ماذا تفعل بكلمة لا .... وعيب ....

[ام ناصر1]

السلام عليكم ....
ايش تسوي مع أهلك إذا طلبت منهم يطلعون معاك وماعندهم رد غير لا ....
نروح نتمشى ع الكورنيش لا ...ناكل بمطعم لا....نروح سينما لا ....نروح المجمع الفلاني ...لأ
نروح كتارا ....لا ......عيب ...
وليش دايما هالنوعية يقولون لا .........خاطري اعرف كيف انخليهم يقولون ايه تدلولون ...تامرون والله

[لبيبة]

السلام عليكم،

من الطبيعي أن تكون هناك قيود وحواجز، دينية واجتماعية ونفسية، وغيرها.

الحل هو عدم المواجهة ومحاولة التأقلم مع الواقع والبحث عن بدائل والانشغال بما يفيد،

قد تكون هذه الممنوعات مجرد كماليات ورفاهية حتى لو كانت مباحة، وعندما نشغل أنفسنا بما يفيدنا في ديننا و دنيانا،

يُفتح لنا باباً للأجر من حيث لا نعلم ولا نقصد، سبحان الله، أمر المؤمن كله خير، القناعة والرضا والطاعة كنوز لا يدركها الكثير،

ومن يقنع ويرضى يجد سعادة في نفسه، الحمد لله.

[ام السعف]

السلام عليكم،

من الطبيعي أن تكون هناك قيود وحواجز، دينية واجتماعية ونفسية، وغيرها.

الحل هو عدم المواجهة ومحاولة التأقلم مع الواقع والبحث عن بدائل والانشغال بما يفيد،

قد تكون هذه الممنوعات مجرد كماليات ورفاهية حتى لو كانت مباحة، وعندما نشغل أنفسنا بما يفيدنا في ديننا و دنيانا،

يُفتح لنا باباً للأجر من حيث لا نعلم ولا نقصد، سبحان الله، أمر المؤمن كله خير، القناعة والرضا والطاعة كنوز لا يدركها الكثير،

ومن يقنع ويرضى يجد سعادة في نفسه، الحمد لله.




لكن يالبيبة مب من حق الانسان انه يسمع نعم بدل الاءات المتكررة ؟

[بصمة قطرية]

هالنوعية ( نكدية ) ..
كل شي عندهم لا و عيب ..
بالرغم من إنها أمور عادية و بسيطة جداً
و ما تدخل ضمن العيب ..
لكن طبيعتهم تحب تعقد الأمور
و أعتقد يشعرون إن شخصيتهم قوية بمجرد قولهم ( لااا ) ..

[رهج السنابك]

هههههه اعيش هالحاله بالضبط

كله لا مافي
والسبب كسل :)
وطبيعتهم بيتوتيين مايحبون تغيير الجو
محد يشجع على الروحه
طبعا اكثر من يعاني هم الي يحبون يطلعون ويصدمون بالناس البيتوتيه اهني يكون في ضيق نفسي

يلا الله يعين

ويرزقنا الجنه نروح في اجمل الاماكن ومحد يقول لا
اللهم امين

[لبيبة]

لكن يالبيبة مب من حق الانسان انه يسمع نعم بدل الاءات المتكررة ؟



نعم من حقه يا ام السعف،

له كل الحق في ذلك،

ولا يعني السكوت انه قد اسقط حقه،

لكنه يدخر له ليوم الدين،

وباستمرار السكوت قد يتحرك الضمير الرافض،

وربما حينها، ربما،

يلين ويقبل بما رفضه بالأمس،

لنتحلى بالصبر، ولو بالقليل منه،

والله مع الصابرين.

[ام السعف]

نعم من حقه يا ام السعف،

له كل الحق في ذلك،

ولا يعني السكوت انه قد اسقط حقه،

لكنه يدخر له ليوم الدين،

وباستمرار السكوت قد يتحرك الضمير الرافض،

وربما حينها، ربما،

يلين ويقبل بما رفضه بالأمس،

لنتحلى بالصبر، ولو بالقليل منه،

والله مع الصابرين.




امممم

بصراحة يا لبيبة احس اني لا كذا ولا كذا:shy:

لكن هالموضوع لازم يلتفت له صاحب اللاءات ويدرك ان هناك حاجات
لازم تتوفر بقول نعم ولا لغير نعم ،،

[رهج السنابك]

لكن هالموضوع لازم يلتفت له صاحب اللاءات ويدرك ان هناك حاجات
لازم تتوفر بقول نعم ولا لغير نعم ،،


Cc: My brother

[طير حوران]

السلام عليكم ....
ايش تسوي مع أهلك إذا طلبت منهم يطلعون معاك وماعندهم رد غير لا ....
نروح نتمشى ع الكورنيش لا ...ناكل بمطعم لا....نروح سينما لا ....نروح المجمع الفلاني ...لأ
نروح كتارا ....لا ......عيب ...
وليش دايما هالنوعية يقولون لا .........خاطري اعرف كيف انخليهم يقولون ايه تدلولون ...تامرون والله

ليس لك الا الصبر وسعة الصدر ومحاولة الاقناع بمزيد من الاحتواء وكسب الخواطر ولن يندم صاحب هذه الوسيله

[aziz4z]

إذا تبين أخوج يطلعك برة , اطلبي طلبية من مطعم و جيبيله على غرفته , بعد نصف ساعة مري عليه و قوليله , ممكن نروح كورنيش :shy:

[نوار قطر]

بووووو شكثر سمعنا هالكلمه منهم مممم انا عمري ماشفت كتارا وحتى الكورنيش يمكن ثلاث او اربع مرات بس الي رحنا له،،،، وصااامدووون ،،، :omen2:

[نوار قطر]

إذا تبين أخوج يطلعك برة , اطلبي طلبية من مطعم و جيبيله على غرفته , بعد نصف ساعة مري عليه و قوليله , ممكن نروح كورنيش :shy:

شوي الا حاذفنا بصحن المقبلات الي قدامه :rolleyes2:

[ضوى]

يارب ترحم ابوي واخواني وتحفظ لي زوجي وعيالي ، ماقصروا ولا مقصرين الحمد لله

هذا اللي كله يقول لا الله يعينه على نفسه ، يخلق فجوة وجفاء بينه وبين اهله

[ام السعف]

يارب ترحم ابوي واخواني وتحفظ لي زوجي وعيالي ، ماقصروا ولا مقصرين الحمد لله

هذا اللي كله يقول لا الله يعينه على نفسه ، يخلق فجوة وجفاء بينه وبين اهله

اللهم آمين ،،

احنا بعد ما احرمونا من اماكن رحنا على قدنا كل مكان
المحرقة والبحر والبر والمتحف والمعاصر وكباب شجاع

وين بعد ياربي ؟
ايه الكورنيش ،،

فربي يخليهم لنا ويبارك لهم في اعمارهم لا ابوي ولا امي ولا بوالعيال
ولا اخواني قصروا فينا ،،
فالله يجزيهم كل خير ،،

[Hamad5882]

صدقوني ترى والله من محبتهم لكم يجيكم الرد لااااا
اعتبري نفسج جوهرة ثمييييييييييينة وهو خايف عليج و يحبج و يغار غيرة المُحب

عالعموم من رايي لا افراط ولا تفريط، دام الوحده بحشمتها ورزانتها م اتوقع ينقال لها دايم لا بالعكس الواحد يفتخر انه يمشي مع هله وهم لبسهم مستور،
كثار من ربعي يرفضون يطلعونهم بسبة لبسهم ما يكون بالمستوى المطلوب من الحشمة و الوقار

[ANONYMOUS]

خاطري اعرف كيف انخليهم يقولون ايه تدلولون ...تامرون والله


:telephone: حق مؤسسة حماية حقوق المرأه والطفل

escape

[رهج السنابك]

بووووو شكثر سمعنا هالكلمه منهم مممم انا عمري ماشفت كتارا وحتى الكورنيش يمكن ثلاث او اربع مرات بس الي رحنا له،،،، وصااامدووون ،،، :omen2:


زين يعني في حد في قطر نفسي مب انا بروحي

انا كتارا رحتها مرتين بطلعه الروح
الكورنيش ثلاث ولا اربع
حديقه البدع ماعرف كيف شكلها
اللؤلؤه ماعمري شفتها
اكوا بارك نووو
سيلين نوووو
سوق واقف مره قبل عشر سنين
المتحف الاسلامي نووو

[فلتة زمانها]

وااايد اسمع هالكلمة من الوالده
احن عليها يمه خل نطلع تقولي ما شبعتي!! كل يوم طالعه ورايحه الدوام
حسبالها الدوام كشته هاهاهاهاهاها

[رهج السنابك]

صدقوني ترى والله من محبتهم لكم يجيكم الرد لااااا
اعتبري نفسج جوهرة ثمييييييييييينة وهو خايف عليج و يحبج و يغار غيرة المُحب

عالعموم من رايي لا افراط ولا تفريط، دام الوحده بحشمتها ورزانتها م اتوقع ينقال لها دايم لا بالعكس الواحد يفتخر انه يمشي مع هله وهم لبسهم مستور،
كثار من ربعي يرفضون يطلعونهم بسبة لبسهم ما يكون بالمستوى المطلوب من الحشمة و الوقار


ماله خص اللبس
لو نلبس خياش مستعدين
بس السالفه كسل ومايحبون يطلعون
حياتهم دوام بيت مسجد دوام بيت مسجد

مافي ترفيه
وهالنوعيه صعبه تتغير

[نور الحور]

هههههههههههههههههه .. لكل شخص مفتاح .. بس يبيله صبر ومسايسة .. الأمر بسيط .. شغلي كيد النسا :shy:

[تغلبية]

السلام عليكم،

من الطبيعي أن تكون هناك قيود وحواجز، دينية واجتماعية ونفسية، وغيرها.

الحل هو عدم المواجهة ومحاولة التأقلم مع الواقع والبحث عن بدائل والانشغال بما يفيد،

قد تكون هذه الممنوعات مجرد كماليات ورفاهية حتى لو كانت مباحة، وعندما نشغل أنفسنا بما يفيدنا في ديننا و دنيانا،

يُفتح لنا باباً للأجر من حيث لا نعلم ولا نقصد، سبحان الله، أمر المؤمن كله خير، القناعة والرضا والطاعة كنوز لا يدركها الكثير،

ومن يقنع ويرضى يجد سعادة في نفسه، الحمد لله.




عدم المواجهة لبيبة !

ما تشوفين ان الانسان من ابسط حقوقه يعيش بالشكل اللي يحبه .. موب 100% لكن على الاقل نسبة تبرد الخاطر

وخاصة لما يكون كلمة " لا " والرفض ماله مبرر ... مجرد مزاج أو جهل أو أنانية غبية!

[قطري92]

ياحلات الواحد يطلع اهله بدون كلمه " لا " حتى لو مايقدر يكون عنده عذر حلو ويقدر يعوضهم ف الايام الجايه

ماجوف ان في شي يمنع لازم الواحد يحس انهم بشر حالنا من حالهم

طبعآ الزوجه هذي لها طريق خاص معنى اكثر الناس هاملين زوجاتهم ، ايش السبب ؟ مايندرى

[همر]

ابليس قاعد في زاوية الموضوع ويتابع بصمت http://www.abestweb.com/smilies/sasmokin.gif

[aziz4z]

شوي الا حاذفنا بصحن المقبلات الي قدامه :rolleyes2:

ههههه

[aziz4z]

شوفي يا أم ناصر يعتمد على حسب الشخص , ممكن تطلبين منه في وقت و هو مشغول , أو مرتبط مع حد , و ممكن تروحون مكانه مايبي هو يروح له.

[حسن]

مااعتقد في وقتنا الحالي من يقول العيب الا ماندر ولا صغير سن
يعني هذه الاماكن عاديه ولا فيها شي من العيب من وجهه نظري ولا هي مراقص ولا اماكن دعاره والحين النسوان يرحون بروحهم
اما يسوقون ولا مع سواقينهم

[قطريه22]

ماعرف شاقولج لاني من النوعيه الي ماحب اروح الاماكن المزدحمه
ولا احب اروح كتارا ولا الكورنيش و..... وغيرها حدي اللؤلؤه اكل فيها واطلع

يمكن الاهل الي يقولون لا من كثر مايسمعون سوالف وبلاوي فخايفين على بناتهم

[ام السعف]

ابليس قاعد في زاوية الموضوع ويتابع بصمت http://www.abestweb.com/smilies/sasmokin.gif


افصح أفصح و أفصح

خذ راحتك لا تخاف منه ،،

اشتقصد في مشاركتك ؟

[بو خليفه 123]

أنا مايقهرني الا الي يقول لا عيب و الويك اند الي بعده مسافر الى ... مع الربع ههههههههه


اتوقع هذي اطباع يا أم ناصر و لكن ممكن مع الوقت تتغير و باستطاعتك انتي تغييرها . بس مكلفه هذي العمليه شوي :p

[duhail535]

الحكم واتخاذ المواقف ، بعد السماع من طرف واحد فقط ، ظلم وإعانة للشيطان على الطرف المستمع منه .

فاتقوا الله يا رسل الانفتاح .

[همر]

الحكم واتخاذ المواقف ، بعد السماع من طرف واحد فقط ، ظلم وإعانة للشيطان على الطرف المستمع منه .

فاتقوا الله يا رسل الانفتاح .


جزء من ردي الى ام السعف ...

انتظري باقي الاجزاء ...

[duhail535]

جزء من ردي الى ام السعف ...

انتظري باقي الاجزاء ...


هذه المرة ، سأتجاوز عن خطئك في حقي وإساءتك لي .

عفا الله عنك .

[لاجئ عاطفي]

اتركي بطاقة الصراف الالي بيده وراح يقولج ( شبيك لبيك خادمك بين ايديك ) :)

[ام السعف]

هذه المرة ، سأتجاوز عن خطئك في حقي وإساءتك لي .

عفا الله عنك .

اعذرني على المشاركة هذي
بس علشان الشيطان ما يتدخل قلت خلني اتدخل ،،

ما اعتقد ان همر يقصد الإساءة كثر ما فهمت انه
يبي يوضح ليش الشيطان قاعد يتفرج ،،

صح همر ولا حضرتي غلطانة ؟

[duhail535]

اعذرني على المشاركة هذي
بس علشان الشيطان ما يتدخل قلت خلني اتدخل ،،

ما اعتقد ان همر يقصد الإساءة كثر ما فهمت انه
يبي يوضح ليش الشيطان قاعد يتفرج ،،

صح همر ولا حضرتي غلطانة ؟

اقتباس الأخ الكريم لمداخلتي وربطها بإشارته للشيطان ، فيها إساءة بالغة لي .
هذا بدون احتساب أن في مداخلتي دعوة لتقوى الله ، التي لا يجوز أبدا تشبيه قائلها بالشيطان ، ولو مجازا .

[ام السعف]

اقتباس الأخ الكريم لمداخلتي وربطها بإشارته للشيطان ، فيها إساءة بالغة لي .
هذا بدون احتساب أن في مداخلتي دعوة لتقوى الله ، التي لا يجوز أبدا تشبيه قائلها بالشيطان ، ولو مجازا .

احسن الظن يا اخوي الدحيل ،،، شنهي علاقتك في الشيطان ؟
وبشكل عام مشاركاتك في المنتدى مافيها الا كل خير فعلى اي اساس تعتقد انه يربطك في الشيطان ؟

واصلا مشاركتك مافيها شي تدل على انه في ترابط بينك وبين الشيطان ؟

تعوذ من ابليس ولا تخلي الشيطان من صجه يضحك علينا :(

[ام السعف]

جزء من ردي الى ام السعف ...

انتظري باقي الاجزاء ...


ممكن تعطيني رايك من غير اقتباسات للآخرين ،،
حسبي الله على ابليسك حركت الشيطان في الموضوع
وخليته يوسوس في النفوس :court:

[لبيبة]

امممم

بصراحة يا لبيبة احس اني لا كذا ولا كذا:shy:

لكن هالموضوع لازم يلتفت له صاحب اللاءات ويدرك ان هناك حاجات
لازم تتوفر بقول نعم ولا لغير نعم ،،




بصراحة هو التفاهم زين و التراضي زين،

بس لما يكون صاحب الكلمة رافض،

مالنا إلا الإذعان بصمت،

يمكن نكسر خاطره بعدين، يمكن.

[قطريه22]

ههههههههههههههه اشدخل همر يقصد حد بالشيطان ههههههههههههههههه

[لبيبة]

عدم المواجهة لبيبة !

ما تشوفين ان الانسان من ابسط حقوقه يعيش بالشكل اللي يحبه .. موب 100% لكن على الاقل نسبة تبرد الخاطر

وخاصة لما يكون كلمة " لا " والرفض ماله مبرر ... مجرد مزاج أو جهل أو أنانية غبية!




اي عدم المواجهة،

لأن عدم المواجهة بيمنع تكون العناد،

ولما يبدأ العناد بتزيد اللاءات،

مب الهدف التخفيف منها؟

ما نواجه، بس نطلب،

وكلما قال لا،

بيحس إنه مكثر منها،

وينكسر خاطره،

ويمكن تطلع نعم وحدة أو ثنتين،

ويمكن تزيد،

أؤمن بأن الطيبة والخير هي الأساس في الإنسان،

وأكيد الرفض المتكرر بيحرك هالأساس الطيب في نفسه،

وبيوافق،

واللي يبي يطلب طلعة،

لازم يكون ذكي،

يطلبها في لحظة صفاء،

وهدوء.

[غايه الطواش]

ماودوني بروح مع ربعي :)

[همر]

هذه المرة ، سأتجاوز عن خطئك في حقي وإساءتك لي .

عفا الله عنك .




اعذرني على المشاركة هذي
بس علشان الشيطان ما يتدخل قلت خلني اتدخل ،،

ما اعتقد ان همر يقصد الإساءة كثر ما فهمت انه
يبي يوضح ليش الشيطان قاعد يتفرج ،،

صح همر ولا حضرتي غلطانة ؟

صح :shy:


اقتباس الأخ الكريم لمداخلتي وربطها بإشارته للشيطان ، فيها إساءة بالغة لي .
هذا بدون احتساب أن في مداخلتي دعوة لتقوى الله ، التي لا يجوز أبدا تشبيه قائلها بالشيطان ، ولو مجازا .

يا اخي انا اتفقت معاك في كلامك من عدم اعانة الشيطان

على الطرف الاخر وهو جزء من ما كنت اقصده ان الشيطان جالس

في الموضوع ويتابع بصمت من يعينه ...

على العموم انا اسف للاقتباس

مره ثانيه بكتب كلامي بروحي :weeping:


احسن الظن يا اخوي الدحيل ،،، شنهي علاقتك في الشيطان ؟
وبشكل عام مشاركاتك في المنتدى مافيها الا كل خير فعلى اي اساس تعتقد انه يربطك في الشيطان ؟

واصلا مشاركتك مافيها شي تدل على انه في ترابط بينك وبين الشيطان ؟

تعوذ من ابليس ولا تخلي الشيطان من صجه يضحك علينا :(

جزاج الله خير لولا شهادتج كان تجرجرنا في المراكز :(

[همر]

ممكن تعطيني رايك من غير اقتباسات للآخرين ،،
حسبي الله على ابليسك حركت الشيطان في الموضوع
وخليته يوسوس في النفوس :court:


قلت استعين بمشاركات الاعضاء اللي اعرف فيهم الخير

وبيردون في سياق المقصود بدون ماتعب اناملي وعشان

اتحاشى القصف المباشر جان ينقلب السحر على الساحر

ويتحول الارنب كرسي :weeping:

[همر]

ههههههههههههههه اشدخل همر يقصد حد بالشيطان ههههههههههههههههه


انتي تسألين ولا تجاوبين ؟!!

ترى توني طالع من مركز الشرطه :court:

[ام السعف]

صح :shy:



يا اخي انا اتفقت معاك في كلامك من عدم اعانة الشيطان

على الطرف الاخر وهو جزء من ما كنت اقصده ان الشيطان جالس

في الموضوع ويتابع بصمت من يعينه ...

على العموم انا اسف للاقتباس

مره ثانيه بكتب كلامي بروحي :weeping:



جزاج الله خير لولا شهادتج كان تجرجرنا في المراكز :(

شاسوي فيكم تسوون المشاكل واحلها لكم ،، ما ادري انتوا اشلون بدبرون نفوسكم من غيري :unsure:

[ام السعف]

بصراحة هو التفاهم زين و التراضي زين،

بس لما يكون صاحب الكلمة رافض،

مالنا إلا الإذعان بصمت،

يمكن نكسر خاطره بعدين، يمكن.



فهمتكوا

[ام السعف]

قلت استعين بمشاركات الاعضاء اللي اعرف فيهم الخير

وبيردون في سياق المقصود بدون ماتعب اناملي وعشان

اتحاشى القصف المباشر جان ينقلب السحر على الساحر

ويتحول الارنب كرسي :weeping:


زين منه تحول كرسي يستفيدون منه الناس
بدل ما يقصبون راسه ويقطونه ياكلونه الفيران :"(

[قطريه22]

انتي تسألين ولا تجاوبين ؟!!

ترى توني طالع من مركز الشرطه :court:


هههههههههههههههههههههههههههههههه فالع من بالمطرقه ومشتكي عليك؟

[همر]

هههههههههههههههههههههههههههههههه فالع من بالمطرقه ومشتكي عليك؟


Duhail535 بس سامحني جزاه الله خير ...

فرطت المطرقه شاسوي .. قضاء وقدر :(

[Rider]

والله القعده في البيت أبرك من الطلعه لبعض الامكان الي مافيها الا الفتن والبلاوي واكيد الواحد لازم يطلع مع اهله لكن في الوقت الي يشوفه مناسب

[Dmy Enabi]

مرة مرتين بنسكت وبنصبر ونستحمل
لكن عقب إنت في طريق وانا في طريق
تخيلوا تعيشون مع إنسان مزاجي ونكدي وكسول والعياذ بالله
أوكي إذا إنت ماتبي توديني عيل لاتمنعني
ولا هو موت خراب ديار

[ام ناصر1]

مرة مرتين بنسكت وبنصبر ونستحمل
لكن عقب إنت في طريق وانا في طريق
تخيلوا تعيشون مع إنسان مزاجي ونكدي وكسول والعياذ بالله
أوكي إذا إنت ماتبي توديني عيل لاتمنعني
ولا هو موت خراب ديار
بل تخيلي اذا الشخص يرفض وفوق هذا يمنع من الذهاب مع الاهل او الصديقات ...هاي صج موقف يولد الانفجار
والتحلطم ...ويخرب أي علاقة ...
بس فيه اشخاص دهاه ....مايعطون لا مباشرة ....ويسوفون الموضوع ...
مثلا يواعدونج بيودنج بعد نص ساعة ..بعدها بساعة يقولون لج لا والله جا شي ضروري من طرف فلان وتأخرنا ...
عطينا ساعة بالكثير .....بعد ساعة ونص ....تعرفين أنه اسلوب حجج وتهرب ....وتنبط جبدج ويضيع وقتج على الفاضي .....
في انتظار شخص فاضي ...مش قد كلمته ولايهتم بالالتزام معاج ....