قبل لا تسوين تلبيس أسنان من أي نوع لازم تعرفين الأضرار اللي

[نايم سهران]

السلام عليكم و رحمة الله و بركاته


انا لاحظت بهالقسم ان بنات وايد حتى لو ماعندهم مشاكل بأسنانهم بس عشان البياض يروحون و يسوون تلبيس
وناس اسنانهم مافيهم شي بس ضرس و لا ضرسين و يروحون يسوون حق صفة اسنان كامله تلبيس

انزين قبل لا تقررون انكم تحكون الضرس ولو مللي واحد
مافكرتوا شنو الأضرار اللي تترتب على عملية حك الضرس و تلبيسه بالسيراميك او غيره؟

اعتقد ان قرار مثل هذا يبيله الواحد يدرسه و يتغاضى شوي عن مسألة ان الاسنان شكلهم حق الناس بيكون حلو
عشان لا يصير فيكم مثل ما صار حق غيركم
و للأسف اتوقع 100% من اللي سووا تلبيس اسنان راح يعانون بالمستقبل

الكلام اللي بكتبه تقدرون تقولون اني سويت فيه بحث و شفت آرارء دكاترة و آراء ناس جربوا التلبيس
يعني مو كلام تأليف

اقروا الكلام عدل و بعدين قرروا اذا العملية تسوى ولا لأ


اولاً: عملية تلبيس الاسنان تتطلب نحت الضرس سواء نحت خفيف او اللي ينحتون الضرس لين يصير جنه عود ضعيف
بكلا الحالتين عملية النحت لو خفيفة راح تتسبب بجعل الأسنان حساسة
و كل ما زاد عدد الضروس اللي راح تتلبس كل ما زادت حساسية الأسنان
تخيلي لو اسنانج حساسة شوي حتى لما تتنفسين هوا بارد بيعورونج
فما بالج طل عمرج ضروسج تعورج؟؟

ثانياً: عشان يلبسون الاسنان لازم ينحك الضرس مثل ما قلتلكم
انزين القشرة ان ذبحت عمرها كثر خيرها ان قعدت 15 سنة (و على فكرة ماراح تقعد 15 سنة بعدين اقولكم ليش)
الحين بعد 15 سنة مو راح تحتاجين تلبيس ثاني؟
انزين بالتلبيس الاول لنفرض حكوا الضرس شوية و حطوا الصمغ و تركب الضرس
المرة الثانية عشان يشيلون القشرة الأولى راح يشرخون الضرس شوي نتفه و لا شالوا القشرة بيكون الضرس مكان الصمغ متضرر عقب 15 سنة فلازم يحكونه مرة ثانية
بس ها
المرة الثانية عشان يحكونه لازم يكون اكثر
ليش؟
اول شي يشيلون الطبقة المتضررة من الصمغ
وثاني شي يحكون عشان يوصلون للمرحلة الي يقدرون يحطون فيها الصمغ مرة ثانية و يثبت التلبيس

لنفرض انج هالسنة سويتي تلبيس اللي يحكون من الضرس نتفه 1 مللي
بعد 10 او 15 سنة غصبن عليج بيحكون ضرسج اكثر و راح تحطين تلبيس اسمك

الحين طافوا 20 او 30 سنة
عقبها على بالج بتقدرين تحكين ضرسج مرة ثالثة؟
سلامتج
أهنيج ضرسج راح انتهى بيشيلون ماتبقى و بيركبون لج جسر أو تركيب ثابت نفس العيايز
لنفرض عمرج 20 سنة الحين
لاصرتي 40 سنة ضروسج عادي تكون تركيب لانج تلفتيهم بشبابج
و بتشوفين عيايز بالخمسين و الستين ضروسهم طبيعية وانتي قعدي عابلي بالتركيب
وعلى فكرة
نسبة كبيرة جداً من الناس ما يقدرون يلبسون مرة ثانية
يعني انا عطيتكم احسن احتمال تلبسين مرتين والثالثة تركيب شئتي أم ابيتي
بس في ناس وايد عقب اول مرة تلبيس مايقدرون يلبسون ثاني مرة لان حسب الضرس شكثر تضرر
فعقب 15 سنة زهبي فلوس زراعة الاسنان
انا اقول من الحين يمعي


انزين و عصب الضرس شلون عليه؟
هذي شغله الدكاترة بيقولون لج انها نادرة الحدوث لكن ناس وايد راح يحتاجون ازالة عصب للاسنان اللي بيلبسونها او يحسون بألم فظيع بعد التلبيس فيضطرون يشيلون العصب بعد التلبيس
يعني انتي مركبة سيراميك 4 ضروس بيشيلون عصب 4 ضروس
مركبة 8 بيشيلون عصب 8
و هلمَ جراً
تعرفين شنو معناة يشيلون عصب الضرس؟
يعني الضرس عبارة عن قطعة بيضا ميتة بحلجج
الضرس مات خلاص
طبعا بهالحالة مليون% ماراح تلبسين مرة ثانيةهي مرة وحدة استانسي 10 او 15 سنة وعقبها الله يكون بعونج


الحين انتي شوفي نفسج بالمنظرة و قيمي
هل اسنانج بحالة من السوء تسوى معاها انج تمرين بكل هذا؟
قاعدة اقولج انج لازم لازم بعد مرحلة معينة راح تركبين جسر او زراعة
مستعدة حق هالشي بس عشان جم سنة لا ضحكتي الناس يحسدونج على ضروسج الحلوة؟


انا حطيت هالموضوع عشان انصح البنات اللي صراحة كاسرين خاطري ركضة من عيادة لي عيادة يدورون احسن العروض
واستغلال مندوبات و سكرتيرات العيادات اللي يعطونج الشمس بايد و القمر بايد عشان تييب زباين للعيادة

رجاءً لا وحدة تدش تقولي الدكاترة دارسين و فاهمين وماراح يقصون عليكم
ادري دارسين
و مليون بالامية درسوهم الاثار الجانبية للتلبيس
بس محد فيهم يتجرأ يقولها
اذا متوسط عملية التلبيس 1000 الى 3000 دينار و سمعت ان في ب 5000 و 6000
تبين الدكتور يقولج لا تلبسين؟

اصحوا و تركوا عنكم التقليد الأعمى للممثلات و المشاهير
هذولي راس مالهم الشكل ماعندهم غير هالويه يعابلون فيه لازم يضبطون روحهم و لا محد يبيهم

انتوا خلكم على طبيعتكم حرام صدقوني بتتأذون و تتحسفون قد شعر راسكم على هالتلبيس حتى لو مستانسين فيه الحين

رجاءً سكرتيرات العيادات بلا دعايات بموضوعي و بسكم جذب على الاوادم
اللي بتسوي دعاية تروح تدفع فلوس وتحط اعلان لاتقعد تقص عالبنات

اللي تبي تعرف و تقرا تجارب ناس مجربين و متضررين وآراء الخبراء تدور بقوقل
side effects of teeth veneers
بتشوفون الهوايل
واللي ماتعرف انجليزي تترجم بقوقل مايبيله شي

بس اقروا عدل عدل عشان بعدين لاحد يلوم الا نفسه


انا من خوفي عليكم قلتلكم هالكلام
و اتمنى اني اكون انقذت البعض من خدعة التلبيس


الموضوع منقول بس حبيت أفيدكم لاني كنت رايح أسوي تلبيس لأسناني كامله بس الحمدلله اقتنعت بكلام الاخت الله يجزيها الجنه

[رهج السنابك]

ههههه انت عجيب سمعت كلام بنت
وخذت قرارك
بدال لا تسأل الاطباء

كلامها ع فكره ثلاث ارباعه غلط

[أسد الجزيرة]

جزاك الله خير اوقات التلبيس يشوه اكثر من انه يجمل

[دنيا الاسهم]

جزاك الله خير على النصيحة يمكن الله سايقك بالوقت المناسب لان العالم هابين هبة بموضة التقويم والتلبيس
الحمد لله رب العالمين

[بومشاري؟]

الكلام المنقول صحيح ميه بالميه

[ضوى]

الحمد لله رب العالمين على نعمة الصحة والعافية يارب ادمها علينا ، المضطر اكيد بيتحمل هالامور كلها ، لكن اللي يسويها دلع وتقليد هذا يتحمل الالم بدون داعي

[ANONYMOUS]

الارستقراطيه

بومشاري

الحين الكلام صحيح ولا غلط

احترنا معاكم

[hasss1969]

الموضوع به كثير مت المعلومات غير الدقيقة،،،وبصفتي طبيب اسنان اقول ان هناك حالات وهي كثيرة جدا تحتاج لتلبيس خصوصا لكبار السن،، وايضا للاطفال الذين لديهم اسنان لبنية ومن يعاني من السكر وبعض الامراض المعينة،،بل وهناك من يحتاج الى عمل جسور والجسور عبارة عن تلبيسات ايضا ومنها الثابت والمتحرك،،،وبعد التلبيس وباتباع ارشادات الطبيب المعالج لن يشتكي المريض من اي مشاكل،،،
هذا للتوضيح وشكرا،،،

[رهج السنابك]

خذ العلم من طبيب الاسنان يا انيمو

والاخت ترا قصدها بموضه الفينير واللومينير بس خبصت الدنيا مع التلبيس
وهذي شي وذيك شي

[وطن]

:rolleyes2:

[قطريه22]

صحيح كلامك التلبيس محتاج لحك طبقه من الاسنان وفي المستقبل له اضرار كبيره

في شي يحطونه على السن بدون لايحكونه مب متأكده هو شنو اذا عدسه او تلبيس يسوونه في دبي

[ضوى]

خذ العلم من طبيب الاسنان يا انيمو

والاخت ترا قصدها بموضه الفينير واللومينير بس خبصت الدنيا مع التلبيس
وهذي شي وذيك شي

منهو فينير ولومينيير بعد ؟؟

[رهج السنابك]

معقوله ضوى ماتعرفينه !!

هاي اللي هابين فيه الفنانات والممثلات ومشاهير هوليوود
طالعي اسنان نجوى كرم الطباشير وتعرفينه

الحين كل البنات يسوونه تقليدا لاسنان المشاهير
وتكلفته كامله ممكن توصل 80 الف

اختي ناويه عليه
اقولها اشتري سيارة ابرك ههه

[عاشق العديد]

هو الموضوع عجبني من ناحية العصصب ..

انا شال ثلاث اربع العصبب والاسنان مافيها شي ..

لانه اكره ماعندي العصصب ..
خلههه ميت فحلجيييي احسن مايكون حي ويعورني ..

[تحداني]

الموضوع به كثير مت المعلومات غير الدقيقة،،،وبصفتي طبيب اسنان اقول ان هناك حالات وهي كثيرة جدا تحتاج لتلبيس خصوصا لكبار السن،، وايضا للاطفال الذين لديهم اسنان لبنية ومن يعاني من السكر وبعض الامراض المعينة،،بل وهناك من يحتاج الى عمل جسور والجسور عبارة عن تلبيسات ايضا ومنها الثابت والمتحرك،،،وبعد التلبيس وباتباع ارشادات الطبيب المعالج لن يشتكي المريض من اي مشاكل،،،
هذا للتوضيح وشكرا،،،




انا مع هالراي .. لان تحت الظروف الي ذكرها الطبيب hasss نحتاج انه انغامر ابهالخطوه
ونجاحها اهني بسبب حاجتنا الماسه لها ..فالوضع يختلف عن الحالات الي تحولت فيها الى موضه وفاشن مثل الممثلات العالميات
ماله داعي احك سن او اخرب سن وانا ما احتاج لهالخطوه


الله يرضى عليك

[قطريه ماركه]

المضطر أكيد بيسويها

[ضوى]

معقوله ضوى ماتعرفينه !!

هاي اللي هابين فيه الفنانات والممثلات ومشاهير هوليوود
طالعي اسنان نجوى كرم الطباشير وتعرفينه

الحين كل البنات يسوونه تقليدا لاسنان المشاهير
وتكلفته كامله ممكن توصل 80 الف

اختي ناويه عليه
اقولها اشتري سيارة ابرك ههه

والله ماعرفته الا منج ، انا اشوف اسنان هالممثلات ومايعجبني يبين ابيض مصطنع ولون الاسنان الطبيعي هو اللون العاجي ، مادريت اقط فلوس عشان اضحك ضحكة مصطنعة والكل يشوف ضروسي :(

[ضوى]

هو الموضوع عجبني من ناحية العصصب ..

انا شال ثلاث اربع العصبب والاسنان مافيها شي ..

لانه اكره ماعندي العصصب ..
خلههه ميت فحلجيييي احسن مايكون حي ويعورني ..

المشكلة ياخوي اذا انسحب العصب او مات مثل ماتقول راح يتاكل الضرس ويسود لانه مافي تغذية ، انا شايلة العصب من سنين بس الحمد لله ماتأكل الضرس بس اغمج لونه ضوي ومايهمني دامها طواحين

[تحداني]

ضوى حبيبتي ..
التلبيس الي يكون من بعد العصب اعتقد غير عن التلبيس الي ياخذ الناحيه الجماليه
في فرق .. فلو ساحبه العصب ضروري اتلبسين السن لان معرض للكسر في اي لحظه

[ضوى]

ضوى حبيبتي ..
التلبيس الي يكون من بعد العصب اعتقد غير عن التلبيس الي ياخذ الناحيه الجماليه
في فرق .. فلو ساحبه العصب ضروري اتلبسين السن لان معرض للكسر في اي لحظه

لا مستحيل ، انا زين مني سحبت العصب بعد معاناه وبعد 10 ابر تخدير والله بعد تلبيس

[قطريه22]

هو الموضوع عجبني من ناحية العصصب ..

انا شال ثلاث اربع العصبب والاسنان مافيها شي ..

لانه اكره ماعندي العصصب ..
خلههه ميت فحلجيييي احسن مايكون حي ويعورني ..

انا سويت العصب 3 مرات او 4 وتحسفت السن الي احذي الي منشال منه العصب انكسر كله وعقب يوم سالت الدكتور قال ان العصب هو الي يمسك السن واذا انشال ممكن مع الوقت الاسنان ترتخي وتطيح بسهوله

[تحداني]

لا مستحيل ، انا زين مني سحبت العصب بعد معاناه وبعد 10 ابر تخدير والله بعد تلبيس




ما يعور اشفيج .. شي يلبسون فيه السن
لا ألم .. وما اتحسين فيه .. تعالي بوديج معاي
غربلتوني :(

[قطريه22]

ما يعور اشفيج .. شي يلبسون فيه السن
لا ألم .. وما اتحسين فيه .. تعالي بوديج معاي
غربلتوني :(

وين سويتيه

[زمان]

:eek5: 80 الف على كم ضرس :eek5:

ثم لتسألن يومئذ عن النعيم

[ضوى]

ما يعور اشفيج .. شي يلبسون فيه السن
لا ألم .. وما اتحسين فيه .. تعالي بوديج معاي
غربلتوني :(

متاكدةعلى مسؤوليتج ؟؟ ان عورني بيكون لي تصرف ثاني معاج وممكن جدا اذبحج

[تحداني]

وين سويتيه



عند طبيب الاسنان .. بس مب الي تكلمت عنه الارستقراطيه لا
انا اقصد تلبيس الاسنان العادي

[تحداني]

متاكدةعلى مسؤوليتج ؟؟ ان عورني بيكون لي تصرف ثاني معاج وممكن جدا اذبحج



عادي اذبحيني .. على مسؤوليتي الكامله
تحتاجين توقيع ؟؟ او نقل كفاله ؟؟ او اي شي

[ام السعف]

والله ماعرفته الا منج ، انا اشوف اسنان هالممثلات ومايعجبني يبين ابيض مصطنع ولون الاسنان الطبيعي هو اللون العاجي ، مادريت اقط فلوس عشان اضحك ضحكة مصطنعة والكل يشوف ضروسي :(
كلش مب حلوة اسنانهم كأنهم غوريلات سودة يلق الابيض فيها ،، لون مب طبيعي ابدا
ويبين انه تركيب ،، ما عجبني كلش ابدا

[شموخ دائم]

,

,

مرحبا

انا تجربتي مع التلبيس كان عندي مشاكل كثيره في الاسنان واللثه
وقررت اعالجها

وكان العلاج سحب عصب ( 6 اسنان ) وعمل حك وتلبيس ال 6 اسنان نفسهم
والحمدالله بفضل من الله هذا العلاج نعمه
قبل ما يكون شي جمالي فهو علاج ايضا

ومن الطبيعي كل علاج فهو له ( جوانب سلبيه )
مهما عملنا ما بيكون مثل الاسنان الطبيعيه فهي خلقه الله سبحانه وتعالى
وايضا الامراض من سوسه والتهابات في اللثه من الله سبحانه وتعالى
ولابد ان نعالجها

عالجتهم في ( عياده تميم )
عملت جدول زمني لهم بمعدل جلستين في الشهر مريح لي
وخلال 6 شهور كل الاسنان كانت من اروع ما يمكن



والان دوم مبتسم 24 ساعه
:)

ترى الاسنان الجميله الصحيه تعطي ثقه في النفس

ولازم ما نهمل الاسنان خاصه من البدايه

,

,

اخوك

شموخ دائم

[نور الحور]

فيه تلبيس علاجي بعد معالجات الأسنان كسحب العصب وغيره ..

وفيه تلبيس تجميلي مثل (الهوليود سمايل) .. في أنواع منها ما تحتاج برد للسن بس مجرد عدسة تنحط على واجهة السن ..

والنتيجة ابتسامة حلوة .. وبلون طبيعي ..مو لازم مثل الممثلات .. بياضهم ناصع بزيادة .. يخوف .. أحسه ممكن يولع بالظلمة :rolleyes2:

[Hamad5882]

انزين يا صاحب الموضوع أنت ضامن انك تعيش 10 سنوات او 15 سنه قدام هههههه
خل العالم تحورف بعمرها دام بيستانسون، الحياه حلوه ومش طويلة (طبعا بما يرضي الله)

[نايم سهران]

انزين يا صاحب الموضوع أنت ضامن انك تعيش 10 سنوات او 15 سنه قدام هههههه
خل العالم تحورف بعمرها دام بيستانسون، الحياه حلوه ومش طويلة (طبعا بما يرضي الله)


محد ضامن يعيش دقيقه بس مجرد نصيحه الي أسنانه مافيها عيوب موب زين يسوي تلبيس لانه اذا سويته خلاص مافي أمل ترجع خطوه ورى ،،

[الصغيره]

هذا بعد اذا طاحت التلبيسه بحقلها وهي نايمه وجابت الاجل لقدر الله

[سعودالدوسري]

أفضل عيادة لتلبيس الأسنان اللي يعرف أفيدنا ويكون عن تجربه
وأنواع التلبيس الموجود عندهم
وأي نوع أفضل

[Rashaalzain]

جزاكم الله خيرا..

[abunorah]

طيب وش افضل انواع التلبيس... افيدونا

[كازانوفا]

الموضوع به كثير مت المعلومات غير الدقيقة،،،وبصفتي طبيب اسنان اقول ان هناك حالات وهي كثيرة جدا تحتاج لتلبيس خصوصا لكبار السن،، وايضا للاطفال الذين لديهم اسنان لبنية ومن يعاني من السكر وبعض الامراض المعينة،،بل وهناك من يحتاج الى عمل جسور والجسور عبارة عن تلبيسات ايضا ومنها الثابت والمتحرك،،،وبعد التلبيس وباتباع ارشادات الطبيب المعالج لن يشتكي المريض من اي مشاكل،،،
هذا للتوضيح وشكرا،،،


صحيح كلامك وغير اللى اسنانه اتكسرت هاي ايش يسوي؟؟
لاني مضطره اودي ابني يسوي تلبيس لاسنانه واحد مكسور والثاني صار لونه على سواد خفيف

[كازانوفا]

أفضل عيادة لتلبيس الأسنان اللي يعرف أفيدنا ويكون عن تجربه
وأنواع التلبيس الموجود عندهم
وأي نوع أفضل


اول مره اعرف ان التلبيس انواع :omg:
طيب خبروني ايش احسن نوع وسعره بيكون بحدود كم ؟؟