بغيت رايكم بنوع سيارة مستعملة تصلح للمشاوير الطويلة اليومية

[بنت شرق]

السلام عليكم
بغيت راي أهل الخبرة والشور بنوع السيارة المستعملة الفورويل او صالون الي ممكن اشتريها لمشاوير طويله، من الدوحة للشمال خط يومي بسبب العمل وياخذ حوالي 50 دقيقة لساعة يوميا
فكرنا نشتري سيارة جديدة بس شفنا حرام نشتري سيارة جديدة للكرف
فياليت تنصوحنا برايكم في افضل السيارات الي ممكن تتحمل المشوار وتوفر البترول

[ابومبارك]

لاند كروزر جي اكس او جي اكس ار

[ضاحي]

الافالون سيارة كرف

[عازف]

السلام عليكم
بغيت راي أهل الخبرة والشور بنوع السيارة المستعملة الفورويل او صالون الي ممكن اشتريها لمشاوير طويله، من الدوحة للشمال خط يومي بسبب العمل وياخذ حوالي 50 دقيقة لساعة يوميا
فكرنا نشتري سيارة جديدة بس شفنا حرام نشتري سيارة جديدة للكرف
فياليت تنصوحنا برايكم في افضل السيارات الي ممكن تتحمل المشوار وتوفر البترول

وعليكم السلام
سيارة لمشوار طويل ومستعمل
الفورويل:؛ يوكن أو تاهو حق ضرب خطوط مافي اروع منهم
أما صالون: شفر ماليبو آو كابرس أو تويوتا أفالون أو اوريون

[الحسيمqtr]

يوكن أو تاهو

[Qaatar]

نصيحه اخويه يافيكسارر 2004 لين 2007.السعر بين 70 لين 90
او يوكن 2007 لين 2009. بين 65 لين 80
او لكزس صالون ال اس 2005 لين2006 بين 65 لين 80

[عاشق العديد]

.. سلام عليكمم ورحمة الله وبركاته ..

الموضوع أنا كنت اعاني منـه
لانه فتره نقلوني راس لفـاننن .. وتميت فراس لفـان لمدة 3 شهـور صدق الواحد يفح من البترول .. موتري كان مرسيدس ..
قلت خل اصفه وخذت لي تيوتـا .. لكن شفت انه التيوتـا نفس الحاله يصرفف بعد .. موتري كان جي اكس ار .. 2007

التيوتا من 2008 وطالع هذا نعممم يوفر بترول واحسن من القديم
لكن اكثرية الشباب ترى ياخذون مواتر عاديه مثلا كورلا .. او كامري ..
هم افضـل حق الخطوط وصرفيتهم بسيطه وفولهم مايتعدى 50 ريال ..

انصحجج بكرلا ..او كامري .. والله يوفقـج

[al-obaidly]

كامري من موديل 2006 وتحت صج موتر كرف والبترول انسى

[أبورودي]

انصحك فى سوبارو محركها ممتاز وسعرها رخيص وقطع غيرها رخيصه وعن تجربه
ومكيفها رائع سعرها مستعمل لايتجاوز 30 الف وستجدها استعمال اشخاص من اوروبا

[chevelle-ss]

سيكويا تويوتا بلا منازع

[ابوصالح1]

السلام عليكم اخي انا مثلك أداوم في دخان من بيتي 97 كيلو وكان معي كامري 2013 ممتازة ومريحه والصرفية جيده جداً لأكن فيها عيب في الليل النور القصير فاشل ولا يبين أبدا

[الـخـور]

موضوعك عندي .. انا فالخور واداوم فالدوحة كل يوم

اهم شي في موتر الخطوط الطويلة انه يكون فيه مثبت سرعه + رهيف (يعني جامبيناته لينه ) + صرفيه قليلة ومكيف بارد ومن الشركات الي تقبل الكرف
واذا تبي دلع يكون فيها رادار مثبت سرعه

ابعد عن الكامري لانه ينطط وايد ويابس ..مايصلح وعر فالخطوط الطويله

لهذا انا ارشح لك لمديل السنة ٢٠١٣ : افالون او لكزس es او اذا عندك فلوس ls

اذا تبي شي مستعمل
ركز على es فوق 2009
او لكزس ls من 2004 الى 2006 اوالشكل الي عقبه من 2009 وطالع

[Qt.1]

اختي مالج الكامري ومافي غيرها , تويوتا دق سلف وامش , وبتعمر معاج كم سنه واذا نويتي اتبيعين تقدرين في نفس اليوم اتبيعينها , ابعدي عن الاامريكي واللكزس انتي تبين شي عملي ماتبين شي حساس وكل يوم تشييك وخراب , ( نصيحه من شخص ايدوام في لفان وساكن في الدوحه )

[تمون]

الكامري بلا منازع

انا اداوم في مسيعيد ومل يوم قابض فيها خط لاصرفيه ولا ازعاج و مكيفها ثلج ما شاء الله و قطعها رخيصه وسعرها فيها

وانصحج ب ٢٠٠٦ ونازل
بالتوفيق

[بـن عدوان]

كامري 2006 والقلب داعيلج

اهم شي الموتر نظيف ومافيه خرابات

[teef3beer]

كامري 2006 او التيما 2005 لين 2007 وتقبل مروري

[كتكوت الوحش]

موجود كامري عندي موديل ٢٠٠٦ وعندي ٢٠١١

[Qa10]

الأفضل هو الجي أكس آر ثمانية سلندر أختي
الصرفية ممتازه للبترول والثمانية سلندر للخطوط أريح

[إعلامي قطر]

..

أفالون عن تجربه من 2006 لين 2009 أسعارهم
بالمتناول بالخمسينات والستينات وسياره
مريحه جداً وماتصرف بترول وفولها 55
ريال تقريباً وأيضاً اللمتد فخمه من داخل..

والمكسيما كذلك بحكم تجربتي لها أيضاً لكن
عقب الأفالون حطيت على المكسيما إكس..

بالنسبه للكامري أستخدمتها فتره بسيطه لكن
بصراحه سيئه ومب مريحه مثل الأفالون..

بالتوفيق..

..

[قطري92]

كامري من موديل 2006 وتحت صج موتر كرف والبترول انسى

انا مع اخوي العبيدلي كلامه 100%

الكامري القديمه او الكورلا القديمه .. ماتصرف كلش

والله يوفقك انشالله

[911Turbo]

انا اشوف الكامري افضل الخيارات من جميع النواحي و بالتوفيق ان شاء الله

[Aaziz]

بورادو 4 سلندر
سعرها مقبول و تمسك سعرها و اقتصادية جدا بالبترول و فيها مكيفين و فورويل رفيعه

[بونووف]

حق الخطوط الجمس احسن شي يوكن ولا سييرا ..وعندج الكابريس الرويال ولا كراون فيكتوريا

[راعي 2006]

كامري

[بنت شرق]

مشكورين بيض الله وجيهكم دنيا وآخره
ما دام الاغلبية اجمعت على كامري أو افالون اختيارنا بيروح صوبهم بس بناخذ اقل شي 2009

[BuFaisal]

الله يعزكم .... الكابرس زبالة .. الكامري زبالة

ما انصح أي احد ياخذهم وهذا من واقع تجربة

والغريب ان الموترين يتصنعون باستراليا ومن حولوا صناعتهم لاستراليا وهذي المواتر صارت فاشلة

[بنت شرق]

الله يعزكم .... الكابرس زبالة .. الكامري زبالة

ما انصح أي احد ياخذهم وهذا من واقع تجربة

والغريب ان الموترين يتصنعون باستراليا ومن حولوا صناعتهم لاستراليا وهذي المواتر صارت فاشلة

انزين ايش تنصح فيه

[BuFaisal]

انا اداوم يوميا مشوار حول 200 كيلو

للجيب ....
انصحك باللاندكروزر
عندي واحد موديل 2011 ماشي 140 الف تبارك الله وما اشتكيت منه

صالون ...
افلون الجديدة حلوه وريفه ومب غالية وايد وانصح فيها

عندك فلوس اكثر !!
انصحك باللكزس المتوسطه

[مافي مثلي]

الكامري الجديده من افشل السيارات الي نزلتها تيويتا من سنه 2012
لا سواقه ولا سيفتي فيها ولامريحه

[Ghanim202]

ما في الا الكامري بلا منازع الصراحة

[NaifQatar]

بالنسبة للصالون :: كامري أسعارها بين 30 و 50 على حسب الموديل

بالنسبة للفورويل :: لاندكروزر جي إكس إو جي إكس آر أسعارها بين 40 و 60 على حسب الموديل

أسعارها رخيصه ولما تبي تبيع سعرها فيها يعني ماتنزل قيمتها إلا شي بسيط لو نزلت

[النهار]

تبي موتر يخدم ورهيف على الخط
مالك الا الهونداء ان كانت سيفك اواكورد وصرفية البترول انسى
اقل سياره تصرف
ابعد عن الكامري تقول كانك راكب عراوي 90

[قطري92]

كامري من موديل 1998 لين 2006 فقط لا غير

والله يوفقج يارب

[hamad aaa]

السلام عليكم ورحمة الله
طبعا افضل سيارة للخط وتوفير البترول بالاظافة الى السيفتي هي مرسدس سي 200 او 240
سعرها معقول واستخدامها حلو ومالة كرف

[كتكوت الوحش]

السلام عليكم ورحمة الله
طبعا افضل سيارة للخط وتوفير البترول بالاظافة الى السيفتي هي مرسدس سي 200 او 240
سعرها معقول واستخدامها حلو ومالة كرف

صراحه انا مع رأيك جريي هالسياره روعه وعمليه

[abo0o0od QtR]

المكسيما الجديدة انا اشوفها ممتازه

وشخصيا استخدمها من سنتين اشوفها احسن من الكامري وسعرها مقارب للكامري

[Mr-Khalifa]

افالون الجديدة .. موتر عملي وممتاز ومن داخل كأنه لكزس

من شهر تقريبا خذت للبيت و الحمدلله مرتاحين مع الموتر

وسعره تقريبا 125 الف

بالتوفيق

[qtrvip]

اتوقع الصالون افضل للخطوط و انصحك بالكامري او الاوريون سيارات عمليه وتصرف البترول وسعرها معقول في السوق ...


وموفقه انشالله

[boamir]

السلام عليكم ارشح الافالون او الكابريس
بس أهم شي تاخذين شي نظيف إذا بتاخذين مستعمل
خصوصا إذا صالون لازم ممشاه يكون اقل من 100 الف
عشان ماتتلعوزين بالخرابات دام إنج تبين توفرين

ولو انا كنت مكانج كنت بدور لي كابريس 96 ولا موتر يصف جنبه بالخطوط هع

بالتوفيق إن شاء الله

[لابس بشت]

افالون او لكزس صالون
وبالتوفيق
واذا انك مب راعي طويله عليك بالكورفيت بس اهم شي غط الارقام وامورك طيبه :)