الأسقف المائلة : أيهم هم احسن

[Nahool]

الأخوة الاعزاء0 أيهم احسن و افضل ، عمل الأسقف المائلة من الخرسانة ( الصبيات) او عمل سقف عادي و من ثم عمل الشكل الأسقف المائلة من الحديد و الخشب. الرجاء الإفادة لمن لديه خبرة

وهل التكلفة تختلف بين عمل الأسقف المائلة من الخرسانة و الأسقف المستوية.

و شكرًا

[معماري قطري]

الأسقف المائلة شغلها صعب ومعقد عندنا لأنها خرسانة وعليها يجي عازل صبغ بتومين وبعدين خشب يمسك القرميد وعازل حراري بين الخشب وهذي إشتراطات التخطيط.

الميزة المعمارية الداخل لو خليته مكشوف بدون سقف مستعار نازل بيكون عندك شكل حلو وسقف مرتفع وحسب التصميم اللي لازم يكون مدروس وفي الخارج بيبين منظر السقف وميلانه والقرميد اللي مغطيه بيعطيه جمال أَكثر... ومثل ما قلت كله بنسب معينة وتصميم مدروس .. وفيه مميزات ثانية بالنسبة لأساس هذي النوعية من الأَسقف إنها مستعملة في الدول الباردة وكثيرة المطر والثلج .. الثلج لو تكثف على سطح مستوي وتراكم لإرتفاعات كبيرة ممكن يثقل على المبنى ويتسبب في انهيار .. لكن الميلان يخلي الثلج ينزل بفعل الجاذبية الأرضية وكذلك ماء المطر.

حسب معرفتي في أمريكا يستخدمون بلايوود خفيف أبيض مع عوارض خشبية ويعزلونها ويركبون عليها قرميد أَو قطع تشبه القرميد مسطحة تنضرب بالمسامير تحمي الخشب وتغطيه عن الماي والرطوبة وتعطي شكل مقبول .. وهذا الشغل يسونه مقاولين مختصين ولهم طريقة معتمدة وحسابات جاهزة وعارفين شغلهم .. ويكون اقتصادي وعملي لآخر درجة وبعض منه يعيش أَو عايش 500 سنة للآن .. مصور صور لهذي النوعية من الأَسقف باحطها إن شاء الله في موضوع خاص.

عندنا طبعاً الوضع يختلف والتركيز يتم على الأسطح المستوية لأَنها سهل شغلها ومعروف ومساحتها تطلع أَقل من المساحة المائلة، وبمتابعة بسيطة لليو تيوب ممكن لأَي نجار مسلح يسوي النجارة الخاصة بهذي الأَسقف المائلة حسب النظام الأَمريكي والأُوروبي، وأَكيد بتكون حل لدور ثالث في حالة سماح التخطيط بدور ثالث ووضع مواصفات خاصة به للبيوت الجاهزة والراغبين أَصحابها في بناء دور ثالث.

[Nahool]

اشكرك .