الشيكات بدون رصيد ,, والمحاكم الفاشلة ,,!!

[المولع22]

بسم الله الرحمن الرحيم ,,


احب اتكلم بعد اذن الجميع عن قضية ( الشيكات بدون رصيد ) ,, والمحاكم الفاشلة اللي عشان ترجع حقك تطلع عينك !!

اتكلم عن تجربة شخصية وليس مجرد كلام وقالو وسمعنا ..


لما يجي شخص يعطيك شيك بالقيمة الفلانيه تكتشف انه بدون رصيد ,, تاخذ ورقة البنك اثبات ان بدون رصيد

وتروح امن العاصمه يطلع امر منع سفر ويتحول الموضوع للنيابه ومن النيابه الى المحكمه ,,

ثانيا ,, النيابه تحط منع السفر للشخص هذا ( يقدر يشيله بسهوله اذا جاب اي عذر طبي او مرافق سفر ) !!

ثالثا ,, المحكمه تحكم للشخص لانه طبعا ( غيابـي ) وانت صاحب الحق تراكض من الصح وهو طبعا يجيه خبر ومايحضر

تصير جلستك فيها حكم غيابي مثل ماحصل لي وطبعا الحكم كالتالي

(سنتين) : مع دفع كفالة (500 ريال فقط) عشان يطلع منها ,, وطبعا دفع الكفاله ومانحبس ولا دقيقتين ,,

نكمل الموضوع ونروح الى المحكمه المدنيه ,, طبعا تدفع رسوم القضية وتدفع وتدفع وتدفع بنفسك ,, وتنتظر موعد الجلسه

حسب ماحصل معاي كالتالي ( لازم عندك آله حاسبه عشان تحسب المده ) ://

1- الجلسة الاولى ( لم يحضر الخصم ) تأجيل 35 يوم (اخطاره بالمسج)
2- الجلسة الثانيه ( لم يحضر الخصم ) تأجيل 30 يوم (اخطاره بالارشاد)
3- الجلسة الثالثه ( لم يحضر الخصم ) تأجيل 40 يوم (اخطاره بالأرشاد مره ثانيه)
4- الجلسة الرابعه ( لم يحضر الخصم ) تأجيل 35 يوم (اخطاره بالأمن العام)

--------------------

بعد هذا كله طبعا القاضي راح يحكم ( غيابي ) لان الشخص لم يحضر ولاجلسه ,, وانت صاحب الحق كل جلسه من الصبح قاعد !

الحكم الغيابي بعد مايحكم غيابي القاضي طبعا بعدها تروح انت تسحب اوراقك وتروح الى ( محكمة التنفيذ ) عشان تنفذ الحكم !! ( انت تفرح ان قربت )

بس انا اقولك ,, تو الناس ياخوي استريح ,,

لما تطلب تنفيذ الحكم ,, ممكن بكل سهولة يجي (الخصم) ويرفع استئناف ,, بحجة انه ماعنده علم بشي ولم يتم اخطاره .. ! وخذ لك بالموضوع هذا (شهور اضافية)

خلاصة الموضوع : انا من سنه 2012 الى هذا اليوم لم يتم استرجاع قيمة الشيك والى اليوم عندي جلسات بالمحكمه واقرب جلسه هذا الشهر !!

للعلم ان المبلغ اللي بالشيك لايتعدى ( 100 الف ريال ) عشان مانقول سالفتك طويلة وفيها ملايين ومليارات !!

يالربع زبدة الموضوع كثير من الشباب الطيبين هنا عارفين كلامي اللي راح اقولة

ان لو عندك حد هنا وهناك راح ينسحب الشخص هذا من بيته ( بأمر إداري ) وينحط في الحبس الى ان يرد الحق لاصحابه ,, اتمنى محد ينكر هذا الشي بس !

اللي حصل مع واحد من ربعنا بشكل سريع ,, انه كان يطالب واحد تقريبا (60 الف ريال) ,, لما تعب صاحبنا من المحاكم والمشاوير والتعب هذا كله

الشخص صاحب الشيك قال له انا عندي (35 الف ريال) كاش الحين ,, تحب تاخذهم وتسحب القضية والا تحب تستمر فيها الى مالا نهايه

صاحبنا من بعد التعب كله هذا والذل من صباح الله خير ,, رضى بالامر الواقع واستلم 35 وتنازل عن حقه الباقي اللي هو 25 الف ريال !!

------------------

استفسار للي يعرفون الامر هذا ؟!

هل صعب ان برقمه الشخصي تطلع عنوانه وتروح له دوريه وتاخذه وتحبسه لين احد من اهله والا عياله يدفع عنه !

او مثلا يتم بيع ممتلكاته الشخصية عقار - سياره - اسهم - وغيره بالمزادات وارجاع الحق لاصحابه !

--------------------

وجهة نظر //

دام المحاكم عندنا لهذي الدرجه سايبه ومماطله بشكل لايصدق ولايطاق ,, كل شخص يدفع شيكات بملايين ومليارات ,,

واقولك روح اشتك علي بالمحاكم

ولين يجي دورك ويجي حقك ,, وقتها باكون بالمليون هذا سويت عشرة مليون وبرجعها لك وفوقها بوسه بعد :victory:




(( باب النقاش مفتوح ))

[الشاااهين]

اخوي كلامك عدل 100% للأسف هذا اللي صاير والا المفروض من أول يوم يحضروه لين مركز الشرطه وإذا مادفع يدخل السجن ويروح النيابه والمحكمه وهو بالسجن والله ماتشوف حد يكتب شيك من هالنصابين .....


الله يعينك ويرد حقك

[monatee]

الخلل ليس بالمحاكم وليس بالقاضي وليس بالشرطه

انما الخلل موجود بنصوص القانون وكثره ثغراته

[قطريه22]

المحاكم عندنا بطيئه في اتخاذ القرارات لازم تروح المحكمه اكثر من مره وفي كل مره ياتتأجل أو يحددون لك وقت ثاني انا تميت 3 سنوات مع المحكمه واخرتها ماطلعت بشي منهم للاسف الي يقول المحاكم تاخذ حق الواحد غلطان المحاكم تفر راس الواحد بس

الاجراء الصح اذا شافو واحد كاتب شيك من غير رصيد وطلع حكم فيه وهو مب موجود يحجزون على كل شيء يملكه من اموال ويردون للناس حقها
للاسف الشديد المحاكم عندنا صارت استثمار يشفطون فلوس من الناس وبس

[الزعفراني]

تجربة مثيرة الله يعينك .. والمفروض كل شخص يقرأ هالكلام .. لا يتعامل الا بالشيكات المصدقة عشان يضمن حقه وكان الله غفور رحيم

[المولع22]

اخوي كلامك عدل 100% للأسف هذا اللي صاير والا المفروض من أول يوم يحضروه لين مركز الشرطه وإذا مادفع يدخل السجن ويروح النيابه والمحكمه وهو بالسجن والله ماتشوف حد يكتب شيك من هالنصابين .....


الله يعينك ويرد حقك

للاسف اخوي ان المفروض شي
والواقع شي ثاني تماما

[المولع22]

الخلل ليس بالمحاكم وليس بالقاضي وليس بالشرطه

انما الخلل موجود بنصوص القانون وكثره ثغراته

اتفق معك في هذا الشي

[المولع22]

المحاكم عندنا بطيئه في اتخاذ القرارات لازم تروح المحكمه اكثر من مره وفي كل مره ياتتأجل أو يحددون لك وقت ثاني انا تميت 3 سنوات مع المحكمه واخرتها ماطلعت بشي منهم للاسف الي يقول المحاكم تاخذ حق الواحد غلطان المحاكم تفر راس الواحد بس

الاجراء الصح اذا شافو واحد كاتب شيك من غير رصيد وطلع حكم فيه وهو مب موجود يحجزون على كل شيء يملكه من اموال ويردون للناس حقها
للاسف الشديد المحاكم عندنا صارت استثمار يشفطون فلوس من الناس وبس


للاسف ان الواحد يشوف الذل
لين من نفسه يتنازل عن حقه من عقب التعب

[المولع22]

تجربة مثيرة الله يعينك .. والمفروض كل شخص يقرأ هالكلام .. لا يتعامل الا بالشيكات المصدقة عشان يضمن حقه وكان الله غفور رحيم


ياليت لو كان فيه قانون صارم
واجراء سريع لردع هذا الشي

[+abc]

الله يعين

انا عندي شيكات على هندي من اربع سنين بستين الف ولليوم ماخذيت ولاريال والهندي كل ويكند يشيل منع السفر ويسهر في البحرين
بعد هالهندي حرمت اتعامل بالشيكات لكن جاني قطري وعسكري وهو خميس الخليفي
وعطاني شيك بسبعين الف ولي كم سنة ماخذيت منه شي ليش لانه طلع يلعب في الخويا يعني فوق القانون لانه يلعب كورة وليومك ماخذيت شي

تنبيه للجميع لاحد يتعامل بالشيكات قانوننا هنا مصري يعني تتلته وتتبهدل وتشوف غيرك يلعب بحلالك وانت مقهور ليش يقولك يبقى الحال على ماهو عليه وعلى المتضرر اللجوء للقانون.

[Locale]

سبحان الله
اللي يبوق شلون يقدر ينام الليل !!

[المولع22]

الله يعين

انا عندي شيكات على هندي من اربع سنين بستين الف ولليوم ماخذيت ولاريال والهندي كل ويكند يشيل منع السفر ويسهر في البحرين
بعد هالهندي حرمت اتعامل بالشيكات لكن جاني قطري وعسكري وهو خميس الخليفي
وعطاني شيك بسبعين الف ولي كم سنة ماخذيت منه شي ليش لانه طلع يلعب في الخويا يعني فوق القانون لانه يلعب كورة وليومك ماخذيت شي

تنبيه للجميع لاحد يتعامل بالشيكات قانوننا هنا مصري يعني تتلته وتتبهدل وتشوف غيرك يلعب بحلالك وانت مقهور ليش يقولك يبقى الحال على ماهو عليه وعلى المتضرر اللجوء للقانون.


الله يعينك اخوي ويعيننا على مابلانا ,, بس احيانا الشيك احسن من ولاشي ومع ذلك ( للاسف )

الشيك يفيدك بحاله وحده ان هالشخص اذا انك مب ضامنه بس عالاقل تمسك عليه ممسك مثل الشيك عشان تقدر تطالب بحقك احسن من انه يقول انتظرني وبجيك !!

[المولع22]

سبحان الله
اللي يبوق شلون يقدر ينام الليل !!

طال عمرك للاسف جدا ,, ان هذا الكلام صار قديم وصارت النسبة الاكبر هي ( تنام الليل مرتاحة وهي ماكله حقك وحلالك )


يعني باختصار حاليا اللي صار اني اخذ منك الملايين واقولك انتظرني لين استفيد منهم وارجعهم لك الضعف ومثل ماقلت لك قبل ارجع لك فلوسك وفوقها بوسه

للاسف هذا الواقع

[مرتبش]

لاحول ولا قوة الا بالله شاللي وصلنا لهالمرحلة من غياب القانون

[قطر833]

للاسف القانون القطري هو الي مساعدهم،، المفروض يتم تجريم هالعمل

[aziz4z]

سبحان الله , القصص كثيرة , ناس تأكل أموال الناس بالحرام ...
إنك تروح بيته و تتصل بالدورية عشان يمسكون عملية صعبة , و ممكن تصير من وراها مشاكل أكثر
بس مرات ممكن تفيد
في واحد من أصحاب المعدات الثقيلة , اشتغل شهر , و طلب حقه , أعطاله شيك , لين راح البنك عشان يصرف الشيك , طلع أنه مافي رصيد في البنك , انتظر أيام و نفس الشيء مافي رصيد , و ليحين شغال معاه , مرت 15 يوم من الشهر الثاني , دخل على المدير في المكتب و قاله مافي رصيد , المدير قاله تعال بكرة , لين صار بكرة المدير محد , و جوالاته مسكرة , قال مافي إلا أراقبه طول اليوم من الصبح لين المغرب , كان ينتظر من بعيد و يراقب سيارته , شافاه جاء المكتب الساعة 4 عصر , راح بسرعة و حرك الحفار , و وقف وراه , حاصر سيارة المدير , لين طلع المدير و يبي يروح , قاله ياتدفعلي الحين كاش , و ياماأخليك تروح البيت , اضطر يدفعله
في ناس يبيلها ضرب بالراس
المفروض البنك مايعطي شيكات إلى برصيد معين , يعني كل شيك 3000 ريال , و عدد الشيكات 50 شيك , 3000 *50 = 150000 , لازم يكون في حسابك هالمبلغ , و إلى مايصرفلك الشيك , و يسون عليه بلووووك , يعني مايقدر يسحب هالفلوس من البنك .

[الزجاجي]

والحل !!

عندي قضيتين شيكات من غير رصيد وهم ما حصلت حل ؟
ووكلت محامي في وحده من هذه القضايا وما قدر عليها !

[باحث علم]

خوفتوني صراحه
انا كنت ناوي اساعد واحد بمبلغ كبير
بس عقب اللي قريته
لاوالله ، الله يستر عليه وعلينا

[باحث علم]

واحد يقول لي اذا نصب عليك
روح لواحد ثاني انت وانصب عليه بنفس المبلغ
واذا ذاك رجع لك فلوسك رجع انت فلوس الرجال
وخل الناس كل واحد ينصب على الثاني طالما مافي قانون

[OREO]

لي تجربية شخصية بموضوع الشيكات و كل اللي اقدر اقوله بأن محاكمنا همها الضرايب اللي تاخذها من الناس و القوانين الموجوده حاليا تخدم الحرامي بشكل اكبر من ما تحفظ حق المظلوم ،..

[الدبلوماسي]

كان الله في عونك ف هالزمن الذمه 0 الا من رحم ربي
النظام المتبع اذا المبلغ من 1000 ريال الى 490 الف الواحد ياخذه كاش افضل بدال عوار الراس
اما اذا كان من نص مليون وطالع ينطلب من الشخص شيك( بضمان البنك) وهذا الي حاصل في شراء العقارات

[الدوحه1]

انا مادري ليش من الاساس القضيه تتحول على المحاكم؟؟
مادام التهمه ثابته على المجرم والمجرم اعترف انه صاحب الشيك وان التوقيع اللي على الشيك توقيعه فالمفروض يسجن حتى يدفع.

القضيه تتحول على المحاكم في حالة انكار التوقيع.

[نتفـه]

حسبي الله ونعم الوكيل في اللي ذمتهم وسيعه .. مايدرون انهم لو نفذو منها بالدنيا عليها عقوبه يوم القيامه عسيره جدا لدرجة انه لين مات وما حللوه يتم معلق بسبة الدين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟

[qatara]

هذا نتيجة القوانين الوضعيه
ضياع وقت وحقوق وبدهله بالشهور والسنين
تكره حقك وتمل منه وانت صاحب حق

[بوخالد911]

الله يبعدنا عن مشاكل المحاكم

[الكواري 1972]

حسبي الله ونعم الوكيل

لي مديونات على ناس حسبي الله عليهم

لكن للاسف مافي رادع قوي

والله حرام عليكم

عندك واسطه محكمتك بتخلص بسرعه

الله يكون في العون

[المولع22]

حسبي الله ونعم الوكيل
لي مديونات على ناس حسبي الله عليهم
لكن للاسف مافي رادع قوي
والله حرام عليكم

عندك واسطه محكمتك بتخلص بسرعه

الله يكون في العون

بالضبط هذي هي زبدة الموضوع !

[مخطط قطري]

اطلب شيك منجر وريح راسك الحين اغلب البنوك شيك المنجر بلاش ونفس ماذكر اخوي الدبلوماسي موضوع الذمه مع الاسف صار عند بعض الناس امر هين
ولكن انا على كثر تعاملاتي نادر جدا اصادف مثل هالنصابين يعني الحمدالله عددهم قليل وهم شر لابد من استئصاله وذلك بوضع محكمه خاصه لمثل هالامور تستعجل في نطق الحكم

[عضو دائم]

مشاكل الشيكات بدون رصيد المفروض ماتتعدى حدود مركز الشرطة وهو ياتدفع المبلق المطلوب ياتخيس في السجن حتى لو عشرين سنه ..

[SeniorTrader]

حسبي الله ونعم الوكيل

الله يردلك حقك وحق ابوي لانه يعاني نفس مشكلتك وحق كل مظلوم

محاكمنا ضعيفه للاسف مما يزيد الفساد والسرقه والاستهتار خلاص محد قام يثق بالشيكات

[RE-Qatar]

مشاكل الشيكات بدون رصيد المفروض ماتتعدى حدود مركز الشرطة وهو ياتدفع المبلق المطلوب ياتخيس في السجن حتى لو عشرين سنه ..

انا مع هذا الراي

لأن كل شي مثبت ليش يتحول محكمة وجلسات روح وتعال عشر مرات وصاحب الحق هو اللي يتعب

صارت التجارة والتعاملات مافيها أمان ولا ثقة
صرنا قبل لانستلم الشيك نسأل في المركز عنه !!

[المولع22]

كلام جميل ولاحظت ان الكل يعاني من نفس المشكلة والخلل هو الخلل

طيب ياجماعه محد لقى حل لهذا الموضوع ,, دام ان وصلنا 4 صفحات للموضوع وماشاء الله ولا احد اموره تيسرت واخذ حقوقه

مجلس القضاء هل لهذي الدرجة مسيـب ولارقابه عليه ,, عالاقل يتابعون ان مواضيع الناس متى تخلص ومتى ينوجد لها حل

مب كل قضية تاخذ بالسنتين والثلاث واكثر !! يجب وضع رقابه على القضايا حتى ماتاخذ اكثر من وقتها

ومثل ماقال احد الاخوان القضية لشيكات بدون رصيد المفروض ماتتعدى حدود امن العاصمة ويُرمى بالسجن كل من سولت له نفسه بهذا العمل

حتى يرد الحق لاصحابه ,,!

[الفا برافو]

انا عندي قضية شيك بدون رصيد والحين وصلت الى مرحلة محكمة التنفيذ بعدالمرور على المحكمة الجنائيه وعقبها المحكمه المدنيه وكل محكمة لها جلسات عديده .... الشخص اللي نصب علي وعطاني الشيك ماعنده اي شي باسمه.. لا بيت ولا عقار ولا حتى سياره ولا فلوس في البنك...عليه امر بالقبض بسبب الشيكات اللي من غير رصيد واصدرها لعدد كبير من الناس وكل واحد الحين رافع عليه قضيه وحالته مثل حالتي لانه هالشخص عارف اسلوب المحاكم وانه حتى مع امر القبض عليه الامور مقدور عليها..
القهر ليش البنك المركزي مايصدر تعميم للبنوك بعدم منح شيكات شخصيه لهولاء الاشكال اللي قضايا شيكات من دون رصيد تارسه المحاكم بكل درجاتها.. وليش الشرطه او النيابه او من اول محكمه يصدر عليه حكم يأمرونه بتسليم دفتر الشيكات اللي عنده ..

صدقوني دام الامور بهذي السهوله ومافي تشهير بهالاشخاص ماراح يتغير الوضع الا بعدم قبول اي شيك شخصي مهما كانت شخصية هالشخص واسمه واسم عايلته ومكانته الاجتماعيه .

[المولع22]

صدقوني دام الامور بهذي السهوله ومافي تشهير بهالاشخاص ماراح يتغير الوضع
الا بعدم قبول اي شيك شخصي مهما كانت شخصية هالشخص واسمه واسم عايلته ومكانته الاجتماعيه .

الله يعيننا وياك ياخوي ,, ومثل ماقلت ,, المفروض المواضيع هذي ماتتعدى اسوار امن العاصمة من الأساس
دام ان كل شي واضح والشيك ليس مزور والتوقيع صحيح وصاحب الشيك شخصيا اللي وقع عليه مع العلم انه لايوجد رصيد !!

يعني بالعربي الفصيح ( مستهزء بالقانون ) !!

وارجع شي واحد ,, ( اذا عندك حد هنا والا هناك ,, يطلعون له أمر قبض إداري ) وامورك تخلص في 24 ساعه "للأسف"

[العلياا]

الخلل ليس بالمحاكم وليس بالقاضي وليس بالشرطه

انما الخلل موجود بنصوص القانون وكثره ثغراته

+1 اتفق مع هالرأي

اخوي انت موكل محامي ؟