العضوية في شركات السياحة ، هل حقيقة أم نصب ؟؟؟

[toghma]

السلام عليكم ورحمة الله وبركاته

في البداية بحثت في المنتدى عن موضوع مشابه لموضوعي لكن للأسف ما لقيت ، وبنفس الوقت استغربت أن هالشئ محد تكلم عنه من قبل !!:secret:

هو مش موضوع ، كثر ما هو استفسار عن شركات السياحة واسلوب موظفينهم في البحث عن الزباين في المجمعات التجارية والجمعيات الاستهلاكية .
تفضل حضرتك ، جاوب على سؤال : اذكر لي واحد من عجائب الدنيا السبع ، امممم ( كتارا ) ـ صح :omg:
الف مبروك يا أفندم ، تشرف حضرتك مع المدام بكرة تحضر معانا جلسة بالشركة وتستلم جائزتك على طول عبارة عن عطر ماركة ( تستخدمه علشان تشيل المخفي من السيارة ) :rolleyes2:

المهم ما أطول عليكم ، انا شفت من هالشركات كثير في الدوحة وفي دبي ، واخيرا أمس قدر واحد منهم يقنعني ويخليني ازورهم وسندروني ساعة ونصف ( او بالاحرى أنا إلي سندرتهم ) وشرحولي سالفتهم إلي هي باختصار ( تشترك معاهم في عضوية تتملك عن طريقها شاليه لمدة اسبوع فقط كل سنة !!! بعقد موثق من وزارة التجارة والخارجية ) وعقب بيأجرونه لك وسوالف وخرابيط وايد وايد .
والحلو بالموضوع انك يا توقع معاهم على العقد الحين الحين بمبلغ 39000 ، واذا بتطلع من عندهم وتفكر وترجع بكرة بتدفع 60000
تصدقون هالشئ ؟؟:tease:

الحين استفساري ، هل أحد منكم انقص عليه واشترك ؟ استفاد شئ ؟
لأن كان واضح من اسلوب الموظف ان السالفة كلها نصب في نصب

ممكن كل واحد يدلو بدلوه ، وياريت اصحاب الخبرة لو سمحتوا

اوه نسيت اقولكم ، جائزتي كانت تذاكر لأكوابارك وقالولي انهم خلصت للأسف ، واسبوع اقامة في شاليه خمس نجوم ، عطوني ورقة مختومة لاقامة 3 ليالي فقط في فندق 3 نجوم في تايلاند !!!! يعني تغسل ملابسك بنفسك وفي خصم على الصابون
:strong

[بوطلحة]

سؤال: العضوية في شركات السياحة ، هل حقيقة أم نصب ؟؟؟

الجواب: نصب!

وانت مثل ما قلت عرفت هل الشي من اسلوب الموظف (واخد بال سعادتك عشان نكون واضحين يعني ومنزعلش من بعضينا!) بس غيرك في ناس ادفعوا واكتشفوا ان الي باعوهم باعوهم وهم أو سكن غير الي اتفقوا عليه وباعوه على أعداد كبيرة من الناس فكلما تبي تحجز قالوا ما في حجز ومحد بيشتري حصتك لأنها أصلا ولا شي في الحقيقة وذاك الوقت هالشركة أصلا سكروها والكرت الي يعطونك اياه يازعم اشتراك ما اشتراك ولا أحد يعرفه، باختصار العملية نصب عيني عينك بس شلون مخلينهم يمارسونه في العلن مادري الصراحة!

[شيخ الديرة]

ليس هناك أي نصب, وأنما هم شاطرين في أقناعك بشراء شئ لا تستفاد منه أو تحتاجه, وما أكثر زبائن اليوم

[أم علي 2010]

هههههههههههه

كل ما أروح الجمعية يسوط علي المصري أقوله لا شكرًا وامشي


لان لو في فائدة ما اقعدوا يسوقون بهالطريقة

[monatee]

اللي فهمته من طريقتهم ،، انك تشتري وبتدفع في شي وفي النهايه مانت بجايفه ولا برايحه

مثال : بيكون عندك شاليه على البحر في البلاد الفلانيه وتدفع عليه شهريا مبلغ وقدره ... وغير مبلغ الدفعه الاولى ،، وبنفس الوقت هناك اناس غيرك لهم اسهم بهالشاليه نفسه

عندهم طريقتين يا يقصون عليك ويدفعونك المبلغ كامل او اذا قلت ماقدر بيقولون لك بنقسطه لك


لكن عشان تقدر تروح هالشاليه او تحجزه بيكون فيه شروط

بعض من الشروط : انك تبلغهم قبلها ب سنه او اكثر عن نيتك بحجز الشاليه بشهر الفلاني والوقت الفلاني

على اساس ان الشاليه كله زحمه ومافي حجوزات

الطبيعي محد يفكر بسفره او يخطط لها قبل بسنه او اكثر فلما تكلمهم تقولهم تبي الشاليه الحين او الشهور القريبه قالولك مافي وهم يستغلون هالنقطه

لين ماتمل منهم الناس وتوقف دفع الاقساط الشهريه

لكن هم مستفيدين من الدفعه الاولى والاقساط لمعظم الشهور قبل لايقطعها العميل

بنفس الطريقه هالكلام يمشي على عميل اخر ،، عاد انت احسب كم يربحون من عميل لين عميل

[khalid525]

لا هي مب نصب هي ما تصلح للي يبي يسافر بحريه وفي اي وقت مب بس وقت محدد.

بعدين مافي شي يضمن حقك اذا هم وقفوا الاتفاقية ، انا احد منتجعات ماريوت في فرنسا قعدوا يسوقون لي نفس هالعرض اني اشتري شاليه لمدة اسبوع في السنه وقالوا لي ان هالاتفاقية راح تتصدق من غرقة التجارة والبلدية ، قلت لهم هل عندكم اي ضمان ان شركة ماريوت العالمية تضمن حقي في حالة افلس المشروع، قالوا لي ماريوت العالمية مالها اي علاقة احنا فرع من ماريوت بس ما يتدخلون في شغلنا ، قلت زين وثقوا العقد في الخارجية الفرنسية او اي مجلس استثماري خاص للاجانب قالوا احنا بس نوثق في غرفة التجارة ، قلت لهم مع السلامة وخذت هديتي ورحت (اهم شي الهدية ) :)

[عضوو]

ماريوت العالميه تقدم العضويات مجانا وماريوت الدوحه يبيع العضويات وللأسف هناك من يشتريها ويدفع عليها رسوم سنويه

[اجرام]

للاسف ياخوي هالحركه اشبه بنصب واحد من الشباب جلس معاهم وقالو له مثل ما قالو لك قالهم خل عنكم سوالف اسبوع ابي اشتري الشاليه ابي اتملكه يقولي احسهم توهقو وجابو لي مسؤلهم لما شافو اني فاهم يقول على طول صرفوني وخلوني اروح والناس الي كانو جاين نفس الوقت معاي ضلو معاهم على قولته عملية غسيل مخ والي محيرني اكثر انهم يبونك تدفع المبلغ بنفس الوقت يعني لو تقولهم بكرى او افكر يقولون لك لا لازم تدفع الحين

[Roo7MooT]

صارت لي كذا مرة

اول مرة جاني لبناني وتم يعدد لي ويشرح لي وسألني اكثر الدول الي سافرت لها والي بسافر لها

عقب قالي تعالي المكان الفلاني علشان تستلم جائزتك

قلت خير أن شاء الله مريته مع واحد من الربع تم يبربر وأشترك الحين ب ستين الف وبتحصل كيت وكيت وكيت

المهم صرفته لني مارتحت في كلامه

بعد سنة تقريبا كنت في المحكمة وقريت أسم الشركة ومرفوع عليها 8 قضايا كلهم من اهل قطر

الي يبي الأسم يكلمني على الخاص


الموقف الثاني من فندق انتر كونتينتال وتمت تشرح وعندك أشتراك في جميع فنادق الأنتر حول العالم

سالتها يشمل تايلاند قالت لا سالتها يشمل مكة دار التوحيد قالت اي قلت لها يشمل العشر الاواخر في رمضان قالت لا

قلت مايصلح لي لاني مب من رواد الفنادق الفايف ستار دائما عقب قالت لي احجز في الدوحة قلت لها يصير خير انا الحين مشغول واكلمكم بعدين


والله تمت قريب الشهر تتصل وانا مسفه مسفه ولا أرد عليها


فالرجاء الحذر كل الحذر من هالنصابين

[sahrleel]

هذا كله نصب في نصب وانا شخصيا نصبوا علي حسبي الله ونعم الوكيل عليهم

وكاتب عن هذا الموضوع منذ عام 2011 بس للاسف كثير من الناس ينسى وتخونه ذاكرته

فالحذر كل الحذر من هذا النصب والاحتيال وهذا رابط الموضوع

http://www.qatarshares.com/vb/showthread.php?t=444626

[khalid Qtr]

نصب واحتيال ، واتمنى الجهات المختصة توقفهم عند حدهم ، اول شي يقولك تفضل استلم جائزتك ، ياخذك على جنب ث ويقول لك عندنا حفل افتتاح لمحلنا الجديد للعطورات وتجي بكرة تحضر وتستلم جائزتك ، واذا رحت هناك اشتغل النصب ، صرت اطردهم اذا قربوا مني بعد ما عرفت عن نصبهم .