الصين ( كوانزو )

[وكر الذيب]

السلام عليكم ورحمة الله تعالي
الاعضاء الكرام اللي عندة اي خلفية عن التسوق في مدينة كوانزو الصينية لتشطيب المنزل اتمنى يفيدني
والمواد المواد المطلوبة :
الارضيات ( السيراميك )
الحمامات اجلكم الله والادوات الصحية
الادوات الكهربائية ( سوكتات اسوتشات ثريات نوعية ممتازة )
البيبان الخشبية والدرابزين ( الحديد المشغول )
والمطلوب
افضل الطرق للشراء ( شركات التخليص والترجمة ) عن تجربة الاعضاء
طريقة الدفع او تحويل المبلغ ( المبالغ الكبيرة نسبيا )
والنصائح بشكل عام

وجزاكم الله خير

[كلاسيك قطر]

هلا بيك يالغالي

الصين كل شي فيها توصيل واي شي موجود اهناك

بس انا عندي رقم مترجم وان شاءالله يفيدك في الامور وارسله لك ع الخاص

[Rider]

والله ياخوي تبغي نصيحة جيب اغراضك من السعودية ومن السوق الصيني في دبي كل شي عندهم والشحن ارخص
والله يهنيك بالبيت وجعله مسكن مبارك

[V.I.P_QATAR]

اخوي روووح وانت مغمض اهناك مثال الرخام الصيني في السوق الصيني بتعينه بـ110 ونفس النوعيه بتعينها في الصين في كوانزو بـ30 ريال وعليك الفرق

[بونووف]

عندك مكان واحد وفيه كل انواع الجوده من الغالي لين الرخيص

واذا انك ناوي خلاص .. خلك موجود وتأكد بنفسك من الاغراض قبل لاتدخلهم الكونتينر .. ممكن يجيبون لك لون غير عن اللي طلبته

انا ارشح لك الرياض احسن وتقريبا نفس السعر اذا بتحسب تكاليف سفرتك ..

الله يوفقك

[وكر الذيب]

جزاكم الله خير جميعاً

[alsoq]

نصيحة لا تخسر فلوسك في الصين على بيت العمر وانت تعرف ان بضاعتهم لا تدوم وبتكسر عليك يمكن قبل توصلك قطر
والاشياء الثانيه ما تعمر تخترب زد عليها كم الف واخذلك اسباني او ايطالي او الماني

[توشيبا]

اخوي نصيحه لك لا تشتري اي شي صيني من الخليج لي ان عندنا زباله الصين

روح للصين افضل لك

وميحتاج مترجم بس اهم شي تعرف انجليزي

واذا رحت روح شارع العرب بتحصل مطاعم عربيه واسلاميه عندهم كتب للسياحه فيها اسامي الاسواق وكل شي

[V.I.P_QATAR]

اخوي الي يقولك ان الي في الصين رخيص او تجاري ماراح او راح وخذا اقل جودة اهناك

اخوي اهناك السوق مفتووووح يعني كرسي جلوس بتعين منه 100 ريال وبتعين منه بـ20 الف ريال للواحد بس الي اهناك احسن من الي اهنا اهنا التجار ياخذون النوع بو جوده رخيصه علشانهم يحسبون التكلفه والمخزن والمعرض والعمال والنقل والتركيب ويحطونها كلها على الزبون فا اذا الزبون شاف المبلغ غالي ماراح يشتري بس اذا شافه رخيص بيشتري

مثال بسيط الثريا الي اهنا بتعينها في شارع سلوى بـ 10 الاف ريال اهناك بـ 1000 ريال ونفسه بالضبط بس اهنا دووووم الي يبيعون يبهرون شوي للبضاعه

اقرب مثال كنت بركب 12 سماعة تقريباً واربع كيمرات وانتر كم وامبلي فاير واحد طلع على اهنا في الدوحه شركه السوني بـ 36 الف ريال

رفيقي خذا من اهناك 10 كيمارات و امبلي فاير دبل الي كنت باخذه وسماعات اكثر من الي ماخذها بـ 7900 ريال ونفس الشركه سوني اصليه شفت الفرق بينا وبينهم فا مابالك بالاثاث والفرش والثريات

الزل اهنا سعر الموكيت بـ 650 ريال للمتر النوع الجيد اهناك بـ250 ريال صوف طبيعي السمك امتن من الي اهنا