مشكلة في لسان الوالد

[الملا]

اخواني وأخواتي


عندي الوالد صار له فترة يعاني من لسانه يقول في عصبه في لسانه من الجهة اليمنى شدت عليه والحين يقول الألم وصل للخد من 3 ايام .. خذناه من فتره لعيادة الأسنان وعيادة الأذن والحنجرة في عيادة الدوحة وسووله ام أر اي بدون اي نتيجة .. وقبلها في مركز ثاني سووله أشعة للفك نفس الشيء مافي اي نتيجة وعقب خذناه على دكتور قال لنا عنده جرثومه وصرف له علاج بدون نتيجة وخذناه على المركز الصحي والدكتور قال لنا مب أعصاب ولا فك وعطاه مسكنات ، وفي الأخير وديناه على الرميلة عند دكتور في الفك الله يهديه راح له اول مره عطاه موعد وفي موعد الثاني طلب منه أدوية السكري اللي يأخذها وعطاه موعد ثالث واحنا ماشين على هالموال ،، والله قلبي يتقطع وانا أشوف أبوي جدام عيني يتألم ومب قادر أسوي شيء

[بوخالد911]

الله يسهل عليه
حاولوا تعالجونه برررع قطر

[غير عنهم]

ممكن اعصاب وان شاءالله بسيطه

[عمري قطر2]

الله يشفيه أن شاء الله

[اليشم]

أخوي عنده انحراف باللسان ولا بس ألم

[البيت القديم]

اخوي جرب الجمادات الدافيه على الخد وحط له دفاية في المكان الي يقعد فيه

[khalid525]

اخوي وده تايلند افحصه هذي امور طبية لازم يجاوبك عليها اهل التخصص ، الله يشافيه لكم

[خالد البلوشي]

أسأل الله أن يمن على الوالد بالشفاء العاجل .. اللهم آمين

[حياة]

الوالده صار عندها تقريبا نفس الالم وديناها في الاخير الدكتور حمدي في مركز الجزيره الطبي وسوى لها فحص b12 طلع نازل وهو السبب وعطاها ابر فيتامين تحسنت الحمد لله..

[بوعمير]

ما يشوف شر الوالد وطهور ان شاء الله. شوف الشيخ انك تعيين دكتور يشخص ويعالج حالته أبوك في قطر ذي ماتجي إلا ((( حظ .. او .. صدفه ))).

أنصحك تأخذ الشيبه لتايلند وخذ العلاج الصح بآذن الله ولا ضيع وقتك هنا ترى ماوراهم إلا المغثه وعور الرأس.

[فرهود]

اخوي الله يشفي والدك بس لاتهمل وتلعوز ابوك مع دكاترتنا اخذه على الرياض او الاردن وان شالله بتحصل العلاج عندهم.

[معماري قطري]

الطب في قطر وما أدراك بالطب في قطر كله تجارب وفوضى

انا عندي سكر له 33 سنة وقوي نزول وارتفاع وبدأ يأثر على الفك والأسنان وكنت أسوي تنظيف كل فترة .. آخر مره اجتمعوا علي كم طبيب حكومي وقالوا لي أسنانك بتطيح واحد ورا الثاني ولا نقدر نسوي شيء .. ومن أيام زرت طبيب أمريكي محترم قال لازم نشيل السنين الأخيرين لأنك ما تحتاجهم وهم اللي متعبين الفك ويخلون الباقين يهتزون .. وسوى لي مثل العملية تحضير وتعقيم وتخدير موضعي وشلهم والحمد لله ما حسيت بشيء ولا تأذيت وألحين وايد أحسن.

أتمنى لوالدك الشفاء العاجل وجرب توديه عند محمد حسني في بن عمران، وفي الغالب احتمال تجلط بسبب السكر في اللسان انا صادني هالشيء قبل بس مع الحركة وتخفيف الأكل واعتدال السكر يخف.

[BIG-VEGA]

لاتخلي دكتور في قطر الا وتمر عليه

وعليك بالرقيه الشرعيه

وفي الاخير عليك بتايلاند

والله يشفيه ويعافيه من كل شر

[شموخ-qtr]

ماطلع من الموضوع بدون رد

غير اني اقول الله يشفيه ويعافيه ويخليه لكم يارب ....

[بشائر]

الله يشفيه ويعافيه ..
بالإضافة إلى علاجه بتايلاند ضروري تعالجه بالرقية الشرعية
أكثر الأمراض اللهم عافنا سببها العين والحسد ..

وطمنا على صحة الوالد الله يحفظه .

[latof]

خذ الوالد الى سوق واقف عند واحد اسمه حجي حبيب عنده محل والله عن تجربه يعالجه في مدة اسبوع ان شاء الله

[الملا]

جزاكم الله خيرا ،،، والله ما قصرتوا في تفاعلكم ورودكم ..

بخصوص الرقية حمد الله الوالد يرقي نفسه وأخوي الشيخ يرقيه


أختي العزيزة لطيفة من حجي حبيب وشنو تخصصه وين مكانه في سوق واقف

[OM_OMAR_QATAR]

الله يشافيه يارب

[احمد1]

اخواني وأخواتي


عندي الوالد صار له فترة يعاني من لسانه يقول في عصبه في لسانه من الجهة اليمنى شدت عليه والحين يقول الألم وصل للخد من 3 ايام .. خذناه من فتره لعيادة الأسنان وعيادة الأذن والحنجرة في عيادة الدوحة وسووله ام أر اي بدون اي نتيجة .. وقبلها في مركز ثاني سووله أشعة للفك نفس الشيء مافي اي نتيجة وعقب خذناه على دكتور قال لنا عنده جرثومه وصرف له علاج بدون نتيجة وخذناه على المركز الصحي والدكتور قال لنا مب أعصاب ولا فك وعطاه مسكنات ، وفي الأخير وديناه على الرميلة عند دكتور في الفك الله يهديه راح له اول مره عطاه موعد وفي موعد الثاني طلب منه أدوية السكري اللي يأخذها وعطاه موعد ثالث واحنا ماشين على هالموال ،، والله قلبي يتقطع وانا أشوف أبوي جدام عيني يتألم ومب قادر أسوي شيء
جربو تروحون لدكتور اسمه عبدالعزيز الجفيري عيادته جنب اكاديمية الجزيره

[نوفة قطر]

الله يشفيه ويطمنكم عليه ان شاء الله

اذا تقدرون ودوه تايلند لان تشخصيهم ممتاز ..