الله يسامحكم يالحريم ،،، كل شي رفعتوا سعره !!!

[مشاكل]

معقولة مكياج وتسريحة حق حفلة عرس ب 1800 ريال وهذا ارخص شي بعد .
معقولة الفساتين اسعارها فوق ال 2000 ريال وهذا يعتبر شيييييب على قولة الحريم البرستيييج .
معقولة الحنه لليد بس ارخص شي ب 150 ريال .
غير الشنطة والجوتي الله يعزكم والاكسسوار اللي لازم كلهم يكونون متناسقين مع الفستان والتسريحة والمكياج والخرابيط .

شيسوي المسكين اللي عنده اربع او خمس او ست حريم فالبيت ؟!

أنتوا السبب يالحريم في ارتفاع الاسعار الله يسامحكم ،،، من زادوا الرواتب واشتغلتوا قمتوا تمشون والفلوس اتحذف منكم ولالها قيمة كلش ،،، تبون الدليل ؟

والله العظيم ان في وحدة كوافيرة كانت تسوي المكياج ب500 ريال ،،، والحين ارفعت سعرها مره وحده ل 1200 ريال ،،، قالوا لها الاهل ليش ؟؟ تدرون شقالت ؟؟!!
قالت : يوم كانت اسعاري رخيصة محد كان يجيني ويوم رفعت الاسعار مب ملحقه على الشغل !!!! تخيلوا عاد !!!

[يمامـة]

صحيح كلامك يا اخوي مشاكل ،،

في الوقت اللي المفروض نشجع البنات انهم يتعلمون يتمكيجون في البيت ويتعلمون يسوون تساريحات
ويصممون لنفوسهم ويبقى على الخياط انه يخط لهم ،،

المشكلة الكل يبي يصير مثل بنات الشيوخ والاكبارية في الدفع ..

[أسد الجزيرة]

وين عايش انت هذا قبل ايام التسعينات الحين اقل من خمسة الاف ما تيجي المكيجة

[يمامـة]

وين عايش انت هذا قبل ايام التسعينات الحين اقل من خمسة الاف ما تيجي المكيجة

بالغت كثيرا يا اخ العرب ،،

[أسد الجزيرة]

بالغت كثيرا يا اخ العرب ،،

هي للعروس

[النهار]

لو فيه احصائيه
كم يكلف العرس وليلة الحناء والهديه وشهر العسل + مصارف المعازيم الي يصرفونها على انفسهم للمكياج والفستاين والاكسوارات والحذاء وووووووو
اكيد مبلغ خيالي

[النهار]

بالغت كثيرا يا اخ العرب ،،

ليش اختي الحين يطلبون الي تمكيج من دول الجوار كل شي على حساب العرس
من تذاكر والفندق وبوكت موني + الاتعاب

[مشاكل]

ارجو تثبيت الموضوع
من حر مافي قلبي :eek3:

[يمامـة]

ليش اختي الحين يطلبون الي تمكيج من دول الجوار كل شي على حساب العرس
من تذاكر والفندق وبوكت موني + الاتعاب

بس هو كتب اقل شي 5000

عرس ولدي العروس ما ادفعت 5000
وما بالك بالباقي من الحضور،،
500 او 600 مع المبالغة ،،

[يمامـة]

ارجو تثبيت الموضوع
من حر مافي قلبي :eek3:

ما انصحك اتطالب بتثبيته لأنه بيموت ،، خله متحرك وشارك فيه
وان شاءلله حرتك بتبرد ..

[يمامـة]

هي للعروس

لا مستحيل في ارخص

[بوحارب]

دليل على قلة العقل ،،،،

[المتألم]

العيب مب بالحريم ، العيب في الرجال .

[مشاكل]

ما انصحك اتطالب بتثبيته لأنه بيموت ،، خله متحرك وشارك فيه
وان شاءلله حرتك بتبرد ..
اختي يمامه ،،، العيال كبرت ،،، وكلن قام يزوج بنته او ولده ،،، والفاتورة شغاله في كل زواج ملجه وليلة حنا وعرس وكل مناسبة تحتاج فستان وكوافير والاكسسوارات وغيرها ،،، ومايمر شهر الا بحفلة ،،، واللي عنده اربع او اخمس او ست بنات شيسوي ؟؟!! :eek3:

[CH Engineer]

لو فيه احصائيه
كم يكلف العرس وليلة الحناء والهديه وشهر العسل + مصارف المعازيم الي يصرفونها على انفسهم للمكياج والفستاين والاكسوارات والحذاء وووووووو
اكيد مبلغ خيالي

بعض الحريم الفستان ماتلبسه الا مره وحده عيب تلبسه مره ثانيه الكل بيتكلم عنها .. وسعر الفستان 5000 ريال وانت طالع
غير المكياج والخ..

لو تحسب كل الحريم الي فالعرس كم يكلفهم الحضور للعرس + مصاريف العرس نفسه بيطلع المبلغ بالملايين فوق ال10 مليون كمتوسط واعراس الهوامير مبالغ خياليه اكيد

[يمامـة]

العيب مب بالحريم ، العيب في الرجال .

لااا الريايل مساكين ظلال لا تكش ولا تنش ،، و الحريم هم السبب في كل شي

[يمامـة]

اختي يمامه ،،، العيال كبرت ،،، وكلن قام يزوج بنته او ولده ،،، والفاتورة شغاله في كل زواج ملجه وليلة حنا وعرس وكل مناسبة تحتاج فستان وكوافير والاكسسوارات وغيرها ،،، ومايمر شهر الا بحفلة ،،، واللي عنده اربع او اخمس او ست بنات شيسوي ؟؟!! :eek3:

الله يعين يا اخوي مشاكل ،،

في ناس ما خذتهم المظاهر بالطريقة المبالغ فيها ،، وفي ناس لا لازم يواكبون موضة المبالغة في حب الظهور ،،

في ناس يستلفون فساتين من بعضهم البعض ويستلفون اكسسوارات وكلتشات او عبي حتى
وحياتهم ماشية يدخلون العرس ويضحكون ويرقصون ويطلعون ،،

وفي ناس لا تلقاهم الا يكون عندهم من كل شي حتى لو بيلبسونه حق مرة وحدة
بعد يدخلون العرس يضحكون ويرقصون ويطلعون ،،


الاسعار في ارتفاع مبالغ والناس اتجاريها على كل شي المهم واللي مب مهم ،،

وربنا يرحمنا برحمته يا اخوي مشاكل ،،

[النهار]

بعض الحريم الفستان ماتلبسه الا مره وحده عيب تلبسه مره ثانيه الكل بيتكلم عنها .. وسعر الفستان 5000 ريال وانت طالع
غير المكياج والخ..

لو تحسب كل الحريم الي فالعرس كم يكلفهم الحضور للعرس + مصاريف العرس نفسه بيطلع المبلغ بالملايين فوق ال10 مليون كمتوسط واعراس الهوامير مبالغ خياليه اكيد

اكيد تقصد هذالرقم الخرافي لعرس واحد فقط لوحسبنا كم عرس في اليوم وفي الاسوع وفي الشهر والسنه
لوجمعت هذه المبالغ فعلا رقم خيالي لايتصوره عقل انسان حتى لو حذفنا نصف المبلغ المذكر
بهذه المبالغ نستطيع انتشال دول مسلمه كثيره من العوز والحاجه والفقر

[دااانة قطر]

اكيد تقصد هذالرقم الخرافي لعرس واحد فقط لوحسبنا كم عرس في اليوم وفي الاسوع وفي الشهر والسنه
لوجمعت هذه المبالغ فعلا رقم خيالي لايتصوره عقل انسان حتى لو حذفنا نصف المبلغ المذكر
بهذه المبالغ نستطيع انتشال دول مسلمه كثيره من العوز والحاجه والفقر



صدقت والله
تصدقون اني صرت اجامل البعض على صور عرس او خطوبة لاني مابي اكسر بخاطرهم
احيانا لا مكياج ولا تسريحه والمشكله ان قبل ماتعطيهم رايك كل وحده تمدح عمرها وانها سوت شي مايوصف فتقول في نفسك فكتني من المجامله




الحين اذا دفعوا واايد معناها ملكة جمال


الله يهديهم

[Hamad5882]

ردى العقل مصيبة ،،،

[لاجل QT]

حنان النجادة في الكويت


مكياج بس 16 الف

تخيلو صبغ بيروح بالماي بهالمبلغ وساعتين بس

اتفق معك مشاكل الحريم هم السبب .

ثقافة الشرا عندنا غلط في غلط

كل ماكان الشي غالي اقدر افوشر بة...وليست الجودة هنا هي الاساس...اهم شي غالي وخلاص حق تقدر تفوشر ويعطونها نظرة الابهة والتقدير....مالت بس على المخوخ الفاضية

ثقافة غبية بصراحة اخترعها بعض النساء الاغبياء للمفوشر

والضحية احنا الناس المتوازنة:(

[بنت مريخ]

الحريم مايبون الرخيص لان سعره مب حلو
يبون الغالي حتى لو يلوع الجبد حق المفوشر و الزبو
ماترضا تفشل عمرها برخيص اذا اسئلوها
الحمدلله ماروح اعراس

[نور الحور]

الله المستعان يا مشاكل .. الموضوع صار (ثقافة) شائعة ... إن الغالي بالضرورة أفضل .. إن الغالي للمظاهر و(المفوشر) ..

وطبعاً هالثقافة المنتشرة يقابلها (تلقف) من قبل التجار .. إلا من رحم الله .. لأن (الجمهور عايز كده) !..

وهالشي مو عند الحريم بس .. حتى الرجال اللحين يبحثون عن الغالي وعن المظاهر المبالغ فيها ...لهم ولأهلهم بعد ..

صار الغلاء والتضخم (وبااااء) .. نحن من ساهمنا (ولو من ناحية هذه الجزئية فقط) في صنعها واستمرارها و ... (عتيها) !!

يمكن الموضوع ظاهر في الحريم أكثر لأن احتياجاتهم تفصيلية اكثر .. والمفوشر مبين اوضح :secret:

لكنها ظاهرة مجتمعية تعم الجميع .. ظاهرة (خليجية) نحو المظهرية وحب الاستهلاكية ..

ما نقول إلا .. الله يديم النعم بس ولا يؤاخذنا الله بما فعل السفهاء منا يارب ..

وما أقول إلا الله يعينك مشاكل هههههه

[Rosso]

يعني ما يشترون شي عشان يرضونك؟

[qtr qtr]

الله يخلي لنا السوق الصيني

مره شريت لبنتي شنطه ماركه تقليد درجه اولى من السوق الصيني ب120 ريال ورفيجاتها فاكرين انها اصليه

والله يعينا على عقليات بعض الحريم السفيهات مخربين على غيرهم من الحريم المساكين

لنا الله

[قطريه22]

احنا مالنا خص
لم اي مكان في الدوله يسمع ان في زياده تلاقي الكل رفع سعره..
ترى هذي معاناتنا مع الاماكن الي ذكرتها..

يعني الحين بتحط الغلط علينا في رفع الاسعار..

اذا هذا تفكيرك فأنت غلطان ولاتحط غلط على الحريم وانت ماتدري

[قطريه22]

الله يخلي لنا السوق الصيني

مره شريت لبنتي شنطه ماركه تقليد درجه اولى من السوق الصيني ب120 ريال ورفيجاتها فاكرين انها اصليه

والله يعينا على عقليات بعض الحريم السفيهات مخربين على غيرهم من الحريم المساكين

لنا الله

التقليد يبين والاصلي يبين
والسوق مسويين فيه للي يرضى الاذواق والناس
مش معناته انا او غيري اذا بنشتري من محل ماركه الاسعار بترتفع
محلات الماركات معروفه اسعارها في الخليج انها غاليه

[طرف محايد]

الحل يخفضون الرواتب 50%

[حسن]

دليل على قلة العقل ،،،،

انت اصبت قلب الحقيقه

:victory:

[وطن]

حلاة الشي بنعومته
وبساطته
يعني شي سهل وأظن كل وحده تقدر تسويه


أما اللي يسوونه المكاييرات في وجوه البنات
والتسريحات اللي طالعين بها !!

شي يضحك
يحولهم الى مهرجين للأسف مب شي يزيدهم جمال وانوثة ورقة



الله يهديهم ويصلحهم
يخسرون فلوسهم عشان يبشعون أعمارهم
:secret:

[كازانوفا]

شكلك يا صاحب الموضوع دفعت مبلغ وقدره هههههههههههههه
الله لا يبلينااا يازين التواضع بالامور كلهاااا

[meeemz]

السبب الاول والرئيسي لغلاء الاسعار هو ارتفاع سعر الإيجارات
يعني محل على شارع رئيسي ب 80 الف في الشهر والمساحه مب كبيره يعني ماتخيل وشو بيبيع عشان يغطي التكاليف مالت المحل ... في حين انه دول ثانيه ومحلات على الشارع ما توصل ربع هالمبلغ
واذا على الماركات ، الاسعار في كل العالم ارتفعت مب عشان احنا شرينا رفعوها ...

يمكن المكياج و التجهيزات صاير استغلال ..





التقليد يبين والاصلي يبين
والسوق مسويين فيه للي يرضى الاذواق والناس
مش معناته انا او غيري اذا بنشتري من محل ماركه الاسعار بترتفع
محلات الماركات معروفه اسعارها في الخليج انها غاليه

بس دبي غاليه والا قطر ارخص بلاد في الماركات انا ماقصد الملابس بس اقصد سوق الشنط حتى الاحذيه في قطر ارخص
انا اشتري اونلاين وشفت السوق في قطر وفي اوروبا بصراحه فرق بسيط مب كبير لكن عن امريكا فرق كبير في امريكا اغلى بوايد في معظم الماركات باستثناء الماركات الامريكيه دايما تكون ارخص

[أم محمد 90]

السلام عليكم ،،


أخوي أول شي / انت بيدك القرار انك تعلم (مرتك / بنتك) شلون تصرف الفلوس وشنو تختار

ما اقول انك تنقي لها وشو تلبس ولكن تجبرها تصرف بالمعقول ..



أولاً : محد قام يشتري شي من قطري للاعراس ..

تبي فساتين اقل من ألف ريال وشحلاتهم ؟ روح الحسا ! مشوار كم ساعة مع الاهل يتغرضون للعرس من فساتين وشنط وكعوب واكسسوارت ..

بالنسبة للمكياج ، المكياج العادي فالصالونات بـ 350 ريال ..

الممكيجات هم اللي ياخذون اسعار مبالغ فيها (اذا يجون البيت) ..

غير هذا لو تدفع مبلغ رمزي ومرتك او بناتك يتعلمون المكياج بروحهم في دورة بتوفر ع نفسك فلوس وايد ..


ثالث شي الحنا مانقدر نتجادل فيه ، اللي يبي الشي الزين بيدفع ..



مشكلة حريم قطر زبايات .. ماراح يتعلمون أبداً .. اعرف وحدة فصلت فستان لعرس اخوها بـ25 الف ريال ، البسته مره
وتمت تعرضه للبيع محد خذه ، ولين اليوم اقولها فلانة مو متحسفة ع المبلغ؟
تقول لا كلن يوقفني ويسألني من وين وكنت (نجمة الحدث غطيت ع العروس) مو متحسفة ..


الله لا يبلانا ..

[قطريه22]

السبب الاول والرئيسي لغلاء الاسعار هو ارتفاع سعر الإيجارات
يعني محل على شارع رئيسي ب 80 الف في الشهر والمساحه مب كبيره يعني ماتخيل وشو بيبيع عشان يغطي التكاليف مالت المحل ... في حين انه دول ثانيه ومحلات على الشارع ما توصل ربع هالمبلغ
واذا على الماركات ، الاسعار في كل العالم ارتفعت مب عشان احنا شرينا رفعوها ...

يمكن المكياج و التجهيزات صاير استغلال ..




بس دبي غاليه والا قطر ارخص بلاد في الماركات انا ماقصد الملابس بس اقصد سوق الشنط حتى الاحذيه في قطر ارخص
انا اشتري اونلاين وشفت السوق في قطر وفي اوروبا بصراحه فرق بسيط مب كبير لكن عن امريكا فرق كبير في امريكا اغلى بوايد في معظم الماركات باستثناء الماركات الامريكيه دايما تكون ارخص

الماركات في اوروبا ارخص بوايد من الخليج اذا بتروحين وباتخذين بتطلع لج ارخص لان يرجعون لج مبلغ في المطار
اما عن الماركات بين دبي وقطر من شهر رحت دبي الماركات عندهم اغلى من قطر ب100 او 200 ريال

بس دبي اضمن من قطر لاتنسين كم محل ماركات صايدينه يجيب تقليد ويبيعه على انه اصلي..

[المحاميه]

ايه والله صاج

المشكله قاموا يرفعون علينا الاسعار واذا قلتلهم ليش تقولك هذي اسعاري واطبقها على الكل ههه يعني تبين اهلا وسهلا ماتبين كيفج مب واقفه عليج!!

مالاحظت فرق الاسعار الا يوم قارنت اسعارنا باسعار الدول اللي احذانا

[المحاميه]

السبب الاول والرئيسي لغلاء الاسعار هو ارتفاع سعر الإيجارات
يعني محل على شارع رئيسي ب 80 الف في الشهر والمساحه مب كبيره يعني ماتخيل وشو بيبيع عشان يغطي التكاليف مالت المحل ... في حين انه دول ثانيه ومحلات على الشارع ما توصل ربع هالمبلغ



سلامتج
السبب لا ايجار ولا شي
السبب الوحيد هو الطمع
لانهم شافونا ندفع ونمشي ومايهمنا
فقالوا ذيله فلوسهم وايده وماتفرق معاهم 1000 ولا 2000

[المستقل]

!!!!!!

[نوار قطر]

كلامك صح مليوون في المية اسعااارهم واايد مبالغ فيها .. اوكى زيدو اسعاركم بس مب لي هالدرجة .. وازيدكم من الشعر بيت طالعين بطلعه يقولون لك انيي نمكيج من 3 وطالع اقل من 3 مانجي او اذا تبون مكياج حق وحده بس ..ياخذون الدبل على سعرها ... واذا مب الدبل ياخذون ربع المبلغ زووود على السعر الاصلي ... المشكله مب في الماكيرات لا المشكله فينا احنا الي نرضى بهالاسعار واقل كلمه نقولها شنسوي بعد؟؟

طبعا هذي الماكيره لو كانت في قطر اما اذا من برع من دول الخليج ف حدث ولا حرج ... كل وحده مب اقل من 1500 ريال غير التذكره والسكن وعليكم الحسبه

[نوار قطر]

السبب الاول والرئيسي لغلاء الاسعار هو ارتفاع سعر الإيجارات
يعني محل على شارع رئيسي ب 80 الف في الشهر والمساحه مب كبيره يعني ماتخيل وشو بيبيع عشان يغطي التكاليف مالت المحل ... في حين انه دول ثانيه ومحلات على الشارع ما توصل ربع هالمبلغ
واذا على الماركات ، الاسعار في كل العالم ارتفعت مب عشان احنا شرينا رفعوها ...

يمكن المكياج و التجهيزات صاير استغلال ..




بس دبي غاليه والا قطر ارخص بلاد في الماركات انا ماقصد الملابس بس اقصد سوق الشنط حتى الاحذيه في قطر ارخص
انا اشتري اونلاين وشفت السوق في قطر وفي اوروبا بصراحه فرق بسيط مب كبير لكن عن امريكا فرق كبير في امريكا اغلى بوايد في معظم الماركات باستثناء الماركات الامريكيه دايما تكون ارخص

اي اجارات واي اسعار ... صباااح الخير .... مافيه ولا ماكيره قطرية عندها محل كل الماكيرات يشتغلون من بيوووتهم الا كمن وحده ينعدون على اصابع اليد الوحده يعني الاجار والمخاسير مرفوعه عنهم