مشكله مع المقاول مطلوب ارائكم

[Qtrun]

السلام عليكم ورحمة الله وبركاته


اخوي موقع العقد مع مقاول من سنة 2010 وللحين ماخلص البيت
الحين باقي يركب الابواب الخارجيه علشان ينزلون الدفعة الاخيره وباقي بعض التشطيبات
البسيطه يعني ماتكلف حتى عشرين الف
المقاول شكله فلس مسكر تلفونه الحبيب والفورمن اتصل على اخوي وقال له
لو سمحت بس نبي سلفه علشان نقدر نركب الابواب الخارجيه وننزل الدفعة الاخير
المشكله مب في السلفة المشكله انه ماصار عند اخوي اي
ثقه في هالمقاول رافع ضغطه يقول شسوي معاه
ومايبي يرفع قضية عليه في المحكمه لانه يعرف انه بيتلعوز معاهم

هل فيه طريقه انه اخوي يفصخ معاه العقد ويستلم الدفعه الاخيره ويخلص باقي الاجراءات وبيته بنفسه ؟

مع العلم بأنه تم الانتهاء من الصبغ والاعمال الكهربائيه جميعها
شبه جاهز البيت

[شموخ دائم]

,

,


مرحبا

الموضوع بسيط ان شاء الله


اذا الدفعه تنزل عند المالك بيكون هذا احسن شي

واذا الدفعه تنزل عند المقاول لازم يروح يغيرها من البنك وتكون في يد المالك
( هذا شي ضروري )

خل اخوك يروح يتعاقد بنفسه على الامور الي ناقصه
يعني يروح للابواب الخارجيه يدفع نص السعر باسمه هو لبيته بعيد عن المقاول
والاتفاق يكون من مالك البيت الى شركه الابواب

حتى يضمن ما يصير تأخير

ويخلص باقي الامور كلها بنفس الطريقه هو يدفع باسمه
والشركه عليها تتابع بس ومالها شغل بالفلوس
راح يكون العمل اسرع وبنفس الوقت الفلوس بتروح للمكان المناسب
وما ياخذها المقاول لمصاريف ثانيه كما يحصل بالعاده

وبعدها يخلص ( اتمام البناء ) مع المقاول والبلديه
لانه بيحتاج ختم وتوقيع المقاول والاستشاري

وبعدها ( كرت الكهرباء ) بيحتاج توقيع المقاول والاستشاري ايضا

وفي الاخير يجلس مع المقاول او ( الفورمن )
يخصم قيمه الي دفعه من الدفعه الاخيره
نفرض دفع 20 الف والدفعه الاخيره 100 الف
باقي للمقاول 80 الف

يخصم عليه ( الشرط الجزائي ) مال التاخير

ونفرض باقي للمقاول 30 الف

يدفعها له بعد دخول الكهرباء للبيت كامل ويتطمن ان جميع الامور كامله ومافيها مشاكل
وايضا سستم الماء شغال بدون مشاكل

لان هذا حقه والعقد شريعه المتعاقدين

اما اذا مافي شروط جزائيه

يدفع للمقاول حسب الاتفاق للعقد

ولا تظلم ( نفسك ) ولا تظلمه في شي

عند الله سبحانه وتعالى ما تضيع الحقوق


لا تفكر تاخذ الدفعه الاخيره لك من المقاول
بسبب التاخير

الغلط ما يتعالج بغلط

شوف العقد شنو ينص وتمشي عليه


التاخير له حل اما بالخصم بحسب العقد عن كل شهر كم المبلغ المنصوص عليه

واذا ما في نص واضح

اجلس معاه واخصم مبلغ بالتفاهم بينك وبين هذه الشركه

راح تحتاج للمقاول

في اتمام البناء

وفي الكهرباء

وفي الصيانه للمده القادمه لو طلع مشاكل في المبنى

,

,


اخوك


شموخ دائم

[Qtrun]

شكرا اخوي شموخ

وضحت لي شي مهم اني اخليه يدفع بنفسه ويخلص بيته

والفلوس تنزل في حساب اخوي مب في حساب المقاول

[ولد العلي]

بالتوفيق

[قطري قديم]

بالتوفيق