حد أيفيدني بخصوص جزيرة بالي الأندونيسية

[بوشاهين2]

السلام عليكم .. بغيت احد رايح هالجزيرة وكم يوم تكفيها طبعاً فقط الجزيرة بدون أندونيسيا ووين الأماكن الحلوه من ناحية السكن بالفيلا بأي مناطق .

[Mohammed.a]

وعليكم السلام ورحمه الله
عشرة ايام تقريبا وحاول انك تاخذ فندقين
عندك منطقه ابود هي جنه الارض وفي فنادق فخمه مثل فورسيزون وبعد شوف بوكنج واختار الي يناسبك
وفي منطقه ثانيه الي هي كوتا وتعتبر العاصمه وفي فنادق ممتازه مثل ويستن و انتركونتيننتل

اذا مسافر ومعاك اطفال صعبه عليهم حر ورطوبه او تشبكها مع هونكونج

[asasasss]

خايسة على حسب تجربتي السكن كان 900 دولار حق 20 يوم

[بنت كحيلان]

جزيرة بالي توني راجعه منها من حوالي شهر
اذا تبي تسكن بروقان لا تقرب منطقه كوتا
منطقه كوتا مزدحمه ورجه وازعاج بس مايمنع تسكن فيها ليلتين عن الخاطر انا سكنت بفندق شيراتون كوتا الليله تقريبا ب650 ريال سعودي وكان هو الافضل بين الموجودين وفيه بنفس الفندق مجمع تجاري صغيرون وحواليك مطاعم وفنادق على طول الشارع ويأجرون حناطير ودبابات كل شي كل شي تتوقعه وماتتوقعه
وسكنت بمنطقه اسمها الواتو هاذي منطقه صخريه جنوب بالي مقابله للمحيط وجنبها معابد مشهوره وخذنا فندق اسمه انانتارا الليله كلفتنا 1650 ريال بس كان رااايق ومريح وحق استرخاء وفيه جاكوزي بالبلكونه ومنظر الغروب خيالي وقريب منها شاطي ممتاز اسمه دريم بيتش
ومنطقه عبود او اوبود بعيده شوي لكن يمديك تروح رحلة الصبح تتفرج على حقول الارز وترجع يعني ما انصح بالسكن فيها لانها موحشه بالليل كغابه وكلها قرود وماحولك اشياء ممكن تقضي يومك فيها مجرد الفندق او شوارع للسكان المحليين ماهي للسواح
منطقه نوسا دوا جميلة ورايقه وفيها فعاليات كثيره وفنادقها رخيصه واكثر الفنادق تكون من الفلل يعني شالية مسكر ولك المسبح الخاص حقك وبصراحه جمييل وراح تنبسطون فيه كثير وتقدرون تطلعون من الفندق وتروحون للبحر وتلعبون باراشوت او غطس او سي ووكر او الموزه او الدونت يعني اشياء كثيره للتسليه
وفيه منطقة جمبران قريبه من كوتا فيها مطاعم مرره رايقه ورمانسيه يحطون لك طاولة على البحر وشموع حوالينك وكذا
انا الجزيره اكثر من سبعه ايام ماتحتاج الا اذا انتو تحبون تتمططون بالوقت