الصين

[k.fatma]

مرحبا
احد راح الصين يأثث بيته يعطيني معلومات
تسوى الروحه للاثاث وهل اثاثهم فخم وكم الميزانية
ياريت احد يفيدني
وشكرا

[بوغانم995]

بعد فتره ليست بالغريبه ستفتح القريه الصينيه .......آخر المحلات الجديده لبروه ..من جبله اي مقابل المنطقه الصناعيه الجديده .....واذا في أفاده من الذي قام برحله وتبضع ..يطلعنا على هذه التجربه بالتفصيل ....ولكم الشكر والتقدير على الأفادة...وبسسسسسسسسسس

[قطريه22]

في الصين اثاث فخم واسعاره غاليه وفيه الاثاث الحلو واسعاره جيده ورخيصه

اغلبية المحلات الكبيره يجيبون اثاثهم من الصين ويبيعونه دبل

[Bo jassim 33]

اي اي ديره حلوة واسعارها مناسبه وعلى حسب البوكيت موني

بالمجمل افضل وارخص من قطر وحتى دول الخليج

[MS.TOMA]

الصين ترا مكان كل المصانع يعني نفس الكوالتي اللي اهنيه ..
يعني روح المصنع هناك باقل الاسعار من اللي اهنيه ...
وحده من صديقاتي ان الموضفين اللي معاها اثاث البيت من الصين وتقول ما كلهم 30 الف قطر بيته ما شاء الله 3 طوابق ..
يعني لو بيتج فيلا من بتصرفين عليه الفيلا اللي على القرض عطونج 50 الف تاثيث ..
وتحياتي ..

[من بغى الزين]

روح وتوكل علي الله

[فراغ]

فيه ناس تجيب من الدمام السعودية وفيه ناس تجيب من مصر فيه أماكن كثيره أسعارها حلوه

[الزعفراني]

إذا بتأثث البيت من وإلى .. فأنا أنصحك تروح وتأثث من هناك لعدة أسباب :

1- توفر الجودة بكل درجاتها ووفرة الاختيارات ( في اشياء مش موجودة هنا وموجودة هناك ) ( يعني لو تبي غرفة نوم بو 120 الف ريال بتحصل ولو تبي غرفة نوم بو 5000 ريال بتحصل بعد ) .. بس عموما أرخص من الدوحة .

2- فرق السعر هناك كبييييير عن الدوحة شامل الشحن ( يعني بتوفر مبلغ محترم )

3- وجود سوق متخصص بالاثاث اللي يخطر على بالك واللي ما يخطر على بالك في مكان واحد وتحت سقف واحد .

أتكلم عن السفر الى مدينة ( غوانزو في الصين ) .. وبالقرب منها مدينة الاثاث اظن اسمها ( شواندا ) بينهم ساعة بالسيارة ان ماخاب ظني

كم المبلغ يعتمد انت شنهو بتأثث ؟؟ وكم مساحة البيت اللي عندك ؟؟ وهل بس تأثيث والا يشمل اطقم الحمامات وبلاط الحوش والسراميك والثريات والاضاءة ... إلخ

الشحن يكون عبر الكونتينر وفي حجمين للكونتينر .. واحد اضن 6 أمتار والثاني 12

تكلفة الكونتينر الصغير أظن حروة 2300 دولار للشحن .. لين ميناء الدوحة .. وتشحنه اللي ودك

الكونتينر الصغير يشيل تقريبا 20 غرفة نوم مكونه من 5 قطع .. ( عشان تتخيل حجم الكونتينر )

شيء مهم ويفضل تعرف حد هناك عشان يساعدك في موضوع الشحن وتخليص الاجراءات مع المحلات اللي بتحجز منها الاثاث

وحط في بالك بعض قطع الاثاث مش متوفرة في المحلات ولكن يتم تصنيعها لك ... يعني ممكن تأخذ 10 أيام مثلا تصنيع

الاجراء الصح المخلص هناك هو يتابع لك موضوع تجميع البضاعة وشحنها وتخليصها من الصين ..

المخلصين عبارة عن مكاتب كثيرة متخصصه في هالامور .. ويتعاملون مع كل تجار العالم او الوطن العربي ..

بس اهم شي المكتب يكون ثقه ومعروف او حد موصيك عليه .. لان اللي سمعناه وحذرونا منه في مكاتب كثير حراميه .. يعني يبوقونك

او ما يهتم لبضاعتك ..

الافضل طبعا تكون موجود هناك وقت الشحن عشان تتأكد ان كل شيء تمام .. بس المشكلة في ان بعض الشغلات مثل ماقلت لك تحتاج يصنعونها لك

وهالشيء يخليك مثلا تكون متواجد هناك بدون داعي .. او يمكن تقضي الوقت سياحه ..

الدفع في شيء تدفعه مقدم وشيء عند استلام البضاعة في الدوحة وهالشيء يضمنه لك المكتب اللي بيخلص لك البضاعه وامور الشحن

اتمنى قدرت افيدك بشيء ..

لان انا كنت هناك من فترة ورحت لسوق الاثاث لكن مش بغرض الشراء ولكن للتعرف على أسواق الصين في غوانزو وللسياحه بنفس الوقت ..

على فكره في مكتب في سوق العلي جنب تميمه ممكن تمر عليهم ويساعدونك في موضوع الشركات او المكاتب اللي تخلصك في الصين

انا ما تربطني فيهم أي علاقة ولكن مريت بالغلط هناك قبل لا اسافر وشفت حاطين اعلان للتجار لاستيراد البضائع من الصين وشحنها من هناك

بالتوفيق ان شاء الله

[العلياا]

ما بعد مداخلة اخونا الزعفراني كلام ماشاءالله كفى ووفاا
بس استفسار عن المحل اللي صوب سوق العلي في عندهم كاتلوجات نختار منها والا ؟!

بالتوفيق لصاحب الموضوع

[الزعفراني]

ما بعد مداخلة اخونا الزعفراني كلام ماشاءالله كفى ووفاا
بس استفسار عن المحل اللي صوب سوق العلي في عندهم كاتلوجات نختار منها والا ؟!

بالتوفيق لصاحب الموضوع

ماعندي علم .. لكن الكتالوجات ما راح تسوي لج شيئ .. هناك موجود اللي يخطر على بالج واللي ما يخطر .. واللي ع الواقع افضل بكثير من اللي في الكتالوجات ..

وفوق ذي لو في بالج تصميم لاي قطعة اثاث مستعدين يفصلونها ويصنعونها لج ..

شوفي هالمقطع ع اليوتيوب لسوق الاثاث

http://www.youtube.com/watch?v=Q9n2jcN9Tdc

أو ابحث في يوتيوب عن " جولة في مدينة الأثاث الصينية (شـنـده) - مع المهندس سالم المسرحي "

[k.fatma]

مرحبا
الف شكر على المعلومات المفيدة
بس سؤال كم المدة لين الاثاث يوصل الدوحه

[الزعفراني]

مرحبا
الف شكر على المعلومات المفيدة
بس سؤال كم المدة لين الاثاث يوصل الدوحه

تقريبا شهرين