موضوع يحتاج التفاعل كيف تحوش من راتبك

[تأملات]

السلام عليكم
يعتبر فن الادخار مفقود عند القطريين وبخاصة النساء ، على الرغم من ارتفاع الرواتب بشكل تدرجي خلال السنوات الاخيرة ، ومع هذا يعتبر الادخار خارج أوليات الأسر القطرية ،التي تمتاز بنمط استهلاكي ويغيب عنها التخطيط للمستقبل. ولأهمية الموضوع أرجو المشاركة بشكل إيجابي بطرح طرق تساعد على الادخار ومن ثم الاستثمار ، وماهي الأولويات التي يجب ان لا تغيب عند التخطيط المالي للفرد والأسرة وكيف نكسب أطفالنا. تعلم فن الادخار

[عاهد بن علي]

موضوع في غاية الاهميه
اشكرك على هذا الطرح المهم
:nice::nice::nice:

متايع

[قطريه22]

موضوع في غاية الاهميه
اشكرك على هذا الطرح المهم
:nice::nice::nice:

متايع



متايع شنو بعد:eek5:




موضوعك حلو ومفيد وانا متابعه لاني ابي حل :weeping:
مب قادره اجمع مع ان عندي حساب توفير وكل شهر يتحول 2000 ريال ومايجي تاريخ 10 الا انا مطيرتهم
حطيت حصاله ومافي فايده
مادري شاسوي :weeping:

[aziz4z]

مافي إدخار أبدا , لا فوق هاي ديون من البنوك , يعني راتب + 150% دين من البنك
الله يصلح الحال و يبارك في أرزاق الناس

[رهج السنابك]

انا اعلمك شلون

اول شي راقب مصروفاتك

وحط لسته شهرية
وشوف شنو صرفياتك خلال الشهر
لنفرض راتبك ٣٥ الف ان كنت جامعي
خلال الشهر بتسدد فواتير ومشتريات للبيت وللعزايم وللكشخه

لما تراقب وين قاعد تصرف بسهوله تسوي كنترول

انا ادخر ٩٥٪ من الراتب بسهوله
مافي اسواق بشكل دايم ( زياره اسبوعيه للجمعيه تكلف اكثر شي ٣٠٠ريال)
مافي طلعات مطاعم (احلى وانظف من اكل البيت مافي)
مافي حفلات ولا حضور اعراس ( لاني ماحب)
ماحط لي فواتير مالها داعي مثل اشتراكات رسيفر او جوال شهري (كرت هلا ب٢٠٠ يكفي شهر)
مافي صالونات وخرابيط ( شغل البيت انظف )

ماعدا الاستثناءات وهي قليله مثلا هدايا او شراء اجهزه او زيارة عيادات

[رهج السنابك]

بخصوص كيف تعلم عيالك الادخار

العيال بيتعلمون منك


وبعطيك نصيحه يمكن تستغربها لكنها كانت اهم وسيله في تربيتي على ادارة المال من الصغر

كانت امي تعطيني راتب شهري يقارب ٥٠٠ من وانا بصف اول ابتدائي
كل مابغيت لعبه او اي شي بخاطري ومصروفي اليومي كله منها
بنفسي وعلى قد ماعندي من ميزانيه اشتري اللعبه الي بخاطري لا احن على راسها ولا انتظر حد يتعطف ويشتريها لي
هالطريقه علمتني شلون ادير ميزانيتي
شلون اتخذ قراري
شلون احسب واوفر
علمتني ما اطلب من احد شي :) بحياتي ماتسلفت
علمتني الزهد لكثرة مايتوفر في يدي من مال من ذاك العمر صارت نظرتي للحياه خاليه من الماديات والمال والماده شي مب رئيسي ولا اهتم له بقدر اهتمامي بما يسعدني

وشيء مهم واهم من ادخار الدنيا هو ادخار الاخره
خلي جزء من ادخارك للاخره كوقف او صدقات جاريه

[فلتة زمانها]

الموضوع بسيط اخوي
افتح حساب توفير وحط الي تقدر عليه شهرياً
تطلع بمبلغ حلو وتحطه وديعه في المصرف
وإذا كلش ما قدرت تسيطر على نفسك شارك في جمعيه

[تأملات]

الاستقراطية. معقولة نسبة التوفير عندج 90٪

[طلعة الروح]

وفر من 75 الى 95% من الراتب شهريا، طبعا النسبة تعتمد على مصروفاتك والتزاماتك، اذا عليك قرض من البنك أكيد له تأثير بالسلب ع الحسبة، لكن التوفير دائما متوفر لمن يملك الإرادة...

[طلعة الروح]

الاستقراطية. معقولة نسبة التوفير عندج 90٪

اللي بيمسك يده يقدر يوفر هالنسبة بسهولة من الراتب...

[ضوى]

المتزوج غير عن المتزوج والمعيل غير عن غير المعيل ، العملية نسبيه ، شخصيا اوفر ٥٠٪ من الراتب بس يكون كميزانيه للسفر ، ميزانية الواجبات الاجتماعية هذي لحالها ، السوق مب كل شهر مناسبات او مرة كل شهرين ، ممكن اللي يدبر اموره يقدر يوفر بسهولة ، بس اشوفها صعبة للريال لانه هو متحمل كل ميزانية البيت والعيال والمصاريف

[تأملات]

( والذين إذا أنفقوا لم يسرفوا ولم يقتروا وكان بين ذلك قواماً ) الفرقان 67
الاعتدال. في الصرف هو الحل مع احترامي للجميع نسبة ٩٥٪ للتوفير غير واقعية في قطر الا اذا كان الشخص ما يصرف الا نفسه. ولا يساهم في البيت

[قطريه22]

استقراطيه اشكرج حبيبتي باطبق الي قلتيه وباقولج اشبيصير

الله يجزاج خير

[طلعة الروح]

أنا اشوف ما يحتاج تحط لسته شهرية، حط لمت معين للصرف ما تطلع فوقه وانتهى ، الا طبعا في الظروف الاستثنائيه والطارئة وهاي طبعا ماراح يكون كل شهر...

[تأملات]

قطرية٢٢
بالتوفيق

[القبطان سلفر]

موضوع مفيد

متابع لتجارب الاعضاء واقتراحاتهم .

[رهج السنابك]

تأملات انت ماجاوبتني عشان اعلمك شلون توفر بهالنسبه اوًمايقاربها

انا قلت لك حط لسته وبنخطط معاك

اعتقد يوصلك مسج للفواتير ولاي سحبيه كردت كارد

افتحهم واسترجع وشوف وين تروح صرفياتك وبتكتشف انك تصرف في اشياء مالها داعي

راقب ميزانيتك
راقب مدخولك
راقب التزاماتك الماديه
وهل عليك ديون او لا

واشكثر بالعاده يبقى لك

لا تخلي موضوعك عشوائي بدون حسبه ولا بتضيع وبتشتت نفسك

[رهج السنابك]

استقراطيه اشكرج حبيبتي باطبق الي قلتيه وباقولج اشبيصير

الله يجزاج خير

طبقي وبتكتشفين كيف تديرين مواردك باحترافيه :)
والاهم بسعاده ورضا داخليه

[شموخ دائم]

,

,


مرحبا

شكرا على الموضوع

هذه ثقافه من يتبعها لا يحتاج الى احد طول عمره
:)
وكل ما ابتدى فيها الشخص اول ما يتوظف
يقطف ثمرتها بطريقه افضل

اعتقد 25% من الراتب نحطه توفير اجباري
عن طريق امر تحويل دائما من الحساب العادي الى حساب التوفير

يعني الي راتبه 35 الف يقدر يوفر منه 8500 وشوي
في السنه 102 الف

في 5 سنوات 510 الف
يتزوج فيها :)
بدون ما يقول لاي انسان ( عطني )
وبدون ما يقول الزواج مكلف
:)

وبدون ما يقول ( مديون )

الي ما يخطط لحياته
الديون بتخطط فيه
:)

,

,


اخوك


شموخ دائم

[طلعة الروح]

اللي مايعرف في التجاره والأسهم وكيفية الاستثمار يضطر يوفر أكثر في اعتقادي،،،

[تأملات]

من منكم قرا كتاب. دليلك لعمل ميزانية الاسرة للدكتورة الفاضلة. لولوة المسند
انا استفدت من هذا الكتاب بشكل كبير.

[بنت مريخ]

اتمنى أوفر من راتبي
ماعرف
ياليت حد عنده خبره يعلمني يأخذ فيني اجر
أختي الأرستقراطيه ماشاءالله عليج

[عنيــــد]

انا ما قدرت اوفر لكثرة المصاريف و تعددها ،،

حاولت سنه ما قدرت ،، آخرتها صرت احول المبلغ المراد توفيره للاسهم ،،

و بهالشكل نجحت و لله الحمد ،،

بالنسبة للمتزوج الامر اصعب بكثير ،،

[طلعة الروح]

انا ما قدرت اوفر لكثرة المصاريف و تعددها ،،

حاولت سنه ما قدرت ،، آخرتها صرت احول المبلغ المراد توفيره للاسهم ،،

و بهالشكل نجحت و لله الحمد ،،

بالنسبة للمتزوج الامر اصعب بكثير ،،

شوية إرادة وتضبط أمورك وخصوصا لما يكون عندك هدف وحاب توصله من خلال مبلغ التوفير....

[ابوعلي]

دايما اوصي الي حولي بهالشي

بالنسبة لي تحويل اجباري ٤٠٪ من الراتب يتحول للتوفير اول ما ينزل الراتب وبشرط ان السحب بالبطاقة يكون على الجاري فقط وفي حالة احتجت مبلغ يلزم علي اروح البنك حتى اسحب كنوع من التضييق حتى الزم نفسي بالصرف في حدود معينه وهالشي كان في بداية الامر والحمدلله الحين اصرف على قد حاجتي وبنفس الوقت ماقصر على الي حولي


وبديت بهالطريقة مع ام العيال ان فتحت حساب مشترك بيني وبينها واحول من سابها شهريا مبلغ وبفضل الله جمعت مبلغ محترم ولو عرفت بتنصدم وابراء للذمة حطيت بالوصية ان المبلغ بالحساب المشترك خاص فيها

الاهم اختي بداية الامر وعقب بتتعودين على الادخار

[رهج السنابك]

طريقه ابو علي بعد حلوه للي يحس نفسه مب قادر يسيطر لازم يستخدم هالطريقه

[تأملات]

أبو علي
انت تحول بشكل دائم 40 ٪ من الراتب. وتصرف الباقي
عندك حساب مشترك مع ام العيال يعني اغلب الادخار بس كاش ؟
وفي حالة الاستثمار في الاسهم. او امتلاك عقار بكون من توفيرك الشخصي او العائلي

[ابوعلي]

أبو علي
انت تحول بشكل دائم 40 ٪ من الراتب. وتصرف الباقي
عندك حساب مشترك مع ام العيال يعني اغلب الادخار بس كاش ؟
وفي حالة الاستثمار في الاسهم. او امتلاك عقار بكون من توفيرك الشخصي او العائلي

اي نعم احول بشكل دائم بالنسبة لي وحتى لام العيال

اذا احتجت من ادخاري اخذ جزء منه على قد الحاجة وخاصة اني اشطب في بيت العمر

وبالنسبة للاهل ما تسحب من مبلغها

والحمد لله حطينا استثمار في الاسهم بالرغم من المخاطره والحمدلله المبالغ الي حطيتهم في الاستثمار من الاكتتاب وجزء شراء اسهم باسعار حلوة


ومن رايي وخاصة بهالوقت تفتحين حساب ببنك بروة وتوديعين مبالغ في حساب خاص عندهم ويعطون نسبة 3٪ يعني تدفعين زكاة المال بالاضافة الى ربح نص في المائة

[CH Engineer]

لا تشتري شي انت مب محتاج له
ولا تصرف على شي مب مهم

واذا بتاخذ شي للكشخه او للكماليات فكر بالموضوع شلون ماتخسر من وراه ولا تكرر هالشي شهريا



اذا راتبك 30 حول 20 على بنك ثاني ماعندك فيه بطاقة صراف وحاول توفر من ال10 لنهاية الشهر..
مب شرط تضبط معاك من اول شهر ومب شرط تضبط معاك كل شهر الا ويطلع لك شهرين بالسنه تصرف فيهم الراتب كامل


بالتوفيق

[تغلبية]

ترديد هذا السؤال على النفس له دور كبير في الادخار او الاقتصاد عموماً

هل احتاج لهذا الشي لكي شتريه ؟

الجواب اما لا

واما نعم ..

هناك 4 احتمالات لاولوية الشراء اللي نقول فيها لا و نعم

هل الغرض اللي بتدفع فيه:


مهم وعاجل <<<< تدفع الآن

مهم غير عاجل <<<< لا تدفع

غير مهم غير عاجل <<<< لا تدفع

غير مهم عاجل <<<< تدفع

اذا حددنا الهدف .. ممكن يزيد عندنا الوعي بعمليات الدفع والشراء اللي غالبا تتحكم فيه العادات السيئة في الشراء موب القرار

[qatari 111]

نظامي اول ماينزل راتبي ال24 الف احول فالتوفير 10 الاف ريال اجبااري والباقي اصرفهم لحوايج البيت وللعيال وام العيال واذا بقى شي احوله عالتوفير
والحمدلله الطريقه هاذي انجحت معاي لان الواحد سبحان الله يمكن يصيده ضرف طاارء له او لاخوانه او قرايبه

واهم شي الصدقاات وزكاة الماال

[qatari 111]

ملاحظه اكتشفت بعض الناس عندها ادمااان في تغيير اجهزة الجواال كل مانزل موديل جديد باع اللي عنده وشرى الجديد رغم ان الجهاز السابق مايمدي يستخدمه شهر او شهرين ويمكن اسبوع ويغيره

وغير استخداام النت بفتراات طويله وخاصة وقت السفر يطلع عليك فوااتر فوق ال2000 الى 6000 ريال

يعني عندهم هوس مب طبيعي فالتغيير واستخدام النت

[khalid525]

روعة نصايح الاعضاء الله يوفقهم ارستقراطية وشموخ دايم وبوعلي

اضيف نقاط مهمة جدا لكي تنجح في التوفير :

- اقضي على جميع بطاقات الكريدت كارد واذا محتاجها لسفر او خلافه طلعها وقت الاحتياج فقط وارجع كنسلها او خفض اللمت الى اقل مبلغ .

- لمن لديهم ديون ، اشتغل اول على سداد المديونية ولو بتحويل الجزء الاكبر من الراتب لسداد الدين باقرب فرصة فلا معنى للادخار في وجود دين سوف يعيقك عن اي خطة استثمارية . طبعا لمن هدفه من الادخار استثماري .

- حاول ان يكون حساب الادخار في بنك اخر مختلف عن البنك الذي يحول اليه راتبك ، وطبعا لا تطلع بطاقة صراف الي على حساب الادخار .

- لا زال شراء الاسهم والعقار هو افضل خيار لمن اراد الاسثمار قليل المخاطر .

- نقطة مهمة جدا جدا وتحتاج الى ارادة قوية ، اموال الادخار لا تستخدم نهائيا الا لتحقيق هدف اسثماري او هدف كبير في حياتك ، يعني لا تقول بخذ شوية فلوس عشان سفرة او اشتري موتر ، لا تصرف اموال الادخار الا لغرض استثماري يعود عليك بفائدة .
المصاريف الاخرى مثل الزواج او السفر او شراء سيارة يفضل الادخار لها بجانب الادخار الاستثماري . لماذا لانك اذا صرفت ادخارك على غرض استهلاكي فلا فرق بينه وبين الدين، بمعنى خذ سلفية افضل لك خصوصا مع انخفاض سعر الفائدة .

طبعا يرجع اختيار الاولويات في صرف اموال الادخار للشخص نفسه .
شكرا

[+abc]

كل البنوك ترفض فتح حساب جاري غير الي فيه الراتب الا اذا الح صاحب الحساب على فتحه لانهم يحاولون انكم تفتحون توفير باي شكل

وكلام اخونا بوعلي صحيح وهي افضل طريقة بتحويل مبلغ شهري لحساب جاري ويكون بدون بطاقه

وانصح الحميع بتحري الحلال والحرام لانه ملاحظ انه الربا والتوفير صار شي عادي وكيف نتوقع بركة في حلالنا واحنا حاطينه بحساب توفير ومادام اسمه توفير فهو ربا مهما كان اسم البنك لان كل البنوك الحين الله المستعان تتلاعب بالناس تحت اسم الاسلامي

ومن تجربة مايذبح الواحد الا الاقساط فكل واحد في بداية حياته لازم يسويله اصل ثابت وهو العقار ويكون مدخول ثابت له

[Roo7MooT]

انا شهريا أوفر من راتبي قرابة 50 % قد تصل في بعض الاحيان الى 70 %

وعندي سيارة وأكلي كله برع وكل يوميين بترول فل وأدفع حق كيوتل كل شهر

وأسافر في السنة 2-3 مرات

سياسة الادخار أنك تعرف شنو أحتياجاتك الشهرية الاساسية بعدها لمدة شهر في ورقة تسجل كل شي

شريته هالشهر وشوف الخلل وين كان هالشهر وحاول تتفاداه الشهر الجاي

على سبيل المثال 2 من ربعي واحد راتبه 30 ألف والثاني 6500

صاحبنا بو 30 الف يتشكى 18-20 الشهر ويقول متى ينزل الراتب لانه شبه مفلس

صاحبنا الثاني بو 6500 مكتفي وعنده فائض

أغلبنا يصرف ويصرف ويصرف ولا يحسب حساب هالشي في أشياء تكون في بعض الاحيان شبه ضرورية

وغير ضرورية

[قطري2022]

لان المشكلة في اللي على قد حاله و يبي يلبس مثل ما يلبس المليونير ، لو يترك عنه الساعة اللي بستين الف او يمكن الساعة الي بعشر الاف بتأثر على ميزانيته ، بيعيش مرتاح و بيقدر يحوش ، لانه مستقبله اولى بالمبالغ اللي تنصرف على الكشخة الكذابة ، ترى المليونير ابتدى فقير وبدى يجمع و قصر على نفسه في بداية حياته ، وعقب ما جمع راس مال و تاجر فيه و زاد ، ذيك الساعة بدى يدلع نفسه ، لكن ماراح يشخط الفيزا و لا ياخذ قروض ولا يتاجر في عرضه كبعض النساء علشان يصير في مستوى المليونير علشان شنطة لويس فيتون وغيره من الماركات ، القناعة عامل رئيسي في الحياة ، والايمان بالقدر خيره و شره من اركان الايمان.

[حسن]

السلام عليكم
يعتبر فن الادخار مفقود عند القطريين وبخاصة النساء ، على الرغم من ارتفاع الرواتب بشكل تدرجي خلال السنوات الاخيرة ، ومع هذا يعتبر الادخار خارج أوليات الأسر القطرية ،التي تمتاز بنمط استهلاكي ويغيب عنها التخطيط للمستقبل. ولأهمية الموضوع أرجو المشاركة بشكل إيجابي بطرح طرق تساعد على الادخار ومن ثم الاستثمار ، وماهي الأولويات التي يجب ان لا تغيب عند التخطيط المالي للفرد والأسرة وكيف نكسب أطفالنا. تعلم فن الادخار

فعلا احنا لاعندنا سياسه ترشيد ولا فن اختيار ابد مافي كلش
ليش
بعد زياده الرواتب الاخيره والفوائض الكبيره في الاسره
اصبح كل بيت او نقول 90%واكثر يمكن مداخيلهم الشهريه فوق 100 الف ريال شهر
تخيل لو صرفت يوميا 1000ريال وهي استحاله طبعا عندك فائض كم 70 الف شهريا في السنه كم حدث ولا حرج
فاصبح المواطن لايبالي خير شر خميس وجمعه ويكند لندن الكل يتكلم عن القطري مبذر
قبل كم يوم اسولف مع كويتي ونقول نفس الحديث يقول اقول حق قطرين روحو على الطيران التركي رخيص الى لندن يقول بيوفرون 15 الف تنفع للسكن قالو لا نبي دايرك
يقول حنا الكويتين غير نعرف نشلون نستغل
عقولنا في فلوسنا انتو ادفع وبس وعقب تتحندون ماعندنا فلوس وماعندنا فلوس وترزون وجيهكم في الديوان ولا تسون مكاتيب حق الشيخه المياسه مثل اول العام
فشلني بوعبدالله

خل ينزلون الرواتب وبتشوف فن الادخار
الغايه تبرر الوسييله

انت خبرت شعب يعيد برع بلاده وين صارت ذي

تقول ادخار

الحين يقولك حتى اكياسهم مالت الزباله من هارتز

[بشائر]

موضوع في غاية الروعة والفائدة
أشكرك على حسن الطرح ..
وأشكر الأخوان والأخوات لأني استفدت كثير من خبراتكم ونصائحكم ..
جزاكم الله خير جميعا ..

[Roo7MooT]

فعلا احنا لاعندنا سياسه ترشيد ولا فن اختيار ابد مافي كلش
ليش
بعد زياده الرواتب الاخيره والفوائض الكبيره في الاسره
اصبح كل بيت او نقول 90%واكثر يمكن مداخيلهم الشهريه فوق 100 الف ريال شهر
تخيل لو صرفت يوميا 1000ريال وهي استحاله طبعا عندك فائض كم 70 الف شهريا في السنه كم حدث ولا حرج
فاصبح المواطن لايبالي خير شر خميس وجمعه ويكند لندن الكل يتكلم عن القطري مبذر
قبل كم يوم اسولف مع كويتي ونقول نفس الحديث يقول اقول حق قطرين روحو على الطيران التركي رخيص الى لندن يقول بيوفرون 15 الف تنفع للسكن قالو لا نبي دايرك
يقول حنا الكويتين غير نعرف نشلون نستغل
عقولنا في فلوسنا انتو ادفع وبس وعقب تتحندون ماعندنا فلوس وماعندنا فلوس وترزون وجيهكم في الديوان ولا تسون مكاتيب حق الشيخه المياسه مثل اول العام
فشلني بوعبدالله

خل ينزلون الرواتب وبتشوف فن الادخار
الغايه تبرر الوسييله

انت خبرت شعب يعيد برع بلاده وين صارت ذي

تقول ادخار

الحين يقولك حتى اكياسهم مالت الزباله من هارتز


وبيجيك واحد شاطح عقب ماسافر وصرف وفسفس فليساته

الخطوط القطرية ليست للقطريين !!!

[الـقـاسـي]

انا اتبع معاي ابوي طريقه من انا صغير والحمد لله مشت معاي كان يعطيني راتب شهري من وقت المدرسه ويقول لي لو خلصت فلوسك مالي شغل فيك لكن كان يعطيني مبلغ يكفيني
اول شهر وثاني شهر يمكن من اول كم يوم خلصت عاقبني ابوي ثالث شهر ماعطاني شي غير المصروف اللي بداية الشهر نهائيا ومنع حتى امي تعطيني وكنت اروح المدرسه بدون فلوس لكن من بعدها انقرصت وصرت اقسم فلوسي اعرف شنو اللي انا محتاج له وشنو اللي انا مب محتاج له مشيت فتره طويله وانا فلوسي تكفيني لين اخر الشهر بس بعدين صرت اوفر منها واشتري اي شي ابيه

انا ادعي لـ أبوي اليوم على هالطريقه اللي سواها معاي لانها فعلا نفعتني وعلمتني احسب شلون اصرف ووين اصرف
بعد ماتخرجت من الجامعه داومت وكان راتبي وقتها 7600 ريال تقريبا بس كانت مبلغ جدا كافي قبل سنوات
رتبت حسبتي وقعدت افكر انا وقت الدراسه كنت اخذ من ابوي نص المبلغ تقريبا ويكفيني ويزيد ف حولت تقريبا 40% من الراتب توفير وكنت اصرف من الباقي واحاول اني ما اخلص راتبي كامل
بفضل الله والطريقة اللي اتبعها معاي الوالد من اول يوم داومت فيه الى اليوم ماعمري انتظرت ينزل الراتب وانا متضايق او ماعندي فلوس ما مريت بحمد الله بالاحساس اللي اشوفه عند اغلب الربع اللي ماعندهم اي تخطيط في الحياه

تزيد المصاريف وتتغير الاوضاع تقل نسبة التوفير بس احاول قد ما اقدر اني ما اوقف موضوع التوفير والصدقة الجاريه لانها هي اللي تبارك بالفلوس

[kazoze]

السلام عليكم


موضوع حلو واحب الي يفكر فيه واايد وانا من المهتمين في ترتيب اوضاع الصرف وترتيب نوعيه الادخار للمستقبل القريب والبعيد ..

مثال : راتبي 10 الف ريال ( اول شي احط احتياجاتي للشهر والمصروف واقسمه عليه ) نرجع للمثال : احط مصروف 200 ريال في اليوم واقسمها ( 25 ريال بترول 10 ريال فواتير 100 ريال طلبات 25 ريال راتب خدامه بيبقى 60 ريال اذا تم منها شي حطيته في علبه توفير ) وطبعا راح اصرف بهذا المعدل في الشهر 200 × 30 = 6000 ريال ..

خير ونعمه ووفر على قد ما ابغي واذا صار طاري معليه على 1000 ريال او 2000 ريال الحمدلله الراتب يسد الحاجة اهم شي اني انجز كل شهر شي واحس اني سويت شي وماضاع راتبي لشي ما ابغيه ولا استفدت منه .

اما سالفة اني بسافر عادي اقدر اسافر وانا مرتاح :

مثال : وفر 500 ريال وانت طالع 1000 الى 1500 ريال كل شهر تقدر عادي توفرها 500 × 12 = 6000 او 12000 الف او 18000 الف وانت وشطارتك واي وقت تبي تسافر تقدر تاخذ جزء منها تساعدك على الاقل في تقلليل مصاريف السفر ..

لحد يقول ما اقدر او تطلع لي شغلات تخرب على السستم لا عادي رتب امورك شهر شهرين ثلاث لين تضبط معاك اهو شي هو انت وش تبي تصرف من راتبك انت الي تحدد الاهم لك ..

وانا حاضر للاستشارات :nice:

تره على فكره انا ماشي منذ الصغر الحمدلله وحتى هلي علمتهم على ترتيب الامور واعيالي كذلك وكل واحد له جدول مرتب حياته فيها :)

[panda]

سلام عليكم، عندي سؤال من فضلكم نوروني: انا حاط مبلغ في البكك و كل ٣ اشهر اجيني مبلغ اضافي حق الفوائد، هل هذه الفوائد حلال علي؟ بنك المصرف و المبلغ حاطه في سيفيج، و شكرا

[المحاميه]

كلنا نقدر نصرف على اﻻساسيات بس ونخلي الكماليات على صوب
نجاهد نفسنا وبجذي بنوفر وايد
بس محد يبي الصعب
كلنا ندور السهل