&&هوس الرشاقة والتنحيف عند النساء &&

[ضوى]

محادثة وهمية :

مريم : نورة خلاص مب قادرة اتحمل وزني ، مافي فايدة اقلل اكل اسكر حلجي مافي فايدة وزني مو قاعد ينزل ،

نورة : اشدعوة .. ، جربتي ريجيم دشتي ؟؟

مريم : شنو هذا بعد ريجيم دشتي ..؟

نورة : هذا الله يسلمج نظام غذائي يعتمد على الامتناع نهائياً عن الكاربوهيدرات يعني عن الخبز والعيش والمعكرونات والاعتماد عاللحوم بكل انواعها .

مريم : بسم الله وين اقدر اصبر عن الخبز والعيش ماتحمل

نورة : كيفج تحملي وزنج عيل .

مريم : يعني تبين تفهيمني مافي طريقة ثانية كلش انزل فيها وزني غير هالريجيم القاتل ؟

نورة : فيه ، بس هالعلاج متوفر وغالي .

مريم : قولي مستعدة ادفع بس المهم ينزل وزني

نورة : فيه حبوب تاخذينها تنزلج 8 كيلو في اسبوعين

مريم : من صجج ؟؟ شنهو هالدوا السحري

نورة : هو عبارة عن أعشاب من الاناناس والزنجبيل ومدري شنو بعد

مريم : من صجج ليش ما اكل الزنجبيل الطازج والاناناس الطازج عيل ؟؟

نورة : اووه اشدراني عاد المهم انه هالحبوب مجربينها ناس وضعفوا عليها وااايد

مريم : ان شاء الله ، بس من وين احصلها .؟

نورة : في واحدة تبيعهم عندها حساب بالانستغرام والعلبة فيها 60 حبة ب 500 ريال لمدة شهر

مريم : والله سعرها معقول مب غالي اذا باضعف عليه .


حوار مريم مع صاحبة حساب الانستغرام :-

مريم : هلا اختي ، ممكن اطلب من الحبوب ، بس لي كم سؤال عن هالمنتج .

التاجرة : تفضلي اختي امريني

مريم : هالحبوب مالها اضرار جانبية ؟؟ وهل هي مرخصة من وزراة الصحة عندنا ؟

التاجرة : طبعا اختي هالحبوب آمنة جدا ومرخصة مافي منها أي مضرة .

مريم : طيب ابي علبتين وهذا هو عنواني .

التاجرة ابشري وهذا رقم الحساب اللي تحولين عليه الفلوس .

انتهى

يصل الدواء عن طريق الجمارك يتم تحويله لإدارة الصحة ، يتم إرساله للمختبر يتم تحليله الطامة الكبرى يحتوي على مادة خطرة جدا ممنوعة دولياً .

تأتي مريم لاستلام دوائها ،

مريم : لي دوا حولته ارامكس والا دي اتش ال عليكم

الصيدلي : اخت مريم هذا الدواء ممنوع تداوله ، وفيه مادة مضرة ومحرمة دولياً .

مريم : شنهو هالكلام ، الدواء الكل ياخذه والكل يستخدمه جات علي انا ممنوع .

الصيدلي : اخت مريم انا غير مخول الا باتلاف هذا الدواء او إعادة تصديره واستعادة نقودك من هذه التاجرة

مريم : بس هذي التاجرة تقول انه مرخص من الصحة ؟

الصيدلي : خليها تعطيج الترخيص اذا هي صادقة

مريم : طيب انا باخذه على مسؤوليتي الخاصة

الصيدلي : ممنوع

مريم : تعود خائبة الرجاء لبيتها وتندب حظها مع نورة وانها وهقتها مع هالتاجرة .

الخلاصة :
الاحظ الكثير من النساء تلجا لحبوب تخسيس الوزن وهي أشكال وألوان متعددة ، أصبح هوس التنحيف هاجس يشغل بالهن ، نصيحة من اخت في الله محبة لكم ، كل من يدعي انه هناك حبوباً تنزل من الوزن دون تخفيف الاكل ودون عمل الرياضة فهو كذب ، وان صح فيكون فيه مادة دوائية خطرة ومحرمة دولياً وهذا مايفسر نزول الوزن السريع

ابتعدوا عن حبوب التخسيس ابتعدوا عن اي منتجات تدعي تخفيف الوزن السريع ، شوية رياضة شوية تخفيف وزن وشوف تحصلن على الرشاقة المطلوبة بالتدريج ودون حرمان ودون التعرض لمواد دوائية خطرة عالصحة العامة

مع تحياتي لكن برشاقة دائمة ان شاء الله

[بوحارب]

المصيبة اللي تسوي عملية قص معدة ب 50,000 وهي مب محتاجه لها

بس من باب الموضه والدلع انها سوة عملية

والشي هذا شفته بنفسي

اما حبوب التخسيس هذي تجارة استفادوا منها التجار :) وكلوا تبن اللي جربوها هههه

[بصمة قطرية]

صادقة حبيبتي ضوى
للأسف وايد ناس ياخذون هالحبوب و لا يسألون عن مضارها
و مرات يغشونهم التاجرات ..!!!
من فترة بسيطة قريت مقاله لدكتور يحذر من هالحبوب
و ذكر تاجرة تجيب حبوب أعتقد من تايلند و مثل ما ذكرتي
فيها مواد محرمة دولياً و خطرة جداً ..!!
و كان يحاول ينبه الكل
في نفس الوقت قالوا إنهم بلغوا الصحة عشان تتصرف معاها
لأنها تتاجر بشي يضر الناس مو هامها غير الربح
لا ذمة و لا ضمير ..
عمر هالجبوب ما كانت صحية و سليمه
حبوب يعني دوا ..!!
معناته فيها مواد مضرة ..
يعني ممكن تسبب آثار جانبيه و ممكن تضر الشخص
و تسبب له أمراض ..!!
الصحة ثم الصحة ثم الصحة
الواحد ما يحس بقيمة الصحة و العافية إلا يوم يفقدها ..
المشي الرياضة الأكل الصحي تخفيف الأكل ..

[العلياا]

تدرين يا ضوى
مرة وصلني برودكاست عن الامارات انهم صادوا كمية من البضائع المقلدة وتم الكشف عن عنوان صاحبها عن طريق وسائل التواصل الاجتماعي ..
أحنا ليش ما عندنا نفس الشي ماعرف كيف بتكون الآلية لكن في تجاوزات قاعدة تصير وكلها من هالانستا وغيره من هالبلاوي !!

شخصياً ما أؤمن بحبوب وغيره
الله يستر على الجميع واشكرج على التنبية

[راشد محمد]

نص الدوحة مسوين قص المعده..

[بريق الحق]

نص الدوحة مسوين قص المعده..

ههههه مصيبه الصراحه
بعجبني الي عنده اصرار انه يضعف ولا عليه من فلان وعلان

[سارونه]

الحين يا جماعة في فاكهه plam delite تباع عن طريق الفلبينيات تخسس خلال شهرين

اسم الفاكهه البرقوق المجفف يساعد على تنظيف المعدة وتنزيل الوزن . في احد سمع عنها ؟

[النهار]

انزين مافي حبوب تزود الوزن تعبت ابي وزني يزيد

[S S]

مافي احسن من الرياضه والحركة والإصرار بس البعض تعود انه يبي كل شي بساهل بدون ما يفكر فى العواقب

[شيخ الديرة]

الحين يا جماعة في فاكهه plam delite تباع عن طريق الفلبينيات تخسس خلال شهرين

اسم الفاكهه البرقوق المجفف يساعد على تنظيف المعدة وتنزيل الوزن . في احد سمع عنها ؟

http://www.bubblews.com/assets/images/news/766690699_1361251399.jpg

[ريم الشمال]

الحركة من تركناها ونحن نكتسب وزن لكن الحل بيدنا ونبحث عن السهل و الذي يؤدي لنتائج كارثية على صحتنا

[مليونيرة مفلسة]

http://www.bubblews.com/assets/images/news/766690699_1361251399.jpg

لو هالكلام صحيح ليش لحد الان نشوف فلبنيات مكرشات هههه

[بوحارب]

لو هالكلام صحيح ليش لحد الان نشوف فلبنيات مكرشات هههه

من الاندومي يالمفلسه :)

[ضوى]

شخصيا وعقب اللي مر علي من غش في هالمنتجات ، صرت ماثق بشي ابدا

[حمد 2002]

انزين مافي حبوب تزود الوزن تعبت ابي وزني يزيد

:shy:

[حمد 2002]

يمكن بسبب الموضه ؟

في قديم الزمان كانت الموضه بان الحرمه اتكون متينه . اما الان الموضه االدارجه بان الحرمه تكون رشيقه !! .

[حمد 2002]

المشكله المتن والضعف له حل !!

لاكن بعضهم قصار الطول ويلبسون الكعب مب حبا فيه بل رغبتهم بان يبدوا طوال .. يمكن العامل نفسي والله اعلم ..

[ضوى]

شكرا للجميع

[قطريه22]

وحده من البنات تبي تضعف قلت لها تسوي رجيم احسن من الحبوب والخرابيط بس ماسمعت كلامي

تقول في حبوب وعسل وشاي يبيعونه في الصيدليه وينزل 20 كيلو في الشهر وتاكل الي تبيه من اكل

اقولها يمكن مب مصرح تقول دامه في الصيدليه اكيد طبي وزين

نصيحه للي يبون يضعفون يبتعدون عن الحبوب وهالاشياء الضاره وايد سمعت تحذيرات من الحبوب الي تضعف..

مشكوره اختي ضوى موضوعج مهم

[رفيع الهامه]

والله اكثر اللي قصوا المعدة صارت اشكالهم تخرع .... صاروا من اهل المجاعات اشكالهم والوجه شاحب الى درجة انك تعطف عليه من الضعف والمرض الله يكفينا شر القص

[كازانوفا]

انزين مافي حبوب تزود الوزن تعبت ابي وزني يزيد

اشرب حلبه تفتح الشهيه بطريقه مش طبيعيه

[كازانوفا]

والله احسن حل تخفيف الاكل والمشي والرياضه
حاليا دور على نادي رياضي قريب من الهلال او المطار او المعموره حد يدلني ؟؟؟؟؟؟؟؟؟؟؟؟؟؟؟؟؟

شكرا يا ضوى على المووضوع

[همر]

والله اكثر اللي قصوا المعدة صارت اشكالهم تخرع .... صاروا من اهل المجاعات اشكالهم والوجه شاحب الى درجة انك تعطف عليه من الضعف والمرض الله يكفينا شر القص



انا مسوي قص ومانزل وزني عن ال100 :)

[همر]

السبب في الدعايه الاربع ساعه وعشرين شغاله

مثل قناة فنون

كوجي ادفانص

كوجي ادفانص

كوجي ادفانص

بين الدعايه والدعايه دعايه

لين ينحفر في العقل الباطن

وفي اللاوعي ...

[ضوى]

ومثل الانستغرام يا همر صار هوس بعيد الشر ، تنحفيف شد خواصر زنود ، كلام فاضي ، والحريم فيهم هوس مب طبيعي تجاه هالشي ، كلنا نبي الرشاقة بس مب المبالغة بهالشي

[مــاي ورد]

انا كل سنة انزل 4 كيلو ههههههههههههههههههههههههههههههههههههههه

[مــاي ورد]

السبب في الدعايه الاربع ساعه وعشرين شغاله

مثل قناة فنون

كوجي ادفانص

كوجي ادفانص

كوجي ادفانص

بين الدعايه والدعايه دعايه

لين ينحفر في العقل الباطن

وفي اللاوعي ...


اهم شي ينحفر في العقل اللاواعي ان الشخص مستحيل يضعف فما راح يضعف نهائيا!! وبيروح يشتري من هالخرابيط

[قطريه22]

اشرب حلبه تفتح الشهيه بطريقه مش طبيعيه

بااااااااااااااااااااااال حق الريحه ريحتها قويه وتبط الراس
في كبسولات تنباع في الصيدليه اسمها زيت كبد الحوت حلوه فيتامينات وتفتح الشهيه

[توشيبا]

بااااااااااااااااااااااال حق الريحه ريحتها قويه وتبط الراس
في كبسولات تنباع في الصيدليه اسمها زيت كبد الحوت حلوه فيتامينات وتفتح الشهيه

هالحبوب سمعت عنها لها فرق ثلاثين فايده

بس علي ماعتقد اسمها حبوب زيت السمك بس حوت مادري وين صرفتها منه

[همر]

ومثل الانستغرام يا همر صار هوس بعيد الشر ، تنحفيف شد خواصر زنود ، كلام فاضي ، والحريم فيهم هوس مب طبيعي تجاه هالشي ، كلنا نبي الرشاقة بس مب المبالغة بهالشي



الرشاقه صراحه طريقها طويل ومتعب

الرشيقين خلقه في نعمه يحسدون عليها

واللي ضعفوا ضعفوا بمجهود مافي شي

يصير بين يوم وليله ... بس طبيعة بني ادم

يحب يجرب الاسهل والاسهل لين يقتنع

بضرورة الصعب ... غالباً بعد فوات الاوان ...

[R 7 A L]

وانتم ليش زعلانيين
خلوا الناس تستانس مثلكم وتنزل اوزانها بأي طريقة

[أم محمد 90]

بالعكس الحبوب وايد مفيدة انا قبل كنت استخدم حبوب مصرية وضعفتني وايد وايد

لكن التاجرات قصو ع العالم ووالحبوب ب 100 ريال يبيعونها ب 500 و 600


اي الحريم فيهم هوس رشاقة , في كل العالم سواء خليجية عربية اجنبية ,,

[أم محمد 90]

وانتم ليش زعلانيين
خلوا الناس تستانس مثلكم وتنزل اوزانها بأي طريقة

تحس ان بعض الردود منقهرين ع عملية قص المعدة

مادري من جيبهم الفلوس ولا من جيب اهلهم ؟؟؟؟؟؟؟

[قطريه22]

هالحبوب سمعت عنها لها فرق ثلاثين فايده

بس علي ماعتقد اسمها حبوب زيت السمك بس حوت مادري وين صرفتها منه

في حبوب زيت السمك

بس الي اقصده حبوب كبد الحوت بتلاقي اللزقه الي عليها بالاصفر

[همر]

اهم شي ينحفر في العقل اللاواعي ان الشخص مستحيل يضعف فما راح يضعف نهائيا!! وبيروح يشتري من هالخرابيط



معروف ان هالحبوب حلول مؤقته

للي بتضعف كم كيلو عشان تلبس فستان

معين في ليله معينه

للي بيستخدمها مع نظام رياضي وغذائي

مستمر


اما اللي تبلبع في هالحبوب وهي قاعده

على الكاوتش طول اليوم وتاكل دجاجه كامله

وتبي تنزل 50 كيلو عسى ماشر ؟!!


اسمها suppliments يعني مكملات


مش معدات حفر !!!

[ضوى]

معروف ان هالحبوب حلول مؤقته

للي بتضعف كم كيلو عشان تلبس فستان

معين في ليله معينه

للي بيستخدمها مع نظام رياضي وغذائي

مستمر


اما اللي تبلبع في هالحبوب وهي قاعده

على الكاوتش طول اليوم وتاكل دجاجه كامله

وتبي تنزل 50 كيلو عسى ماشر ؟!!


اسمها suppliments يعني مكملات


مش معدات حفر !!!


عجبني مصطلح معدات حفر

[دااانة قطر]

واللي تبي تزيد وزنها الثاابت من 15 سنه 54

[abu m7md]

الرشاقه غير وانقاص الوزن غير
ليس كل نحيف رشيق
الرشاقه تحتاج الى جهد قوي جدا للوصول اليه وليس الى حبوب لانها تُبنى الرشاقه على القوة والسرعه والتحمل ( يعني رياضه )
وليس حبوب تخسيس كما يعتقده البعض

عن نفسي مستعد ارتب لأي شخص جدول غذاىي مع تمارين خفيفه تنزله فالشهر 15 كيلو اذا استمر على التعليمات :)

مجرب على نفسي ولله الحمد

[R 7 A L]

تحس ان بعض الردود منقهرين ع عملية قص المعدة

مادري من جيبهم الفلوس ولا من جيب اهلهم ؟؟؟؟؟؟؟

لا مايبون العالم يضعفون نفسهم
يبون هم وبس والباقي خس

[الماريّة]

الحمدالله اني ما احب هالحبوب الغريبه

حبوب زياده وزن وحبوب تخسيس وحبوب شد وحبوب تبييض

كله حبوب شدعوة صاروا طيور ^_^

واما بخصوص فاكهه البرقوق مدري الرقروق ههه اول مره اسمع عنها وشكلها اسيويه

والي سوو قص المعده في بعضهم رد وزنهم وزاد مابه فايده


يالله عليكم العافية :)

[ضوى]

:)


لا مايبون العالم يضعفون نفسهم
يبون هم وبس والباقي خس

:)

[مهرة]

بذور الشيا + روب يوناني + شوفان عضوي + فراولة + كيوي + بينتس بتر (هوم ميد) + موزة + ستيفيا محلي وعلى البلندر

وهذا فطورنا لليوم وخذي صورة من جميع الزوايا واشوية اديت وبالعافية :nice:

[Qtr37]

حلوة الرشاقة:shy:

[كازانوفا]

بااااااااااااااااااااااال حق الريحه ريحتها قويه وتبط الراس
في كبسولات تنباع في الصيدليه اسمها زيت كبد الحوت حلوه فيتامينات وتفتح الشهيه


يختى احسن من الحبوب والبلاوي اتذكر اثنين اخوه من الحبوب صارو يغسلو كلى
واذا على الريحه في الحمدلله مي وصابون وشامبو ومعطرات لا تقفليها بوجهه خليه يمتن وبعدها نكون حققنا له امنيه حياته ههههههههههههه

[قطريه22]

يختى احسن من الحبوب والبلاوي اتذكر اثنين اخوه من الحبوب صارو يغسلو كلى
واذا على الريحه في الحمدلله مي وصابون وشامبو ومعطرات لا تقفليها بوجهه خليه يمتن وبعدها نكون حققنا له امنيه حياته ههههههههههههه

ماتعرفين عيل الحلبه مصيبه ريحتها تكون في الجسم طابعه لو تفركين تفرك بالصابون ماتروح

[فلتة زمانها]

ان شاءالله كل المتان يضعفون ويصيرون غزلان

[بوحارب]

بذور الشيا + روب يوناني + شوفان عضوي + فراولة + كيوي + بينتس بتر (هوم ميد) + موزة + ستيفيا محلي وعلى البلندر

وهذا فطورنا لليوم وخذي صورة من جميع الزوايا واشوية اديت وبالعافية :nice:
متأكدة هذا فطور !!!!

هذا شكله أدوات سحر وشعوذه

[يمامـة]

انا مسوي قص ومانزل وزني عن ال100 :)


أقل شي ينزل الواحد من 30 لين 40 كيلو..

والشحوب اللي يعانون منه بعض او لغالبية ممن سووا العملية

بسبب سوء التغذية بعد العملية ،،


فالأكل الزايد ما يعطي نضارة للجسم،،

بينما الأكل الصحي هو اللي يعطي هالنظارة،،

[يمامـة]

المهم اشجع على التخسيس او عمليات القص عند فشل المحاولات العديدة لخسارة الأزوان الزايدة،،

لكني ضد الحبوب والعسل والتمر وغيره ،، لأنه تأثيرهم يكون وقتي مجرد تركهم الجسم يرد
يكتسب وزونه وزود ..وفوقه تظهر اعراض جانبية تأثر على الصحة بسبب طول فترة تناولها.

[همر]

أقل شي ينزل الواحد من 30 لين 40 كيلو..

والشحوب اللي يعانون منه بعض او لغالبية ممن سووا العملية

بسبب سوء التغذية بعد العملية ،،


فالأكل الزايد ما يعطي نضارة للجسم،،

بينما الأكل الصحي هو اللي يعطي هالنظارة،،


نزلت 50 كيلو

كنت مدور صرت مستطيل :)

[تغلبية]

ومثل الانستغرام يا همر صار هوس بعيد الشر ، تنحفيف شد خواصر زنود ، كلام فاضي ، والحريم فيهم هوس مب طبيعي تجاه هالشي ، كلنا نبي الرشاقة بس مب المبالغة بهالشي



فضااااااااااااااااااااااااااااااااااااوة وانتي الصاجة

[Dana’1]

إي والله يازين الرشاقة رشاقة البدن ورشاقة النفس
هي يبغالها جهد وتنظيم نمط الحياة والغذاء
أما حبوب التخسيس ما افضلها بعد الواحد هبابه ياكل بعض العلاجات والفيتامينات بعد يزيدهن حبوب تخسيس.. بتلعب بالمعدة لعب
إحنا للأسف ثقافة الرياضة شبه معدومة عندنا
ادخلي اسباير وشوفي الي يلعبن وشوفي الاجانب كيف يجيبون اطفالهم الرضع والي ابو سنتين وثلاث ويمارسون انشطة رياضية
بعض الامهات جالسة تراقب الطفل وهو يلعب ويمارس نشاط حركي جماعي مع اطفالا بعمرة
يعني الي اقصدة إنها مو مثل الحضانه تحط الطفل وتروح تمارس الرياضة! لا متعنية لاجل تجيب هالطفل وتزع فيه حب الرياضة والحركة

إحنا الدوله وفرة لنا كل شي في هالمجال بالذات( الرياضي)
... بس محد محصلها ومستمتع بها الا الاجانب بالغالب

[Right]

بعض الحريم كأنها بطريق وحاطه على بويه ، وبقدرة قادر تبي تصير سمبتيك مرة وحدة



ما عندها مشكلة لو تشيل الطحال والكبد والبنكرياس والأثنى عشر



مقصب آلي مو حرمه ، وين لمزاني عنها :nice:

[يمامـة]

نزلت 50 كيلو

كنت مدور صرت مستطيل :)


يعني نزلت الحد اللي نقول
ما شاء الله تبارك الرحمن رقم ممتاز..

[النهار]

تحس ان بعض الردود منقهرين ع عملية قص المعدة

مادري من جيبهم الفلوس ولا من جيب اهلهم ؟؟؟؟؟؟؟

سبحان الله النصيحه في هالزمن اصبحت مسبه لاحول ولاقوة الا بالله

[نورالهدى]

الرشاقه غير وانقاص الوزن غير
ليس كل نحيف رشيق
الرشاقه تحتاج الى جهد قوي جدا للوصول اليه وليس الى حبوب لانها تُبنى الرشاقه على القوة والسرعه والتحمل ( يعني رياضه )
وليس حبوب تخسيس كما يعتقده البعض

عن نفسي مستعد ارتب لأي شخص جدول غذاىي مع تمارين خفيفه تنزله فالشهر 15 كيلو اذا استمر على التعليمات :)

مجرب على نفسي ولله الحمد

أنا معاك مستعده للإلتزام 10 كيلو راضيه

[شاهين]

اللي مايصدقني انه الحريم يحبون الاكل
يشوف يمعة حريم في مطعم وينتبه لطلباتهم
صحن الوحده لو انا وبوحارب ومعانا الجيلو مانخلص الصحن
واول مايطلبون ويوصل الطلب كل وحده طلعت الجوال من شنطتها وصور طرش على الانستغرام والواتس اب
تخلص التصوير تحذف الجوال في الشنطه وهاته هاته بالخمس
اي روج اي بطيخ يطير
واللي يقهر تشرب دايت تخاف المسكينه من السمنه
برميل دايت مايحرق اللي كلتيه ههههههههههههه

[ضوى]

اللي مايصدقني انه الحريم يحبون الاكل
يشوف يمعة حريم في مطعم وينتبه لطلباتهم
صحن الوحده لو انا وبوحارب ومعانا الجيلو مانخلص الصحن
واول مايطلبون ويوصل الطلب كل وحده طلعت الجوال من شنطتها وصور طرش على الانستغرام والواتس اب
تخلص التصوير تحذف الجوال في الشنطه وهاته هاته بالخمس
اي روج اي بطيخ يطير
واللي يقهر تشرب دايت تخاف المسكينه من السمنه
برميل دايت مايحرق اللي كلتيه ههههههههههههه

:rolleyes2:

[يمامـة]

:rolleyes2:

يحق لج ،، خاصة مع التفاصيل اللي ذكرها ..


المووهوم نرجع لصلب الموضوع ..

من الطبيعي الوحدة لو مثلا خست وضعفت وترهل جسمها تلجأ الى عمليات تصحيح الخلل الحاصل في جسدها
فما يصير الوحدة مزلا عقب ما تخسر 30 كيلو تقعد تشل معاها كيس جلد في بطنها او ظهرها او زنودها!!

فثل هالحالات تحتاج الى ترميم بعد التخسيس اذا سوت رياضة او سوت رياضة او ما نفع،،

يقول لي ولدي يمة رفيجي سوى تكميم مع انه يتمرن ومعضل الحين الا انه عنده جلد امطه بطول نص ذراع او اطول
صوب بطنه..

فمثل هالحالة تحتاج الى مشرط طبيب التجميل،،


لكن

ان الوحدة تروح تغير من شكل جسدها بحيث تضيف له علامات انثوية متكاملة
وتكبر اهنيه وتصغر هناك وتنفخ شي وتفشش شي ثاني..

هذا هو اللي المفروض نرفضه، ونوقف ذده
فعمليات تجميل الأنف والحواجب والجفون وتكبير مناطق معينة وشفط
من اماكن اخرى لبروز مناطق اخرى هالشي اعتقد بدأ يزيد من غير حساب لرأي الشرع فيه !!

[الدمعه]

العتب مو عالحريم اللي يبون الرشاقه والضعف ،،، العتب على الرياييل اللي يبون باربي قطريه ،،،