ماهي الأجراءات في حال كشف الجار لمنزل جاره

[Nojoom]

السلام عليكم

وماهي الإجراءات الي الواحد ممكن يتخذها في حال هناك جار كاشف منزله

انا سكنت في بيت والفلا الي في مقابل فلتي لها بلكونه مطله على بيتي

كل يوم احصل فيها وحده من جنسيه عربيه جالسه وتشيش تقول مطله على البحر واليوم حصلت زوجها جالس

طلعت له وكلمته قلت له مالقيت الا هامكان تشيش فيه .. انت جالس في مكان كاشف بيتي

قال انا جالس في بيتي وكيفي وانا عيني مش على بيتك

هددته باني اشتكي عليه

وش الحل القانوني معاه ؟

قبل لا اطلع من طوري بسبت هالشي الي ينرفز

[فارس الكلمة]

إما ان تضع ساترا من الصفيح على سور بيتك أو تطلب من مالك البيت إغلاق البلكونه

[شيخ الديرة]

نفس المشكلة كانت معي، شبابيك البيت الجيران تكشف علينا، اتصلنا بمالك البيت والرجل تفهم موقفنا ووضع ستائر حديدية على الشبابيك المطلة.

[حسن الاحمد]

من كم يوم استأجرت بيت والبيت مكشوف من 3 جهات لان درايش الجيران عالحوش مباشرة والسور واطي جدا. جبت بيمات حديد وجينكو ورفعت السور 4 متر فوق السور الحالي الطابوق وارتحت. خصوصا اننا نقعد كثير في الحوش وخصوصا في هالاجواء الطيبة

[Nojoom]

جزاكم الله خير

الموضوع مب انه كاشف وبس

الشخصين بساعات يقعدون في هالبلكونه مشاهدين البيت

يعني شبه مراقبه للبيت يعرفون متى نطلع متى ندخل من موجود

يتناوبون على الشيشه وعلى الجلسه ..

غير انهم كاشفين البيت احس بشبه مراقبه للبيت

[رجل مثالي]

جزاكم الله خير

الموضوع مب انه كاشف وبس

الشخصين بساعات يقعدون في هالبلكونه مشاهدين البيت

يعني شبه مراقبه للبيت يعرفون متى نطلع متى ندخل من موجود

يتناوبون على الشيشه وعلى الجلسه ..

غير انهم كاشفين البيت احس بشبه مراقبه للبيت



ممكن الحل تعمل ساتر للبيت افضل من المشاكل لانه على كلامه جالس في بيته

[DreamBox]

بسيطه ، حط كشافات مليون واط مواجهين بيته وطفهم الساعه 12 فالليل

وياحبذا لو كيمرات مراقبة كبيرة علشان يعرف ان فيه تصوير

من ناحية قانونيه هو فالسليم ، لكن اللي قلت لك على من ناحيه قانونيه انت فالسليم بعد

[ذكي جدااا]

للأسف مافي اي إجراء كل واحد ببيته ماله شغل بالثاني. الحل مثل ما قالوا لك الإخوة انك تسوي ساتر بينك وبينهم وممكن تزرع أشجار كبيرة قدام البيت من النوع اللي يكبر بسرعه. الله يعينك

[MAZEN37]

لو كان بناء فيلته حسب خرائط وموافقات البلديه ما في قانون يمنعه من استخدام البلكونه
هذه مشكلة الاراضي الصغيره تحصل الفلل متلاصقه
الله يرحم ايام البيوت الشعبيه والحوش الكبير دار مدار البيت
الله يعينك

[al saad]

بسيطه ، حط كشافات مليون واط مواجهين بيته وطفهم الساعه 12 فالليل

وياحبذا لو كيمرات مراقبة كبيرة علشان يعرف ان فيه تصوير

من ناحية قانونيه هو فالسليم ، لكن اللي قلت لك على من ناحيه قانونيه انت فالسليم بعد

:victory::nice::nice::nice::victory:

[وطن]

لو كان بناء فيلته حسب خرائط وموافقات البلديه ما في قانون يمنعه من استخدام البلكونه
هذه مشكلة الاراضي الصغيره تحصل الفلل متلاصقه
الله يرحم ايام البيوت الشعبيه والحوش الكبير دار مدار البيت
الله يعينك
بالضبط

مافي قانون يمنعه
حقه يقعد في البلكونه
هو في بيته
ما تجبره على شي


لو افترضنا ان مقابل بيتك يعني في شارع بينكم
بعيد يعني

و لو ع الجنب المفروض بينه و بين سورك ظ£ متر
و بينك وبين سوره نفس الشي اذا كان عندك شبابيك

يعني مالك حق عليه لو فيلته مساحاتها قانونية

اذا مب عاجبك الوضع اخوي
غير في بيتك
ارفع سورك

لكن ما تجبر الناس ما يقعدون في بيتهم بالمكان اللي يبونه

:nice:

[بوNasser]

بما انه ساكن قبلك، يعني ما فتح نوافذ أو بلكونه مطلة على بيتكم بعد البنيان، فللأسف ما لك حق عليه.

جنب بيتي، جاري بنا فيلا ودرايشها كاشفة حوشنا، كلمت المقاول اثناء البنيان وقلت له غير مكان النوافذ أو خل زجاجها (غير شفاف) نفس الحمامات أعزكم الله ، وتفاجأت بعد فتره انه مركب زجاج عاكس وهذا اسوأ خصوصا في النهار، لأنه يكشفنا ولا ندري به.

اشتكيت عليه في البلدية خصوصا انه ما كمل البنيان، وارسلوا مفتش عاين المكان، واعتقد سجل عليه مخالفة.

كلمني المقاول يوم احتاجوا شهادة اتمام بناء، اني اتنازل عن القضية في البلدية، وراح يصلح الوضع، قلت له اول ضبط الموضوع وبعدين اتنازل.

وفعلا هذا اللي صار.

على العموم وضعك مختلف، والحل واحد من اثنين:
1- وضع ساتر وهذا هو الأحسن والأسهل، وممكن مالك البيت يتفهم الموضوع ويتقاسم التكلفة معاك.

أو

2- تشتكي عليه عند الشرطة، لو قدرت تثبت فعلا انه يراقب بيتكم، وهذا صعب اثباته.

تحياتي لك وللجميع.

[أسد الجزيرة]

حتى لو ما جلس في البلكونة ممكن يطل على بيتك من الدريشة فالأفضل انك تسوي ساتر قماش او شينكو بينك و بينه

[الكنترول]

بسيطه ، حط كشافات مليون واط مواجهين بيته وطفهم الساعه 12 فالليل

وياحبذا لو كيمرات مراقبة كبيرة علشان يعرف ان فيه تصوير

من ناحية قانونيه هو فالسليم ، لكن اللي قلت لك على من ناحيه قانونيه انت فالسليم بعد


هههههههههههههههههههههه حلوووووووووووووة جبتها صح

[الفا برافو]

بنيت استراحه في ام عبيريه والجيران من جهتين فيلل طابقين وثلاثه حتى وان كان بيني وبينهم شارع الا انهم يكشفون الحديقه...رفعت السور مترين من الشينكو من الجهتين والحين الوضع تمام.

[قطريه22]

ماتقدر تحكم على الغير لان صح كلامه بيته وهو حر فيه
بس انت تقدر تحط حاجز بينك وبينه

[ضوى]

استغرب من الردود اللي تقول كيفه بيته وهو حر !! وين حق الجار ؟؟

والله يا انه الواحد مايبطل درايش بيته يخاف لا بالغلط يكشف ستر جاره ، صج النخوة والغيرة انعدمت عند الناس ، يااارب لا تموت الغيرة فينا ولا النخوة

لك الله يا صاحب الموضوع والله يعينك دام هذا رد جارك ، ارفع سور بيتك واستر بيتك واهلك ، وقول حسبي الله ونعم الوكيل

[حمد 2002]

هل هناك حلول مبتكره للحاجز مابين الجيران غير رفع السور وغير القماش وغير الكيربي نبي شيء مبتكر ورخيص بنفس الوقت ؟ :telephone::secret:

[فارس قطر]

الرحيل الشعار الجديد

لكل واحد يجد مضايقات في منزلة.

[النهار]

هل هناك حلول مبتكره للحاجز مابين الجيران غير رفع السور وغير القماش وغير الكيربي نبي شيء مبتكر ورخيص بنفس الوقت ؟ :telephone::secret:

انت قووووووووووووووول
اذا كل الحلول الي قلتها ماتنفع مافي الا حل واحد :anger1:

[حمد 2002]

انت قووووووووووووووول
اذا كل الحلول الي قلتها ماتنفع مافي الا حل واحد :anger1:

هالحلول غاليه ههه نبي حلول ارخيصه = يعني فيها دفع فلوس شوي :rolleyes2:

[النهار]

هالحلول غاليه ههه نبي حلول ارخيصه = يعني فيها دفع فلوس شوي :rolleyes2:

حمد تبي الستر ولاتبي الفلوس اختار
والله لواتسلف ماخلي شوفاتي يتلصص عليهم غريب

[حمد 2002]

انزين الي ايحط حاجز كيربي هل ممنوع ول لا ؟ من ناحيه قانونيه ؟

[فريج النجادة]

عليك بشجر السدر تظرب عصافير

1- الكنار
2- العسل
3-الطيور والاصوات الحلوة
4- تكسب جيرانك والرسول وصا على الجيران
5- 150 ريال سعر السدرة طولها 3 متر

ولا تنساني في العسل والطيور

[أخت الكل]

فعلا الزراعه هي الاحسن وراح تستفيد منها نفسيا وصحيا خصوصا جونا اللي كله مغبر

[panda]

الحل هو الكلام الرزين. شكلك تهاوشت معاه من البداية. حاول تتحاور معاه بلطف ممكن يتفهم الوضع

[حمد 2002]

عليك بشجر السدر تظرب عصافير

1- الكنار
2- العسل
3-الطيور والاصوات الحلوة
4- تكسب جيرانك والرسول وصا على الجيران
5- 150 ريال سعر السدرة طولها 3 متر

ولا تنساني في العسل والطيور

بس الشجر الكبيرر ايخرب منظر البيت وايسكر المجاري والمنهولات وانت بكرامه

[جرس الإغلاق]

نفس القصه تقريبا

الجار بنى طابق ثاني صحيح بدون بلكونه بس حط دريشتين

الفرق ان هو جارنا من 30 سنه

المراد

انا ودي اعلي الحوش متر او مترين طابوق

او درابزين و قزاز بلاستيك ك عازل

الشينكو شكله يضيق النفس ومظهر غير حضاري

القماش الساتر شسالفته؟ كم العمر الافتراضي له؟

الخشب احس مش عملي ولو ان مظهره حليو

الشجر يبي له تباريه وتنظف وراه وقت الخريف

فعطونا الراي