[ ماهي أفضل 3 أشياء كان يفعلها معك أبوك أو أمك ؟ ]

[الزعفراني]

يقول أحدهم .. 3 أشياء كنت أفعلها لأبنائي وأحرص عليها ..ولها الأثر الكبير في علاقتي معهم ..

1- قبلة الصباح قبل ذهابي للعمل ..
2- دعوة لكل واحد منهم في صلاة العصر ( يعني يدعي لكل واحد فيهم في صلاة العصر ) .
3- حضن المساء قبل النوم ( كان يحضن عياله قبل لا ينامون ) ..




كل واحد يكتب لنا أهم 3 أشياء كان يفعلها معه والده أو والدته ؟؟ .. ( سؤال للجميع ) ..


كل واحد يكتب لنا أهم 3 أشياء يفعلها مع أولاده ؟ .. ( سؤال للأباء والأمهات ) ..


:shy:

[kuwari]

الله يرحم الوالد كان يقعدني بحضنه بالسياره يوم كنت صغير والوالده اتسبحنا بالبانيو اللي بالحوش على اساس انه بركه

الله يرحم ايام قبل ناس بسيطين والفرحه عامره

[الرويـس]

الواير الابيض
الواير الابيض
الواير الابيض

[تغلبية]

أبوي .. كان يخلينا نقرا الفاتحة قبل ما ننام
أمي .. لازم نتريق قبل ما نطلع من البيت للمدرسة
أبوي .. علمنا ما نرمي الأكل الزايد عن حاجتنا ودايماً يخلينا نقارن بين النعمة اللي احنا فيها وبين مجاعة افريقيا.



اللهم اغفر لي ولوالدي وارحمهما كما ربياني صغيراً

[عاشق العديد]

أبوي .. كان يخلينا نقرا الفاتحة قبل ما ننام
أمي .. لازم نتريق قبل ما نتطلع من البيت للمدرسة
أبوي .. علمنا ما نرمي الأكل الزايد عن حاجتنا ودايماً يخلينا نقارن بين النعمة اللي احنا فيها وبين مجاعة افريقيا.

اللهم اغفر لي ولوالدي وارحمهما كما ربياني صغيراً

امين .. وجميع اموات المسلمين والمسلمات ..
اتذكر امي الله يطول بعمرها اصرارها على دخولي مركز لتحفيظ القران ..

[تغلبية]

^

اللـــــه يطول في عمرها .. ويجعلك ممن يضعون تاج الوقار على رؤوسهم في الآخرة .. ويكسي والدتك حلة الكرامة يوم القيامة

[ابوعلي]

الواير الابيض
الواير الابيض
الواير الابيض

وانا الملاس من الوالدة فديتها

[بنت الطائي]

الواير الابيض
الواير الابيض
الواير الابيض

انا الواير الاسود

يا كثر ما انطقيت طق فديته يا رب احفظه لي

[نور الحور]

موضوع حلو .. ربي يحفظ أبهاتنا وأمهاتنا ويخليهم لنا يارب ويعينا على برهم ..

الموضوع أثار شجوني جداً ..

أكتفي بالمتابعة الصامتة ولكن بشغففففف :)

[khalid525]

اعظم شي كانوا يفعله لنا والدينا انهم كانوا يعانون ويتعبون ويتحملون كدر الدنيا ، ولا كانوا يحسسونا بهالشي ، كانت فرحتهم يشوفونا نلعب ونستانس وننام ونكبر .
اللهم ارحمهما كما ربياني صغيرا

[زبرجد]

إذا مرضنا كان أبوي يقرا علينا ويرقينا .
ما يخلينا نلعب مع الصبيان ههههه :)
أمي تريقنا وتهتم في ملابسنا ونظافتنا .

[مختلفة عقليا]

السلام عليكم .,

ياتني الصيحه وانا اقراء .,

ماعرف ,’

الشي الوحيد اللي ما يروح عن بالي ,’ دعواتها لي .,

اللهم اجعل لـ امي نصيب من الراحه في الدنيا والاخره ., ينسيها التعب اللي جافته في حياتها

ويسلمو ,’

[فارس قطر]

[ ماهي أفضل 3 أشياء كان يفعلها معك أبوك أو أمك ؟ ]
اللهم ارحمهم كما ربياني صغيرا

علموني على

صلاة

قراءة القران

صلة الرحم

[عابر سبيل]

وانا الملاس من الوالدة فديتها

هههه..الله يحفظها لكم و يحفظكم لها..

انا كانت الله يرحمها ما تهد "العسو"..
فهو اداة عقابية "لطيفة"..
لكن العقاب في كل الاحوال
"مجدي" !
*
*
،،
موضوع ممتاز و رائع..

اشكرك عليه جدا اخي الزعفراني..

و قد تكون لي عودة مجددا..في صلب الموضوع

[زبرجد]

صحيح تذكرت أهم شي كان أبوي دايما يوصينا على قراءة القرآن .

[Aaziz]

ودي والله اصير كشخه بس ما اقدر ،، ذكريات واير المسجل اليمة :anger1:

[حمد 2002]

موضوع حلو .. ربي يحفظ أبهاتنا وأمهاتنا ويخليهم لنا يارب ويعينا على برهم ..

الموضوع أثار شجوني جداً ..

أكتفي بالمتابعة الصامتة ولكن بشغففففف :)

شكلج انطقيتي طق بكل انواع الشغف خخ

[غايه الطواش]

ابوي : لازم نقرا كتب وكان يحرص على شراء الكتب لنا ودايم يردد اقرو اقرو
واول كتاب قريته كنت في صف ثاني ابتدائي وعباره عن قصه حياه الشاعر الكويتي فهد العسكر والكتاب الثاني نساء صغيرات
بس الكتب كانت مصاغه بطريقه سلسله وسهله لعمر االاطفال وكان معاه شريط مسموع للكتاب

الشي الثاني كنت لي طلبت فلوس يقول اخذي الي تبين من البوك ولاتسندريني فاخذ المبلغ الي يطربني

الشي الثالث : لو نمرض مايرضى نغيب عن المدرسه يقول روحوا وهم برجعونكم البيت ههههههه

امي : اولا: تعايرنا ببنات الناس الي يعرفون يطبخون واحنا مانعرف لين تعلمنا (عاد منهم بنات الناس مادري)
ثاني شي : تجبرني نسوي كل يوم قدوع العصر يمكن حد يمر علينا بالصدفه من الجيران
ثالث شي : اي شي نسويه لازم نطرش منه حق قصرانا
رابع شي : اي قصور من الي فوق يقابله فرصه طعامه التمر (او بالاحرى على قولتها) فرصه البنات

[ريم الشمال]

ابوي الله يرحمه هو من اصر على تعليمنا هو الوالده رحمة الله عليهم اتذكر شراء ابي للمستلزمات وقيامه بحمل كرتون مليء بلمستلزمات المدرسية لين احين كأن نظر له وهو حامل الكرتون وداخل به علينا ما زالت هذه الصورة عالقة في ذهني .

ابوي رحمة الله عليه كان يصلي الفجر في المسجد ثم يتوجه بعدها للسوق في الوقت نفسه تقوم امي الله يرحمها بأيقظنا لكي نتجدد ونصلي الفجر وما زالت رائحة القهوة علقة في انفي وأمي تقوم بإعدادها ودخول أبي علينا وفي يده ما لذ وطاب من الريوق من جباتي وسنبوسه جبن أو خضار واحينا كباب نخي وكان هذا الافطار يتنوع كل يوم حسب رغبت أبي ورغبتنا وإذا ولدت الماعز عندنا يكون الافطار البا لذيذ ... الله يرحمهم كم كان وجودهم رائع في حياتنا

اتذكر لأم رحمة الله عليها موقف جميل جداً كانت عندنا في الفريج في فترة رمضان عادة الغبقه وقد كانت تدور على البيوت مرة أو مرتين أو أكثر وكان هناك غبقة الرجال وغبقة لنساء الفريج وللفتيات الاكبر وللصغار وطبعا نحن من فرضنا على أهلنا أن يقبلوا بأن يكون لنا غبقه مثلهم وطبعا جاء الدور علي وقامت أمي بطباخ الطعام الخاص لي ولصديقاتي وقامت أختى الكبرى الله يطول في عمرها بأعداد الجلي بأنواعه مع وضع الفواكهه وقد كانت حركة جديده وسوت لي كريم كرمل وهريس وغيرها من الخفايف وكم كنت فخوره بذلك وأنا أرى أنهم لم يتم تجاهلي لصغر سني وتم الاهتمام بي غبقتي ليس مثل غبقة الكبار ولكن اعتقد كانت غبقه مميزة وصديقاتي تحدثوا عنها كثيراً وتمت المقارنة بين أمي رحمة الله عليها وبين امهاتهم بأن امي اهتمت بي واظهرت اكبر قدر من الاهتمام بغبقتهم وكان تأثير ذلك على الامهات الاخريات أن تم الاهتمام بغبقة بناتهم حتى لا تظهر بأقل من غبقتي كم كانت أيام رمضان رائعه وكم كانت الامهات رائعات في اكرام بناتهم والتنافس في اظهار الاهتمام بهم

[المحاميه]

ابوي الله يطول ف عمره يخلينا نشتري اي شي مايقول لا كلش

امي الله يطول بعمرها ماتخلي حد يدوسلنا على طرف

[Dana’1]

أبوي فديته
يقرأ علينا في حال تعبنا
يذكرنا بالصلاة قبل طلعتة لها واذا رد ييتفسر هاصليتوا؟!
بسط الوجة بإبتسامه رائعة .. رغم متاعبة أحيان
كان شبة يومي يودينا حديقة العاب الحي الي جنبنا.. نسميها الزحليقة الصفراء:)
كان بشكل أسبوعي واحيان مرتين بالأسبوع لنادي الفروسية أمارس هوايتي... وإذا ما امارسها هناك نروح الكورنيش حيث بعض الخيول هناك واخذ راحتي معها ... حتى الهنود يرتاحون من الدوارة يسلمني الخيل ويجلس:)
إذا دخل للبيت وصادف إننا مقيلين والمفروض نصحى ... يمشي بالمرر حق الغرف ويغني لنا أغنية عجيييبة أظنها من تأليفة فديته يستلمنا فيها دوعابه أهم شي اني اقوم وانا أبتسم
فلوس الفسحة كان يخليها على طاولة التوب وورك بالمطبخ وكل ياخذ مصروفة

أكثر شي ينرفزة لما نقط شي بالأرض برا بالأماكن العامة او من السيارة وغيرة .. ومو بس من صوبنا كان مايحب أي شخص يرمي اي وسخ


أمي فديتها
تقريبا تتشارك مع أبوي في بعض الأمور
بالإضافة إنها
تسوي لي شعري كل صبح وأحب شي لها الظفاير يمكن لين أول متوسط:shy:
المذاكرة بس ببعض مراحل الإبتدائي!
الفرق بينهم إن أمي عندها عادي البنت تنطق وتنقبص وأحيان ما تقصر معنا ههههه
من هالناحية عكس أبوي تماما.. البنات خزنات ويسلبن الألباب ولا يطالنا لا ضرب ولا قبص هههه


الله يحفظهم آمين يارب العالمين

[بنت مريخ]

امي فديتها كان صديقها العسو تضرب ضرب
و تفرص تذبحني
و الصلاه تقولي انا واختي الى ماتصلي ماتكلمني ولا تسلم علي
كله تقول الصلاه عمود الدين لاتتركها يا مسكين
و الحياه جهاد كل يوم كنت اسمع هلجمله ايام الجامعه
الحمدلله نعم التربيه بشهاده الكل والله
الله يرزقنا برها في الدارين

[الزعفراني]

الله يرحم الوالد كان يقعدني بحضنه بالسياره يوم كنت صغير والوالده اتسبحنا بالبانيو اللي بالحوش على اساس انه بركه

الله يرحم ايام قبل ناس بسيطين والفرحه عامره

الله يرحمه .. وهذي من الافعال اللي ترتبط في ذاكرة كل طفل ويتذكرها كل ما كبر أكثر

[الزعفراني]

الواير الابيض
الواير الابيض
الواير الابيض

ممكن صورة للواير الابيض ؟

أخبر الهوز الاسود او الهوز الاحمر مال سلندر الغاز

[العلياا]

أبوي
من وانا صغيرة يوصلني لمدرستي لجامعتي لدوامي
أحس بوجودة جمبي نقعد نسولف لين ما نوصل
رغم أني كبرت وكانت فكرته اني اسوق لين يومك هذا
اوقات اصر عليه او اتعذر بأي شي عشان هو يوصلني

أمي
كل يوم صبح تجهز لي الفطور قبل لا انزل تقعد من وهل عشاني
اقول لها يمه مب لازم واهي تعرف لولاها ما فطرت الصبح
وسوالفها الصبح كل يوم وهي سبب في تأخري على الدوام لكن فدوه
الصلاة وكل شي بخصوص الدين مسؤولية أمي

وأنا ما عندي الا حلالهم ما غير ابوس ايدينهم وراسهم كل ما طلعت ورجعت البيت

[الامير]

سلام عليكم ورحمه الله وبركاته
خليت عيني تدمع ع صبح بس الحمدلله ع كل حال ايش اقولك ابوي الله يرحمه علكني اشياء اشياء وووووواجد
1_ عطي الانسان حقه سواء كان تاجر او اجير ولا ارقد ليل الى معطيه .
2- صدق في الكلام ماكذب في اي شي سلعه ورزق ع الله كان واجد يكررها رزق ع الله
3 عدم القذف ونميمه كان كل ماقعد معه ماسمعه يتكلم في احد اذا سمع بشخص يا اثنى عليه يا ساكت
4 مايحب الاسراف وبسيط والحمدلله ماعن الخير وااااجد والحمدلله بفضل الله وحكامنا امانه تنقال فيهم
ايش اقول ولا اقول صدقوني انه مدرسه كان يشجعني ي ع تعاليم ولان احضر للدكتور والحمدلله
الله يرحمك يا الوالد....... اما الوالده لا ماقدر اقول شي كفايه انا الجنه تحت قدمها الله يخليلكم والديكم صدقوني اذا احد الدينهم موجودين يلزمهم والله مايحس بهم الى لما يفقدهم

[Serenade]

موضوع جميل جدا جدا احييك عليه

3 اشياء من ابوي:
1- كان يحب دايما يقول لنا قصص و يضحكنا ..فكاهي من الدرجة الاولى.. مطيح الميانه معانا و عمره ما حسسنا انه لازم نخاف منه
2- كان اسبوعيا يجيب لي مجلات الاطفال و دفاتر الرسم.. و كل اليوم العصر كان يطلعنا .. مكتبة.. ايس كريم.. أي شي بسيط
3- ابوي كانت و ما زالت ثقته فيني عمياء.. في حياته ما رفض اني اروح مكان معين او اسوي شي معين.. و كان دايما يقول لي : انتي لو يحطونج بين الف رجال ما خفت عليج

3 اشياء من امي
1- حرصها على حفظي للقران والصلاة من وانا صغيرة
2- توقف معاي في أي مشكلة تواجهني..من مشاكلي التافهه..الى مشاكل الشغل ..محد ينفعني كثرها في حياتي
3- امي صديقتي .. اقرب لي من صديقاتي و خواتي.. اكلمها عن كل شي و هي تتكلم معاي في كل شي.. حتى صديقاتي يحبون يصادقون امي لانها شخصية جذابة جدا


الله يحفظهم لي و يحفظ لكم امهاتكم و ابهاتكم :shy:

[ذكـــــرى]

ماسوولي شي غير الهموم
الاب ......... والام ........

[شبح الصمت]

ممكن صورة للواير الابيض ؟

أخبر الهوز الاسود او الهوز الاحمر مال سلندر الغاز




الواير الابيض اهو نفسه الي يركب حالياً على الريسيفر وما يحتاج اكمل هيج مشاعري الرويس

الواير الابيض كان قبل يوم الاريل ينكسر مال التلفزيون كانوا الله يسلمك يحطون هالواير داخل فتحة التلفزيون على اساس انه راح يجيب لهم القنوات وتقعد تحرك فيه يميين ويسار ..




اضم صوتي لصوت الرويس انا الواير الابيض كانت لي معاه قصص حلوه وجميلة


الله يرحمك يابوي ويجعل قبره روضه من رياض الجنة ما تكفيك ولا توفي معاكـ اي كلمة .
ربيتنا وما قصرت وجعل مثواك الجنه

وامي الله يخليها مواقفي معاها كثيرة كانت تقعدنا برشة ماي اذا ما كنا نقعد الله يخليها ويطول بعمرها ويحفظها لنا


الله يحفظ لكم امهاتكم يارب

[بوخالد911]

اللهم ارحم واغفر لأبي

[روز باريس]

انا الواير الاسود

يا كثر ما انطقيت طق فديته يا رب احفظه لي
من الوالد او الواير الاسود😂

[بوخالد911]

ماسوولي شي غير الهموم
الاب ......... والام ........

استغفر الله

[الرويـس]

ممكن صورة للواير الابيض ؟

أخبر الهوز الاسود او الهوز الاحمر مال سلندر الغاز

اما هوز سلندر الغاز

شكله الوالد الله يحفظه متبع سياسة (المجازر الجماعية) وما نفع معاكم غير الهوز

ههههههههههههه

[الرويـس]

وانا الملاس من الوالدة فديتها


انا الواير الاسود

يا كثر ما انطقيت طق فديته يا رب احفظه لي







الواير الابيض اهو نفسه الي يركب حالياً على الريسيفر وما يحتاج اكمل هيج مشاعري الرويس

الواير الابيض كان قبل يوم الاريل ينكسر مال التلفزيون كانوا الله يسلمك يحطون هالواير داخل فتحة التلفزيون على اساس انه راح يجيب لهم القنوات وتقعد تحرك فيه يميين ويسار ..




اضم صوتي لصوت الرويس انا الواير الابيض كانت لي معاه قصص حلوه وجميلة


الله يرحمك يابوي ويجعل قبره روضه من رياض الجنة ما تكفيك ولا توفي معاكـ اي كلمة .
ربيتنا وما قصرت وجعل مثواك الجنه

وامي الله يخليها مواقفي معاها كثيرة كانت تقعدنا برشة ماي اذا ما كنا نقعد الله يخليها ويطول بعمرها ويحفظها لنا


الله يحفظ لكم امهاتكم يارب


تاريخ مشترك وحافل بالوايرات :p

واقدر اعرف سن الشخص من الواير اللي تم تعزيره به

يعني الاخت اللي قالت واير اسود اتوقع هي مواليد السبعينات لان الواير الاسود وقتها كان بلون واحد حق التلفون الهندل

بس الاخوان اللي وايرهم ابيض اتوقع مواليد الثمانينات بحكم التطور الطفيف في البكرات الكهربائيه :p

اما الهوز الاسود والاحمر فاتوقع من ايام اكتشاف النفط

:taunt:

[غايه الطواش]

والله الوايرات طلعت عامل مشترك بين اعضاء المنتدى ههههههههههههههههههههههههههه

[عاشق العديد]

والله الوايرات طلعت عامل مشترك بين اعضاء المنتدى ههههههههههههههههههههههههههه

انا كانت عندهم طرق جديده ومبتكره ..
جذع من النخيل مع علاقه ملابس ومع تسخين بسيط على النار ..
ومع توسيم بسيط بالركبه ..
ومع تلشط قليل ..
وفالنهايه كافي جلكسي ينسك الزعل كله ..

[نتفـه]

امي الله يرحمها ويغفر لها ويجعلها من اهل الجنة كانت :
1. تحرص على انها تخلينا نروح المدرسة كل يووووووووووووووم .. وتلبسنا وتكشخنا وترتبنا كلناااا .. ((مع انها مب متعلمه)) لكن تشد علينا علشان نتعلم ومافي دلع بغيب ومادري شنو ..
2. ما نخطي خطوه الا وهي معانا في الطلعات والدخلات وكل شي ريلها على ريلنا :)
3. مافي أمل حد يدوس لنا على طرف في وجودها ((الله يرحمها فقدتها والله .. الله يجمعني بها في جنات النعيم يارب ))

ابوي الله يعطيه الصحه والعافيه ويشفيه ويآجره :
1. يحرص على ان احنا نتعلم ... ((مع انه مو متعلم)) .. ههههههه كان كل ما كنا عيزانين نقوم الصبح يقول قومو يللا حق المدرسة كأنكم مقيودين للذبح هههههههههه
2. ما يقصر علينا بأي شي .. لو كنا نبي شي ونطالعه بس .. يشتريه لنا بدون ما نقول .. الله لا يقصر عليه ان شاء الله ..
3. كنا كل ما بغينا ننام وعذبنا امي .. يشيلنا واحد واحد يحطنا بالفراش .. يطق طق على كتوفنا او ظهرنا لييييييييييييييين نناااااااااااااااااااااااااام .. حنون بشكل يخلينا حتى لو ما فينا نوم ننام عقب دقيقتين سبحان الله ..

احبهم وايد والله .. الله يعوض تعبهم في الاخرة ويجزاهم عنا كل خير

[قوت القلوب]

افضالهم لاتعد ولاتحصى

يكفي لما أحد فيهم يوديني المستشفى وانا مريض ،،،!

قلبه يرتجف من خوفه علي وعينه تدمع مع آهاتي

والله لما اشوف حد من العيال يمرض اتذكرهم أقول كيف كانوا يحسون ويتألمون بسبتنا

[SOONALL]

اول الوايرات كانت متوفرة بالبيت كامل بس الحين كل شي وايرليس
الضرب هل الزمن كيف

[rayyani12]

موضوع جمييل الصراحه .. الوالد الله يحفظه ويطول بعمره كان طيب مع كل الناس وكان همه الصلاه ويقعدنا حق صلاة الفجر ونروح المسيد والحمدلله كل الفروض كنا نصليها فالمسيد وصلة الرحم كله ياخذنا انا واخوي ونروح معاه يزور عمامه وخواله وحتى الشيبان اللي مايصيرون لنا لين يومكم يروح لهم جزاه الله خير وكان يخلينا نروح مركز تحفيظ القران والحمدلله حفظت ظ¦ اجزاء واخوي ظ¢ظ¥ جزء وكان يعلق الخيزران فالصاله ويخليها قدامنا عشان اذا صار شي بسرعه بسرعه من قريب :tease: وكنت انا واخوي عقب مانتغدى ندخل الغرفه اللي تحت نغسل يدنا ونتلحف بلفيت منخشين وهو يدخل يغسل يده وعقب يجيب الخيزران ويلشط الفراش يدري ان احنا تحت يلعبنا واحنا نضحك لان ماكان يعور .. واخبر بعد كنا نلعب كوره عند المسيد ولازم اذا اذن نخش الكوره فحمام المسيد اللي دايما مقفول الله يعزكم ونتوضى وندخل نصلي وعقب الصلاه رحت اجيب الكوره والسالفه لازم فيها شقحه من الحمام الثاني المهم حطيت رجلي على البيب وعويته وانكسر من قل الوزن :shy: وابتلشت والمؤذن جزاه الله خير ماقصر علم ابوي ويجيك الوالد وماسكني من يدي ورايحين البيت مشي وكل خطوتين ولا ثلاث لشطه بالعقال :nice: لين الحين اتذكر الموقف عالق ف مخي والله .. وماكان يخليني اغيب لو شنو لانه كان وكيل قبل فمدرسه وعارف حق الطلاب ((= بس كنت اتصل ف اخوي ويطلعني بدون مايكلم ابوي :shy:

وامي الله يحفظها ويطول بعمرها كنت اذا مرضت توديني المستشفى وتقعد مقابلتني وهم حاطين علي جهاز الربو وماسكه يدي .. وهي واسطتنا عند ابوي :victory: وبعد ماكانت ترضى اغيب عن التحفيظ وتزفني زف اذا غبت وتخليني اروح حتى لو قرب يخلص الدوام .. واشيا وايد والله ماتحضرني الحين .. الله يحفظهم ويطول لنا بعمرهم ويعينا وياكم على برهم ويرحم ويغفر للميت منهم .. وشكرا

[أخو من طاع ربه]

فضل الام كبير وأكبر من فضل الاب فببدا بالغاليه جعل ربي يطول بعمرها على طاعته

ذكريات لا تنسى من بدينا ندرك بالواقع المحيط قصص ما قبل النوم ,, وقراءة سورة الكرسي ,, وهذا وامي مب متعلمه ,,
حرصها على أذكار الصباح والتوكل على الله ما جعلني ولله الحمد لا اذكر عمل اعمله غير اتوكل على الله
حرصها الدائم على ان الرزق لا ياتي من مخلوق وغرسه في عقلي ,, البلاليط الصباحي له طعم يختلف عن طعمه في الوقت الحاضر
لن كان تعده شخصيا" قبل الذهاب للمدرسه

الوالد قصة ثانيه علمتني أشلون الدنيا بسيطه وان الانسان لا يجني من الدنيا غير ما فعلت يداه
علمني حسن المنطق وعدم التفاتي لصغار الامور وتوافهها الرزانه والثقل وكثير من الامور

طبعا" لا أنسى الواير الابيض كنت اشوفه فقط وهذا طبعا" شي مرعب بالنسبه لي ولكثير من الناس


الله يطول بعمر كل أم وأب على طاعة الله وحفظهم من كل شر

ويرحم من توفى منهم

أشكر أخوي على الموضوع وفضلهم لا يعدل ولا يحصى علينا وجزاك الله الجنه

[أخو من طاع ربه]

لا انسى منظر لي الحين في بالي كان عندنا عمل خيري في المدرسه وراح الوالد هو والوالده جمعية المعموره ويابت كيك و سوت
خبيصه في البيت والله يا أخواني اني لا انسى المنظر يوم أدخلت الوالده الله يحفظها المدرسه وكان بيدها كيس فيه كيك وحامله مطبقية خبيصه ههههه
يا زين قبل وياحلو هالايام وبساطتها

[الدبلوماسي]

الله يطول ف عمر الوالد والوالده
ياما انطقينا وانلشطنا بالوايرات ايييييييييييييه اكره شي عندي خيزران سوق عمان وخاصه الخيزران الضعيف الي يحرقص وانا ماعندي مخشه الا يا ورا خزان الماي وله تحت الطاولات واذا خلاص عرف مكاني الوالد العب فن رن معاه حول البيت هههههههههههههههههههههههههههههه

اهم شي تعلمت منهم الصلاة والامانه وحسن الخلق مع الناس الحمدلله ربونا احسن تربيه

[الزعفراني]

الله يطول ف عمر الوالد والوالده
ياما انطقينا وانلشطنا بالوايرات ايييييييييييييه اكره شي عندي خيزران سوق عمان وخاصه الخيزران الضعيف الي يحرقص وانا ماعندي مخشه الا يا ورا خزان الماي وله تحت الطاولات واذا خلاص عرف مكاني الوالد العب فن رن معاه حول البيت هههههههههههههههههههههههههههههه

اهم شي تعلمت منهم الصلاة والامانه وحسن الخلق مع الناس الحمدلله ربونا احسن تربيه

على أيامنا ما كان فيه شي اسمه سوق عمان هههه .. الله يحفظ والديك ووالدين المسلمين اجمعين

[الزعفراني]

ماسوولي شي غير الهموم
الاب ......... والام ........

الله يفرج همج