بخصووص الفيزا الأمريكية. .. شوفوا شلي صار وساعدوني

[دمي قطري]

السلام عليكم ورحمة الله وبركاته

عندي استفسار بخصوص الفيزا الأميركية

ولله الحمد طلع تقرير علاجي لامريكا فرحت استكمل الإجراءات مع زوجي
شلي صار انهم اقبلوا فيزتي بس المرافق اللي هو زوجي ما قبلوها قالوا في رقم راجعو فيه الموقع اول ما يطلع على طول تعالوا السفارة وسلموا جوازة .. قلت لهم كم المدة قالوا لي اسابيع .... وايد زعلت أنتظر هالتقرير من زمان رحت المجلس الأعلى للصحة وخبرتهم قالوا لي ما نسوي لج شي بدون الجواز والفيزا .... يعني معقوله ما في إجراءات خاصة في المريض مع العلم انه سفرتي بأذن الله في 25 فبراير نفسيتي جداً تعبانة منههالموضوع ... شاسوي شلون اتصرف ... ارحم الله والديكم

[معماري قطري]

تصرف غريب والله .. شوفي خليه يراجع الخارجية ممكن يكون في يدهم شيء .. والله يشفيج إن شاء الله وتتعالجين أحسن علاج

[دمي قطري]

الله يجزاك خير اخوي .. عسى ربي يسرها

[Chambray]

تصرف غريب والله .. شوفي خليه يراجع الخارجية ممكن يكون في يدهم شيء .. والله يشفيج إن شاء الله وتتعالجين أحسن علاج

والله الخارجية ماراح يقصرون
لكن مافي يدهم شئ
لان الاجراء هذا مش من السفارة ، من واشنطن !!

مالكم الا الصبر
او تغيير الوجهه

وبالتوفيق

[دمي قطري]

الله كريم بس ما ابي اغير الوجهة .. عسى الله يكتب الخير

[وليف الشوق]

ههههه شر البلية مايضحك وتذكرت سالفة يوم استلمت فيزتي لعلاج بنتي في امريكا حزتها كان معانا واحد توه متزوج وبشهر العسل حاب يروح لامريكا هو وزوجته لكن كانت المفاجاءة ان السفارة وافقت على زوجته واهو ( لا ) ههههههههه واتمنى يااختي من العلي القدير ان يشفيك واذا في مجال تغيري وجهة سفرك لدولة اخرى مختصه في علاج مرضك اذا كانت اخر الحلول ،، لكن قبل كل شي حاولوا تراجعون السفارة بطلب مقابلة القنصل العام او السفير ومدهم بتقارير طبية وصدقيني السفارة الامريكية بواقع تجربتي اسلوبهم جدا ممتاز وذوق ومرحبين بكل الزائرين للولايات المتحده الامريكيه وخاصه القطريين والحل الاخير ايضا يمكن لك تغيير المرافق اذا كانت المصحه بأمريكا مختصه بمرضك وأسأل الله لك التوفيق

[دمي قطري]

للأسف ما ابي اغير الوجهه لان المستشفى ممتاز انا رحت لندن لكن ما ارتحت للعلاج بنتظر عسى الله يفرجها يارب حلم حياتي اكون ام .. يوميا تفكير الامومة ماخذ قلبيوعقلي ومأثر على حياتي ونفسيتي بشكل مو طبيعي ... االحمدلله على كل حال ..ما اقدر اغير المرافق لازم يكون زوجي معاي

[AR-2103]

وعليكم السلام ورحمة الله وبركاته

اخــتي مافهمت شنو قصدك ( قالوا في رقم راجعو فيه الموقع اول ما يطلع على طول تعالوا السفارة وسلموا جوازة )

انا مادري بالاول لما عبيتي الابلكيشن ( الطلب ) عشان الموعد في السفاره شنو اخترتي نوع الفيزا ؟ ثاني شي قدمتي اوراق المستشفي لهم الي اخذتي منه امكانية العلاج ..؟

بعدين بالنسبه لك انتي وزوجك هل كل واحد سوى طلب لحاله او اثنينكم مع بعض بما انه مرافق لك .؟

اذا كان كل واحد لحاله بعطيك رابط وشيكي برقم الطلب وشوفي شنو صار بالظبط وكم باقي الخ

https://ceac.state.gov/CEACStatTracker/Status.aspx?eQs=WwjqOlbeRYzCYubaSQI+RA==

وبالنسبه تقدرين تراسلينهم عن طريق البريد الالكتروني مرفقه رقم الطلب وتقدرين تعرفين شنو صار على التأشيره حقت زوجك ..

الله ييسر لك كل خير انتي وزوجك وان شاء الله رحله علاجيه موفقه .

[دمي قطري]

هلا اخوي
اي قدمنا وقالوا لنا لازم ينتظر لين ينزل رقمة في الموقع وممكن بعد 3 أسابيع او اكثر وانا يوم سويت الطلب رحت ريجنسي وعطيتهم الاوراق اللي استلمتها من المجلس الأعلى للصحة وعلى اساسه عبوا لي الطلب يوم رحنا الكونتر اللي في السفارة عشان نعطيهم الطلب رويتهم اوراقي الي من الصحة ... يارب تتسهل وتطلع له الفيزا في اقرب وقت ياااارب ..

[alwahesh]

موعد السفر بعد شهر يعني حتى لو ردو عليكم بعد 3 اسابيع ان شاء الله اموركم طيبه

[بوحمد1]

اهم شي الورقة اللي فيها اسماء المرافقين
والورقة اللي فيها الموعد وهم بيقدرون الوضع

[دمي قطري]

موعد السفر بعد شهر يعني حتى لو ردو عليكم بعد 3 اسابيع ان شاء الله اموركم طيبه

انشاء الله تكون الامور طيبه المشكله في الحجز احنا نبي نسافر بزنس مافيننا شدة على السياحيه ولازم نستلم اوراقنا للدوام انا مب مشكله بس عشان شغل زوجي بعد خايفة يروح علي الموعد وانا انتظرة بفارغ الصبر... ياعساهاا تتيسر بأذن الواحد الاحد

[دمي قطري]

اهم شي الورقة اللي فيها اسماء المرافقين
والورقة اللي فيها الموعد وهم بيقدرون الوضع

اخوي بو حمد انا عطيت الكونتر الاوراق وفهمتها انه زوجي المرافق ورويتها تاريخ الموعد قالت اوكي بس راجعوا الموقع لين نزل رقم الطلب له جيبوا الجواز وثاني يوم استلموا الفيزا ... بس المشكله انها تقول احتمال يطول الموضوع وانا على نار انتظر

[دمي قطري]

اليوم الموقع سووو آب ديت ومانزل رقم زوجي متحطمه نفسيا

[قلم صادق]

الله يسهل اموركم اختي و حاولوا تراجعون السفارة واطلبوا مقابلة القنصل او اي مسؤول واشرحوا له الظروف .... ولا تيئسين اختي دائما اكثري من الاستغفار.. وسبحان الله بتنحل ان شالله ......

ونصيحه اختي العزيزه دائمآ ادعي وخصوصآ عند صلاه قيام الليل دعاء سيدنا زكريا (رب لاتذرنى فردا وانت خير الوارثين) والله ان شالله يرزقج الذريه الصالحه يارب

[دمي قطري]

الله يسهل اموركم اختي و حاولوا تراجعون السفارة واطلبوا مقابلة القنصل او اي مسؤول واشرحوا له الظروف .... ولا تيئسين اختي دائما اكثري من الاستغفار.. وسبحان الله بتنحل ان شالله ......

ونصيحه اختي العزيزه دائمآ ادعي وخصوصآ عند صلاه قيام الليل دعاء سيدنا زكريا (رب لاتذرنى فردا وانت خير الوارثين) والله ان شالله يرزقج الذريه الصالحه يارب

ماقصرت اخوي انشاء الله الأمل موجود وكل تأخيرة فيها خيرة ... الله كريم يرزقنا ويرزق كل محروم بالذريه الطيبه

[وطن]

اختي تصبري وعسى ان تكرهوا شيئا وهو خيرا لكم

الغريب ان الفيزا للقطرين ما تطول بسرعة يعطونا
في يومين
ليش مأخرين موضوعكم !!!
يمكن في مشكلة تشابه أسماء مع زوجج أو شي

الله ييسر لكم ان شاء الله

[QAT2020]

أسأل الله العظيم أن ييسر أموركم ويرزقكم الذرية الصالحه ،،
واختي الفاضله عليكم بالاستغفار ولايفتر لسانكٍ من الاستغفار ..

[معماري قطري]

ماقصرت اخوي انشاء الله الأمل موجود وكل تأخيرة فيها خيرة ... الله كريم يرزقنا ويرزق كل محروم بالذريه الطيبه

صدقتي يمكن تأخير شوي ينفع خصوصاً هالأيام البرد قاتل في ولايات كثيرة

انا أحلى أيام أشوفها أيام الربيع في بداية شهر 4 .. تخضر البلاد وتطلع زهور برية والعشب يكون أخضر من قلب مب عشبنا أملح .. وحلو يكون العلاج في أجواء طيبة .. ألحين أشوف الأخبار المدارس مسكرة والرحلات متعطلة ودرجة الحرارة تحت الصفر .. في مطار تامبا 27 رحلة متكنسلة الحين بسبب الأجواء في المناطق المتجهة لها هذي الرحلات .. عندنا شمس ودرجة الحرارة ألحين 21 مئوية سلسيآس والساعة 12 الظهر.

[الزجاجي]

صارت مع اخوي لان قال لهم وقت المقابله انه رجل أعمال وقالو له تابع الموقع وبعد شهر تقريبا كلموه وقالو له تعال سلم الجواز
وهم صارت مع نسيبي لانه عسكري وردو عليه بعد اكثر من شهر !

نصيحتي لج اختي تغيرين المرافق مؤقتا الين تظهر فيزه الزوج (وتاكدي فترتها انها 10 سنين) علشان تخلصين اوراقج في لجنه العلاج بالخارج لان هم المتابعه معاهم تغث

[دمي قطري]

ماقصرتوا على الردود بس للاسف ما اقدر اغير المرافق ماعندي إلا زوجي وهو بالفعل عسكري يارب تيسر الأمور ... قلبي حدة متقطع انتظر هالتقرير من زمان

[looorans1999]

خليه يسافر الامارات ويقدمها اذا تبين الي يخلص في الامارات عطني خبر ونا بطرش لك الي يخلص الفيزه الامريكيه ونا سويت عنده في 5 ايام استلمت الفيزه من ابوظبي

[عاشق العديد]

مرحبا السلام عليكم..


انا صارت لي نفس المشكله السنه الي طافت.. معني كنت اخذها قبل داىمـا..

قدمو مره ثانيه.. انا سويت نفس الحركه..
وحصلتها شهر الي بعده.. وترى ماتاخذ اسابيع كلها يومين مادري ثلاثه.. ويسلمونج الجواز..

[sweet qatar]

الله ييسر امرج.. قلبي معاج وان شالله الحلول الي قدموها الاخوان تفيدج