ركبو السيراميك زيرو جوينت وعفسو الحمامات !!!!

[Qt.1]

تعاقدت مع شركه لتركيب سيراميك حمامات البيت اعزكم الله , نزلنا السيراميك الحوش وجا شافه المقاول والفورمان , قلت للفورمان ابيه زيرو جوينت يركب قال اي يركب مافي مشكل ميه ميه , مع العلم سيراميك اسباني طالع علي حول الثلاثين الف , المهم بدى ايركب وعقب كم حمام انتبهت ان التركيب مش زيرو جوينت وفي فراغات كثيره والبلاط اصلا مش سيده الخط من فوق لتحت متداخل اشوي وعقب يوم اطق على البلاط اسمع مثل صوت الشي الفاضي !! , كلمت المقاول رحنا لين الحمام قال للفورمان المالك قال زيرو جوينت هل هذا زيرو جوينت قال الفورمان حاولت اركب زيرو جوينت وماركب وطلع فراغ بسيط هاوشه المقاول قاله كان قلت لصاحب البيت ان السيراميك مايركب زيرو وركبته كروس احسن , المهم اللحين وقفت الشغل وقلت للمقاول الشغل مش عاجبني ولازم انشوف حل , اللحين رايكم ياجماعه شنو الحل اتوقعون اعفسو السيراميك الي شريته وركبو لي اياه اي كلام , ركبو 3 حمامات ونص تقريبا وباقي اثنين ونص , شالدبره معاهم ؟

[معماري قطري]

والله يا بو عبدالله شقول لك .. صبرت وايد كان المفروض تخليهم يركبون خط بلاط واحد وتشوفه .. وتقول يطبطب شلون هم مركبينه بوشو؟ ليكون يحطون مونه اسمنت عادي ويرضخونه على الطوفة؟ .. المفروض يسوون الطوفة بلاستر أول شيء وبشوية تشميخ بمشط حديدي أو حتى بدون إذا يستخدمون لزقة قوية مواصفاتها تنحط على سطح ناعم .. بعد ما يخلصون البلاستر وينرش ماي كم يوم أو حتى أول ما يخلص تجي تشيك عليه إذا سيده ينرش ماي ويتقوى فترة اسبوع وبعدها تصبر شوي لين يجف وبعدين يبدأ التركيب وحسب مواصفات اللزقة أو المونة الخاصة .. لكل مونة مواصفات مصنع وطريقة عمل وخلط خاصة .. بعضها بالماي وبعضها بسائل خاص وبعضها باليد وبعضها بخفاق كهربائي وكل شيء بكميات محددة .. بعدين تجي طريقة تركيب بلاطتين أو 3 بلاطات وانت تشوف وتعرف استعداد اللي يشتغل بالعدة الضرورية وبطريقة التركيب صح .. سوقنا يا اخوي فيه المتردية والنطيحة وما أكل السبع والكل مستعد يسوي كل شيء ويسونه غلط عينك عينك من البداية.

للي ما يعرف أُسس التركيب يحاول قبل يشوف ويسئل وحتى اليوتيوب فيه طرق التركيب واضحة .. بس أفضل يسوي بحث باللغة الانجليزية.

بعدين تمثيلية المقاول مع الفورمان معروفة وحتى الإستشاري اللي ياخذهم بالزعاق .. خطوة خطوة ما تنتقل للخطوة الثانية الا الأُولى مسوية صح .. ويفترض توقيع المقاول على استلام البلاط وحمايته وتوقيعه على طريقة التركيب وباشراف الاستشاري .. لأن هذي التعليمات المفروض تصدر من استشاري متابع.

[فتى الجود]

ووين الأستشاري ؟

المفروض الأستشاري يكون مشرف عليهم وعلى اصول الصنعه

و الله يعينك

[Qt.1]

تسلمون شباب على ردودكم , انا عقدي عظم بس ويوم خلصت هالمرحله انتهى عقدي مع المقاول والاستشاري , الشركه الي ركبت لي السيراميك شركه ثانيه غير عن الي بنت لي البيت .

[معماري قطري]

حتى ولو إخوي بو عبدالله .. انا ما الومك لكن أحذر الكل وحتى الكل يستفيد أقول وشو الإجراء الصح .. وصدقني العظم ما فيه شيء مهم أو واضح للإشراف وممكن يمشي بدون إشراف .. الأهم مرحلة التشطيب وعقود التشطيب لازم تكون تحت اشراف وادارة استشاري واستشاري فاهم.

ألحين المفروض المقاول هو مسؤول يعوضك ويحل لك المشكلة مثل ما اتفقت معاه في الأصل .. ومثل ما وضحت لك الخطوات اللي لازم يسويها.

[Bozizoo]

اخوي اذا الشغل بالمره كريه ..انصحك بدا معاه انه يغيره كله على حسابه لين توصل النص بالنص او يدفع لك اي شي من قيمتة..بالعربي اي شي تقدر تاخذه منه.هذا بيتك لازم تخسر عليه اشوي ..ومثل ماقال الخبير معماري قطري عن المفروض ايش كان لازم تسوي ..والله يعوض عليك يعني تقريبا 10 الف ..الله يرحم استراليا شغل العمال كنه مصنع والله كنت ابقق عيوني على الدقه ..بس بكل امانه احنا الي ندور الرخص ولا شغل الب وفيشنال موجود بالدوحه ..

[khaldoon]

اخوي اعتمادك على نفسك فقط بدون اشراف في مرحلة التشطيب اكبر غلط الصراحه

اسف لو قولت لك انك رحت على ناس مالهم خص بالصنعه ولا يعرفون عن السيراميك شي....ما تشتري شي غالي و تعطيه لناس ما تفهم تدمره

الحين اللي تركب يعتبر في حكم الهالك و ما اعتقد تستفيد منه

ما تدفع شي و اطلب تعويض و روح لناس محترمين و على الاقل يورونك شغلهم عدل باماكن ثانيه

الله يعوض عليك

[Chambray]

نفس مشكلتي بالضبط

كنت ابحث عن الرخص
وانضربت على راسي

لكن تعلمت في الارضيات وباقي الحمامات بعمال مستواهم جداً ممتاز ..

الحياه تجارب ..

ومرحلة بناء العمل بتعلمك الكثير الكثيرللاستفاده في المستقبل

[معماري قطري]

ذكرتوني بمشكلة أحد الاخوان .. قال لي تعال شوف بلاط الأرضية شلون .. وهو كانت نيته يركب بلاط شعبي رخيص ويركب عليه باركيه خشب .. وقال لي العامل مصري .. قلت له يا اخوي أي جنسية باقدر اتفاهم معاها أما مصري بيطلعني غلطان وبيقنعك ان شغله صح .. ألح ورحت معاه .. والله كان البلاط تدوسه يهتز وكان غير مستوي وفيه تحدب غريب في الوسط .. والمصري ياخذك بالكلام لدرجة اني عصبت عليه واعترفت بعجزي عن اقناعه ورحت .. والمالك كمل البيت واضطر يسوي البلاط التحتي مره ثانية وكان هذا في الصالة السفلية غير عن العلوية اللي بيكون فيها الباركيه .. واللي ما ادري شسوى فيها بالضبط بس شغله يحتاج تعديل ... أما تحت بين واضح واستوت ارتفاعات مزعجة وقام البلاط واحتد يغيره كامل .. يعني مسكين هالعامل لعب عليه لعبه بدال ما يدفع مره دفع 3 مرات علشان يصلح أخطاء هذا العامل.

[نور الحور]

لا حول ولا قوة إلا بالله .. الله يعوض عليك أخوي بوعبدالله .. وإن شاء الله تلقى حل يرضيك يارب ..

سبحان الله البنيان تعب بتعب ... كلشي يبيله تدقيق حتى لو عندك مختصين أو استشاري ..

والله حزات أقول سبحان الله بيت ولا فيلا بالدنيا يبيلها كل هالتعب والجهد والوقت ..!

وقصر في الجنة .. ينبني لك في دقايق لما تقرأ سورة الإخلاص (قل هو الله احد) عشر مرات ..

أذكر نفسي وأذكركم بقراءتها واحتساب أجرها ..

[معماري قطري]

ايه والله صحيح إخت نور الحور .. الله يعطي وكل الدنيا بما فيها ما تسوى قطرة من ملكه اللي يسع محيطات

[Qt.1]

مشكورين على مروركم اخواني واخواتي وعلى دعوتكم الطيبه , يمكن اشوي انا هولت الموضوع هو مب تعبان لهدرجه في كذا غلطه يعني لكن عامة الشغل زين , واليوم رحت مع المقاول البيت وراويته الااخطاء واعتذر لي و قال لتحاتي اي خطأ انا بغيره وبعدله وانا مسئوول عنه وغير لي الفورمان وقالي حتى لو عدلنا والشغل ماعجبك مستعد اغير لك الحمام على حسابي بعد , بصراحه ماقصر الله يجزاه خير .

[Civil ENG]

اخوي معماري اذا فيه مبلط بروفشنال كم تتوقع بياخذ على المتر المربع وشنو تنصح بالنسبه لاحسن طريقة للدفان وهل تنصح اخذ مبلط مع المواد او افر المواد بنفسي وشكرا لراعي الموضوع *

[معماري قطري]

اخوي معماري اذا فيه مبلط بروفشنال كم تتوقع بياخذ على المتر المربع وشنو تنصح بالنسبه لاحسن طريقة للدفان وهل تنصح اخذ مبلط مع المواد او افر المواد بنفسي وشكرا لراعي الموضوع *

هلا إخوي مهندس مدني .. بنيانا يا اخوي مب رخيص غالي في مواده وفي مصنعيته بس أستغرب في التبليط والطريقة اللي ماشية بأن يركبون البلاط على طبقة رقيقة من المونة الموضوعة بقفشة بلاستر وبواسطة واحد يتفنن ويقيس الإستواء أو اللفل بعينه أكثر شيء .. الغالبية يسون صبية تحت 10 سم وبعضهم 15 سم ويحطون حديد وشغل زين .. بس نجي فوق بعد تمديد الكهربه نحصلهم يتركون المقاول يلعب على كيفه ويدفن بالبودرة .. اللي تعتبر عادم كسارات رخيص وملوث أوقات بيرقات نمل أبيض أو حتى نمل عادي .. والأفضل عمل صبية مايعة .. الماي كثير فيها ويخلونها تستوي مستوية بالوزن بدون تدخل وتكون سيدة وجاهزة للمونة وللبلاط مثل ما حطيت من مقاطع اليوتيوب.

حتى شبك الحديد ما تحتاجه وتحتاج حماية نايلون من تحت ودفان زين وأرضية مدكوكة .. الردي مكس ينصب فيه وهو يخلط قبل ليصب في البمب مادة سائلة تتحول خيوط فايبر وهذي تمنع تشقق وتشلخ الخرسانة وما تحتاج إدامة " curing " وتكون الأرضية ملسا وقوية وجاهزة للسجاد حتى بدون تبليط .. شوف الصفحات الأُولى من المواصفات اللي حاطها في موضوع العقود اللي في توقيعي فيها اسم المادة .. بالنسبة للأرضية سواءً ملسا وناعمة أو مخشنة لكل نوع نوعية مونة مناسبة وبقوة مناسبة تلصق البلاط .. تصدق خذت نوع من ساتكو على ما اذكر ماركة فوسروك تحط بس في زوايا البلاطة قليل بحجم النص ريال وتلصقها على أي سطح وما تقوم كلش الا تنكسر البلاطة .. انا ركبت منها على سطح خشب مارين بلايوود أملس وتكرم في الحمام والماي ينرش عليها دوم ولا طاحت ولا بلاطة لمدة قريبة من 10 سنين ألحين.

السوق مليان مواد زينة بس محد يستعملها وأوقات ما يستعملونها صح، الزين ألحين كل شيء موجود ومشروح في اليوتيوب بوضوح غير عن الكتب وتعليمات التركيب والخلط الخاصة لكل مادة.

بالنسبة لسؤالك عن المبلط والمواد .. إذا تتعامل مع مقاول جيد بقعدة بسيطة معاه بيشرح لك كل شيء ولازم كل شيء محدد قبل بواسطة الإستشاري ومشروح بالرسم التفصيلي والمواصفات .. ولكل طريقة تكلفة ومواد .. مثلاً الزيرو جوينت الغالبية يشردون منها ويقنعونك تركب بفواصل لأن هذي الطريقة الوحيدة اللي يعرفونها ويحشون فراغاتها بإسمنت أبيض رخيص ويقولون لك كل شيء زين .. الإسمنت الأبيض كيس 50 كجم يكلف يمكن 20 ريال ويكفي بيت كامل كغراوت أو مونة بين البلاط .. وفيه نوعيات 5 كيلو ب 25 ريال وتعتبر الأرخص وتكفي حق غرفة حسب الفراغات بين البلاط .. وفيه نوعيات غالية توصل ل 200 ريال للعبوات الصغيرة وتكفي أمتار بسيطة .. Non sanded epoxy grout على ما اعتقد .. وهذي الأخيرة تخلط بخفاق كهربي وبمقادير معينة وبسائل خاص يجي معاها ولازم تنمسح عن البلاط سرعة لأنها تلزق ولا تقوم كلش وتغير حتى لون البلاط .. وفيه عندك نوعية حبات الرمل وايد صغيرة فيها وتجي بألوان متعددة وتنفع حتى لفتحات كبيرة توصل 14 ملم .. وهذي تعطي شكل حلو وفيه منها ألوان فاقعة مثل الأصفر والأخضر وما تتغير أو تمسك الوصخ وتنخلط بكمية ماي بسيطة معينة .. هذي موجودة عند المتحدة ورخيصة نسبياً مع الايبوكسي.

شوف بالأخيرة لو تبي تسوي تشكيلة وتكون الخطوط واضحة وتكسر لون البلاط بتطلع وايد حلوة وممكن تغامر بالألوان لو حبيت .. مثلاً بلاط أسود وغراوت أحمر أو أصفر أو أخضر فاقع.

مهم عندك الإشراف ومعرفة المواد اللي بيستخدمها المقاول واللي المفروض محددة مسبقاً في المواصفات والرسومات التفصيلية أو تتفق عليها قبل التنفيذ وسواءً تشتريها انت أو يشتريها المقاول الاشراف مهم .. البعض من الفورمنية والعمال يتفننون ويخلطون لك غراوت زين مع رمل أو اسمنت أبيض .. ويتفننون في وضع مونة قليلة أو ببساطة إسمنت عادي كلاصق تحت البلاط .. وصدقني التوفير ولا شيء بس ما يهمهم .. لكن في المواد الغالية التوفير يكون وايد لصالح المقاول.

في آخر هذا الموضوع حطيت كم رابط لمقاطع فيديو تثقيفية عن البورسلان.

http://www.qatarshares.com/vb/showthread.php?574298-%C7%E1%C8%E6%D1%D3%E1%C7%E4-%C7%E1%C7%C8%D8%C7%E1%ED-%E6%C7%E1%C7%D3%C8%C7%E4%ED-%BF

[كرواتيا]

شامبري ابي رقم العمال لو سمحت