استفسار : تعلم الطبخ [الأرشيف] - منتديات شبكة الأسهم القطرية

ام ناصر1

12-11-2013, 11:06 AM

السلام عليكم ...هلا ومراحب والله بالغاليين ...
استفسار بسيط ....
الطبخ مهارة و ميزة مهمة في حياة المرأة ....كيف تعلمتي الطبخ ....تتذكرين اول طبخة
سويتها او حرقتيها ...وليش حبيتي تتعلمين الطبخ ....ممكن تسترسلين ...وتقولين لنا أنتي
شاطرة باي نوع ...وكم ساعة تقضينها بالمطبخ عادة ....والى أي من المطابخ تميلين ..( خليجي ..مصري ..شامي ...الخ .....
اخذوا راحتكم واعتبروا الموضوع ......موضوعي ........<<<<اتغشمر ...

حمد 2002

12-11-2013, 11:12 AM

الحين كل وحده بتسأل ميري هههههههههههههه لا لا امزح بالعكس كلهم فيهم الخير والبركه ،،،

ولد العرب

12-11-2013, 11:17 AM

الحين كل وحده بتسأل ميري هههههههههههههه لا لا امزح بالعكس كلهم فيهم الخير والبركه ،،،

ليه حمد ليه هالاسلوب شفت نيتك شلوون مثل ماقالت وطن النيه مطيه :weeping:

ضوى

12-11-2013, 11:23 AM

موضوع جميل ويكسر روتين مواضيع المنتدى شوي

تعلمت الطبخ من امي الله يرحمها وجدتي ، في فترات الاجازات كنت اقعد ويا امي وهي تطبخ ، اتذكر اجازة الشهر مالت الثانوية العامة اكون معاها ادرس واشوفها تطبخ ، طبعا مب باحتراف ، الله يرحمها كانت طباخة ماهرة ، وماتذكر اكلنا من يد خادمة الا بعد مامرضت شوي الله يرحمها كنت هي اللي تطبخ ، عموما انا احب الطبخ ومايبي له تعليم ، ماعتبر نفسي ماهرة في الطبخ بس عيالي يشوفوني طباخة ، احب اطبخ بس ماحب اتفنن ، واحب الخليجي اكثر شي ، واحب الطبخ السريع ماحب وايد مواعين ووايد تحضيرات ، حتي زوجي مايصدق اني بهالمدة القصيرة اخلص طبخ ، سريعة جدا في الطبخ وماحب اكون في المطبخ اكثر من ساعتين

بو الجوري

12-11-2013, 11:30 AM

موضوع جميل :..

متابع فضولي :secret:

قطريه22

12-11-2013, 11:41 AM

غايه الطواش

12-11-2013, 11:50 AM

اول ظبخه طبختها يوم كنت في ثاني اعدادي وعباره عن مشخول دياي وطبعا امي ساعدتني
وعقبها اي اكله نسويها في حصه الاقتصاد المنزلي اطبقها فالبيت , وعقب جاتني فتره قطعت المطبخ وركزت ع الدراسه هي فتره الثانويه والجامعيه
لكن طول ذيك الفتره امي كانت تعايرنا ببنات الناس الي يطبخون عاد مين هم الله واعلم , وكانت دوم تقول انا انتو بتفشلوني انتو بتطلعوني قليلات سنع انتو بتخلون الحريم يقولون عني ماعرفت تسنع بناتها ومن هالكلام ,,, بس ماكان ياثر هههههههههههه.
المهم تخرجت وقعدت فالبيت ومنها بديت شوي شوي اضيع وقت فراغي فالمطبخ اخترع اكلات اطبق اكلات الي اشوفها فالنت , بس الشهاده لله الاكلات الشعبيه ماحبها واحسها ثقيله يوم اكلها غير الدوحخه الي تصيبني منها وفوق هذا ماشيخ عليها ماقولت ماجربت جربت بس ماظبطت معاي, وعقب شوي شوي بديت اتعلم محاشي حلويات كيكات , كانو صديقاتي يعطوني وصفات خالتي واسوي واصور :)
وعقب اكتشفت ان عالم المطبخ عالم جميع اقدر ابدع فيه . واقدر انسى مشاكلي او اتهرب منها فيه , وبعد ما اشتغلت كنت اجي يوميا من الدوم غداي انا اسوي بنفسي , وعقب صرت اسوي العشا كل يوم وبعدها توسعت مداركي وصرت اطبخ مكسيكي , واسوي مشاوي ومحاشي واغلات غريبه واكلات اخترها من مخي وغير الحلويات الي مابقى قالب ماشريته ,حاليا اعرف من كل قطر اغنيه على مايقولون
شوي مصري شوي مكسيكي شوي سوري ايطالي شوي خليجي خفيف , صالونه فرنسيه اكلات حجازيه اكلات هنديه اكلات مالها اصل من اختراعي ههههههههه
والحين الفتره الاخيره متعمله صيني وحطيت من فتر ه تساول فالمنتدى شلون اسوي الدامبلينغ والله يجزاه خير واحد من الاعضاء عطاني طريقه العجيبه وغير هذا قعدت اتابع فيديو في اليوتيوب عن طريقه لفها والحمدالله سويت الصيني وعجب الكل والحين الكل صار يحب الاكل الصيني
وحاليا بما ان دوامي طويل يوم الجمعه لازم ضرور ياسوي العشا واحيان اذا لي مزاج يوم في نص الاسبوع , بس الشغله الي تمللني صارو يحبون الالكل من يدي وانا ماعندي وقت اطبخ كل يوم
وبس والله هاذي قصتي مع حبيبي المطبخ

ولد العرب

12-11-2013, 11:50 AM

تسلمين يام ناصر على هالموضوع الحلو

كيف تعلمتي الطبخ ؟ من كم سنه كنت افرفر في التلفزيون وشفت قناة فتافيت وشفت وحده تسوي كب كيك على طول جبت ورقه وقلم وكتبت الطريقه ودخلت المطبخ وطبقتها.

تعلمت الطبخ من :
امي الله يطول بعمرها
الانترنت
الكتب
التلفزيون
واخترع من راسي:)

تتذكرين اول طبخة ؟ كب كيك

سويتها او حرقتيها ؟ الحمدلله ضبطتها

وليش حبيتي تتعلمين الطبخ؟ انا كنت ماحب الطبخ ولاالمطبخ وسبحان الله مره وحده حبيته وصرت احب اتعلم اسوي اشياء جديده.

شاطرة باي نوع ؟ احب اسوي الحلويات والاكلات الشعبيه الحلوه .

وكم ساعة تقضينها بالمطبخ عادة؟ على حسب الي ابي اسويه اذا يحتاج اطول او لا؟ الفرن بروحه يخذ وقت :weeping:

والى أي من المطابخ تميلين؟ مافي شيء محدد

ها نجحت والا لا :shy:

شوفي انا اعتبر الطباخه اذا طبخت الخرووف مفطح ولا اسمحوولي

ام ناصر1

12-11-2013, 11:51 AM

تعلمت الطبخ من أختي الكبيرة واهي تعلمت من أمي ...أول طبخة تعلمتها المجبوس ...لين صرت خبيرة فيه وبانواعه .....اعرف التقطيع بانواعه ..احلفي بس ...للحوم وبخاصة السمك ...
من شيل الصفاط لين الامعاء والحواشي الداخلية ...اعتبره درس تشريح عملي ...طباخي اكثره خليجي ...بس اميل لاطباق الفرن ...بطاطس ومعكرونه بالبشاميل..وغيره ...
اشوفه اسهل واريح للمعدة ...ما احب الاكل المصري ملوخية ..كشري ...ما ادري ما استسيغه ...احب كل جمعة اعجن اما جباتي او براتا او بيتزا ...بس ساعات اكتفي بعمل النخي او الباجلا ......ايه تعلمت الطبخ ببداية الجامعة ...ما كنت احرق الاكل بس كان الملح يطلع عندي زايد اشوي ... وكنت اسوي البلاليط هميجة

نوار قطر

12-11-2013, 12:00 PM

موضوع عجيييب:nice:

تتذكرين اول طبخة ؟ شيلاني وسمج مشوي وكنت في ثاني اعدادي

سويتها او حرقتيها ؟ الحمدلله ضبطتها

وليش حبيتي تتعلمين الطبخ؟ كنت واايد ادخل مع امي المطبخ وكنت الاحقها في كل خطوه تسويها اروح اطل في الجدر اشوفها شلون تسووي وشلون تطبخ ومنها حبيت الطبخ وصرت بروفشينال

شاطرة باي نوع ؟ الاكلات الشعبيه المحاشي المعكرونات مممم بس اكثر شي الاكلات الشعبيه .

وكم ساعة تقضينها بالمطبخ عادة؟ مممم الطباخ ماياخذ مني وقت خاصة ان كل شي جاهز مممم عموما انا احب اطبخ على سعه اخذ راحتي وبعد على حسب الطبخه الي بسويها وكم صنف بطبخ

والى أي من المطابخ تميلين؟ الخليجي سوالف الفطاير والاشياء الصغيره الي تعالي وقطعي وعجني مااحبها كلش اتملل عشان جذي مااسويها الا نااادراا

وبس والله:shy:

sweet qatar

12-11-2013, 12:09 PM

سوالفكم تهبل بنات.. يعطيج العافية ام ناصر على الموضوع العجيب :victory:

أحب الطبخ.. مثل ما أحب المكياج على المزاج

طبعا أتذكر أول مرة طبخت فيها .. في حصة التدبير المنزلي .. سوينا بيتي فور :shy:

وانا صغيرة ممنوع علي أدخل مطبخ بيتنا ، بس لما أروح عند جدتي أقعد معاها وهي تطبخ.. فديتها تخليني ألعب شوي

كنت استثقل دخلة المطبخ في رمضان .. مع ان ما كنا نسوي شي غير لف السمبوسة
لكن شوي شوي بديت أطبق الوصفات الي يتبادلونها البنات و وصفات النت

خربت وايد وحرقت وايد .. و سمعت تعليقات حلوة وسخيييفة .. بس في الأخير اكتشفت ان الطبخ مثل ما قالت غاية يريح النفس ويفرغ الطاقة

أحب أجرب كل المطابخ لكن أحب الطبخ على أصوله .. واحب النكهة تكون اوريجينال

قطريه22

12-11-2013, 12:23 PM

يوووووووووووووووووووووه انتو رجعتو لايام المدرسه في اشياء وايد طبخناها مع الأبله :shy:

واول مامسكت خلتني اقطع بصل :weeping:

نور الحور

12-11-2013, 12:27 PM

هاهاهاهاها .. أسئلتج أم ناصر لامست (شغاف) قلبي ..

متابعة بصمت هالمرة :secret:

رهج السنابك

12-11-2013, 02:55 PM

ايييه يا ام نصور المطبخ واحد من قصص الف ليله وليله معاي خليني استرجع البدايات
اول ماعرفت المطبخ وانا بعمر 11 سنه
سوينا عجة في المدرسه ورحت البيت وطبقتها كانت فرحه غير طبيعيه وانا اشرح لامي الطريقه
بس بعدين بديت شوي شوي اترك المطبخ
امي ماكانت مشجعه دائمه كل همها اركز على دراستي وبس
ولما تبينا ندخل المطبخ عشان نغسل المواعين مب عشان نطبخ
ماحسيت عندي ميول للطبخ كلش
اذا اشتهيت طبخه فتحت النت وقريتها وطبقت
برمضان احب اتفنن
ماعمري جربت اطبخ مجبوس او اقطع دياي او لحم ولا مكرونه بجدر
لكن اسوي صواني باشميل او لازانيا
احس اني اعرف وايد لكن ماطبق كل شي اعرفه
تييني فترات ادش النت بالساعات بس احوس واقرا واشوف وصفات الاكل اذا تحمست وايد سويت ماتحمست عادي

لكن لاحظت اني شاطره في السويتات
ان سويت سويت اهلي يستخفون عليه ويعجبهم

ماحب اسوي طبخه اول مره وافشل فيها احس باحراج واستحرم المكونات الي خسرتها
ماحب اتعب واجهز طبق لضيوف ويطلعون مسوين رجيم وماياكلون منه :( ينكسر خاطري

احب ادلع اخوي في المشروبات لانه عاشق للكوفي بانواعه
اتفنن له في الكابتشينو والفربتشينو والموكا والميلك شيك بانواعه واشتري اجهزه خاصه

وبس ذي تجربتي الفاشله مع الطبخ

زبرجد

12-11-2013, 02:56 PM

تعلمت الطبخ من وحدة تصيرلي
ومن النت
وإذا اعجبتني طبخة أسئل عن الطريقة ما أخجل أبداً لأنه في ناس ما تتنزل تسئل
أذكر الطبخة إلي سويتها بداوي لحم
وأحب أطبخ أكلاتنا الشعبية والحلويات الشعبية أما السويت ما أضبطه أبد إلا الكيك:shy:
تسلمين أم ناصر وعساج عالقوة موضوع حلو يحفز الذاكرة :)

توشيبا

12-11-2013, 05:11 PM

ام ناصر1

12-11-2013, 05:25 PM

ناقص الوحده تقول اًول طبخه قعود ولا تيس محشي عليكم صواريخ

قولو بيض واحترق او كيك واحترق المطبخ كذا يمكن نصدق

لذلك اعلن انا العضو h-p
اطلب من كل عضوه تامر خادمتها تسوي لي عشئ ويدزونه لي

شكرا لكم

لا والله القعود وهاي السوالف ...مش صوبنا ...احنا نتكلم عن قطعة سمج او لحم او دجاج ...اخبر حراير قطر ...مره حطت طريقة طبخ تيس ...
والطباخ ...الي تتكلم عنه يصلح كخبرة ...للمطابخ الشعبية ..حيا الله عندنا ببيوتنا مطبخ لاثنين ...ترى الجيل القديم غالبيتهم يعرفون يطبخون....بخصوص اول طبخة ...فعلا انا وحده اول طبخة محترمة تعلمتها مجبوس ...لكن اطباق الريوق ماتحتاج تعليم

زبرجد

12-11-2013, 05:35 PM

طبعاً هالطبخة الي سويتها هي الناجحة بعد سلسلة من الحرايق والانفجارات عشان محد يتهمنا بالكذب ههههههههه بس ما اذكر اول طبخة

توشيبا

12-11-2013, 05:53 PM

لا والله القعود وهاي السوالف ...مش صوبنا ...احنا نتكلم عن قطعة سمج او لحم او دجاج ...اخبر حراير قطر ...مره حطت طريقة طبخ تيس ...
والطباخ ...الي تتكلم عنه يصلح كخبرة ...للمطابخ الشعبية ..حيا الله عندنا ببيوتنا مطبخ لاثنين ...ترى الجيل القديم غالبيتهم يعرفون يطبخون....بخصوص اول طبخة ...فعلا انا وحده اول طبخة محترمة تعلمتها مجبوس ...لكن اطباق الريوق ماتحتاج تعليم

انا اذا جبت الاهل او الربع للعزبه ايام كانت عندي عزبه اذبح تيس واصلخه واسوي لهم مندي تيس محشي ب ماكرونه

اذا انا رجل اطبخ اي شي يجي في بالي

الا كيك وهالخرابيط اللي مكبره كروش البعض

بس من ادخل مطبخ البيت اقول لهم عطوني ماي ماعرف اطبخ فيه لا احب اتم فيه ماعرف ليه

Miss

12-11-2013, 07:07 PM

اول طبخه طبختها كانت مجبوس لكن بقدرة قادر تحولت لمضروبه :secret:
ما كنت اعرف ان العيش ما ينحرك وايد
اميل للطبخ الخليجي والحمدلله اضبط بس السويتات ما تضبط معاي كلش

بصمة قطرية

12-11-2013, 07:18 PM

انا اذا جبت الاهل او الربع للعزبه ايام كانت عندي عزبه اذبح تيس واصلخه واسوي لهم مندي تيس محشي ب ماكرونه

اذا انا رجل اطبخ اي شي يجي في بالي

الا كيك وهالخرابيط اللي مكبره كروش البعض

بس من ادخل مطبخ البيت اقول لهم عطوني ماي ماعرف اطبخ فيه لا احب اتم فيه ماعرف ليه
حتى أخوي يتفنن في العيوش
تيوس و غيره :ok::ok::ok:

بصمة قطرية

12-11-2013, 07:25 PM

يا زين الموضوع
أقول من وين طالعة ريحة الطباخ :shy:
أتاري البنات فتحوا مطابخهم :shy:
أنا و المطبخ علاقة عشق قديمة
أحب المطبخ بكل ما فيه بدءاً من الطبخ إنتهاءاً بالمواعين
مافي أحلى من الطبخ
تعلمته من صغري كنت دوم أدخل المطبخ مع أمي الله يرحمها
أساعدها و شوي شوي بديت أتعلم
و الإقتصاد المنزلي له دور بعد كنت أحب أطبق اللي تعلمناه
الحمدلله أعرف أسوي كل شي إلا الذباح للحين ما تعلمتها
بإذن الله بتعلمها و بتقنها ما يبي لها شي بس يبي لها جدر كبير :shy:
السي فود أطبخه لكن مستحيل آكله لذلك ما أطبخه وايد
أحب أتفنن في الشوربات السلطات المكرونه بأنواعها
أحب أقضي ساعات في المطبخ أحس بمتعه
ما أحب أدخل أسوي صنف ولا صنفين أحسه مضيعه للوقت
لازم كذا صنف
أحب أتعلم و كل شي يعجبني آخذ طريقته و أطبقه ..

نوار قطر

12-11-2013, 10:59 PM

ناقص الوحده تقول اًول طبخه قعود ولا تيس محشي عليكم صواريخ

قولو بيض واحترق او كيك واحترق المطبخ كذا يمكن نصدق

لذلك اعلن انا العضو h-p
اطلب من كل عضوه تامر خادمتها تسوي لي عشئ ويدزونه لي

شكرا لكم

بقولك ترى الطباااخ مايبي له شي وااايد سهل بس يبي له مزااااج واذا على الذباح انا طبخت مره مادري مرتين بس يعني الذبيحه مب كبيره هرفي صغيرونو ،،،، يعني لاتشكك في قدراتنا الطبخيه :anger1:

توشيبا

13-11-2013, 06:28 AM

بقولك ترى الطباااخ مايبي له شي وااايد سهل بس يبي له مزااااج واذا على الذباح انا طبخت مره مادري مرتين بس يعني الذبيحه مب كبيره هرفي صغيرونو ،،،، يعني لاتشكك في قدراتنا الطبخيه :anger1:

مره او مرتين

وهرفي صغنون

علي قولت الايرانيين ايدادي بيداد

مستر بن

13-11-2013, 06:48 AM

مايسيرر احنا نجااوب هههههه

aziz4z

13-11-2013, 07:38 AM

شكله النسوان محكرين الطبخ , ممنوع من الرجال الاقتراب و التصوير و المشاركة :secret:
هوايتي المفضلة الطبخ :nice:

نوار قطر

13-11-2013, 08:00 AM

مره او مرتين

وهرفي صغنون

علي قولت الايرانيين ايدادي بيداد

المهم اني تجرأت وطبخت لهم وان شالله الاسبوع الياي بطبخ تويس في العنه:tease:

ام ناصر1

13-11-2013, 08:07 AM

مايسيرر احنا نجااوب هههههه

ممكن ليش لا ...مع ذكر سبب تعلمك للطبخ ...هواية ...او غربة ....او مشروع تجاري

ام ناصر1

13-11-2013, 08:10 AM

شكله النسوان محكرين الطبخ , ممنوع من الرجال الاقتراب و التصوير و المشاركة :secret:
هوايتي المفضلة الطبخ :nice:

ما شا الله ...ووين واصل بالهواية .....اول الطريق او وصلت للاحترافية ...وتطبخ جدور للشباب

ام ناصر1

13-11-2013, 08:12 AM

المهم اني تجرأت وطبخت لهم وان شالله الاسبوع الياي بطبخ تويس في العنه:tease:
اعزموا اتش بي ...أو طرشوا له نصيبه ....: )

نوار قطر

13-11-2013, 08:31 AM

اعزموا اتش بي ...أو طرشوا له نصيبه ....: )

حياه الله المكان مكانه ... يشرفنا هو ومن يعز عليه:victory:

aziz4z

13-11-2013, 08:46 AM

ما شا الله ...ووين واصل بالهواية .....اول الطريق او وصلت للاحترافية ...وتطبخ جدور للشباب

الطبخ فن و ذوق , بس أنا تعلمتها بسبب الغربة:shy: , و السبب ما أحب أكل المطاعم كلش , و أخاف من أنها ماتكون حلال و يحطون فيها خمر , خاصة اللحم :(
الطبخ هوايتي المفضلة , و كل ما أروح فندق أو مطعم , أصور الاكلة اللي حبيتها, و أرد البيت أدورها في النت و طريقة طبخها
أغلب الاكلات أتعلمها من النت :) , و مرات من التلفزيون بس من التلفزيون مملة , ياخذون وقت وايد :(
بداية الطبخ كان البيض :nice: , أسهل منها مافي
أطباقي المجبوس :nice: , و البرياني , و اللحم - حسب الطريقة - , و أهم شيء سلطات , كل وحدة لها طريقتها
و أكثر شخص يشجعني على الطبخ , أختي الصغيرة :)
الربع الله يحفظهم يشجعون على الطبخ , بس الكسل لاعب فيهم لعب , حتى غسل الصحون مافي :weeping: , و خاصة موسم التخييم :victory:

توشيبا

13-11-2013, 10:25 AM

اعزموا اتش بي ...أو طرشوا له نصيبه ....: )

والله انج بنت اصول بس ان شاء الله ماتطلع وحده وتقول اسوي كب كيك في العنه

توشيبا

13-11-2013, 10:29 AM

حياه الله المكان مكانه ... يشرفنا هو ومن يعز عليه:victory:

كفو والله تسلمين يالشيخه

نوار قطر

13-11-2013, 11:25 AM

كفو والله تسلمين يالشيخه

الشيخ اونكل ( ابوك) وانت ولده:shy:

حمد 2002

13-11-2013, 11:30 AM

نوار كلام في كلام ، ولا ابخل منها مافيييييييه !!!

ولد العرب

13-11-2013, 11:32 AM

ام ناصر ردت عليهم كلهم الا انا :eek3:

نوار قطر

13-11-2013, 11:33 AM

نوار كلام في كلام ، ولا ابخل منها مافيييييييه !!!

ههههههههههااااي والله اني مب بخيله والي يعرفني يشهد ان الي في يدي مب لي :shy:

حمد والله والله صج انت بخيل ترى يبين عليك:secret:

قطريه22

13-11-2013, 12:18 PM

ام ناصر ردت عليهم كلهم الا انا :eek3:

:eek3:
حتى انا ماردت علي

باندول

13-11-2013, 12:24 PM

تعلمت الطبخ بروحي وانا صغير لاني احب الرحلات
وان طلعنا رحله كنت اطبخ لربع وحبوا اكلي وان سافرنا بعد انا اطبخ
واسوي لهم غداا سابقااا... اول طبخه سويتها هي مجبوس دجاج
يمكن لظروف عملي الشاق يمكن صار لي عشر سنين ماطبخت
وحتى في السفر والرحلات حاليا ما اطبخ لاني يدوبك احصل اجازة
وابغي ارتاح واستغل كل وقتي فيها لاستجمام اكثر من الاكل

aziz4z

13-11-2013, 12:43 PM

:eek3:
حتى انا ماردت علي

ماتحبكم :secret:

ام ناصر1

13-11-2013, 12:46 PM

شوفي انا اعتبر الطباخه اذا طبخت الخرووف مفطح ولا اسمحوولي

تخيل عاد انا ما اعرف اسوي الي تقول عليه ..قول ورج ...يد ...رقبة ...في السيفتي

لاتحط في بالك انا عادة ما ارد على الموضوع اذا كان عن الاراء والتجارب الشخصية ...الا اذا حد علق ينتقد ...أو موعاجبه الطرح

ام ناصر1

13-11-2013, 12:57 PM

تسلمين يام ناصر على هالموضوع الحلو

كيف تعلمتي الطبخ ؟ من كم سنه كنت افرفر في التلفزيون وشفت قناة فتافيت وشفت وحده تسوي كب كيك على طول جبت ورقه وقلم وكتبت الطريقه ودخلت المطبخ وطبقتها.

تعلمت الطبخ من :
امي الله يطول بعمرها
الانترنت
الكتب
التلفزيون
واخترع من راسي:)

تتذكرين اول طبخة ؟ كب كيك

سويتها او حرقتيها ؟ الحمدلله ضبطتها

وليش حبيتي تتعلمين الطبخ؟ انا كنت ماحب الطبخ ولاالمطبخ وسبحان الله مره وحده حبيته وصرت احب اتعلم اسوي اشياء جديده.

شاطرة باي نوع ؟ احب اسوي الحلويات والاكلات الشعبيه الحلوه .

وكم ساعة تقضينها بالمطبخ عادة؟ على حسب الي ابي اسويه اذا يحتاج اطول او لا؟ الفرن بروحه يخذ وقت :weeping:

والى أي من المطابخ تميلين؟ مافي شيء محدد

ها نجحت والا لا :shy:

الله يسلمج ويحفظج ...اكيد نجحتي ..وبامتياز بعد ...ما شا الله عليج امبين عليج من البنات القليلات الي يعرفون يطبخون ...واصلي والله يحفظج ....

معليش مارديت ..لأنه مثل ماقلت بردي السابق اذا الموضوع عن تجارب شخصية افضل ما ارد ...اريح لين تقرين الموضوع ومايتشتت وايد ....
ومالج عندي غير الحشيمة وطيبة الخاطر ...وما عليج من كلام عزيز .....

قطريه22

13-11-2013, 12:59 PM

الله يسلمج ويحفظج ...اكيد نجحتي ..وبامتياز بعد ...ما شا الله عليج امبين عليج من البنات القليلات الي يعرفون يطبخون ...واصلي والله يحفظج ....

معليش مارديت ..لأنه مثل ماقلت بردي السابق اذا الموضوع عن تجارب شخصية افضل ما ارد ...اريح لين تقرين الموضوع ومايتشتت وايد ....
ومالج عندي غير الحشيمة وطيبة الخاطر ...وما عليج من كلام عزيز .....

الله يسلمج وماقصرتي والله
واشكرج على كلامج الطيب والذوق

ام ناصر1

13-11-2013, 01:00 PM

ماتحبكم :secret:

هههه ..لا ابد بس من ضمن الاسباب...اتكيسل عن الرد ...وهم شباب ومستأنسين واهم يطقطقون عند العيايز ع بالهم ...سريعين مثلهم

ام ناصر1

13-11-2013, 01:17 PM

الحين كل وحده بتسأل ميري هههههههههههههه لا لا امزح بالعكس كلهم فيهم الخير والبركه ،،،
حيا الله حمد ....الخير بوجودك ...

غايه الطواش

13-11-2013, 01:41 PM

انا اخذت الكحلي

كنت مياله اكثر للذهبي والفضي عقب استقريت ع الكحلي

http://im35.gulfup.com/kSm77.jpg (http://www.gulfup.com/?iq3hLk)

http://im35.gulfup.com/ewZp5.jpg (http://www.gulfup.com/?AY8kH5)

http://im35.gulfup.com/VaEtv.jpg (http://www.gulfup.com/?XKWCgX)

غايه الطواش

13-11-2013, 02:06 PM

مب جني حاطته فالموضوع الغلط هههههه

نور الحور

13-11-2013, 02:45 PM

تخيل عاد انا ما اعرف اسوي الي تقول عليه ..قول ورج ...يد ...رقبة ...في السيفتي

لاتحط في بالك انا عادة ما ارد على الموضوع اذا كان عن الاراء والتجارب الشخصية ...الا اذا حد علق ينتقد ...أو موعاجبه الطرح

ليش تفتحين هالموضوع أم ناصر؟ أنا مو عاجبني ! << لا حد يصدق بس .. كله بس عشان تردين علي :shy:

ام ناصر1

13-11-2013, 03:53 PM

غاية ...ههههههه ...الصور مناسبة الموضوع ....

نور الحور ...كنت برد عليج ردي علينا بشغف ...مش بصمت ...بس قلت ماله داهي الاحراج ....

توشيبا

13-11-2013, 07:46 PM

sweet qatar

14-11-2013, 09:37 AM

مب جني حاطته فالموضوع الغلط هههههه

هههههههههههه

حبيبتي ما رحتي بعيد

كلهم حلوووين .. بس من وين ؟

تصدقين يا ام ناصر موضوعج ذكرني بسوالف قدييييمة

تخيلي مرة سويت شيزكيك لعزيمة عندنا

واحنا كلنا في المطبخ يدتي وامي وخالاتي دخل علينا واحد من العيال ولا يقول من الي سوا الشيزكيك ؟

فلان يموت عليه ولو درا انج مسويته بيخطبج !!

كنت في الثانوي و روايات عبير تارسة راسي وهذا يقول لي بنخطب بسبة شيزكيك !! :weeping:

تنرفزت بس ماقدرت أتكلم وتمنيت اخذ القالب واكسره على راسه وراس ولد عمه

وكرهت المطبخ لفترة طويلة .. :(