ابي استشاري

[بوجاسم@قطر]

السلام عليكم


بغيت استشاري يصمم لي ملحق ويطلع لي رخصه البنيان بس يكىن سعره معقول :weeping:

[معماري قطري]

الملحق ما يحتاج شغل وايد .. شوف استشاري عنده شيء قريب من اللي تبيه وجاهز بيقدر يخلصه لك برخيص وبسرعة .. مر على كم واحد وقارن أَفضل لك.

[بوجاسم@قطر]

اخوي تعبت وانا ادور استشاري يصمم لي


اقل سعر حصلته 7000 ريال على مساحه 70 متر

[M O 7 A M M E D]

نصيحة اخو وعن تجربة ..

ابتعد عن مكتب الريان ..

والله يوفقك ..

:)

[معماري قطري]

ركز طلبك على تصميم جاهز ما تغير منه شيء ويناسب احتياجك وصدقني بيخلصه لك بنص أَو ربع هذا السعر واحتمال لو تبي انت تخلصه بيسويه بسعر رخيص .. لكن تطلب تصميم وشغل وتعديل لازم بياخذون سعر يتناسب مع شغلهم.

[captin]

يا جماعة الخير

لا تروحون حق الرخيص لا تروحون حق الرخيص خلوه مبدأ عام

كثير من المكاتب المعروفة واسعارها مقبولة وذات جودة في العمل

[عقرب]

صغر المساحة لين 60 متر مربع ولا تحتاج لا إستشاري ولا مقاول وقت إستخراج الرخصة , بتروح البلدية وبيطلع معاك مساح يشوف موقع البناء في البيت وبيرسم المخطط وبيعطونك رخصة إضافة خلال يومين أو ثلاث إن شاء الله , يعني لا تروح خدمات ولا غيره , وعقب شوف لك مقاول يبني الملحق

( بشرط أن الملحق الي بتبنيه مايحتاج أنك تقوي كهربة البيت .. يعني كهربة البيت تستحمل الأحمال الي بتزيد للملحق )

[عقرب]

وإذا مصمم على إستشاري عندك شعاع للإستشارات الهندسية روح للسوداني أسمه الأمين

مكان مكتبهم من جسر مدماك تروح كأنك متجه للشمال بيكون المكتب على يمينك بعد نص كيلو

[معماري قطري]

يا جماعة الخير

لا تروحون حق الرخيص لا تروحون حق الرخيص خلوه مبدأ عام

كثير من المكاتب المعروفة واسعارها مقبولة وذات جودة في العمل

صح كلامك اخوي كابتن وهذا الشيء اللي انصح به دايما لكن المشكلة طغيان في سعر الاستشارات وفي النهاية مبنى صغير وعادي ونسخ .. الواحد يطلب مشروع مشابه أَفضل له وبسعر زين .. وإِضافة الأَخ العضو عقرب في محلها، وأَتوقع إِذا يمشون 60 متر بيمشون حتى 100 متر إِضافية هم شخسرانين الواحد يحتاج مخزن وغيره.

[بوNasser]

اخوي تعبت وانا ادور استشاري يصمم لي


اقل سعر حصلته 7000 ريال على مساحه 70 متر

انا سويت الخرائط عند المكتب اللي ذكره الأخ عقرب

الملاحق عبارة عن: مجلس + غرفتين نوم + مطبخ خارجي ، كلها متباعدة عن بعض بحكم تصميم الأرض، بمساحة تقريبا 230 متر

وكان السعر في حدود 5000 ريال.

تحياتي لك وللجميع

[بوجاسم@قطر]

صغر المساحة لين 60 متر مربع ولا تحتاج لا إستشاري ولا مقاول وقت إستخراج الرخصة , بتروح البلدية وبيطلع معاك مساح يشوف موقع البناء في البيت وبيرسم المخطط وبيعطونك رخصة إضافة خلال يومين أو ثلاث إن شاء الله , يعني لا تروح خدمات ولا غيره , وعقب شوف لك مقاول يبني الملحق

( بشرط أن الملحق الي بتبنيه مايحتاج أنك تقوي كهربة البيت .. يعني كهربة البيت تستحمل الأحمال الي بتزيد للملحق )


يعني مابيعطوني تقويه كهرباء؟


اخلي المحلق بدون مكيفات !!!!!!

[عقرب]

يعني مابيعطوني تقويه كهرباء؟


اخلي المحلق بدون مكيفات !!!!!!

اي لازم تحط بادقير :)

لا ياخوي فهمتني غلط الله يجزاك خير

إلي أقصده أن كهربة البيت إلي بتسوي فيه الملحق لازم تستحمل الأحمال الكهربائية الإضافية الي بتحطها في الملحق ( مكيفات + ليتات + ألخ )

بعض البيوت كهربتها ضعيفة وإذا بتسوي ملحق لازم تقوي الكهرباء وأكثر البيوت مايحتاج تقوي لأن الكهربة قوية
وتستحمل

أنت جيب كهربائي وخله يشوف المجمع حق الكهرب إلي في بيتكم وقوله إنك بتسوي ملحق فيه كذا وكذا من مكيفات هل كهربة البيت تستحمل ولا لا .. إذا قال تستحمل توكل على الله وسوو إلي قلت لك عليه