوصلني للمجرم هذا أكيد ساعتها بتفرغ الشركه وأنا حاط محامي لان لو مب تسيبها ما خطط ابن الحرام لهاسوالف وتجرا وراح أراجع بكره العاصمة وشوف لو ين وصل والمشكله أن اشتغل لي على رقم خارجي اليوم وسكر فودافون القطري ،،، حسبي الله عليهم وهو نعم الوكيل
اخوي صدقني مش هتوصل لحل بيجبون شريحه من اي بلد ويلعوزونك طنششششششششششششششششششششششششششش وبعدين تليفونات الجديده فيها تطبيقات حظر الارقام والرسايل :nice:

[مساهم فنان]

فيه برامج تقدر عن طريقها اتسوي بلوك على الرقم المزعج وترتاح من الإزعاج

[Locale]

ايييه ذكرتني بايام مضت
تميت عالسب والشتم ثلاث سنين وعقب انكشفوا سبحان الله يمهل ولايهمل
الله ياخذ حقك منهم

[vip8]

إذا على الشخص انه قريب هو فعلا قريب من تفاصيل الي يطرشها وإذا وقفت الرقم بيطلع غيره وإذا أنا غيرت رقمي بيجيبه وأنا متأكد أن شخص قريب مني بس الي أبيه شلون اجيبه واتاكد أن هو بدون دليل لو كان شخص بعيد بقول أن طاح علي ويبي يستفزني بس المشكلة يعرف كل ارقامي حتى مالت الشغل ،، الله كريم وأنا بروح الأحد مجلس الأعلى وبأخذ البلاغ معاي وماقصرتو على ردودكم ووقفتكم معاي

[kmk]

هذا كلام فاضي المفروض الموضوع يوصل للنيابه

او ترفع قضيه على فودافون وين قاعدين رقم مب مسجل

لازم يتكنسل وبالقانون ولازم لك تعويض ولا تسكت عن حقك

شوف لك محامي وارفع قضيه وبشرنا

هذا كلام صحيح والمفروض الداخليه تعمم على الشركه كل شرايحه بدون اسم تقطع الخط

[بريق الحق]

بقولك شي رد عليه وطقع وخل الجوال شغال هو راح يزهق مع الايام
ههههه اخبر السحرة يات فترة انا اتصل فيهم والله تميت اسبوع لين مازهق قالي لا تتصل مرة ثانيه وماقام يرد