شنو الفرق بين الضابط والجندي في السيارات

[كلاسيك قطر]

السلام عليكم ورحمه الله وبركاته

اليوم باتكلم عن شي صاير في قطر ومادري في الخليج في هاي الشي
انا الحين اشوف ضباط من اي وحده في العسكريه في قطر يدخلون بسياراتهم كل يوم
انا شفت ضابط عنده هوندا اكورد موديل 2004
والجندي عنده سيارة اخر موديل 2014 او 2013
واشمعنى الضابط عنده المواتر القديمه وفي البيت وله سياره عندكم

ياخي انت ضابط وراتبك اعلى من الراتب الجندي ياخي اشترلك سياره مثل الاوادم

لين اتقوله ليش ماتشتري سياره جديده يعصبعليك ويروح عنك

[musel999]

ياخي ضابط وعنده سيارة اكورد ولا كامري ومكفيته ومقضيه حاجته
لازم يهايط
كل واحد ياخذ السياره اللي يشوف انها تخدمه وتسد حاجته
من تواضع لله رفعه

[khalid525]

هههههههه ليش شايل همهم اخوي ، كل واحد وكيفه

[Dana’1]

:eek5: مو لهدرجة عاد التدقيق بالناس وتوصل كأنها قضية!!!
عالعموم الهوندا الأكود 2004 ماهي للأوادم يعني؟!
يمكن هو مرتاح لها ..وما يفكر بالشكليات كثير وعارف قيمتة وقدرة كشخص ورتبه ماهي مرتبطة بسيارتة او لبسة حتى ..قيمته أعلى من كذا بكثييير !

[قلب صادق]

سبحان الله ذابحتنا المظاهر الخداعة

[كلاسيك قطر]

اوكي بس المشكله ضابط جديد مو قديم انه امقدم ع سلفه وسوالف ضابط ماعليه التزامات في البنك ول شي

[يوسف0]

هذي مشكله في قطر

يعني لازم يكفخله موتر ب 500 ولا بمليون عشان يملي عيون الناس ؟

واذا كان يجمعها في امور افضل كالزواج او التجارة مب أحسن؟

ما اجوفها عيب اذا عنده موتر قرنبع

لاكن بتصادفه مشاكل فالشارع كعدم احترام وقلة ادب من البعض بسبب ان سيارته هوندا :weeping:

[ابوعلي]

سبحان الله ذابحتنا المظاهر الخداعة

صدقت اخوي وهذا الي ابي اقوله

ياخوي كلاسيك في بداية التسعينات كان لي زميل وصل لرتبة رائد وعند كرولا واستفسرت منه من باب الفضول ورده كان لي ان عنده اولويات وما ينظر للامور الثانويه والمظاهر الخداعة والي اغلبها سلفيات على الظهر

ذكر لي الالويات

تعليم اعياله وتربيتهم وذكر ان زوجته كانت تشتغل وقالها باعطيج راتبج بس قعد بالبيت وتفرغي لتربية العيال وتدريسهم

ومن اولوياته بناء بيت العمر

ومن اولوياته الصرف على اعياله في الدورات المفيدة لهم بحياتهم


وفعلا بعد ما خلص بيت العمر تفرغ لنفسه وخذ له اكثر من سيارة له ولعياله والحمدلله مرتاح بحياته وبدون التزامات ماليه عليه

[Qatari In Us]

بل بل بل اما هذا موضع تطرحه ?

ياخي من راقب الناس مات هما. شعليك بالرجال شيسوق ولا شيشتري ترى مب بكل شي بتشوف بتكتب عنه موضوع

لاحول ولا قوة الا بالله

[R 7 A L]

الحمد لله في امريكا الوضع طيب الضابط وغير الضابط ( القطريين ) يركبون نفس السيارات تقريباً
مافيه فرق والحياة حلوة وجميلة

[اناقه]

و الله كل واحد و كيفه

(( من راقب الناس مات هما ))

السيارة ما ترفع من قدر الشخص و لا تنزل من قدره

و اذا الشخص بيقيم الغير على حسب مواترهم وش عندهم من فلوس فهذا شخص اقل ما يقال عنه انه تافهه الناس باخلاقها مب بمراكزها و ممتلكاتها اخوي الكريم

يا ليت انك حاط موضوع للنقاش الايجابي نطلع منه بنتيجه تفيدنا و تفيد المجتمع

دمت بود اخي الكريم

[السيف5]

حرية شخصية والواحد على كيفه
يسوي الشي اللي يناسبه

[كلاسيك قطر]

الف شكر لكم واللهذ

انا بس فاتح الموضوع ابي اشوف الفرق بينهم
الله يعطيكم الصحه والعافيه

[Ţĥę őήę]

سبحان الله
لهالدرجة قيمة الانسان بسيارته ؟

[بريق الحق]

هههههههه
طوبى للغرباء

[وطن]

:omg:

[Aaziz]

من راقب الناس مات هماً
دع الخلق للخالق

[بنت مريخ]

الجندي الاغلب مايكون متزوج وماعنده التزامات فيصف ديون فوق ظهره
الضابط عنده بيت واسره والتزامات كثيره فيوفر فلوسه لشي اهم

[ANONYMOUS]

العقل

[SOONALL]

اقول اشتر له هديه سياره وفكنا من عيارتك

[العربية نت]

خلو العضو كلاسيك يعبر عن رأيه مدري ليه زعلانين
انا من رأيي الموقف هذا له كذا جانب اذا كان ما يملك الا هالسيارة فقد يكون والله اعلم بخيل عافانا الله
وفيه احتمال انه هالسيارة يروح فيها الدوام وهي اقل صرفية هي تنفع الزحمة وضربات الزحمه:eek5:
فيه ناس تحب تكون مغبره مع انه فيه خير وهذا له جوانب الدين تكلم عنها فمن لديه نعمه وخير يجب ان تظهر عليه هذا من ناحية الدين
ترا حتى العميد الي راتبه حول المئة الف تلقاه من هالنوعيه

وفيه نوع اخر من الضباط يستغل الراتب العالي جدا ويدخل فيه في استثمار وهذا النوع يمكن لاهي بالتجار وما حصل وقت يكشخ :swoon:

بشكل عام ما نقدر نحكم على الشخص الا من مجالسته ومعرفته عن قرب بس الي ذكرته أعلاه نماذج وهي واقع وقد يكون صاحبك ينطبق عليه واحد منها

[qatara]

السياره وسيله
وليست غايه

لاكن عند البعض نقص يحس ان السياره الفخمه تكمله

[خليفـة]

بيكون لموضوعك اهمية اكبر اخوي كلاسيك لو كان عن الموظف السنير والجنير بشكل عام
مو عن الضابط والجندي

كأن يكون عن المهندس والفني
او عن الطبيب والممرض
او عن رئيس القسم والموظف العادي

يعني لو كان عام بدون تحديد المهنة او الوظيفة

عموماً

جميل جداً ان تظهر نعمة الله سبحانه وتعالى على عبده
وخصوصا لما يكون الله منعم على عبده براتب زين وعالي
احنا ما نقول ياخذ له سيارة بمليون .. ولكن ياخذ له سيارة مناسبه المظهر
وحديثة نوعاً ما .

بنفس الوقت هناك المهم .. وهناك الأهم
ممكن يكون هذا الموظف السنير حاط اولويات له في حياته
وبعد الانتهاء منها وتحقيقها .. ياخذ له سيارة مناسبة
اما أن يكون موظف سنير وراتبه محترم وياخذ سيارة عمرها 20 سنةوقديمة
وممكن تكون عنده يوم وفي الكراج يومين .. فهذا أمر يسيء لهذا الشخص

صحيح ان الأمريكان والأوربيون لا يهتمون لمثل تلك الأمور
وقد تجد جنرال رايح دوامه على سيكل او دراجة نارية
ولكن هذا أمر مألوف عندهم وطبيعي .. ولا ينطبق عندنا أبداً


انا من وجهة نظري .. دائما وأبداً خير الأمور الوسط


خليفــة

[مدور الصداقة]

خاطري افهم شنو الموضوع ووين المشكلة

[بوNasser]

خاطري افهم شنو الموضوع ووين المشكلة
المشكلة عند صاحب الموضوع

ليش الضابط، دام انه من كبار الموظفين وراتبه عالي، يسوق سيارة هوندا 2004،

بينما الجندي اللي من صغار الموظفين، يسوق سيارات موديل السنة!!!!!!!!

[مخطط قطري]

سؤال انت وين شفتهم؟

[تاجر كشخة]

تبي الصراحة ومع احترامي لك انت لك وزن وثقل في المنتدى بس موضوعك ما ادري شيبغى الرجال ضابط متعود على الشده وما يهتم حق ذي الاشياء ناقص يقول صورني وانا كاشخ وكاني ما ادري

[راس مشعاب]

ههههههههههههههههههههههه
اضحك عالردود اللي كسرت مجاديف الاخ راعي الموضوع
ماتسوى عليه الرجال كتب هالموضوع
عموما
التمس له العذر
يمكن موتره خرب بالطريق
واخذ موتر فورمان العمال بالشركة مالته
على ان يقوم الفورمان بتصليحها وارجاعها اليه

[مواقف النجادة]

اولا الموضوع يعبر عن مدى السطحية اللي وصل اليها المجتمع القطري .. ولو بيدي .. أطالب بمكافئة الضابط و ادعو الله ان يكثر من أمثاله .. التعلق بالمضاهر مرض الله يكافينا وإياكم منه ..

على العموم .. اغلب العسكريين اصحاب الرتب الثقيلة في عائلتنا عندهم موترين .. واحد صغير.. حق الدوام وواحد كشخة حق الطلعات العائلية و الاجتماعية..

[حمد 2002]

الموضوع مهم وله ابعاد كبيره ولكن لايجب علينا ان ننظر له من زاويه وحده ولكن يجب علينا ان ننظر للموضوع من زوايا مختلفه لكي نحلله ونفهمه ولانتسرع بالحكم عليه ..

لأن الشخص أ يفهم الموضوع بطريقه مختلفه عن الشخص ب


ويمكن كاتب الموضوع تعمد وضع الموضوع وطرحه على طريقه التعويم والألغاز ... لكي يتركنا نشغل عقولنا للتفكير ونجد السبب لذلك ..

لانه لو قال لنا ووضح لنا الامور من البدايه لاختفت الحبكه من الموضوع .. وفي حاله اختفاء الحبكه لاصبح الموضوع مكشوف وسهل للعيان ويالتي لاختفت المتعه والتشويق ...

واصل يامبدع ..

[سعادة الوزير]

الاخ حمد سواه مسلسل تركي.

الموضوع عبارة عن شكليات فارغة لا اكثر ، واحنا المفروض انه مايعنينا فلان شنهي سيارته او انه يقدر يشتري ولا لا ، ياريت كلنا نتذكر الحديث الشريف "من حسن اسلام المرأ تركه مالا يعنيه".

[لاجل QT]

:eek5:

ماوصلت نتدخل في شؤون الغير لهدرجة

مالهم وهم ابخص فية

الغريب ان البعض يفكر في شؤون ماتخصة نهائيا لامن قريب ولا من بعيد

لاتخلون التفكير في شؤون الناس اكبر همكم

خلو الناس في حالها

[kuwari]

القناعه كنز واهم شي الريال مقتنع

وفي ناس مثلي تحب اتخلي للدوام سياره معينه للتوفير البترول واشياء اخرى

[الواثق باالله]

اخي الكريم بداية اسمح لي أن أبدي اعجابي بمواضيعك

ولكن في هذا الموضوع ليس لك الحق لأنك لاتعلم كيف يكون تفكير هذا الضابط الذي يركب سيارو موديل 2004

يوجد أكثر من سبب ...

1- عمره كبير ولايهتم للمظاهر مثل الجندي يلي بعدو شباب

2- يحب التواضع مقتدياً باالقول ( من تواضع لله رفعه )

3- تكون هذه السيارة للدوام فقط

4- يوجد لديه مصاريف والتزامات ماهي اهم بكثير من ركوب سيارة موديل السنة

تقبل تحياتي

[بوعمير]

انت من الأعضاء ذو القلم المميز وصاحب حضور قوي وراقي. وبخصوص طرحك اعتقد ان الامر اختلاف أولويات او قناعات وقد يكون بخل.

[مجلان]

انت اتفكر الظابط ايش يركب مافكرت السورين ايش يركبون عشان يقاتلون

[فــلان]

من راقب الناس مات هما ًو السياره وسيله وليست غايه

الناس أحوالها أحوال ومحد ملزوم ينشر غسيله لخلق الله عشان يعذرونه أو ما يعذرونه

و إذا فعلا ًهامك أمره أخوي و زعلان على حاله هاديه بسياره تدخل البهجه و السرور على قلبه و إذا قلت مالي وماله عيل مالك وماله بعد تنتقده وتحجمه

إحنا عايشين في مجتمع للأسف كلٍ يطالع الثاني وياليت يطالعون بعض على شي يرزى كمستوى دين أو عِلم أو ثقافه كان حالنا اليوم أفضل بكثير من ما إحنا عليه

سلام!!!

[فرهود]

زمن المواتر الكشخه ياخذها الي يقدر عليها بس انتهى الحين اصغر موظف يقدر ياخذ احسن موتر وصار الامر عادي الشي اذا كثر صار عادي وقيمته في ندرته.

[بوخالد911]

اعوذ بالله من البخل

ياخي اذا الله منعم عليك لا تبخل

[طلعة الروح]

خلصت القضايا والمطالب وباقي بس نركز على مواتر العالم واناقشها !،،، وبعدين نقول نبي نشوف تطور وتقدم في البلد!
لو ثبت ان الرجال المذكور مليونير وبليونير شي راجع له يركب أي موتر يبيه، طول ما الموتر ملكه ومب سارقه ومادام ماضرني بشي ولا ضرك ولا ضر البيئة وماتعدى على حقوق الطريق والمارة،
إذا هو حر ان شالله يركب حمار!

[بوحارب]

ما هذه السخافه يا ساده

[ضوى]

موضوع يدل اشكثر الناس فاضية لدرجة تشوف سيارة هذا وسيارة ذاك ، صج شي غريب

[l0o0rd-qtr]

وانت شنو موترك!

وبعدين راكب كورولا ولا اكورد اهم شي ضابط ونجوم على كتفه

[عازف الاورج]

ضابط مو معناه يقعد يقط فلوسه على اشياء تافهه مثل السيارات!!

يعني وصلت فيهكم التفاهه لهادرجه تعاتبون الرجال حتى على سيارته...

ياخي الرجال يمكن عنده ظروف..... شدراك انت؟

[فــلان]

وش رايكم في موتري يالربع

87571

أهم شي الأخلاق :yes:

:) :) :)

[مشاكل]

شكل الضابط رفيجك وتبي تقوله هالكلام ومستحي ،،، ونزلت هالموضوع تبي تفضفض هههههههه