مطلوب رأي الخبراء عاجل لو تكرمتوا

[الـجـنـاحـي]

السلام عليكم ورحمة الله وبركاته

الاخوه الاعزاء وخاصه الخبراء اتمنى ان تفيدوني بمشكلتي هذه

ركبت حجر سوري وخسرت عليه تقريبا 100 الف ريال واللون تقريبا قريب من الاحمر
وللاسف البلدية رفضت تعطيني اوراق اتمام البناء بسبب هذا اللون لان ماكنت اعرف ان ممنوع

سؤالي لو تكرمتوا .. !!!

1 - هل يجوز اصبغ الحجر باللون الابيض ؟؟

2 - واذا يجوز هل يبقى اللون ام يختفى بعد مدة من الزمن ؟؟

3 - واذا فضلت نفس اللون الاحمر هل يرضون بدفع مخالفة لهذا اللون ؟؟

4 - وفي حالة المخافه كم سعرها لو سمحتوا ؟؟

اتمنى ان احد يفيدني وخاصه من لهم خبره في الاحجار والصبغ

وفقكم الله لكل خير ان شاء الله

[@north_star@]

السلام عليكم ورحمة الله وبركاته

الاخوه الاعزاء وخاصه الخبراء اتمنى ان تفيدوني بمشكلتي هذه

ركبت حجر سوري وخسرت عليه تقريبا 100 الف ريال واللون تقريبا قريب من الاحمر
وللاسف البلدية رفضت تعطيني اوراق اتمام البناء بسبب هذا اللون لان ماكنت اعرف ان ممنوع

سؤالي لو تكرمتوا .. !!!

1 - هل يجوز اصبغ الحجر باللون الابيض ؟؟

2 - واذا يجوز هل يبقى اللون ام يختفى بعد مدة من الزمن ؟؟

3 - واذا فضلت نفس اللون الاحمر هل يرضون بدفع مخالفة لهذا اللون ؟؟

4 - وفي حالة المخافه كم سعرها لو سمحتوا ؟؟

اتمنى ان احد يفيدني وخاصه من لهم خبره في الاحجار والصبغ

وفقكم الله لكل خير ان شاء الله

سبحان الله الحين الي يصبغون بيوتهم بأصفر وبرتقالي ووردي مسموح والحجر الاحمر ممنوع !!!!! الله يعينك ويعوض عليك اخوي الحجر ممكن ينصبغ بس راح يخترب شكله ويحتاج اصباغ خاصة تتحمل عوامل الجو بس حاول تشوفلك فيتامين واو او تدفع مخالفة

[الـجـنـاحـي]

الله يجزيك خير ع الرد وللاسف فلل فيها الوان اتبط عين الواحد
واذا عن المخالفه ان كانت بسيطه بندفعها اما اذا كبيره فهذي المشكله

[بو راشد 1]

الحل انك تصور بعض الفلل اللي الوانها غامقه، و تقابل اللجنه و تطالب المعامله بالمثل.

[الـجـنـاحـي]

الله يجزيك خير ع الرد وهذا اللي افكر فيه يابوراشد والله المستعان

[w.qatar]

روح لقسم المخالفات في البلديه و قول لهم تبي حل للموضوع اكيد بيدورون لك مخرج لهالمشكله
لو تقدر قدم كتاب و ارفق معاه صور من فواتير الحجر اللي تبين السعر + صور للبيوت اللي مركبين الوان قريبه من اللون اللي انت حاطه

[الـجـنـاحـي]

تسلم ع المرور
ان شاء الله بصور الفلل اللي الوانها اتبط عين القطو قبل الانسان
حتى يتأكدون ان في فلل الوانها غير صحيه لعين الانسان نفسه

بس انا ابغي اعرف هل صبغ الحجر بيخترب ؟؟
الصبغ يخترب عقب مده من الزمن ولا الحجر يخترب عقب الصبغ ؟؟

[qtr432]

الله يعينك يا خوي بس الي اعرفه انه الحجر الطبيعي ما يخترب وبالعكس كل ما قدم زان لونه، ولو صبغته فرضا ما توقع يصبح نفس اللون الي اخترته لانه راح يكون مزيج بلونين والله يعينك، وفي حل يمكن يكون أفضل شوف عن طريق النت ولا اذا في محلات بالدوحة يكون عندها ماده بلون معين تغطي لون الحجر أو الحجر نفسه مؤقت وبعدها تزيلها فهذا بيكون افضل اختيار اتوقع.

وبالنسبه لرفض البلديه للون الحجر المفروض منها مسبقا انها تنسق مع الجمارك بعدم دخول أو توريد هذي الالوان وينتهي الموضوع مب بعد ما اتفق ويدخل عبر الحدود ويتركب يجون بكل سهوله يمنعوني من شهادة اتمام بناء لسبب هم المشكله فيه.

اقتراحي ياخوي انك ترسل ايميل للوزير وتضع مشكلتك كامله مرفوقه بها الصور، وما يمنع انك تقترح عليهم بعض الحلول لتفاديها مستقبلا مع حالات مشابه لك. ولا تنسى تحط عنوانك عشان ما يكون عندهم عذر ايضاً.

[captin]

مرحبا اخوي

الله يعينك على اجراءات اتمام البناء ويعينا لا جا دورنا
مع العباقرة في الرخص اللي همهم يخلون الدوحة من اجمل مدن العالم .

ما دامه حجر طبيعي وماخذ لون مائل الى الاحمرار ما اعتقد
فيها شي وكثير بيوت مثل ما قالوا الاخوان عليها حجر لونه احمر او برتقالي
وكلنا نذكر الحجر الصغير على معظم البيوت في مناطق الدفنة والهلال والمطار
وغيرها لونه يا مائل الى الاحمرار او برتقالي بالعكس اللون الطوبي او الاحمر
يجمل البيت والبيئة من حوله.

اذا كان ولا بد والعباقرة اللي في البلدية ما عطوك رخصة اتمام البناء بسبب اللون

اسأل اللي يركب لك الحجر اذا يقدر بطريقة ما يحك الطبقة الفوقية بقرايندر
او البروش المعدنية يمكن في هالحالة ينكشف اللون الاحمر وتطلع الطبقة اللي تحتة
وتكون مقبولة. لكن اياك والصبغ فوق الحجر بتكون ما سويت شي بيبين جنه حجر صناعي
وبعد فترة بينكشف اجزء واجزاء وبيشوه منظر البيت من الخارج .

موفق في مساعيك اخوي

[شموخ دائم]

,


,

مرحبا

اخوي الكريم

الله يعينك على حل هذي المشكله

وما بزيد على كلام الاخوان الاعضاء ماقصروا بالردود

توضيحهم طيب

ياريت لو حطيت صوره للحجر الاحمر المقصود

ما شفت حجر سوري احمر سابقا نهائيا

بالفعل هناك قانون عن اللون لخارجي وهو درجات الابيض والبيج

وهذا القانون فيه استثنائات

مثلا يتشددون على البيوت الي موقعها على شارع ( رئيسي حييوي )
ويتركون البيوت الي داخل الفرجان لانها غير ظاهره

الان امامك حلول كثيره

الحل الاخير هو صبغ الحجر ( وهذا ما نفضله ) لانه يتشوه مع الوقت
وهناك انواع من الورنيش يدهن بها الحجر بعد صبغه

نترك الخيار هذا الاخير


الخيار قبل الاخير هو ( حك الحجر ) للحصول على درجه ثانيه من اللون
مثل ما تفضل الاخ كبتن اذا ممكن نحصل على درجه افتح لو لا


اول خيار امامك الان هو التركيز على

( الاستثناء ) خاصه اذا بيتك ليس على شارع رئيسي مهم
استند على هذه النقطه وبيوت كثيره لها اللوان تخالف القانون ومستثنيه
وانت تطالب بالمثل

طبعا يحتاج تتكلم مع رئيس القسم او المدير هناك وليس موظفين

الحل الثاني ( دفع الغرامه )

حاول تتجنب بكل الوسائل انك تصبغ الحجر لانه بالفعل راح يتشوه كثير

,

,

اخوك



شموخ دائم

[معماري قطري]

لا تهتم إن شاء الله يمشون لك الاستثناء

ولازم تحصل التقرير طلع من مهندس يتابع الرخصة وأغلبهم قليلي خبرة فقط يتبعون قوانين

حاول تشوف المسؤولين الأعلى وخذ معاك عينة من الحجر والتوفيق فالك

واحد من الإخوان كان في التخطيط أيام التخطيط مع البلدية .. وبنى على شارع عام وكان مقرر تركيب ألمنيوم على الطابوق وصبغه بتومين .. قالوا له إصبغ ولا ركب حجر بيتك في منطقة تجارية مؤقتة وهذي التكسية خاصة بالأبراج.

ما ادري عندهم نحاسة أو معقدين .. زين بعده بفترة البنك التجاري بنى قرب اللاندمارك وبنيانه 3 أدوار أو 4 وايد مرتفع وعليه المنيوم .. يا ناس الألمنيوم مادة بناء وتكسية متطورة وبيوتنا كلها تقريباً بعيدة عن تراث سوق واقف .. ألحين متحفنا الوطني حديد وألمنيوم وصحون كبار ما شاء الله ليش ما تكون فيه شوية حرية طول ما يؤثر سلبياً على الشكل العام.

مثال آخر على نفس الشارع الدكنور القطري حديثاً والفلسطيني سابقاً باني بنيان مخالف كل القوانين والنظم من حيث الارتدادات والألوان وأعتقد تكسيته ألمنيوم ان ما خانتني الذاكرة.

انت بتشوف كثير مركبين نفس النوع ويمكن في نفس المنطقة .. وبيقولون لك هذا قبل وبتشوف بعدك ناس يركبون .. انا من رايي أي مادة ممنوعة يبلغون الناس بها قبل أو يعطون الواحد اشتراطاتهم مع الرخصة.

الله يعينك وتخلص معاهم وطمنا شصار معاك.

[خزامئ]

الله يفرج
عليك المفروض يكون مع رخص البناء الاشياء الممنوعه
ولا يخلون الواحد يتخصر وعقب يقولون مايسير

[jassim69]

الله يعينك أنا عن نفسي خالفوني عن كل متر 200 ريال

[الـجـنـاحـي]

الاخوان الافاضل السلام عليكم ورحمة الله وبركاته

qtr432
captin
شموخ دائم
معماري قطري
خزامى
jassim69

حفظكم الله ورعاكم وشرفني تواجدكم جميعا

للاسف اللي رفض هذا اللون هو رئيس قسم المراقبه الفنيه في بلدية الريان
والبيت مش ع شارع رئيسي .. البيت بداخل الفريج وحولي بيوت وفلل والوانها
والله فيهم البني الغامق مثل النسكافيه وطبعا صبغ مش حجر
وفي برتقالي غامق مثل الكركم شكله حجر سعودي او سوري الله اعلم
واذا عن رساله للوزير فـ ما اعتقد بيشوف الرساله
والمشكله انهم في البدايه مايقولون لك وش اللون اللي بتصبغ ولا بتركب

والمشكله واللي يقهرك ويجلطك ان البيت بيتك وانت مخسر عليه ودافع فيه دم قلبك
وغير الديون اللي تتحملها عشان اتخلص وتسكن واخر شي يقولون لك هذا اللون ممنوع
وش اللي يمنع ؟؟ هل في مواصفات للالوان ومقاييس ؟؟ والله شي عجيب
ياخي بيتي وكيفي وانا الي بسكن فيه مش موظفين البلديه عشان يمنعون اللون
ع اي اساس انت تمنعني من اللون الي يختاره عقلي وارتاح له ؟؟؟
لو البلديه ادفعت وساعدتنا في اللون بنقول معليه بنتقبل رفضكم
لكن اتسلف واحط ديون ع نفسي واخلص وعقب يقول لي .. لا هذا ممنوع ؟؟
والله شي غريب وعجيب في هالبلاد .. مادري اي قانون في اي دوله يلزمك بأي لون تصبغ بيتك ؟؟؟؟

الله المستعان ان شاء الله بشوف وشو الحل معاهم

[Chambray]

أخوي الجناحي
صور الحجر ، ونزله لنا هنا ..

علشان نقدر نحكم ونساعدك

بخصوص بلدية الريان تراهم متساهلين
مش نفس بلدية الدوحة

عموماً انت نزل صور الحجر .. وان شاء الله تحصل مساعده منا ..

[New Vision]

هالبلديه تخبط في تخبط شدخلهم في لون بيتك يعني الوردي هو المسموح عشان عاجبهم؟؟

[برشلوني قطر]

هالبلديه تخبط في تخبط شدخلهم في لون بيتك يعني الوردي هو المسموح عشان عاجبهم؟؟

هو صحيح مثل ماذكرو الاعضاء ف الوان معينه بس

اخوي ايش الحل الي عطاك اياه رئيس القسم ؟؟

هل قال لك شيله ؟؟

واذا ممكن اسم رئيس القسم ع الخاص

والله يعينك

[معماري قطري]

ممكن يكون الحل عن طريق الوزارة

[الـجـنـاحـي]

هو ماقال لي شيله بس قال لي مقدر اوقع لك ع ورقة اتمام البناء
روح شوف المدير وانا طلعت وماشفته قلت ابغي اعرف اول شي
هل اللون ممنوع ؟؟ والمشكله في الوان كثيره في نفس المنطقه
العن من لوني ومش حجر .. الا صبغ والصبغ يتغير بسهوله
بس الحجر كيف اغيره ؟؟ اشيله يعني واخسر مره ثانيه ؟؟

[الـجـنـاحـي]

84800

84801



هذي هي صورة الحجر وردي ع ابيض
ماعرف انزل الصور وان شاء الله يكونون واضحين

[الـجـنـاحـي]

ماعرف كيف ينزلون الصور اسف

[jassim69]

ماعرف كيف ينزلون الصور اسف

أمورك أن شاء الله سهلات أشوف آلون عادي كنه الصبغ البيج خذ صورة البيت ودخل على المدير وان شاء الله الأمور طيبه

[هدوء العاصفة]

ماعرف كيف ينزلون الصور اسف

اخوي راسلني على الخاص وعطني رقم تلفونك بحاول اساعدك ..

[عقرب]

السلام عليكم

أخوي إن شاء الله موضوعك بسيط

روح للمدير إلي قالوا لك روح له واشرح له الوضع وبيوقعك على تعهد بأنك تغير اللون خلال 3 شهور

وأنسى الموضوع وبيحفظ في الملف إن شاء الله مثل صار لي

ولا تحاتي وأهم شي خلك ريلاكس وهادي ولا تتنرفز لأنهم ينرفزون إلي ما يتنرفز :)

[حياة]

ادع دعاء اللهم لاسهل الا ماجعلته سهلا
وقابل المدير لون بيتك مافيه شي .. عادي اشوفه
احنا لعوزونا مده طويله صابغين لون بني الطيني بس الله
سهلها الحمد لله