المايكرو كرستال هل هو عملي للبورسلان ؟

[ابو جمال]

السلام عليكم

المعروف ان البورسلان الاسباني او الايطالي ذو اللمعه الجميله التي تشبه الرخام لكن في نوع من الوبورسلان عليه طبقة اسمها مايكرو كريستال ! ( طبقة زجاجية )

سؤالي هل الطبقه هذي لها عيوب وهل هي عملية ومقاومه للخدوش او العكس

ارائكم يا اخوان من واقع تجربه قبل ما اشتري النوع هذا .

[معماري قطري]

والله شيء جديد علي .. رحت غزار يا بو جمال ما شاء الله عليك :nice:

بس مؤكد هي مادة حماية .. وألحين هذي المواد منتشرة وبعضها مصنعة بالنانو تكنولوجي وتكون ضد الخدش ومانعة للإنزلاق .. لكن في الغالب البورسلان مادة قوية وخصوصاً الصناعات الأُوروبية .. تذكر شلون شفنا الصيني يقول لك طبقة سيراميك على عجينة البورسلان .. ما سويت شيء يعني تشتري سيراميك زين أحسن من هذا البورسلان .. للبورسلان إذا أُوروبي ولا صناعة راقية تحصل مواصفات فنية من ضمنها معامل الكحت أو mohk degree وهذي أهم مواصفة لأن صنفوا المواد من الألماس وله معامل = 10 إلى الطبشور وله معامل = 1 .. الألماس حاد ويخدش كل شيء والطبشور كل شيء يخدشه.

البورسلان اللي درجته 8 عز حتى 6 مقبول .. وللأسف الرخام يجي 3 وبعضه 4 .. وعندك درجة الصلابة وهذي تعبر عن قوة تحمل الضربات وسقوط المواد الصلبة.

مهم للتركيب تسوي أرضية خرسانية مصبوبة وعليها يجي البورسلان .. ومب شرط تكون خشنة لأن اللزقات ألحين بعضها قوي وينفع لأي سطح .. المهم الأرضية تكون مستوية بدون ميلان وبدون بروزات .. بعدين عندك مهم استخدام خلاط ميكانيكي للروبة واستخدام روبة خاصة .. ولصف البلاطات ألحين يوجد جهاز ليزر يضمن استقامة التركيب.

شوف لو قدرت تحط مواصفات هالمادة تفيدنا عنها.

[ابو جمال]

يا هلا بو محمد والله ياخوي ماعندي معلومات عن النوع هذا بس الي فهمته انها طبقه زجاجيه تضيف لمعه زياده عن البورسلان العادي الاسباني او الايطالي وسعرها اغلى من البورسلان العادي بحكم الطبقه الي محطوطه على البورسلان عموما انا رايح الرياض بكره ان شاء الله وخذت معاي عينه من محل في شارع سلوى ويارب الاقي مثلها هناك .... سعرها في قطر المتر بـ 260 ريال من المحل الي خذت منه العينه ومقاس البلاطه الوحده 47 × 97 سم طبعا لمعتها غير شكل هي والرخام واحد اذا ماكانت افضل بس حبيت اشوف الربع بالمنتدى اذا مجربينها و تسوى ان الواحد ياخذها والا فيها عيوب بعد التركيب اقصد بالعيوب ( طبقه الكرستال أو الزجاج ) وربك كريم نشوف الرياض وشنو فيها ماتدري يمكن الاقي شي افضل منها

[معماري قطري]

الله يوفقك وتلقى نفس النوع وبسعر أرخص وايد

المواد تتطور بسرعة .. عجبني بورسلان فيه قطع ذهبية وهو أبيض ولا أسود ويعطي لمعة وانعكاس للنور .. وفيه نوعيات ألحين مطورة حتى تمتص الشوائب من الجو وتنتج أُكسجين .. وفيه نوعيات للشوارع ما تمسك الوصخ وتتنظف مع أول رشة مطر .. والنوعيات اللماعة والملساء ومانعة الإنزلاق في نفس الوقت.