:::...اليابانية المسلمة واليهودي...ع قمة جبل فوجي...:::

[The Master]

هلا ومرحب ب الجميع...

لاتفكرون واجد...اقروا اول الاسطر وبيشدكم الموضوع...وبيمر الوقت وانتوا ماتدرون...اهم شي عيشوا الاحداث...








اممممم...ياترى من وين ابتدي رحلتي... خل نرجع كم سنة للخلف...واكون صريح اكثر خلنا نرجع سنيييين للخلف...لما كنت صغير واتابع رسوم الكرتون...مازنجر، رعد العملاق، غراندايزر...الرجل الحديدي...كان يلفت انتباهي ذاك الجبل الكبير دايما ف الخلفية...صاحب القمة البيضاء... اسمه جبل فوجي... مرت الايام كبرنا ولازلت الذكريات ف مخيلتنا...وها نحن وصلنا اليابان...وارجولنا حطت ع اراضي وطن العجائب...وخلالها رحت جبل فوجي...ووصلت له...لكن فقط تحت ماقدرت اطلع للقمة...ممنوع...طيب ليه...هالوقت لايسمح ل اي شخص...طيب عطني السبب...الجبل يكسوه الثلج...ومستحيل اي شخص يتسلقه. حزنت...ورجعت وانا اسحب اذيال الهزيمة...لكن بنية اني ارجع لليابان واتسلقه واوصل للقمة...ك هدف ف الحياة...لكن كان هناك مالم يكن ف الحسبان...ف الرحلة تخللتها الكثير من المغامرات والمواقف...اسرد بعضها لكم...





نطلع شوي ع جنب ل تعريف بسيط جبل فوجي أعلى قمة في اليابان، يبلغ ارتفاعه 3,776 مترا. يمكن أن يرى الجبل في الجو الصحو من العاصمة اليابانية طوكيو. يعرفه اليابانيون باسم "فوجي سان" وسان تعني السيد...يعني ينادونه ب السيد فوجي... هو جبل بركاني...خامد ل مايقارب 300 سنة... ف اغلب سطحه هو صخور بركانيه...ورمال... الطقس في جبل فوجي بارد جدا ويغطي قمته الثلج على طول فترة الشتاء. تبلغ درجة الحرارة الدنيا −38.0 °C، بينما سجل أعلى درجة حرارة في يونيو 2008 بمقدار 17.8 °C






نرجع لموضوعنا... خططت ونسقت...استخرت وقررت اني اسافر اليابان فقط عشان اتسلق جبل فوجي...عملت البحث والتنقيب ولقيت افضل موعد يناسبني...وكان تاريخ 19/08/2013 وحجزت مغامرتي ل تحقيق احد احلامي وهو تسلق جبل فوجي...وكانت تستغرق يومين للتسلق...ورتبت اموري...ووصلت اليابان...





ليلة قبل الذهاب لجبل فوجي... كالعاده...احب احوس واتمشى...في طوكيو... المغرب كنت في محطة القطار ...واقف انتظر...لمحت واحد طايح خز فيني...طبعا ما افتكرت كثير...لاني بالنسبة لليابانيين طويل وضخم...ف متعود ع الخز والتبصبص صحيح ان قبل كنت اعتقد عشان اني كيوت...لكن الكيوت بنفسه قال لي ما اعرفك...المهم...هذا قام يقرب ويقرب...وحسيت انه يبغي يطل ف وجهي... طبعا انا بكل ثقه...وغرور المزايين...قلت اكيد يبغي يشوف جمالي الفتان...ف قلت خلني اعطيه نص فيس عالاقل يرضي تطفله... التفت عليه...اوووه...انته عربي؟؟...اي نعم...من وين؟...من قطر...يا اهلا وسهلا...اهلا بك ماتشرفنا بالاسم...انا بركات من مصر... اها ازيك اخبارك ايه...اوه بتتكلم مصري كمان...لا لا بس هالكلمتين...ماتشرفنا ب اسم حدرتك؟...معاك علي...لنا الشرف ... اااااه هوا انته رايح فين؟... مدينة شينجوكو... بجد واللهي؟...انا كمان... طبعا انا اعيوني اصغرت وعطيته نظرة اللي ع جنب... ركبنا القطار...قال لي قصة حياته...لكن ف النهايه عزمني ع حفلة عشا امسوينها حق المسلمين ف طوكيو يحتفلون ب مناسبة عيد الفطر...ف سالته قلت له في اكل ف الحفلة ؟؟ قال لي اماااال ايه طبعا اكيييد... قلت له اتدل المكان ولا ادليك؟؟؟

طبعا اخينا بركات شغال في شقق فندقيه...الأولوية للمسلمين...او غالبا ياجرون للمسلمين...وهو شغال ف الريسيبشن ومعاه واحد جزائري وواحد بنغلاديشي...

وصلنا للفندق...دخلنا اللوبي...مجموعه من المسلمين كانت موجوده...هاي هلو كونبانوا السلام عليكم...قعدت...وقطيت وجهي ع واحد سوري وقعدت اسولف معاه عن سوريا والاوضاع السياسية... المهم شوي والا اشوف وحده داشه ومتحجبه ومتستره...لفتت انتباهي...شوي والا شكلها مب من المألوف...كان شكلها اسيوي...توقعت اندونيسيه او ماليزيه...لكن شكلها مختلف عنهم...سالت الجميل بركات...قال لي هذي يابانية...توها من فترة اعلنت اسلامها...عرفني عليها... ودار بينا هالحوار...

الحوار كان بالانجليزي...

ماشاء الله...جميل لباسك وحجابك...شكرا سمعت انك مسلمه؟...اي الحمدلله انا مسلمه من متى؟...من 5 شهور...اووووه يعني لسه فريش...ابتسمت... طيب ممكن اعرف كيف اسلمتي؟...او اخترتي الدين الاسلامي؟...هل في اسباب معينه او مواقف صارت لك... قالت انا من 3 سنين وانا ابحث ف الديانات...مريت على الكثير...وقريت كتب...وماشفت ديانه اصدق او اكثر واقعيه ومنطقيه غير الاسلام...

طيب انتي وش ديانتك؟...انا شنتو"هندوس...تعبد الصنم"...لكن عمري ماكنت مقتنعه ب هالديانه...

شي جميل...وهل كان عدم اقتناعك ب ديانتك هو السبب ف بحثك عن ديانه اخرى؟...لا لم يكن هو السبب... من 3 سنوات...وانا اعمل ف مجال التجهيز ل المؤتمرات...قابلت رجل اعمال مسلم...خليجي...وكان ف اواخر الاربعين من العمر...اعجبتني اخلاقه وتعامله مع اللي حوله...وكم مرة تحدثت معاه وكان مثقف وعقلاني...واجاباته دائما اتكون مرتبطه ب الدين الاسلامي...ف قال لي اخلاق المسلم هي اخلاق الدين الاسلامي...وهنا قمت افكر ...هل لما اغير ديني بكون نفسه؟...بس يمكن في ديانات افضل من الدين الاسلامي...وهنا قمت ابحث واقرا...واللي جعلني اقرر اني اختار الاسلام...هو معرفتي بعدها ب شاب ف الثلاثين من العمر وهو من عمري...مسلم جزائري وكان مجرد صديق...انعجبت ب اخلاقه...وتصرفاته...وكلامه...وكان يعيد لي نفس ماكان يفعله رجل الاعمال الخليجي...وهنا قررت ان افضل ديانه هي الاسلام...وأسلمت

طبعا هناك صعوبات تواجهها مثل كيف انها اتروح ب الحجاب ل الدوام...وكيف اتفاتح اهلها ب انها اسلمت وهم من الناس اللي ينبذون الاسلام وهذا بسبب تظليل الاعلام الموجه للمسلمين ف العالم...وكذلك كيف انها لازم اتغير نمط حياتها بشكل كامل من ناحية تعاملها مع الذكور والسهرات والشرب... ف عطيتها بعض النصايح العلاويه...والله يثبتها يارب... وتعشينا العشى من يد الحلو الشيف بركات...ملوخيه ب اللحمه...طبعا اغلبنا عقب ماطلعنا رحنا ناكل اندومي...بس الله يعطيهم العافيه ع الجهد المبذول والسعي للخير...









اليوم المشهود... يوم تسلق جبل فوجي... قمت صليت الفجر عالساعه 5 ونص تقريبا...وخذت معاي اغراضي...الكيمره والعدسات...وكم بطاريه اضافيه للجوال...وجاكيت عشان البرد...ووصلت للمحطه اللي بنتلاقى فيها مع المرشد... ع حسب الحجز...عطوني شنطه باك باك احط فيها اغراضي...وجوتي للجبل...وعصاتين عشان الثبات...ولمبه تربطها ع جبهتك عشان الظلام... ركبنا الباص...كل شي امرتب...وامنسق..الباص يشيل تقريبا 25 شخص...وكل واحد اسمه ع الكرسي... دورت وين وقعدت مكاني ...وقعد جنبي هندي...اي نعم هندي...

هلووو هلوووو ...وكل واحد فينا يهز راسه يعني ترحيب متعارف عليه... المسافه عشان نوصل جبل فوجي تقريبا ساعتين ونص...ف قلت خل انسولف مع شنكر...

وهنا الملخص للدردشة... هندوسي نباتي عمره 35 سنه وهو معيد في جامعه ف اليابان...وعنده دكتوراه تخصص علمي من الهند...وهو ف اليابان عشان بيكون مدرس ف الجامعه...اذا تم قبوله...له سنه عشان يثبت نفسه... وقال خلني اطلع جبل فوجي يجيني الالهام...وبما ان عندي اجازه اسبوع وتذكرة بلاش من الجامعه... ماتزوج للحين...يقول للحين ماشفت الدنيا وماحققت طموحي...طبعا هندوسي... ومتبهدل مب لاقي اكل...لانه ماياكل لحم ولا دجاج ولا حتى سمك...فقط الخضراوات...

المهم قربنا...وباقي نص ساعه...انا متشقق حدي...ومستانس...اخيرا بحقق حلمي...وباتسلق جبل فوجي...وهدف من اهدافي ف اللسته وباحط عليها تك...

وانا غايص ف احلامي صحيت ع كلمة المرشد يقول ان التسلق مب سهل...ويحتاج جهد واصرار وعزيمه...وقوه...وصبر... انا قمت اتلفت...وبلعت ريقي لين نشف ومابه ريق...طالعت شنكر وقلت له اشدخل يقول انه صعب...قال لي ليه انت ماقريت دليل التسلق والخطوات والتنبيهات اللي طرشوه ب الايميل؟...قلت له لا ماقريته بس طالعت الصور ... هز راسه شنكر انه اوكي وقال...دونت ووري...ايم ويذ يو...ايفري تينق ويل بي فاين...

القروب اللي احنا فيه كان فقط اجانب بدون اليابانيين...ومعانا مرشدين اثنين...واحد اول القروب وواحد اخر القروب...

طبعا انا متحمس...الجو كان براد...وهوا عليل...وغيم يمر عليك ويتخلل اصابيعك...هوووو هووووو... جا المرشد وقال الحين الساعه 10 ونص...الصعود للقمه يحتاج 6 ساعات تقريبا...لكن بنشوف ع حسب عطائكم وقدرتكم...

هنا شوي تكدرت...واجد 6 ساعات...بس قلت يلا الواحد جاي عشان هالشي... حطيت الشنطه ع ظهري...وشريت لي ماي وكافي...وقلت يلا بسم الله...

طبعا ف البدايه...انا كنت مع المرشد قدااااام...سوالف وضحك ونكت...طبعا لاهو فاهم لي ولا انا ب مفتكر...عدت نص ساعه...شوي الا بوحسن قام يخف الريس... ساعه عدت...الا انا ف النص... ساعتين الا انا قبل الاخير...حسيت ان عندي الحوض شوي قام ينغزني... الصعود كان مشي ع حصى ب زاويه مرتفعه ...ومنها كان تسلق ب استخدام اليدين...ومنها كان صعود الدرج... وكنا كل نص ساعه ناخذ بريك 10 دقايق...وتقريبا خلال المشي للصعود...في مكان لشراء الماي والعصاير...وحمامات انتوا بكرامه...



http://ae7m.com/blog/wp-content/uploads/2013/11/20100728_Climbing_Mt_Fuji_6304.jpg




http://ae7m.com/blog/wp-content/uploads/2013/11/climb_fuji03_sunrise-only_high.jpg







المهم عقب ساعتين حسيت ب الم ف الحوض...قمة الفخذ...بس كنت امشي...ومستحمل... عقب ساعة...حسيت ان فخذي اليمين...صاده نفس الشد...والم...قلت يمكن لاني اضغط عليه واجد ف الصعود...ف قمت استخدم اليسار عشان اتخفف الوزن...عقب نص ساعه...صادني شد ف اليسار...لااااااااااا...هنا فعلا تعبت...ماقدرت...بس قلت لازم استحمل...سالت المرشد الحين حنا خلصنا 4 ساعات يعني باقي ساعتين صح؟...قال لي تونا الحين ف المنتصف...وشوووووو...اي لان انتوا بطيئين...ف يبغيلنا يمكن 4 ساعات... هنا انا قررت...اني ماراح اكمل...ماقدر...خاصة لما شفت وحده معانا صادها صداع الجبل...وقامت ...mountain sickness" اترجع ...قدامي... "تعريف صداع الجبل

طبعا هو يحدث نتيجه الارتفاع...وقلة

الاكسجين...ف يسبب صداع ودوران...وللحد من هذه المشكله هو التنفس العميق...على فترات...ولا بتاكل هوا...

ف لما شفتها قررت مع نفسي...اني بارجع...مايسوى علي هالغثى والشقى... قال لي المرشد وين رايح؟ قلت له بارجع...قال وين بترجع؟...قلت له بانزل تحت... قال لي الطريق اللي احنا جينا منه هو فقط للصعود...مالاحظت التسلق باليد والحصى البركاني والارتفاع...قلت له اي...قال لي مستحيل تنزل والحين وقت الغروب...وبيجي الليل... قلت له طيب كيف ارجع...قال لي في طريق للرجوع...بس لازم تصعد للمنطقه الثامنه...قلت له احنا وين الحين...قال لي السابعه...قلت له طيب بنستحمل وبنطلع...قلت له كم يبغيلنا...قال لي تقريبا ساعتين...نعمممممممممممممم... الدمعه بغت تنزل...لكن تمالكت نفسي...وقلت يلا امرنا لله...لازم نطلع...معاكم...



http://ae7m.com/blog/wp-content/uploads/2013/11/climbing-to-mount-fuji.jpg





http://ae7m.com/blog/wp-content/uploads/2013/11/DSC_0277.jpg











صعدت معاهم...خطوة بخطوة...رجل رجل...حبة حبة... وصلت للقروب اللي انا معاهم...لقيتهم ماخذين بريك...وانسدح ع الحصى من التعب... جاني واحد...قال لي من وين؟...قلت له من قطر...قال لي مرحبا... استيقظت من سباتي...وتعدلت...قلت له اتعرف عربي... قال لي شويه شويه...قلت له انت من وين؟...قال لي من اسرائيل...طبعا سمعت الكلمه قام علم فلسطين يرفرف ف مخيلتي والقدس والفلسطينيين... ورجعت للواقع...قلت له اها...اشر لي على بنت معاه...قال هي خطيبتي...قلت هي بعد اسرائيلية؟...قال لي اي... جات خطيبته ومدت لي بيدها شي كانت تاكله...قالت لي هذا شيبس...تفضل...قلت لها شكرا وراحوا...ارتحت شوي...وبنكمل...جاني الاسرائيلي...وقال لي عطني شنطتك...قلت له ليه...قال لي باشيلها عنك...قلت عادي الشنطه مب المشكله...رجلي المشكله... قال لي عطني الشنطه شوي...شالها وقال هذي بروحها 10 كيلو...فما بالك رجولك شاله وزنك...وفوقها هذا الوزن من الشنطه...اكيد بتتعب...خاصه ماعندك لياقه وما اتمارس تمارين... كلامه كان منطقي...وقلت له صح كلامك... قام وحط الشنطه ع ظهره...وقال خذ شنطتي خفيفه...شيلها... استغربت من تصرفه...وطيبته...شكيت انه يهودي...قلت يمكن اسرائيلي...بس مب يهودي...يعني عايش هناك... قلت له امسك شنطتك...وعطني شنطتي...انا جبتها معاي...وانا باكمل طريقي بها...





كملنا الصعود...والتسلق...طبعا انا الاخير... لين وصلنا المحطه الثامنه...سالني المرشد...ها بتكمل...ولا بترجع...قلت له مادري...دام اني وصلت ماباقي شي... قال لي حتى لو انك بتنزل...على حالتك هذي ماظن بتقدر...قلت له ليه...قال لي لان النزله كلها رمل بركاني...يعني حصى صغير...وسهل الانزلاق...وزاوية النزول حادة...وغير هذا الحين ظلام...وهو ع حافة الجبل...وتحتاج اتكون مرتاح والضغط كله ف النزول بيكون ع الركبه...وانت فخذك مصاب... قلت له وين الطريق للمحطه التاسعه...هيا بنا... واحنا نرتاح ف المحطه الثامنه...المرشد يسأل القروب...من فيكم النباتي...طبعا شنكر اول واحد رفع يده...وعقب انا...قال لي انت نباتي؟؟...قلت لا انا متوحش واكل اللحوم...بس لازم طريقه معينه...قال لي طيب...ولاحظت ان الاسرائيلي وخطيبته بعد رافعين يدهم...سالهم...قالوا له احنا ناكل سمك...وبيض...بس اللحم لا...هنا عرفت انهم يهود...لانهم نفسنا لازم طريقه ذبح معينه...



http://ae7m.com/blog/wp-content/uploads/2013/11/climbing-map-HP1.jpg












الحين باقي ساعتين...من المحطه الثامنه الى التاسعه...وهي الاخيره... طبعا انا دايما الاخير...وانا امشي اشوف وحده معانا صفت جنبي...شوي والا انا طايفها...له له له...ليكون صرت سريع؟؟...عقب اكتشفت انها مرهقه حدها...وخلاااااص...اتعبت...تمشي بالموت...واتحاول...ومعاها وحده اتساعدها...وكل شوي تنطرها...ف هنا انا ارتحت شوي...عشان مايكون اللوم علي اني اللي مأخرهم... خذنا بريك ...طبعا اللي مرهقه كانت توها واصله...طلعت تايلنديه...ف قلت خلني اخفف عنها...واعطيها كلام يشجعها... قلت لها...ترا عادي وبنوصل ...ولاحقين ع القروب...مافيها شي انك اتكون الاخير...انا من بدينا الرحلة وانا كله الاخير...فا عادي... هنا طالعتني شوي ونزلت راسها...وقامت اتصييييح... انا مافهمت الموقف...المفروض انها اتحسن حالتها...بس عقب اكتشفت... ان هي فكرت...كيف هذا الدب اللي كان الاخير ينصحني...ف استحقرت نفسها ووضعها...احم


ها بشروا؟؟ عسى ماتعبتوا؟
استمتعتوا؟...
يلا...
نوافيكم ب الجزء الثاني...:shy:

[The Master]

وصلنا للمحطه التاسعه...يوهووووووووو اولييييييه اوليييه اولييييييييييه...اخييييرا... وكان السكن وغرف النوم لنا...تعشينا...طبعا عشاهم كان كاري مع عيش...ماكلت شي منه...ابغي احط راسي ارتااااااااح...جانا المرشد ويقول...احنا تاخرنا واجد...وبدال ماناخذ 6 ساعات خذنا 8 ساعات ونص... والحين الساعه 8 ف روحوا ارتاحوا...وقوموا الساعه 1...بالليل...عشان نطلع للقمه... قلت له للحين ماوصلنا؟؟...قال لا...عشان اتشوف الشروق...لازم نطلع القمه والشمس تشرق الساعه 4 ونص ونحتاج ساعتين ونص عشان نوصل... قلت له كم ساعه مشي؟؟...قال لي ساعتين ونص...حد يقطني من فوق الجبل يالربع؟؟...لاااااا...

المهم رحت انام...وقمت ادور وين سريري...الواحد يبغي ينام...وكان برد...كنا ف ارتفاع 3400 متر... وصلت للغرفه...قلت بس الحين ذاك السرير الداااافي...والدوشق اللين اللي باتمقط عليه...فتحت الستاره...شوي والا 19 واحد داخل!!! وات ذا ؟؟؟ الغرفه كانت طابقين خشب وممر ف النص...عاليمين خمسه فوق وخمسه تحت ويسار خمسه فوق وخمسه تحت...لا وكان من خشب...وكل واحد له سليب باق...اندعس داخلها...وسكر عليك... قعدت ادور وين مكاني...قالوا لي هنا...كنت عالطرف...ويساري...اليهودي...ياحبييييييبي... كان امسوي لي سعه عشان حجمي... انبطحت...ومع الوقت لصق فيني اليهودي...نعم ياخويه...لاصقين ف بعض... ترك خطيبته الشقرا وجا صوبي الظاهر حس ب الدفا...يا ليل ما اطولك... استروا ع ما واجهتوا...

المهم...اول ماحطيت راسي ابغي انام... واول ماراسي لامس المخده...حسيت ان الدم ف جسمي كله طلع لمخي...وكنه زننننننننن...شعور غريب...ويبتدي الصداع...من حطيت راسي...الساعه 9 لين الساعه وحده وانا صاحي...ماقدرت انام... طلعت معاهم...ووصلنا القمه



http://ae7m.com/blog/wp-content/uploads/2013/11/مƒ•م‚،م‚¤مƒچمƒƒم‚¯م‚¹و§ک3__FL_480_320__.png





http://ae7m.com/blog/wp-content/uploads/2013/11/torii-near-summit-of-mt-fuji-honshu-japan-volcano-volcanic-cone.jpg





هنا انا امصورني شنكر...لحد يركز عالوجه...شنكر المفهي امصورني وانا اكلمه...





DSC_0970_1





...ولما طلعنا فوق ماخذت معاي اي شي...لاشنطه ولا كيمره ولا شي غير الجوال...الكل مستمتع بالمنظر...وانا متسندر...حددددي... وانا واقف اشوف الشروق...اشوف شنكر ينتفض...رحت له...كان وجهه شاااحب...وشفايفه بيضه...كلمت المرشد...شافه وعطاه ماي...قال له اشرب ماي كثير...وكل موز...وكل كافي... هنا لما شفت حالته هانت علي حالتي...ونزلنا... ورحت انام ساعتين...



هنا كم صوره تصويري واحنا فوق...





http://ae7m.com/blog/wp-content/uploads/2013/11/DSC_0963.jpg



http://ae7m.com/blog/wp-content/uploads/2013/11/DSC_0960.jpg





وهذا طريق النزول





http://ae7m.com/blog/wp-content/uploads/2013/11/DSC_0962.jpg








هنا فيديو واحنا فوق قبل النزول...

اول فيديو توني صاحي عقب ساعتين نوم عالساعه 8 تقريبا
لحد يعلق عالفيديو...ترا بجد ماكان حق تقرير او شي...وانما لي وعبط...ف اشارككم فيه عشان المناظر... :shy:

وصبح صبح...



https://www.dropbox.com/s/01boy29ujb3u2ce/MOV_0966.mp4

وهذا فيديو يوضح طريق النزول...



https://www.dropbox.com/s/7mghi4s47lm5hvq/MOV_0967.mp4









انا كنت متفائل...خاصه اني بانزل...وباوصل سطح الارض الطبيعي...اخيييييرا...ف هذا كان معطني طاقه وقوه...



IMG_20130820_173216







حددوا ان وقت النزول بيكون الساعه 8 ونص...ف قمت وتريقت...عطونا سمك وعيش...كلته غصبن علي...لازم...وشربت لي اثنين فيتانين سي يالبالفيت طاقه...وشريت لي مطارة ماي نص لتر... قالوا لنا النزول بياخذ 4 ساعات تقريبا...بس لازم اتكونون حذرين...لان الارض اتسلب واتزحلق...وقريب من منحدر...وزواية ...ولازم انغطي الفم ب واقي...لان الارض كلها تراب ويطير ف الهوا...ومب زين يدخل جسمك... وقال لنا لازم نوصل المحطه الاساسيه قبل الساعه 1 ونص...اذا تاخرنا بيروح عنا الباص...





اول ماحطيت رجلي ع الطريق للنزول...ادوس برجلي احس انها بتغوص...ف استعجل وارفعها وامشي... حسيت ان الموقف مب سهل...والطريقه صعبه وخطره... مشي كم متر...شفت اني عرفت كيف...ف كملت...شوي والا رجلي اتسلب...ابغي امسك بريك ماقدرت...قربت من الحافه...لازم اوقف...تذكرت ان عندي عصاتين عشان اتكي عليهم...وانزلهم ف الارض بقوه...وهنا قدرت اوقف



هالصوره للتوضيح من تصويري...


http://ae7m.com/blog/wp-content/uploads/2013/11/DSC_0957_2.jpg









...وبس عقبها قمت امشي بحذر...والتفائل قام يقل... شوي والا الامريكيه اللي معانا سلبت رجلها وتزحلقت...وتقلبت كم مره وكانت وراي...لين اوصلت رجلي...ووقفت...ولا كان شلتني معاها...هنا التفائل صار صفر...وبدا التشاؤم...





هالصور لتوضيح نوع التربه...


http://ae7m.com/blog/wp-content/uploads/2013/11/IMG_3244.jpg




http://ae7m.com/blog/wp-content/uploads/2013/11/fuji-047.jpg







الجو حار والشمس صاقعتنا...فصخت الجاكيت...وكنت لابس تيشيرت اسود...ف خذ الحرارة والامتصاص...وكان كتمه...مافي هوا...انا صادني التعب...ونقص ف الاكسجين...خاصه بوجود قناع الفم...يقلل دخول الهوا...ف قمت اتنفس بصوت...وكنت مستعجل واضغط ع نفسي عشان ادري اني اذا تعبت باتاخر...ف ماكنت ارتاح...واكمل...عقب ساعتين...صادفتني وحده قصيره...توقعت انها يابانيه...تبغي اتسولف معاي...وانا حتى النفس ماقدر اخذه...ف ماكنت فاضي لها...لكن استحيت ف كلمتها...طبعا من بداية الموضوع وخلال نص ساعه هي اللي اتهذر بس...عن نفسها...وانا بس اها...اووووه...يس يس....واي...ريلي...اووووه... اطلعت كورية عايشة ف اليابان...متزوجه ياباني... عمرها 65 سنه وزوجها 70 سنه...تعرفوا ع بعض ف امريكا وتزوجوا هناك...عندها ولد وبنت...طبعا سبب وجودها ف جبل فوجي...اتقول انا كنت مدرسه وطلعت تقاعد من 4 سنيين...وحسيت اني فاضيه ومتملل...ف قلت حق زوجي وش رايك انتسلق جبل فوجي...هو ماقدر يجي معاها عنده شغل...ف قالت خلاص انا باروح بروحي استمتع...وهذي يمكن المره ال 4 اتسلق...

فاصل..."هذي اذبحها؟؟...ولا ازنطها...اقهرتني...الحين انا متحسف قد شعر راسي...وتووووبه اطلع جبل ف حياتي...وانتي عمرك 65 ولانك متملله جيتي هنا وبروووحك؟؟"

واتهذر واتهذر...وانا ماسمع شي...غير الهوا يدخل جسمي ويطلع...شهيق...زفييييير...شهيق زفييير...

قالت لي وش رايك نرتاح شوي هنا...انا ابغي الفكه منها...قلت لها لا لا باكمل...عشان هي تقعد وانا اروح...قالت لي اوكي اكمل معاك...وتستمر ف الهذره...عقب شوي قالت وش رايك انريح هنا...وانا تعباااان ابغي اخذ نفس ارتاح...قلت لا لا باكمل...عشان هي تتركني وتقعد واروح...وعقب بارتاح...قالت شكلك قوي يلا انا معاك... لزقه لزقه...

شوي وهي اتهذر ...تزحلقت رجلها...وطاحت...قلت انا "يسسسسسس" ومديت لها يدي اقول لها عسى ماتعورتي...بسم الله عليك...لازم ترتاحين...روحي اقعدي لازم ترتاحين تعبتي...قالت لي اي لازم ارتاح...يلا اشوفك عقب...

وانطلق ك الطير الحر...مشيت حوالي ربع ساعه...ولقيت مكان للقعده...حجر امسطح اسود...قلت بس هذا هو... اول ماقعدت ع الحجر...اي اخ اوتش اوووه...الحجر كان حار ويقزز كنه فيه ابره...طحت ع التراب...وقعدت...والشمس صاقعتني ف جبهتي...لا مفر...

5 دقايق...شوي والا ناس مارين من قدامي...والا معاهم الكوريه سوالف وضحك...مالت...يابالفيت اني سريع...







http://ae7m.com/blog/wp-content/uploads/2013/11/IMG_1313-u4nj8k.jpg











المهم قمت وكملت...سالت كم باقي عن المحطه الاساسيه...قالوا لي ساعتين ونص... قلت يلا بسم الله... لكن ...ماقدرت...الجو كان حار...وصخة رطوبة...مافي نسمة هو...والشمس ع راسك...خاصه انك ع ارتفاع 3000 متر...ف الشمس قريبه منك... ولما تتنفس مافي هوا...كنك ماتتنفس...قطيت قناع الفم...وكل خطوتين اوقف اخذ نسم... حتى وانا قاعد ماقدر ارتاح...الشمس ع راسك وحاااااره...ومافي هواااا...اتحس مافي اكسجين ف الهوا...ابدااا...يعني ماتاخذ كفاااايتك... من التعب والارهاق...كنت اطالع الارض تحتي...احس انها تتحرك...سرااااب...قلت اييييه شكله قرب زوااالك...وقمت افكر...ياترى هل باوصل ولا لا؟؟... انا وش كنت افكر فيه لما قلت باتسلق جبل فوجي؟؟... ليه هذا العذاب كله؟؟...بس عشان اشوف شروق الشمس؟؟...بس عشان اقول حق نفسي اني تسلقت جبل فوجي؟؟ انا ليش هنا؟؟...وش اللي جابني؟؟...ليش؟؟ ليش؟؟...

طبعا الخطوات صارت ابطئ...والوقوف صار اكثر...صداع...ضيق تنفس...عطش ماعندي ماي خلص...وباقي ساعه ونص عشان اوصل... ياناس...مافي حل؟؟ ماينفع اتدحرج واتقلب يمكن اوصل اسرع... مافي حد يشيلني...مافي حل؟؟...

شوي والا المح من بعيييييد...شي غريب...شي مش طبيعي...كبير الحجم...والوان... حصان...لقيت حصااااان...قربت شوي ...اشوف احصنه...كم واحد...وفي كم شخص معاهم...قلت ان شاء الله اللي في بالي صح...ان شاء الله اللي ف بالي صح...وصلت عقب معاناه...سالته مايعرف انجليزي...ادور حد يترجم...لقيت واحد يطقطق انجليزي...قلت له والنفس عندي منتهي...هل عنده حصان يوصلني المحطه الاساسيه...؟ ساله ،رد علي يقول اي يوصل بس غالي...قلت له لو ب مليون ماعندي مشكله...اهم شي يوصلني...قال لي يقول انه بيكلفك 12 الف ين...يعني تقريبا 600 ريال...قلت له هااااااااااات...هات وهاك بخشيش بعد...جابوا لي ذاك الحصان البني...ولما وصلت ابغي اركب...قال لي لحظه...انت دب ماينفع...جيب الاسود...وركبت...قلت له كم باقي...قال لي مشي ساعه ونص...بس بالحصان 45 دقيقه...قلت له الحمدلله يارب...انطلق ياحصان طرواده "اشدخل"...

وبس ركبت الحصان...وانا شغال دق رقبه...من الحصان ومني...والهوا يهفهف علي ويطير شعري يمين يسار...ياويييييييييييلي...يازين الحياه زينااااه...وامر ع العالم...اللي يلهث واللي مايقدر يتنسم واللي دايخ...وانا شامخ واقف ضد اي تحدي...

ووصلت المحطه ...وتوقعت اني وصلت قبل ناس واجد...لكن مع ذلك كنت الاخير...احم



اخييييييييرااااا




http://ae7m.com/blog/wp-content/uploads/2013/11/fuji311.jpg











رحت اشرب لي ماي...لقيت واحد من القروب شكله ياباني بس مب ياباني...سالته انت من وين...قال امريكي...لكن اصلي ياباني...قلت اشعندك هنا سياحة؟...قال لا جاي ادرس...قلت له تدرس ياباني؟؟...قال لا ادرس ديانه...استغربت قلت له اي ديانه...قال لي الاسم بس ماتذكرها... قلت وهذي قديمه؟؟...قال لي لا...توها جديده من 20 سنه...احم قلت طيب وش اساسها...قال انك اتعيش مثل ماتبغي...اهم شي ماتضر اي انسان...وتتبع اله... قلت هذا الاله صنم؟...قال لي لا وانما اله سماوي... قلت طيب وش العباده عندكم؟...قال ابدا بس اتقول انك من ديانتنا...واتعيش حياتك اتسوي اللي تبغيه...كيفك...وعندنا نفس الكنايس تدخلها وتتعبد... قلت له وانت ليه تدرسها...قال لي لا ابوي هو اللي صنعها...ف انا لازم اتعلمها وانشرها... قلت طيب كم عدد اللي ادخلوا هالدين...يقول مليونيين"2 مليون"...قلت عدد كبير...قال لي لا مب كبير...هذا ولا شي مقارنه بالديانات المنافسه...قلت من وين اغلب اللي ادخلوا دينكم؟ قال اغلبهم من امريكا واستراليا واسيا... قلت له اوروبا؟...قال لي لا لا هذول مسيحيين وصعب تقنعم...وعندهم منظمات اتحاربنا وتمنعنا... قلت طيب العرب المسلمين...قال هذول ولا فكرنا نجي صوبهم...هذول مستحيل يغيروون دينهم...عندهم طريقه صعبه ف الحياه والتفاهم...ويمكن اذا رحنا لهم يقتلونا...

المهم شكرته ع المعلومات وتركته ابغي ارتاح...

لقيت الحبيب شنكر...ها اخبارك...قال لي احسن...قال ها استمتعت...قلت له هالمحصله

"الواحد يدفع عشان يرتاح...وانا دفعت عشان اتعذب..."


هذي رحلتي ل تسلق جبل فوجي...صحيح اني تبهدلت وتعذبت...ويمكن بعضكم يقول وش اللي حاده...بس احس اني حققت هدف...وطموح...يمكن شكليا مافي فايده...لكن ضمنيا...اشيا كثيرة تغيرت فيني وفي شخصيتي...

مب امعلق ع النقاط والمواقف اللي سردتها لكم ف الموضوع...اخلي لكم حرية الاستنتاج...والشرح...

السموحة عالاطالة...لكن تجربة عشتها...وحبيت اني اشرككم فيها...

اخوكم علي المضاحكه...

الموضوع اخذ مني 3 ساعات كتابه... واخذ منكم تقريبا 18 دقيقه قراءة...

اتمنى انكم استمتعتوا...

[وطن]

هاهاهاهاها أتخيل حالتك
تعذيب
باقي ساعتين عيل

هاهاهاهاها


كمل كمل
متابعة

؛)

[وطن]

الصراحة رحله ممتعه
خاطري اجرب


بس بخصوص غرشة الماي 500 لتر
متأكد غرشه مب تنكر هاهاهاهاها

قصدك نص لتر أكيد

[The Master]

الصراحة رحله ممتعه
خاطري اجرب


بس بخصوص غرشة الماي 500 لتر
متأكد غرشه مب تنكر هاهاهاهاها

قصدك نص لتر أكيد

هاهاهااااااي...تم التعديل...اي والله دنكر...

روحي جربي وناسه...ماتشوفيني مستانس حدي...

[وطن]

هاهاهااااااي...تم التعديل...اي والله دنكر...

روحي جربي وناسه...ماتشوفيني مستانس حدي...

ان شاء الله

:)

[ام ناصر1]

السلام عليكم ..من طول الغيبات...قريت عن الرحلة ممتعة والفال لإيفرست ...خلاص صرت خبير ...جبلي ...
بس كم تكلفة الرحلة ...غالية او رخيصة ...وهل كان معاك مرافق من الاصدقاء والاهل ...
شكلها رحلة تحتاج لصديق او قريب ...بس ما عتقد اني املك جراءه لتسلق جبل جليدي ..حدي جبل صحراوي الشمس منورته كل يوم ....

وما قلت لنا ايش الايجابيات والتغيرات ...حطها لنا بكمن جملة ...

- الحياة متنوعة في اشيائها ...والطبيعية رائعة بشموخها ....والجمال الطبيعي ثابت لايتغير ...والكل ينهل منه ...
والقلة تؤمن ...بأن الصانع حكيم ومبدع ....
- الطبيعة تغسل الروح والقلب ..لأنها تخلق الصفاء ....ولكن اول مانرجع لمدننا سنرجع مرة اخرى للغابة البشرية
- ساترك حياتي تذهب للجحيم ..من اجل شاطئ جميرا ..فلقد وقعت بحبه منذ ان وقعت عيناي عليه ...

هاي تأملاتي بعد سفرتي القصيرة لدبي ..كان اجمل شي الشاطئ ولحظات الغروب والشروق ...على البحر

[wrc]

قراءه ممتعه...اتوقع لك مستقبل رائع في ادب الرحلات .

[بونووف]

ماشاءالله عليك اكشني

استمتعت في في قراءة الموضوع

[bos3eed]

خوش رحله والله, يعطيك العافيه

[وحيد-الشوق]

موضوع عجيييييب ههههههههه من زمان ماقريت موضوع طويل >> عيني تعورني من القراءة في النت بس اسلوبك شيق ويحمس الواحد لين الاخر

انت نفسي كنت احب جبل فوجي خصوصا لما كنت اشوف جرانديزر وكونان :(

الحمدلله على نعمة الاسلام نعمة ماتقدر بكنوز الدنيا وأموالها

يعطيك العافية وكل الشكر ليدك ادري انها تعبت من الكتابة :)

[R 7 A L]

قريت الجزء الأول واستمتعت

باقي الجزء الثاني

بس حان وقت النوم

[سهاارى]

بصراحه .. من اول نظره على الموضوع ماتوقعت اني اصمد لين نهايته ..!
بس بالفعل موضوعك ممتع .. وسردك للاحداث مشوق ..

عساك على القووه

[الحياة الخالدة]

رحلــــة ممتعة و شيقة .. بس حسيت و انا اقراها بالتعب و ضيقة النفس

[تحداني]

ما كملت قرايه لكن راح ارجع اقراها في وقت يكون مزاجي تمام
وراح انقل هالقصه للوالده .. حاليا هي في اليابان .. وباقي لها 35 يوم :(
متى اتمر الايام يالله يا كريم

[دااانة قطر]

احب السفر والرحلاات لكن ماعتقد اقدر اتسلق جبل على رويلاتي



استمتعت بالقراااءه
وطرقتك في السرد عجيبة ومشوقه

[R 7 A L]

done

أنت رائع يابوحسن

كثر لنـــا من هالقصص المشوقة

[khalid525]

بصراحة اهنيك على جراءتكفي اختيار هذه الرحلة وعلى اسلوبك الروعة في السرد ، ذبحتنا ضحك ،
عاد فوجي مرة وحدة كان بديت تتمرن على حزوم دخان :)

[بن مفتاح]

ما شاء الله تبارك الله ..

مغامرة ..... الحمد لله على سلامتك منها .. بس حلوووو ان الواحد جرب شي جديد .. والمغامرة في وقتها تكون صعبـــة اكيد لكن بعد ما تنتهي ذكراها تكون جميلة .. شيء لا يُنسى ..

يعطيك العافيــــة على مشاركتنا بمغامرتك اللي ما اعرف بايش اصفها .. هل امدحها او اذمها ، لا اعرف .. وما اعتقد ان هذا مهم .. اهم شي انك خرجت منها سالم غانم ولله الحمد .. وخرجت بمواقف اعتقد انها مكسب لك ..


الله يحفظك .. والحقيقة طريقتك في الكتابة مشوقة وجاذبة .. عساك على القوة ..

[ROSE]

وانا اقول وين مختفي هالريال اثاريك على جبل فوجي ههههههههههههه

سرد اكثر من رائع للقصة مثل ماعودتنا دايما

[زبرجد]

موضوع من جميع النواحي ناجح من حيث السرد والمحتوى
أعتقد انت طلعت من هذي التجربة رغم صعوبتها تعلمت الصبر على أصوله
وأنا أجوف رغم تفاهة معتقدات بعض الشعوب إلا انهم متمسكين ويحاولون يروحون لدينهم .. ورغم ضعف المسلمين إلا انهم لهم هيبة في قلوب البعض .
بالنسبة لهذي الرحلة اعتبرها مغامرة مستحيل افكر اخوضها لكن خاطري اجرب المشي لمسافات طويلة ... لكن الكبر ما اظن يساعد :)

[يوسف0]

مغامرة جميلة وشرحك فله حسيت اني مكانك :nice:

لو اتحط كمن صورة :) نعيش الجو معاك

مع خالص تقديري

[Miss]

انا ضقت وانا اقرا شلون انت في هالموقف
كان تدربحت اسرع :happy:
وكل هالتعب وما صورت :secret:
ممكن تكرر هالكشته مره ثانيه ولا لا :fight:

[sweet qatar]

قرائتي لموضوعك تشبه متابعتي لفيلم جرافيتي

ابي اوكسجييييييين


احييك على شجاعتك.. لكن اعتب عليك عدم استعدادك لمغامرة مثيرة مثل هذي

وين الاستعداد الجسدي والنفسي ؟؟


ان شالله تعيد هالتجربة الجميلة وانت مستعد لها و معاك ربعك عشان تستانسون صح :victory:

[fzaa_qatar]

تصدق تصفحت المنتدى وانا صوب دوار دحل الحمام عشت جو القصه وصفيت عاليمين اكمل القصه وبصراحه عشتها كنها فلم رحاله والصعوبات اللي تواجهم فهالرحله .. شكرا لك ع سردك الاكثر من رااائع .. ياخي عط تلفزيون قطر شوي افكار وكون مؤلف لهم ولا كان خذيتهم معاك يصورون عالاقل تكون عندهم برامج حلوه .. يعطيك الف عافيه ونقرالك رحلات ثانيه ان شاء الله ..

[The Master]

كل الشكر ع مرورك يا ام ناصر... ولو تمعنتي ف الموضوع اكثر بتعرفين الايجابيات والسلبيات وكذلك هل انا رحت لحالي ولا معاي حد...:tease:

ويامرحبا بك...يكفي تواجدك...:nice:

ودبي دار الحي...مافي شك...بس بحرنا احلى :)

[The Master]

قراءه ممتعه...اتوقع لك مستقبل رائع في ادب الرحلات .

اشكرك اخينا wrc
وربك يسهل...

[The Master]

ان شاء الله نرجع للمشاركات شحص شخص فرد فرد...من انتم...اوه معليش اشتطيت... :tease:

ب اذن الله سيتم تحديث الموضوع و وضع الصور والفيديو...كان المفروض انزلهم مع الموضوع لكن الوقت ماكان يسمح...ف السموحه...وان شاء الله بتعجبكم الصور...بعضها تصويري والبعض من النت...

ف حين ذلك الوقت... سايونارا "بالياباني يعني مع الى اللقاء"

[The Master]

ماشاءالله عليك اكشني

استمتعت في في قراءة الموضوع

حاضريييين يابونووف... اهم شي المتعه :nice:

[The Master]

خوش رحله والله, يعطيك العافيه

الله يعافيك يارب يابوسعييد :)



موضوع عجيييييب ههههههههه من زمان ماقريت موضوع طويل >> عيني تعورني من القراءة في النت بس اسلوبك شيق ويحمس الواحد لين الاخر

انت نفسي كنت احب جبل فوجي خصوصا لما كنت اشوف جرانديزر وكونان :(

الحمدلله على نعمة الاسلام نعمة ماتقدر بكنوز الدنيا وأموالها

يعطيك العافية وكل الشكر ليدك ادري انها تعبت من الكتابة :)


هلا ب وحيد الشوق... والله ماكان ودي يكون ب هالطول...لكن الاحداث هي اللي خلته كذا...مع اني طوفت مواقف صارت عشان الوقت...بس مع ذلك طلع طويل... :secret:
واهم شي انك قدرت تقراه كامل :nice:
اي والله من فينا ماكان يحب جراندايزر...وكونان...
الله يعافيك يارب... ابد والله رغم التعب لكن شي يستاهل...والاهم انكم استفدتوا واستمتعتوا... :victory:
اشكر لك مرورك...





بصراحه .. من اول نظره على الموضوع ماتوقعت اني اصمد لين نهايته ..!
بس بالفعل موضوعك ممتع .. وسردك للاحداث مشوق ..

عساك على القووه


هلا بك اخوي سهارى... تعجبني يا القوي :tease:
اشكرك ع كلامك الطيب...وجد والله هالتعبير يساعدني للافضل :)
لاهنت...




رحلــــة ممتعة و شيقة .. بس حسيت و انا اقراها بالتعب و ضيقة النفس


اوووه اهلا وسهلا الحياه صعبه :nice:
اي والله انها ضيقة نفس وتعب... لكن سردت الاحداث بطريقه فكاهية عشان اتكون احلى وامتع...
كل الشكر ع المرور...




ما كملت قرايه لكن راح ارجع اقراها في وقت يكون مزاجي تمام
وراح انقل هالقصه للوالده .. حاليا هي في اليابان .. وباقي لها 35 يوم :(
متى اتمر الايام يالله يا كريم

هلا ومرحب تحداني :nice:
اتمنى اتكملين الموضوع...خاصه عقب اضافة الصور والفيديو... يهمني رايك... :)
ف انتظارك...





احب السفر والرحلاات لكن ماعتقد اقدر اتسلق جبل على رويلاتي



استمتعت بالقراااءه
وطرقتك في السرد عجيبة ومشوقه


التسلق متعه ماعقبها متعه... شوفي وجهي اشكثر كنت مستانس :eek5:

شكرا ع اطراءك وتواجدك... ويسعدني اعجابك بالموضوع...
نورتي...





done

أنت رائع يابوحسن

كثر لنـــا من هالقصص المشوقة


هلا وغلا ب رحال الصديق الجميل...
والله انت الاروع...ولك وحشة يا المزيون...
ابشر...تامر امر...خبرك ع حسب الاجازات اتصير المغامرات :secret:





بصراحة اهنيك على جراءتكفي اختيار هذه الرحلة وعلى اسلوبك الروعة في السرد ، ذبحتنا ضحك ،
عاد فوجي مرة وحدة كان بديت تتمرن على حزوم دخان :)


هلا بك اخوي خالد...
تشكر ع كلامك...وجبل فوجي حلم...والحمدلله تحقق...
واسعدني ان الموضوع ونسك...وعساك دوم مستانس يارب...
واحزوم دخان بعيده...انا حدي ام قرن سيتي :nice:





ما شاء الله تبارك الله ..

مغامرة ..... الحمد لله على سلامتك منها .. بس حلوووو ان الواحد جرب شي جديد .. والمغامرة في وقتها تكون صعبـــة اكيد لكن بعد ما تنتهي ذكراها تكون جميلة .. شيء لا يُنسى ..

يعطيك العافيــــة على مشاركتنا بمغامرتك اللي ما اعرف بايش اصفها .. هل امدحها او اذمها ، لا اعرف .. وما اعتقد ان هذا مهم .. اهم شي انك خرجت منها سالم غانم ولله الحمد .. وخرجت بمواقف اعتقد انها مكسب لك ..


الله يحفظك .. والحقيقة طريقتك في الكتابة مشوقة وجاذبة .. عساك على القوة ..

حيالله بن مفتاح...
الله يسلمك يارب...من ذوقك...
اي والله صادق...انها صعبه...هي ما انساها هذي معاك حق...لكن جميلة...ماظنيت :rolleyes2:
وتسعدني شهادتك...ولي الشرف...واكون صادق...كلامكم ان الموضوع رسم الابتسامه ع وجوهكم تكفيني... :)
الله يقويك يارب...ويامرحبا بك...





وانا اقول وين مختفي هالريال اثاريك على جبل فوجي ههههههههههههه

سرد اكثر من رائع للقصة مثل ماعودتنا دايما


حيالله مشرفتنا... الورده الحمره :nice:
كنت منخش ف الفوهة البركانية :secret:
تشكرين ع مرورك رغم انشغالك وهذا شرف لي...
واشكرك ع اضافة الصور وسرعة التنفيذ...فعلا جهد تشكرين عليه...:)

[The Master]

موضوع من جميع النواحي ناجح من حيث السرد والمحتوى
أعتقد انت طلعت من هذي التجربة رغم صعوبتها تعلمت الصبر على أصوله
وأنا أجوف رغم تفاهة معتقدات بعض الشعوب إلا انهم متمسكين ويحاولون يروحون لدينهم .. ورغم ضعف المسلمين إلا انهم لهم هيبة في قلوب البعض .
بالنسبة لهذي الرحلة اعتبرها مغامرة مستحيل افكر اخوضها لكن خاطري اجرب المشي لمسافات طويلة ... لكن الكبر ما اظن يساعد :)


هلا ومرحب زبرجد :nice:
اشكرك ع اطرائك الجميل...واسعدني اعجابك ب الموضوع...
وصدقتي في ماقلتيه...رغم ضعفنا لكن لازلنا متمسكين ف معتقداتنا...وهيبتنا قدام العالم...
الله يعينك ع الكبر...كل شي بالرياضه يتسهل...

اسجل اعجابي ب اسم المعرف..."زبرجد" جميل :nice:
ويامرحبا بك...




مغامرة جميلة وشرحك فله حسيت اني مكانك :nice:

لو اتحط كمن صورة :) نعيش الجو معاك

مع خالص تقديري

اشكرك ع تعليقك وتواجدك...
وتمت اضافة الصور والفيديو...
اتمنى لك الاستمتاع :)




انا ضقت وانا اقرا شلون انت في هالموقف
كان تدربحت اسرع :happy:
وكل هالتعب وما صورت :secret:
ممكن تكرر هالكشته مره ثانيه ولا لا :fight:


اي والله فكرت اني اتدربح :shy: بس ماينفع...
اكررها مره ثانيه؟؟ ده المستحيل بزاااتوووو :eek5:

يامرحبا بك...







قرائتي لموضوعك تشبه متابعتي لفيلم جرافيتي

ابي اوكسجييييييين


احييك على شجاعتك.. لكن اعتب عليك عدم استعدادك لمغامرة مثيرة مثل هذي

وين الاستعداد الجسدي والنفسي ؟؟


ان شالله تعيد هالتجربة الجميلة وانت مستعد لها و معاك ربعك عشان تستانسون صح :victory:


اي والله اوكسجييين :rolleyes2:

من زينه جرافيتي...كآبة وحكرة وضييييييق :eek5:

اي والله ما استعدت...توقعتها سهالات...واستهزأت فيها...لكن هي عقب استهزأت فيني :secret:
اي خوفي اعيدها بس...يازين الارض ويازين ريحتها...بلا قمة بلا نيلة :tease:

يامرحبا بك...وشكرا ع المرور الجميل...







تصدق تصفحت المنتدى وانا صوب دوار دحل الحمام عشت جو القصه وصفيت عاليمين اكمل القصه وبصراحه عشتها كنها فلم رحاله والصعوبات اللي تواجهم فهالرحله .. شكرا لك ع سردك الاكثر من رااائع .. ياخي عط تلفزيون قطر شوي افكار وكون مؤلف لهم ولا كان خذيتهم معاك يصورون عالاقل تكون عندهم برامج حلوه .. يعطيك الف عافيه ونقرالك رحلات ثانيه ان شاء الله ..


هلا ومرحب fzaa qatar
له له له كذا انا باصدق عمري...صفيت ع جنب بس عشان اتكمل موضوعي :shy:
من ذوقك الصراحه...واسعدني ذلك...
وعن تلفزيون قطر...والله مانقول لا...من مايحب ينشهر :tease:

الله يعافيك يارب...ويشرفني انك اتكون من القراء الجميليين...:nice:

وانحاول نكتب مواضيع وقصص جميله ب اذن الله...

اسعدني تواجدك :)

[أبو خالد]

الحمد لله على السلامة