مشروع اعادة تدوير

[فيصل الفيصل]

السلام عليكم
افكر حاليا في مشروع اعاة تدوير (ورق ،كرتون، الخ)
لم احدد المادة بل انني لم ادرس المشروع كون اجهل بعض الامور الاساسية قبل هذا
فأحببت ان اسأل
هل اعادة التصنيع احتاج لمصنع او استطيع العمل بورشة
مكان المشروع هل يجب ان يكون في صناعية
امور الترخيص هل فيها عقبات
والسؤال الاهم قبل ان اجهد نفسي في دراسة المشروع هل سأجد باب مغلق لايفتح الا بواسطة
اتمنى تزويدي بالمعلومات والنصائح
وشكرا

[معماري قطري]

إعادة التدوير تحتاج دراسة طويلة ومعقده .. إقترحت هذا الإقتراح في السابق من حول 5 سنين وأعتقد فيه خطة حكومية لهذا.

بعض دول العالم وصلت مراحل متقدمة في إعادة التدوير .. حتى شفت فلم عن تنقية المياه من البكتيريا بصعق البكتيريا بشحنة كهربائية بسيطة وبحيث تنشر برادة الفضة على هذي المياه وتمرر في أأُنبوب يمرر فيه تيار كهربي .. وفي هذه الأثناء تعمل برادة الفضة على صعق البكتيريا أثناء المرور فيصبح الماء 100% نقي لكل الإستخدامات.

سمعت أن بلدية دبي تستخدم 90% من المياه المعالجة لزراعة الشوارع وللبحيرات ولغسيل الزراعة أثناء الليل، فنرى زراعتهم خضراء منوره وزراعتنا ملحا ومغبره.

الآن جاري استخدام البلاستيك المعاد استخدامه في إنتاج مادة اليو بي في سي، وهناك نوع مقوى أكثر ويستخدم لصناعة عوارض " أبيام " السقوف.

ما ادري ليش ما عندنا صناعات كبس الخشب حيث أن الفائض الزراعي الخشبي كبير بسبب قص بعض الأشجار، وما ادري ليش ما تستخدم بعض الفضلات الغذائية في إنتاج تربة زراعية منتجة، سمعت أن ببساطة دفن بقايا السمك وقشور البيض في التربة الزراعية يجعلها خصبة جداً.

تدوير الحديد والمعادن تقريباً موجود عندنا .. بس مهم بعد تدوير الزجاج اللي يعتبر من أسهل المواد قابلية للتدوير .. في ايران استخدموه بخلطه في الصبغ من زمان .. وفي أمريكا استخدموه في خلطات الأسفلت بعد من زمان.

تفكيرك متميز وأتمنى يحصل قبول وورشة بسيطة ممكن تنفع حق مادة معينة .. لكن تدوير كامل يحتاج لعدة ورش مترابطة في مصنع وإدارة وإنتاج وشغل متعب وما يطلع أي ربح ويفترض تقوم به الحكومة على مستوى عالي ولمردود ربحي معنوي وبيئي.

[فيصل الفيصل]

شلون استنتجت انه مايطلع ربح
اسف لكن انا ما اعتبر الكلام جواب
الجواب عن الربح او الخسارة يجب ان يكون باللغة الارقام
من اين تحصل الشركات في قطر على (البلاستك) مثلا
وكم سعره بالطن + اسعار الشحن وغيره
ماهي الكمية القابلة للتدوير في قطر شهريا من البلاستك

[اعمار قطر]

اخوي اذا بغيت بعطيك رقم رجال مستشار بامور دراسات الجدوى للمشاريع وشغله محترم ورخيص

[مذحج]

السلام عليكم ورحمة الله وبركاته

صبحكم // مسإأإأإكم الله بالخير جميعا


اول شي حبيت احييك اخوي فيصل على فكرتك

ولو كانت الفكره حاليا مجرد خيال بس دام الانسان يفكر يعني هو حي وممكن ينجح ,,



بالنسبه لموضوع التدوير موضوع شيق وفيه دخل حلووو .. وخاصة انه ينظف البلاد من ......! ما يحتاج اقول

المهم : ان التدوير يحتاج لمكاين ولالآت وتراخيص صناعيه (وزارة الطاقه والصناعه,غرفة التجاره ,وزارة التجاره ، وزارة البيئه، وزارة البلديه )
وغيره وغيره

ويحتاج يكون عندك ارض في الصناعيه .., سؤال عندك ارض ؟؟

اما بالنسبه للكراتين والاوراق بتحصل لين ما تقول بس ..

وعلى حد علمي عندنا مصنع تدوير ورق وكراتين ومصنع لتدوير البلاستيك والحديد والالمنيوم

يعني بالعربي تحتاج رؤؤؤووووس امواااااااااال كبيييييييييييييره

وهذا الشي ما يمنع ان احنا نفكر ..

ودايما الانسان مايحط قدامه شي اسمه مستحيل ... دامك تعبد (القادر) فما في شي مستحيل

بس ابغيك تحط بالك معاي شوي :!!!!

انت طرحت فكره اللي هي مصنع تدوير نعتبره هذا (هدف)

الحين ابغي منك تفكر معاي شلون توصل لهذا الهدف (هذا هو اهم شي )

مثل ما قلنا قبل شوي المصنع يحتاج تكاليف كبيره وانت وانا لين الحين مبتدين في السوق ومانقدر على هذي التكاليف ..

فلذلك نبدأ شوي شوي لين مانوصل للهدف

ابدأ جيب لك عمال وحط لهم موترين بياكم 3 طن وخلهم يجمعون في الورق والكراتين وابدأ بيع في مخازن الكبس اللي في الصناعيه بشكل يومي يجمعون من الفجر لين الليل ويبيعون اللي اجمعوه ..وبهالطريقه

تقدر تعرف كم تقريبا صافي ربحك في الشهر بحيث ان تكاليفك بسيطه بترول ورواتب عمال فقط ,,

اهم شي تعرف بكم يشتري منك مخزن الكبس ؟ وبكم يشتري المصنع من مخزن الكبس ؟ (طبعا بالطن)

وشهو مخزن الكبس ؟ : (هو عباره عن مكان يشتري الورق من الناس اللي تجمع ويكبسه على شكل مكعبات (بالات) ويبيعه على مصنع التدوير لان المصنع مايشتري الا ورق وكراتين مكبوسه) ... درس اجتماعيات ههه

بحيث انك مع الوقت ان شفت الموضوع ان فيه فايده ومربح تبدأ شوي شوي تفتح لك مخزن كبس ...

ومخزن الكبس غير مكلف : خاصة اذا انت فهمت الشغله مداخلها ومخارجها
تحتاج: سجل تجاري (سهل جدا) بالأضافه إلى :
1- مكينة الكبس (غير مكلفه )
2- الميزان (غير مكلف)
3- سيارتين او ثلاث بياكم 3 طن
4- ستور
5- عمال(تقسمهم : عمال يجمعون وعمال يكبسون وعمال على الوزن)

وتبتدي بعمالك يوميا يجمعون الورق والكراتين من الدكاكين والجمعيات والمطابع والوزارات و و و و و و و وغيره نفس الموضوع السابق
بالأضافه انك تستقبل ايضا الناس اللي تجمع .. وتشتري منهم الورق المخلوط وتكبسه عندك وتبيعه جاهز للمصنع مكبوس هو يدورها ويرتبها ...
والزين في مخازن الكبس تقدر تدخل مناقصات (دايما المصانع اللي بمسيعيد ينزلون مناقصات بمطمر مسيعيد كمية ورق وكراتين )

وشوي شوي لين تفهم الشغله ويصير عندك راس مال بعدها تبدأ تعرف معنى مصنع تدوير ؟,,

المهم انك تبدأ بالقليل والله بيجيب الكثير .. ومحد بدأ مره وحده ما يفهم الشي الا بالتدريج


واسمحلي ع الاطاله وعلى الشرح الممل ,, بس مادري ليش جاني فضول اسرد لك شرح ,,


واتمنى اني توفقت في ذلك

بالتوفيق

ويمكن يفيدك اخوي شموخ دايم اكثر ..

كل الود

[معماري قطري]

شلون استنتجت انه مايطلع ربح
اسف لكن انا ما اعتبر الكلام جواب
الجواب عن الربح او الخسارة يجب ان يكون باللغة الارقام
من اين تحصل الشركات في قطر على (البلاستك) مثلا
وكم سعره بالطن + اسعار الشحن وغيره
ماهي الكمية القابلة للتدوير في قطر شهريا من البلاستك

إذا التركيز على البلاستيك فهناك أنواع كثيرة منه وأغلبها لا يمكن إعادة إستخدامه ويسبب تلوث بيئي

بالنسبة لأي مشروع إعادة تدوير أسهل شيء ويمكن أربح طريقة هي فرز المواد وبيعها خام بأسعار زهيدة .. أعرف إن الحديد بعد هدم المباني يجمع ويباع لمصنع الحديد والصلب .. وعن استنتاجي بخصوص الربح لأن التكلفة عالية والتكنولوجيا المستخدمة لازم تكون عالية وتستجلبها دولة قادرة .. مثلاً إعادة تدوير الورق يحتاج شغل وايد والنتيجة ورق محد بيشتريه بسبب سعره حسب تكلفة انتاجه وبسبب جودة ورخص الورق الموجود.

[السيليه]

بالتوفيق