مطلوب نوعية من الزجاج لحمام السباحة

[tawareq]

عندي حمامين سباحة لفلتي وفلة اخوي مساحة كل حمام سباحة 10في 5
وباغطيه من فوق بكويك سبان بمساحة 14.5 في 8 م

بس على جوانب البركة ابي اصكره كامل وتردد اصكره بزجاج 8 ملم او 12 ملم او في نوعية ثانية غير الزجاج .

اتمنى حد يدلني على الطريقة المناسبة وللي يعرف اسم شركة معين الله يجزيه الف خير

[معماري قطري]

إخوي إذا بتسكر بكي سبان المقوس بيكون سهل تركب قطع زجاج من الجوانب بفريم ألمنيوم أو لو تبي تركب طوب زجاجي .. بتواجهك مشكلة سلوب الكي سبان لأنهم يركبون قناة تصريف على الجنب وتكون مايله فبيكون القزاز غير مستطيل أو مربع .. بيكون شكل رباعي غير منتظم.

إذا تحب تسوي شيء حلو والشمس تدخل دوم ركب بلاستيك خاص من طبقتين من سابك، وهذا خفيف ويتقوس بسهولة مع شكل الكي سبان المقوس، وعلى عرض 8 متر تحتاج قطعتين.

شوف إذا بيساعدك أنس بيقدر يشرح لك شلون .. رقمه 55838608 وهو ما شاء الله خبرة يمكن 15 سنة وأكثر في الكي سبان، والله أعلم موجود أو لا .. وعندهم حديد خاص ستانلس ستيل وبيوضح لك طريقة الحماية كيف .. انا مركب نفس النوعية بس سيدة في حوض سباحة يمكن الموضوع موجود في توقيعي لو حبيت تشوف الصور.

الحلول الثانية بتكون غالية خصوصاً لو رحت صوب الإختيار الألماني لكن طريقتهم مسكتة ألمنيوم مقوى بالحديد من داخل وقزاز دبل وانا في رايي ما تحتاج لقزاز دبل ولا تحتاج لتكييف حتى تدفئة ممكن .. عندك بعد الإختصاصي.

مشكلتك في العرض 8 متر يحتاج حديد خاص ومشكلة الحديد يصدي من الرطوبة .. لو تشوف شركة تصبغه لك إيبوكسي مقاوم للصدأ وحامي للحديد بيكون أفضل وتركب حديد بسلوب بسيط وقزاز مقوى بأسلاك فوق أفضل لك .