فيلا خرايطها غير عن بناها

[الحمر]

السلام عليكم
عندي استفسار دفعت عربون على فيلا بعدما عاينت البيت والخرائط. اليوم رحت الفيلا وقلت خلني اشيك قياس الماستر روم والمجلس لآني أحسهم صغار .

الصدمة ان الغرفة اصغر بمتر كامل والمجلس بمتر ونص وانا الحين مصدوم
هل ممكن واحد يتلاعب في البناء وهل يمكني رفع قضيه علي البائع في حال أتممت البيعة لآني متفق معاه في حالت التراجع يأخذ العربون كله


للعلم الفيلا بأخذها على بنك التنميه يعني الاستشاري ليلحين ماشيك عليها .

[كلمة المرور]

ان شاء الله اهل الخبرة والعلم يفيدوك
والله يعينك

[naklan]

الله يكون في عونك اخوي الحمر
اخوي المفروض التاكد من كل شي قبل الشراء
التلاعب في المقاسات يعتبر غش وتدليس وتقدر ترفع
عليه قضية وتكسبها وترد عربونك غصب كلمه وحاول ترد
عربونك بالتفاهم وان رفض ارفع عليه قضية واطلب
تعويض عن الضرر من حقك ان ترفض الشراء
لوجود غش ضاهرواذا غش في الضاهر فما
هو الحال بالنسبة للباطن للمبنى اكيد
كله تلزيق في تلزيق

كان الله في عونك يارب العربون بسيط بس :weeping:

[معماري قطري]

الله يعينك دوم المشتري يغتش

انا رايي إذا سعرها زين ومناسبة وجيدة وتسوى تفاوض معاه ينزل لك في سعرها والا تشتكي عليه وان شاء الله حقك مب ضايع دنيا ولا آخره.

[فارس الكلمة]

كم قيمة العربون ..؟

[ابوالحارث]

اولاً قم بمراجعة البلديه المختصه للتأكد من ان المخططات و الخرائط الهندسيه للفله و الموجوده لديك حالياً هي نفسها المعتمده من البلديه والتي على اساسها تم اصدار كل من رخصة البناء و شهادة اتمام البناء للفله.

ثانياً اطلب من الاستشاري ان يكون تقريره بناء على الخرائط الهندسيه المعتمده من البلديه و مقارنتها بالمبنى القائم حالياً و اذا كان هنالك فرق يجب ان يتم ذكره بالتقرير.

بعد ماتنتهي من هذه الأجرأت بقولك وش تسوي بس اهم شي انك ما تثير اي شي مع المالك حالياً

[شموخ دائم]

,

,


مرحبا

اخوي الكريم

اسمح لي اختلف شوي معاكم

لو كان هو مقاول وانت جبت له خريطه بيتك
ويبني لك بفلوسك ( وصغر البناء ) هنا يكون الغش واضح


لكن السؤال المهم الان

هل شفتها على الطبيعه قبل ؟؟؟
او شفت الخريطه قبل ؟؟؟

انت دخلت فيلا معروضه للبيع وشفتها على الطبيعه
وعجبتك وقررت تشتري ورحت دفعت العربون

انت شريت على الطبيعه ما شريت على الخريطه

( كان من المفروض يقولك هذي المعلومه )
يابو فلان انا ما مشيت على الخريطه الاصليه وصغرت المساحه
لاسباب معينه قبل ما تدفع العربون
ويوريك الخريطه ويكون واضح معاك


من حق المالك يصغر فيلته بدون الرجوع للبلديه
ولكن مو من حقه ( يزيد ) الا بموافقه البلديه

:)


اتمنى يكون كلامي واضح

اخوك


شموخ دائم

[الحمر]

السلام عليكم
شكرا على الردود
قيمة العربون 90000 الف
وانا دخلت الفيلا وشفتها بعدين شيكت على الخرايط وعجبتني المقاست من الخرايط بس ماذكر شي عن تصغير البناء , المعروف ان الاحجام الغرف تكون اصغير قبل التأثيث وبعد التأثيث تكبر وهاي الي الخطاء الي طحت فيه
بس ياني فضول وقلت اشيك وطلع ان احجام البنا اصغر من الي في الخريطة .

أخ شمخ دائم يعني الحين اي واحد يبي يشتري فلة لازم يأخذ المتر ويقعد يقايس غرفة غرفة والله مشكله
أبو الحارث الفله للحين ماطلع لها أتمام بناء ممكن توضح شوي الخطوات المطلوبة مني لاني مالي في هاي السوالف أبد .

[captin]

مرحبا أخوي

الله يبارك في الشروة وان شاء الله منزلن مبارك

لحل مثل هذا الاشكال اجلس مع البايع وانقل له ملاحظتك
انك لقيت احجام الغرف اصغر مما هي عليه في المخططات.

يمكن هو ما يدري والمقاول غشه في البناء يبي يوفر شوي

حاول تتفاهم معاه واذا هو ابن حلال ويتحرى الحلال في شغله أكيد راح
تتفاهمون على صيغة تطلعون اثنينكم راضيين ان شاء الله .

[تلفزيون قطر]

لا حول ولا قوة الا بالله العلي العظيم
والله الواحد مايدري شيقول غير حسبي الله ونعم الوكيل والله يعينك ياخوي




فالك التوفيق




تلفزيون قطر

[وليف الشوق]

ان شاءالله منزل مبارك وعامر يارب

لكن نصيحه تريث شوي ولا تستعجل ولا تسوي من الحبة قبة وأسأل عن الموضوع بكل اريحيه وراح الامور تكون لك واضحه ان كان هناك تلاعب ام لا !! واذا ثبت التلاعب فيمكن التفاهم مع المالك مباشرة قبل القيام بأي عمل او قول اوفعل يكون مردوده الاول والاخير مش من صالحك وبأختصار انا ابي لك الخير عشان مايجيك اللوم او الفشيله وحاول تكون حليم وهادئ بالموضوع

[تأملات]

السلام عليكم اخوي
قبل اي شي تأكد من مقاسات الغرف وأخذ صورة للخريطة وقارن مع الخرائط الأصلية. تقدر تحصل عليها من البلدية بس يبي لها شطاره او واسطه بعدها. بتعرف فيه غش او تعديل وبناء على هذه النتيجة تحرك. أنصحك. أتمسك فيها وتفاوضه بشكل متوازن. صدقني بتحصل على خصم من السعر المعروض
بالتوفيق لك

[ابوالحارث]

الخطوات واضحه وسهله وبسيطه مثل ما وضحت لك سابقاً

أخي شهادة اتمام البناء مهمه جداً و هي تعني ان البناء تم حسب الخرائط و المواصفات كما ان توصيل الكهرباء و التلفون للفله لا تتم الا بالحصول عليها.

اكرر الخرائط الهندسيه و رخصة البناء و شهادة اتمام البناء هي المستندات الرسميه و الاساسيه المعتمده في حالة نشوب اي خلاف قانوني بين البائع و المشتري

[لطيف الروح]

http://174.36.200.112/vb/showthread.php?t=566271