ممكن مساعده دنكر ماي للشرب او مجاري الله يعزكم

[أنت]

يالربع ابي اخذ دنكر وطقطق فيه
شاخذ دتكر مجاري او ماي حلو للشرب
والي عنده خبره
اي نوع اخذ
ااجره على شركه او اخليه الهندي يشتغل بروحه
اذا على الشركه اخليه مع سايق او بدون
كم يبيلي راس المال
وكم تريب في اليوم يدخل وكم احسب التريب اذا شغلته بروحي مب على شركه
والسموحه اذا طولت والخاص مفتوح الي مايحب يتكلم في العام

[حسن]

ماانصح لا ذي ولا ذاك مشاكل هل المواتر كثيره والسواقين ماعندهم ذمه
ماتاخذ الى سادحه على دوار ولا لفه ولا اذا كان دنكر بواليع

هذا راي ولا انت ملزوم فيه

[aziz4z]

شوف أخوي التناكر ممكن ماتحصل منها هالفايدة الايام هاي , و إن كان في بعض الشيء لهذه الدرجة , لفترة قصيرة كان مدخوله إلى 12000 ريال قطري , حسب أحد الاخوة, و يعتمد على سعة التنكر
بس أهم شيء فيه إذا أنت تقدر تباع بين فترة و فترة. أما تجيب السواق و تخليه على كيفه , أنت الخسران .
و الشيء الاهم إذا عندك مجموعة تناكر , و تاخذ عقود من شركات لفترات طويلة يكون أحسن.
إذا ما تقدر تتابع الموضوع ما أنصحك فيه , تخلي السواق يلعب لعبه
و الله يوفقك و يفتحلك من أبواب الخير

[أنت]

الله كريم

[شموخ دائم]

,


,



مرحبا



اخوي الكريم


هذا الموضوع محسوم شوف كل الي شروا باصات او تناكر او تريلات
في السنوات الي طافت وين وصلوا الحين !!
هل باعوا السيارات !!
او السيارات زادت وكل واحد بدل السياره صار عنده اثنين او اربع او 10
الي صار بتلاقي 90 % منهم باعوا السيارات وبخساره للاسف
والي يشتري السيارات هم الهنود او السائقين نفسهم للاسف

بس نشوف هذي التجارب الي صارت بالسنوات السابقه
لازم ما نعيد نفس التجارب ونفس الخساره كل هذا بسبب ان صار في طلب عليهم
بفتره من الفترات وهذه الفترات تنتهي بنتهاء المشاريع

وبالتوفيق لك


,

,


اخوك

شموخ دائم

[captin]

أعتقد والله اعلم أن القطري التجارة الوحيدة
اللي يفلح فيها هي تجارة العقارات سواء بالبناء والتأجير
أو البناء والبيع.

معظم الأنشطة الأخرى مثل السيارات والنقليات والورش والكراجات
وغيرها الكثير الكثير من الأنشطة تصلح للجنسيات الأخرى نظرا لطبيعة تلك الجنسيات
في تحمل الاعباء مثل التشغيل والصيانة والمتابعة الأمور التي لاتصلح
للقطري بسبب طبيعيته الاجتماعية والمعيشية وارتباطه بالوظيفة الحكومية والعائلة
وعدم التفرغ التام.

هذه ليست دعوة للتقاعس والجلوس ولكن هذا واقع ربما يتغير بعد سنوات طويلة عندما
يصبح المواطن ملزما رغما عن انفه بسبب تقلص فرص العمل الحكومي للدخول بكافة انواع الانشطة ومتابعتها بنفسه ومزاحمة الوافدين مثلما يحدث الآن في السعودية والبحرين وعمان للأسباب المذكورة.

النصيحة يا أخي الكريم حاول أن تحدد رأس المال لديك وثم الدخول في نشاط مناسب
وقليل المخاطرة .


بالتوفيق ان شاء الله