مشورتكم في مجلس صغير

[بوNasser]

السلام عليكم ورحمة الله
بديت في بناء ملاحق ومجلس صغير (بحكم مساحة الأرض المتاحة للإضافات)،

المجلس مساحته 7متر طول و 5 متر عرض كما في الصورة التالية:

http://www.ab2004.com/muntada/majlis001.jpg

سؤالي:

كيف يمكن الحصول على الهوية التقليدية القديمة (من حيث الديكورات) مع الاستفادة من المواد الحديثة مثل نوافذ وأبواب ال يو في بي سي، ومكيفات السبلت أو الدكت وغيرها.

وهل من اقتراحات استفيد منها؟؟

وجزاكم الله كل خير

[معماري قطري]

الله يجعله مجلس مبارك ويجمعك فيه بالخيرين من الأهل والربع

أولاً المساحة عندك معقولة ولو تخلي الباب أصغر .. صفاقة وحدة وجهة الزاوية اليسار بيكون أفضل لترتيب الجلوس على شكل u وتجي على الجهة المقابلة روشنات محفورة في الحائط وفي وسطها التلفزيون .. لا تنسى عندك الحايط دبل وتقدر تسوي روشنات حتى بعمق 30 سم وتكون كافية لصف بعض الكتب وغيرها من زينه .. والأهم بتعكس التراث القطري.

لو حبيت تقدر توزنها بطريقة تخلي مقابلها نوافذ بعرض متر أو 80 أو 90 سم وبطول مرتفع وبقزاز ثابت ملون فوق سواءً مربع أو مقوس وعندك اليو بي في سي ممكن يسونه ويغطونه بلزاق بلون خشبي .. يكون الفريم بشكل خشبي من داخل وشكل أبيض عادي من برا.

عندك البلاستر لو تسويه مخلوط بصبغ بلون طيني ومعمول متموج من داخل بإسفنجه بيعطيك الشكل الطيني القديم لو حبيت .. السقف سوه بدنجل وخوص من فوقه بس خل الدنجل مصبوغ ومصنفر قبل التركيب في منجرة .. ولو تركب سبوتات ال اي ادي خاصة باردة محفور لها في الدنجل بتطلع بعد حركة حلوة .. الأرضية لو سويتها بلاط شعبي عادي وحطيت عليها سجاد فارسي بتطلع بعد حلوه.

لو يشتغل عندي برنامج الاوتوكاد كنت وضحت لك مكان النوافذ والأبواب بس أتوقع شرحي واضح.

السبعة متر تقدر تقسمها إلى 5 درايش طولية مثل ما قلت ومقابلها الروشنات .. والروشنات بعد لو تبي تقدر تسويها مثل الدرايش بإضاءَة مخفية وبقزاز ملون وجدامها مسافة للكتب أو الاكسسوارات .. وبالنسبة للحايطين ال 5 متر بيكونون باب المدخل وباب المغاسل متقابلين وتقدر تضيف درايش بنفس الطريقة قرب الباب ومقابله لها على الحايط الفاصل بين المجلس والحمام وممكن تسوي هذا الحايط سميك ولا تخلي الدرايش بعمق بس 10 سم ومثبت الفريم في طرفها ووراها الإضاءَة المخفية.

قبل لانسى أحس بيكون وايد أحلى لو سويت سكايلايت هرمي بسيط وخله بالضبط في الوسط 2.4 في 1.2 بيكون معقول ولا يمكن تسوي بعد شوي أكبر .. وفكرت في طريقة تخفي بها المكيفات وتقدر تسويها مثل الروشنة المغطاة جزئياً بالخشب بفتحات.

انا باسوي ان شاء الله أفكار قريبة من ذي بس على مجلس دائري.

ولو بتركب دكت سبلت يقدرون يركبون لك الفتحات في السقف وبلون بني يبين قريب من الخشب والخوص .. بس انتبه للإرتفاع وحاول مع التخطيط تزيد شوي أو خالف مثل باقي الناس.

[شموخ دائم]

,

,


مرحبا

اخوي الكريم

الجلسات الشعبيه والتراثيه لها جمالها ولها جوها الخاص


http://www5.0zz0.com/2011/02/13/07/415021137.jpg

وعموما الديكور الشرقي والعربي له نكهه خاصه

وعندك دمج التراث بالحداثه ربما يتناسق اكثر مع حياتنا الان

http://www.hotelchatter.com/files/61268/Souq_Waqif_Boutique_Doha.jpg

هذا شكل الحوائط والشبابيك مثل ما تفضل اخوي معماري


http://www.arabrooms.com/Pictures/HotelPic/175742_175742a_hb_w_003.jpg

انا احب دمج التراث بفخامه الديكور الحديث نسوي تزاوج بينهم
:)

http://foto-origin.hrsstatic.com/foto/5/8/4/8/584879/584879_su_3245731.jpg

http://arabianindustry.com/static/content/images/larger2/23869-250767.jpg

http://www.qia-qatar.com/sites/default/files/16.jpg

http://arabianindustry.com/static/content/images/larger2/23871-250769.jpg

http://www.hotele-butikowe.pl/wp-content/uploads/2012/08/9897303.jpg

http://exp.cdn-hotels.com/hotels/6000000/5100000/5095000/5094975/5094975_23_b.jpg


مشكله المجلس الشعبي يفتقد الفخامه ويخيم عليه الجو ( العتيق )

طبعا هي مسئله ( اذواق )

والناس فيما يعشقون مذاهب

:)


( الصور من فنادق سوق واقف بوتيك )
,

,



اخوك

شموخ دائم

[معماري قطري]

حلوه الصور إخوي شموخ .. كنت افكر في السكايلايت شلون يتناسب مع الشكل وشلون يجي الدنجل متوافق معاه .. ويمكن يكون الفريم بلون الخشب من داخل وجدار المنور ملبس خشب وأجزاء من الدنجل ممدودة لتحت المنور بيطلع حلو.

وبالنسبة للكراسي لو كانت تفصيل وشوي مرتفعة وسدو بتكون حلوه بعد، ولو حبينا الجلسة الأرضية أو الواطية المفروض ننزل مستوى الدريشة أكثر ليتناسب مع مستوى الجلوس.

[بوNasser]

السلام عليكم ورحمة الله

اشكر الأخ معماري قطر على سرعة تجاوبه، وعلى افكاره التي فاقت ما كان في بالي من افكار محدودة لا تتجاوز كم روشنه وسقف بالخوص والدنجل، او حتى جبس مصبوغ بلون الخشب.

اشكرك من كل قلبي وأتمنى من الله ان يوفقك في الدنيا والآخرة وان يجعل النجاح حليفك، ويجزيك على ما تقدم خير الجزاء.

والشكر موصول لأخينا شموخ دائم الذي له من اسمه نصيب. على تجاوبه وهمته العالية ففي كل مشاركة له تجد الفائدة،

ومع ذلك

فقد ازدادت حيرتي مع هذه الصور الرائعة، والديكورات الجميلة التي تجاوزت بلا شك سقف طموحاتي.

والسؤال المطروح هل هناك من ينفذ هذه الديكورات بسعر، لا اقول معقولا، وانما بسعر لا تكون المبالغة سمته؟؟؟ ولو تجاوزنا مسألة السعر، هل سيكون الإتقان والجودة متواجدان وبقوة؟؟؟.

تحياتي لكما وللجميع.

[اعمار قطر]

هلا اخوي شخبارك ممكن تواصل وياي ادزلك رقمك مصصمة لبنانية وثانية المانية شغلهم روعة ومستعدين لتصميم اي ديزاين ومن تجربة بالفيلا والصالون النسائي

[معماري قطري]

مشكور يا بو ناصر على الكلام الطيب والدعاوي الأطيب والله يوفقك ويجزيك كل خير

وأي شيء تسويه بخطوات واضحة وصح يستوي بسهولة .. حتى الدنجل لو تشتريه بروحك وتوديه المنجرة يقصونه حسب المقاس اللي تبيه وفيه عندك أطوال توصل لستة أمتار على ما اذكر .. وأفضل يسوون أما كسرة في الحايط يركب عليها الدنجل وفوقه الخوص أو تركبه على خشب ملاصق للحايط مثبت ببراغي .. وطبعاً الوايرات تكون فوق وتثبيت السبوتات الباردة .. مهم إنها ما تنتج حرارة .. يكون عن طريق كهربجي خبرة ويركب زين والقص والحفر لليتات في الخشب بيسويه النجار .

شفت مره مجلس ملبس الجدران سدو .. ومثبت خشب دنجل ببراغي مخفية وطالع حلو بس العيب فيه إن السدو رديء أو غش ومواد رخيصة بتشكيلة السدو اللي هو في الأصل صوف ووبر الإبل .. وهذا السدو يطلع ريحة مزعجة ومسوي كتمة .. وصاحب المجلس مثبت السدو والدنجل حتى على الحوائط.

إتجاه آخر تقدر تسوي السقف عادي ببلاستر متموج معمول ناعم بقطعة اسفنج وتسوي فيه المنور وتخلي الخشب مغطي جزء بسيط ولو تسوي السقف مرتفع والخشب بمستوى شوي تحت مستوى السقف وبدون خوص أو سعف نخل بيكون عندك شكل السقف مع الإضاءَة أنظف وأحلى وباقي الجدران مثل ما ذكرت قبل.

[Umsultan]

للرفع

موضوع في وقته

محتاجين اسماء محلات تصمم لنا مجالس تراثيه

[الواافي]

86360

[نور الحور]

ماشاء الله تبارك الله .. الله يبارك لك ويسهل عليك تسوي المجلس على ماتحب واكثر يابو ناصر ..

أنا مع راي شموخ دائم .. والصور اللي عرضها روعة ممكن تاخذ منها أفكار ..

حلو إن نظهر الشكل التراثي بـ(فخامة) .. خاصة إنه مجلس .. والمجلس حلو يكون رسمي وفخم .. ويحافظ على (الروح) التراثية ..


ممكن تروح فنادق سوق واقف وتاخذ فكرة .. أو فندق شرق ... واعتقد شركة (كورنيش) للتصميم الداخلي هي اللي نفذت جزء من التصميم الداخلي لفندق شرق ممكن تمر تشوفهم << للأمانة أنا ما جربتهم

[بوخالد911]

الله يوفقكم

[k.fatma]

هذا قد المجلس عندي
المودرن يعطي وسع اكثر لانه التقليدي حلاته بالبني الغامق من ناحية السقف والديكور للحائط
بالنسبة لي بابي في الوسط نفس الصورة
خليت اللون لؤلؤي والسقف ورق فضه بوردر فقط والطوفه اللي بالوجه مناظر زجاج تعطي كبر للمجلس والكراسي تفصيل نظام كرسي وكرسيين خذ مساحه 14 شخص بحرف l
هذا للاستفادة فقط

[بوNasser]

هذا قد المجلس عندي
المودرن يعطي وسع اكثر لانه التقليدي حلاته بالبني الغامق من ناحية السقف والديكور للحائط
بالنسبة لي بابي في الوسط نفس الصورة
خليت اللون لؤلؤي والسقف ورق فضه بوردر فقط والطوفه اللي بالوجه مناظر زجاج تعطي كبر للمجلس والكراسي تفصيل نظام كرسي وكرسيين خذ مساحه 14 شخص بحرف l
هذا للاستفادة فقط

جزاك الله خير

فعلا التقليدي على جماله راح يعطي احساس زيادة بصغر المساحة.

ممكن بس صورة لطرف الطوفة مع جزء من السقف اذا ما عليك كلافه.

تحياتي لك وللجميع

[معماري قطري]

إخوي بو ناصر مجالس أهل قطر التقليدية كانت من مميزاتها صغر المساحة والجلسات الأرضية والركبة في الركبة والدرايش نازلة وخشبية ومفتوحة .. والسوالف طيبة .. لا تهتم بصغر المساحة وركز على البناء وواصل معانا بصور والله يوفقك.