الكاميرات في المنزل ايجابياتها وسلبياتها

[مضارب دوسري]

السلام عليكم ورحمة الله وبركاته

حبيت افتح موضوع واخذ ارائكم فيه وهو الكاميرات في المنزل ماهي ابرز الايجابيات والسلبيات !

وهل انتم مع وضع الكاميرات حتى لو كلفكم ان البعض يتهرب من زيارتكم خصوصا الحريم ؟

وهل انتي تاخذين راحتج اذا رحتي بيت ملغم كاميرات ؟

هل ترتاح اذا زوجتك او بنتك او اختك راحت لبيت فيه كاميرات؟


اترك التعليق لكم



وشكرا

[ضوى]

شخصيا ماحب الكاميرات ولا احب اراقب ، اشتري الشقا لنفسي ليش ، استودع الله بيتي واهلي وعيالي وخدمي والله خير الحافظين

اما بخصوص زيارتي لبيوت فيها كاميرات ، ماقد فكرت فيها ابدا ، بس اتصور عادي خاصة اثناء الزيارات مانقط العبايات الا بيت اهالينا فقط

[عيون الدوحة]

ضد الفكرة
من راقب الناس مات هم
وحين الواحد عندة وقت عشان يشوف التسجيل

[باندول]

اعتقد انه الي يحط كاميرات في البيت هذا انسان شكاك وماعنده ثقه في هله
بيوتنا وبيوت اهالينا اقصد ابهاتنا مكانوا يعرفون هسوالف قبل
الي يقول الواحد يحط كاميرا عشان يراقب الخدامه
اقوله اذا ماعندك ثقه ليش تجيب خدامه بلاساس

[خزامئ]

ضدها بكل اشكالها
بنشوف شي حنرفي غنا عن شوفه

[asulaiti]

أنا حاط كاميرات في منزل منذ زمن طويل .. وذلك لمراقبة الخدم ..

وفعلاً مفيدة إلى أبعد درجة ..

الخادمة التي تعرف بوجود الكاميرا .. تلتزم في أداء وظيفتها بشكل أفضل نوعاً ما ..
أما التي لاتعرف .. فمعظمهم لا يعملون بالشكل المطلوب .. بل تنظيف أي كلام ..
وأحيانا إذا مافي حد في البيت .. يذهبون لغرفتهم إلى قرب موعد وصول أصاحب البيت ..
تجدهم ينظفون تنظيف سريع سريع .. أي كلام يعني ..

وعلى فكرة .. بعض الخدم . .سواء في كاميرا موجودة أو مافي .. تنظيفها أي كلام وكسل إلى آخر درجة !!
يعني ما عليها من الكاميرات .. وكأنها تقول لنا .. هذا شغلي .. تبغي ولا سفرني !!

عموماً أنا أنصح بتركيب الكاميرات في المنزل .. لمراقبة الخدم ولمراقبة الأطفال كذلك ..
طبعاً لا أحبذ تركيب الكاميرات في المجلس .. لأن الضيوف مهما كان لن يأخذوا راحتهم في المكان ..
وحبذا لو تقوم بتركيب كاميرات ممكن إنك تشيلها مؤقت من الصالة مثلاً لو في ضيوف من الأهل راح يجونكم مثلاً ..
وأول ما تنتهي الزيارة بتركب على القاعدة ويتم تشغيلها .. وهكذا ..
وطبعاً في أماكن تركبها على طول .. مثل المطبخ .. غرفة الغسالة أو الحوش .... الخ

أنا حاليا أراقب بيتي وأنا في أي غرفة أو أي مكان داخل بيتي عن طريق الآيباد ..
ويمكنني مراقبة المنزل وأنا في الخارج .. لكن ما سويتها في الحقيقة إلى الآن ..
لأنني أتبع طريقة التسجيل .. والتسجيل الذي استخدمه هو عند صدور الحركة فقط ..
أي لاتسجل الكاميرا طالما لاتوجد حركة في المكان المصور ..

بالتوفيق للجميع ..

[مراد2015]

انا حاط كاميرات وزينة تخلي الخدم يمشون عدل ويخافون

بس مركبها في مداخل الغرف والسور الخارجي من الداخل بس الصراحة مسيطر على الوضع

الاماكن اللي فيها جلسات (لا)

بس ممتازة

[الصغيره]

انا مع وبقوه

ببيتي كيمرات لمراقبة الخدم وفعلا مفيده جدا وما تخلي اي منهم يلف او يدور او يكذب او يسرق

الاماكن

المطابخ
المخازن
الممرات
الابواب الخارجيه
كراجات السيارات
الشوارع اللي حول البيت

كنت زمان لما اسافر انا والاهل حتى السيارات تستغل بالتاجير او كتكسي واكل البيت ما يتم اسبوع الان لله الحمد صارت هي العين اللي تسهر بالبيت وحتى ونحن مسافرين نفتحها برقم سري ونتطمن على البيت والسيارات ولله الحمد 5 سنوات وحنا بخير معها

ومن قبل لله الحمد الكل يكذب ويسرق لكن الان انتهى كل ذلك

[شيخ الديرة]

عندي كاميرات وهمية تشبه الكاميرات الحقيقية لكنها بلاستيك فقط ورخيصة لا تسجيل ولا شي. حاطها في كم المكانات الأساسية في البيت.لما تجينا خادمة جديدة أشووفها كل الكاميرات ومكاناتها وياخذون حذر من تصرفاتهم بسبب ذلك.

[بنت مريخ]

فكرت أحط كاميرات مراقبه لكثره الخدم في البيت
و لوجود أمي كبيره في السن و ولدي
حسيت أني بييب الشقا لنفسي
في كل طلعه استودع الله اهل بيتي
وبس

[aziz4z]

ضد فكرة الكميرات في البيت , أحسها هاي لواحد شكاك , و أكره الشخص الشكاك , حتى الاسلام أنكر على من يشك , البينة على المدعي و اليمين على من أنكر
بس إذا تحطها لمراقبة الخدم , هاي غير , لأنه بعضهم صراحة الله يستر منهم

[fhd4]

عندي كاميرات وهمية تشبه الكاميرات الحقيقية لكنها بلاستيك فقط ورخيصة لا تسجيل ولا شي. حاطها في كم المكانات الأساسية في البيت.لما تجينا خادمة جديدة أشووفها كل الكاميرات ومكاناتها وياخذون حذر من تصرفاتهم بسبب ذلك.

أفكر اسوي نفس الشي …

[vip-30003]

انا مركب كاميرات ومرتاح جداً

هي لمراقبة الخدم ،، واذا سافرت مهمه ... بالجوال اتشوف بيتك

طبعا الصالات والمجالس محد يركبها ،،

[شيخ الديرة]

أفكر اسوي نفس الشي …


ءنا إشتريتها من هذا الموقع عن طريق البريد، مرة كلموني البريد لإعتقادهم إنها حقيقية

http://dx.com/s/security+camera+dummy

[خزامئ]

انا عاجبتني الكيمرا الوهميه عشان الخدم بس
اما حقيقيه الله لا يحدني عليها

[fhd4]

ءنا إشتريتها من هذا الموقع عن طريق البريد، مرة كلموني البريد لإعتقادهم إنها حقيقية

http://dx.com/s/security+camera+dummy

يعطيك العافية وماقصرت …

[kitmat]

فعلا انا مع وضع كاميرات في المنزل وخصوصا في المطبخ بدون كاميرات الخادمات لايقمن بالتنظيف

[khalid525]

وين تنصحون للي يبي يركب كاميرات من وين يشتريها ؟

[الكنترول]

مهمه الكاميرات في البيت وخصوصاً السيارة ومراقبتها خارج البيت

[مضارب دوسري]

شكرا لكل من شارك
ويعطيكم العافيه

[H B A]

انا مع تركيب الكاميرات لكن بحدود !

اولا الكاميرات فقط على ابواب البيت الخارجيه والداخليه
الكراجات والستور والملاحق الخارجيه للخدامات.

وطبعا تكون واضحه وضوح الشمس .. والكل يدري عنها


والله مايحتاج الواحد يشوفها .. بس من يشوفها السايق او الخدامه
بيحترم نفسه وبيخاف

السايق مايقرب صوب ملاحق الخدامات والمطبخ والعكس


اما اللي يفكر ان يحطها داخل البيت ويراقب اهل بيته هذا انسان مريض الله يشفيه :)

[PIX]

السلام عليكم ورحمة الله وبركاته

الموضوع لو سمحتوا لي ابي أتكلم فيه اشوي

قبل 5سنوات تعرض بيتي لحادث أمني خطير
كادت تروح فيها خدماتنا المسكينة

ومن بعدها ركبت كاميرات أمنيه في حوش البيت وخارج سور البيت
وبشكل واضح جداً ولذلك لنه الحرامي مثلا اصله خواف جدا
ومب غبي حتى يعبث مع بيت صاحبه مركب كاميرات تصوير أمنيه

ومن فتره صارت حادثة سرقه سيارة بيت جيراني في أنصاف الليالي
وكلموني العاصمه بخصوص الحادث وجاوني
البيت وأخذوا من الجهاز ولمدة عدة ايام وردوه لي بعد ما عرفوا الحرامية
والحمد لله

وحادثة اخرى في الليالي كنت سهران اكمل شغالي
ولا بسياره تلفلف في الفريج وبعدها صف راعي الموتر عند بيتي
ونزل دخل بيت احد جيراني
احترت جداً وش أسوي
وبعدها بنصف ساعه تقريبا أشوفه طلع الحبيب
وانا بعد طلعت له وشفته شاب صغير في العمر قطري
ووقفته كلمته ارتبك وقام بيفتن علي
قلت له حبيبي كل شيء مصور شوف الكاميرات عدل
ويوم شاف الكاميرات انهار وتحبب على خصمي وراسي
ويعتذر لي ويحلف انه ما يعودها
الصراحة كسر خاطري هو وكسر خاطري جاري الطيب
اللي كل يوم اصلي معاه في المسجد
المهم تركته وقلت الله يستر عليه ويكون بعون الجار وسكرت على السالفة

وحادثه اخرى عباره عن مشاجرة مراهقين من أعياله الفريج امام منزلي
وصار فيها فلع حصى في الرأس ودم الخ
وبسبب وجود التسجيل قدرت أنا وجيراني نعرف من ضرب من
ومن البادي في المشاجرة وكل التفاصيل ساعتها عرفنا من نعاقب


والحوادث كثيره بس هذه إبرزها

والاهم أنا حاليا في بريطانيا من خمس شهور والبيت ما فيه غير الخدم
وبسبب الكاميرات الموجوده في استطاعتي مشاهدت كل ما يصير في المنزل
في اي قت عبر الإنتر نت ومعرفة الخدم بهذا الشيء
مخلي كل واحد يلزم حده بالتمام والحمد الله
مع أني والله ولا أدري عن الكاميرات الا نادرا ادخل اطمن على احوال البيت