الى الخبراء هل السعر مناسب

[الغرناس]

عندي بيت مساحته 735 عرض علي بنيانه عظم وبلاستر مع تمديدات الكهرباء والصرف الصحي ب900الف هل السعر معقول?

[معماري قطري]

نصيحة بدل التعب ووجع الراس سو بيتك بنيان كامل .. بس خل مجال للتغيير والتعديل وخل الأبواب عليك وهو عليه يجهز مكانهم بمارين بلايوود وبلاستر كسآب فريم أو فريم أساسي يركب عليه الفريم، ويترس الفجوات خرسانة وعليه الإشراف على شغل النجار وحماية الفريمات أثناء الشغل، وكذلك الدرايش خلها عليك وخذ نوعية تريحك وتعجبك والمقاول يجهز الفتحات.

الأرضيات حط مواصفات تركيبها على خرسانة ومكان السجاد خله يسوي خرسانة نظيفة .. شوف مواصفة الصبية مع الفايبر عندي في بداية موضوع العقود اللي موجود في التوقيع .. وخل مستوى الصبية للغرف بحيث ما تحط بلاط وركب موكيت مباشرة على الصبية .. والمكان اللي بتحط فيه بورسلان مثل الصالات والمجالس وممكن المطبخ إحسب حساب ارتفاع البلاطة، وخل التوريد عليك وزيد 5 - 10% بس خل المقاول يكون مسؤول عن الإستلام بوصل وعن المحافظة على البلاط .. ما يبقى لك غير التمديدات الكهربية والديبيات وغيرها وبعد شوف مواصفات زينه وخل المقاول يشتغلها صح تحت اشراف استشاري عنده مهندس كهرباء مشرف .. والحمامات وأطقمها خلها عليك وتركيبها على المقاول وبإشراف لازم.

ما ادري شكلي مب قادر أوصل لك كل شيء بس مهم تعرف كم بيطلع بنيانك بالتشطيب كامل وتحسب حسبة المواد اللي عليك وتستفيد من مقاول معاك بدال ما تروح تدور قطاعي وكل واحد يدمر لك أشياء ويعمر لك شيء .. بعدين حط في حسابك إن البنيان على فترة سنتين الى 3 سنين وفي هالفترة ممكن تتحرك وتختار اللي يعجبك ويكون شغال معاك مقاول يقدر يخلص كل شغلات البناء .. أما العظم سهل وكل مقاول يقدر يسويه ويشتغل أي كلام وياخذ ربحه ويخليك كل مقاول يلعب لعبته قطاعي ويطلع ربح براحته وبدون وجع راس عليه.

[captin]

مرحبا الأخ الكريم

اذا كنت تبي تحسب حسبة بلدي سريعة تقسم قيمة العرض
900 الف على مساحة 735 بيطلع لك المتر المربع بسعر 1225 ريال تقريبا.

سعر العظم في السوق يتراوح بين 900 متر الى 1250 يعتمد على الشركة ومستواها
والمواد المستخدمة رغم ان المواد الأساسية وحدة مثل الحديد والاسمنت والطابوق
والخرسانة والفروقات بسيطة في الاسعار بيم مصدر وآخر.



لكن مثل ما قال خبيرنا واخونا معماري وانا بعد أنصحك خلك مع مقاول
واحد واتفق معاه على انك تجيب مواد التشطيب وهو عليه التركيب.

بهاذي الطريقة تضمن التعامل مع طرف واحد بسهولة ومرونة وحتى مهندس
الموقع والفورمن والعمال بيكون عندهم تاريخ وتفاصيل المشروع وبكل سهولة يقدرون
يحلون أي مشكلة تواجههم اثناء التنفيذ.

لذلك إذا انت مقتنع بالشركة ومستواها الفني سو عقد يتكون من جزئين جزء بناء العظم
وجزء فصل فيه أسعار التركيب للمواد وحدد المواد اللي بتجيبها والمواد اللي على المقاول.

موفق إن شاء الله.

[Bozizoo]

وازيد على كلام اخواني الافاضل
ترى مب كل شركه قادرة لعمل التشطيبات بعضهم امكانياته عظم
وينحرج منك يقولك انه ماياخذ تشطيب فا تاكدوا ان الشركه قادره على التشطيبات

[معماري قطري]

ما قصروا الإخوان كابتن وبوزيزو في توضيح ما كنت أقصده .. وصحيح أوقات المقاول ما تكون عنده مقدرة على إكمال الباقي، وفي هذي الحالة من الأفضل والأريح لك تتفق مع مقاول ثاني ممكن يكمل باقي الشغل بالتنسيق معاك .. ولو فيه استشاري شاطر يحسب لك إحتياجات كل مادة وتشتريها وتنسق احتياجاتك معاه بيكون أريح لك وأفضل وعملية الشراء ممتعة وتروح بروحك وتسئل عن المواد وتعرف خصائصها وسعرها وممكن تحصل أسعار وجودة أفضل بوايد من لو يجيبها لك المقاول.

كتبنا وايد حول المواضيع ذي والله يعينك تشوف المواضيع القديمة وتاخذ منها المهم لك حتى ما تسوي شغلة معينة غلط أو مرتين .. مشكلة التنسيق بين عدة مقاولين وخصوصاً مع استشاري مب متفرغ صعبة وايد ولو تخليها على مقاول واحد تكون أسهل وأسرع ودوم خل استشاريك عارف شتبي وفي الصورة وبأوراق رسمية .. ولتنسى تخليه يستعمل التصوير والإيميل علشان يلتزم بالإشراف صح .. أقل شيء الرسائل أو الوتس أب .. حتى يقدر يسوي تسجيل فيديو وصوت ويرسل إذا تعبان يكتب.

[الغرناس]

مشكوووورين وجزاكم الله خير