استفسار فيلا وطابق تحت الارض

[wesam82]

السلام عليكم،

عندي استفسار بخصوص بناء فيلا على مساحة أرض صغيرة 400م

كنت مخطط إذا شريت أرض بهالمساحة الصغيرة أبني فيلا من ثلاث طوابق علشان أخلي حوش يسع للسيارة وللأطفال، بس في واحد من الدلالين قالي مايصير لأن الأرض لازم تكون أرض عمارات!!!! وقالي المسموح فقط بنت هاوس
هل هذا صحيح؟
وإذا كان صحيح فهل يجوز بناء طابق تحت الأرض علشان يكون مخزن ، صالة رياضة أو أي شيء لإستثمار المساحة الصغيرة وبناء غرف كبيرة وكثيرة؟

أرجوا الرد للفائدة للجميع
شكرا مقدما

[شموخ دائم]

,

,


مرحبا

موفق ان شاء الله

يالله شد حيلك نبي نسمع صوت الكرين تحفر بالارض وتغبر ان شاء الله
كل بدايه ولها متعتها
:)

400 متر الارض صغيره واحسن استغلال لها تعمل ( بيسمنت ) مثل ما تفضلت دور ارضي
وهذا مسموح ما عندك مشكله بيرفع عليك التكلفه ولكن راح يعمل وسع وهو المفروض تعمله
وعندك البنت هاوس غرفه الدرج فوق تقدر تعملها غرفه وحمام وتستفيد منها

عندك شغله مهمه لما ترسم الخريطه في ارتداد من الحيط يمين ويسار الفيلا
2 متر اذا تعمل شبابيك واذا تلغي الشبابيك الجانبيه ايصير الارتداد 1 متر فقط
وتكسب مترين زياده من اليمين متر ومن اليسار متر وهذا المترين يعملون فرق
في المخطط موفق يارب


,


,


اخوك


شموخ

[قطري قديم]

مرحباً
لا استطيع ان ازيد علي كلام اخوي شموخ دائم
واتمني لك التوفيق
واي خدمه في البنيان انا حاضر اخوي

[MAZEN37]

اقدر اساعدك بمخطط فيلا على ارض نفسها
وتقدر تشوفها على الطبيعه

[معماري قطري]

يعتمد على التخطيط في شروطهم الأولية

ممكن وضع أرضك يتطلب إرتداد أمامي حول 5 أمتار وورا حول 3 أمتار ويمكن ينزلون لمترين .. بما اني ما اعرف أبعاد الأرض بافترض انها 20 في 20 متر .. فبتصفي على لو فرضنا الإرتداد طلعوا كرماء معاك ووافقوا على 2 متر ومن الواجهة 5 متر .. بتكون مساحة مسطح البناء 16 في 13 = 208 أمتار.

إذا قدرت تسوي بيسمنت بارتفاع مترين و40 سم بيكون مريح لك لملحق ومواقف .. وتقدر تخلي البيسمنت 1.5 متر تحت الأرض والباقي فوق .. بحيث إن نزول السيارة والسلوب يكون بسيط .. وبحيث ما تدخل في تعقيد حفر زيادة وخرسانات .. عندك الجانب الخلفي ممكن يكون محفور بمستوى أرضية البيسمنت ويكون عندك حديقة أرضية نازلة .. أو يكون الملحق ملاصق ومتصل بالبيسمنت .. مفتوح عليه يعني وجدامه مواقف السيارات ويكون البيسمنت ملاصق في حائط البيت بس شبه محفور له في الأرض.

الباقي عندك على دورين كل دور 208 أمتار ودور بنت هاوس بحدود 70 متر مربع .. يعني ممكن توصل البنيان لحدود ال 600 متر مربع متضمن الملحق وبالإستفادة من مساحة إضافية مغطاة لوقوف السيارات.

سويت مره مقترح تصميم حق عضو في المنتدى لمساحة قريبة من هذي المساحة حاول تشوف في المواضيع القديمة لو حبيت انا نسيت شسم الموضوع.

[captin]

مرحبا الأخ وسام

الأحل الأمثل هو البيسمنت لكسب المساحات
وتوفير مساحة مناسبة في الأرض للملاحق والسيارات

أنصحك تشوف تصاميم من الكويت بالذات لأن الإخوان في الكويت
أراضيهم ما تتعدى 400 متر مربع لكن فللهم وبيوتهم روعة
في التصميم واستغلال المساحات والغالبية العظمى في الكويت يسون
بيسمنت وتستغل كمخازن ومواقف سيارات او غرف للخدم.

موفق ان شاء الله .

[أبو ثائر]

والله القبو حل زين بس مكلف عندنا لأن الأرض صخرية

[wesam82]

الله يعطيكم العافية
و تسلمون على معلوماتكم القيمة

للأسف كنت بشتري أرض مساحتها 400 بس صليت إستخارة وطابت نفسي منها۔ وأنا اللحين أدور أرض غيرها وبسوي فكرة السيارة فكرة حلوة ومعلومة الكهرماء وأيضا الكويت

بس عندي سؤال :في مثل يقول لا تخاف من الغني إذا جاع ولكن خاف من الفقير إذا شبع۔ كيف أعرف نزاهة وأمانة المقاول من جميع النواحي، يعني يكون راضي بفائدة معقولة وشغل مضبوط ومن غير نصب، مثل ما تعرفون سعر الاراضي غااالية والبيسمنت مسألة مكلفة ، بس أوفر من شراء 100 أو 200 متر

مرة آخرى شكراً جزيلاً وبيض الله وجيهكم دنيا وأخرة

[معماري قطري]

الله يعطيكم العافية
و تسلمون على معلوماتكم القيمة

للأسف كنت بشتري أرض مساحتها 400 بس صليت إستخارة وطابت نفسي منها۔ وأنا اللحين أدور أرض غيرها وبسوي فكرة السيارة فكرة حلوة ومعلومة الكهرماء وأيضا الكويت

بس عندي سؤال :في مثل يقول لا تخاف من الغني إذا جاع ولكن خاف من الفقير إذا شبع۔ كيف أعرف نزاهة وأمانة المقاول من جميع النواحي، يعني يكون راضي بفائدة معقولة وشغل مضبوط ومن غير نصب، مثل ما تعرفون سعر الاراضي غااالية والبيسمنت مسألة مكلفة ، بس أوفر من شراء 100 أو 200 متر

مرة آخرى شكراً جزيلاً وبيض الله وجيهكم دنيا وأخرة

علشان تتخلص من تكلفة بيسمنت كامل انت تسوي مواقف على الأساسات بنزول بعمق 1.5 ونفس الوقت ترفع أرضية البيت شوي فوق المتر بحيث يكون عندك ارتفاع البيسمنت 2.4 أو 2.5 متر صافي .. وهو كافي لملحق مدمج معاه في الأخير ولمواقف لكم سيارة .. ممكن تخلي الجوانب طابوق وشبه مفتوحة .. وبتتخلص من الدفان.

انا ضد فكرة البيسمنت بمعناه الكامل لكن هذا بيكون شبه بيسمنت وأفضل إستغلال للأرض وللبنيان ولتقليل كمية الدفان.

[أسد الجزيرة]

الافضل استغلال تكلفة البيسمنت بالغائها و شراء ارض اكبر
تكلفة البيسمنت تقريباً 1.5 من العظم + التشطيب يعني 200 متر تكلف 400 الف تقريباً

افضلك تشتري ارض اكبر و تبني بيت ارضي اذا عايلتك صغيرة و لا كبروا العيال تبني الدور الثاني