للاهل الخبره في مجال تجاره صيد الاسماك ..... هل هي مربحه

[قدام]

السلام عليكم ورحمه الله وبركاته في ظل الغلاء الفاحش للايجارات و حتكار التجار الكبار لاغلب المشاريع الصغيره و الكبيره
لم اجد امامي اللي البحر ... اتوقع البحر فرصه كبيره للمواطن لما فيه من خير كبيير
السسؤال :
انا ناوي اشتري مركب صيد مرخص ( قول )
اتمني للاهل الخبره افادتنا عن الصيد هل هو مربح و سلبياتها و ايجابيتها

شكرراااااااا

[QtrGate]

مشروع ناجح
بس حاسب من العامل
لانه يبيع وبيقولك خسران
وبعدها بيقولك باعطيك 2000 ريال في الشهر

[قدام]

جزاك الله خير. ... مشكور علي الرد

هذي المشكله اللي ادور لها حل

[شموخ دائم]

,

,

مرحبا

لو سئلت اهل البحر واهل اللنجات
بيقولون لك

وش لك في البحر واهواله ورزق خلق الله على السيف

ياريت تسئل شخص عنده ( لنج ) بيفيدك
بتعرف خفايا وهموم هذه المهنه

الهندي باللنج مستفيد
وبايع السمك في السوق مستفيد
وصاحب الحلال خسران
واذا جابوا له ودام البيت زين
:)

,

,


اخوك

شموخ دائم

[قدام]

شموخ دايم ---------- جزاك الله خير علي الرد

اهل اللنجات اغلبهم ما يعطيك حق ولا باطل .....ما ادري ليش
بس لو تحسبها اقتصادياا تري الشغله ما لها تكاليف او مصاريف كبيره
بس تجهز المركب مع الرخصه و بحاره

[ضوى]

زوجي كان عندك طراد للصيد مع لنج طبعا ، بس وايد خسر ، كانوا ينصبون عليه الهنود ، بس نحصل ودام في بعض الاحيان ، وحالياً يفكر لانه اعتقد طلع قرار انه طراريد الصيد لازم يكون معاهم واحد قطري

[شموخ دائم]

,

,

قدام

اخوي الكريم

( صحح الان في قانون لازم قطري يدخل بالمركب ( الطراد ) الفيبر وليس الخشبي

الارزاق بيد الله سبحانه وتعالى ممكن تلاقي واحد يربح بالواسع
وواحد ثاني جنبه ونفس النشاط وخسران
هذي ارزاق من الله

اخوي الكريم
اهل البحر ما بيشجعك ويخاف تخسر وتلومه
وما بيقولك لا تدخل ويوقف امام طموحك
اهل البحر هذه ليست ( مهنه لهم ) هذه تجري في دمهم حقيقه
هي مهنه وهي هوايه وهي ( حب ) للبحر
خسر او ربح
هو حاب ومتشرب هذه الشغله اذا ما يشم هوى البحر
ويسمع صوت الموج وصوت النوارس
ما يعتبر نفسه عايش

:)

مثل اهل المقناص عشق وحب لهذه الهوايه

مثل الي يحب يربي الحلال ويتواجد كل يوم في عزبته
ويشوف حلاله

هو عشق اكثر منه مهنه بالنسبه لهم
ولو تجلس معاهم وتسمع سوالفهم راح تعرف انه ( ولع ) ما ينتهي

وانا لا اشجعك ولا اكسر اعزومك مثلهم ايضا
:)
انا اوضح ان الشغله ماهي بسهله نهائيا
ويبيلها واحد ( كبده مالحه ) مثل ما نقولها بالشعبي

بحسبها لك بسهوله

القول ( الترخيص ) لسفينه الصيد بتكلفك 150 الف قاصر او زايد
السفينه الخشب بتكلفك مع المكينه اقل تقدير 150 الف قاصراو زايد
عده الصيد من شباك و غزول وقراقير بتكلفك 40 الف
والاجهزه الملاحيه رادار وقياس اعماق وخرائط ومترولا بيكلفك من 15 الى 20 الف

يعتمد على حجم السفينه
يعني التكلفه من 350 الف الى 500 الف
هذه سفينه طولها متوسط وليس صغير سفينه خشب

بينما الطراد بيكلفك اقل طبعا

وعندك اختيار البحاره ( هنود ) 3 اقل شي
والرابع ( الكبتن ) وهو اهم شخص في الموضوع
بدون كبتن جيد ما تقدر تربح

ولا تنسى بتحتاج ( سكن ) لهم في بدايه الامر الايام الي مافيها بحر
يحتاجون الراحه في السكن

اخوي الكريم
انا اكلمك من واقع ( خبره ) وليس كلام نظري
:)

ملاحظه
طريقه جهنميه يستخدمها الهنود للسرقه
بعد ما يصيدون السمك وهم في البحر يتكلم بالجهاز مع سفينه
فيها هنود اصدقائه
وينزل السمك الي صاده مع سفينه اصدقائه وبيبيعونه له ويتقاسمون الربح معاه
ويرجع الى الميناء
وسفينته مافيها غير كم سمكه حاطهم لك
حتى لو انت تنتظرهم في الميناء ما بتشوف سمك معاهم
وبيكسرون خاطرك وهم اكبر حراميه

:)

الا اذا

الا اذا

الا اذا

انت متفرغ وبتدخل معاهم

هنا يصير كلام ثاني




,

,

اخوك

شموخ دائم

[قدام]

ملاحظات مهمه و مقنعه ..... شكراا شموخ دايم
جزك الله خير

[مذحج]

السلام عليكم

صبحكم // مسأإأإأكم الله بالخير


الشيخ اذا تفكر من ناحية تجاره وفايده ... انصحك بترك الموضوع وعلى قولة اخوي شموخ (شلك في البحر وأهواله ورزق الله ع السيف)

اما اذا الموضوع وناسه وفلة حجاج وودام للبيت انصحك لاتاخذ طراد جديد (لأن تكلفته عاليه ) خذ لك شي مستعمل نظيف استانس فيه وتحمل على روحك ..

كل الود