وقود والدفاع المدني !!!!!

[Rider]

بعد انفجار محطة البترول أتخذت ادارة الدفاع المدني اجراءات بمنع استخدام الغاز في المطاعم واستبدالها افران الكهرباء وفي هذا الاثناء اختفت في ضروف غامضة سلندرات الغاز الشفافه من محطات وقود ومن المحلات التي تبيع هذه السلندرات والله ياخون تعبت امس وانا ابحث عن سلندر للغاز في اكثر من محل الي يقول من يوميين السيارة ماجات والي يقول مافيه احس اني نذليت من قبل الهنود مادري الدفاع المدني هل سوف تمنعون الغاز من البيوت وياوقود وين ردكم الناس تكلموا في وطني صباح الخير والجرائد والمنتديات وانتوا خبر خير بس الظاهر ماتفهمون عربي لانه اكثر الموظفين اجانب في شركات البترول والغاز هل يعقل اكبر غاز موجود عندنا ومافيه سلندرات تكفي الموطنيين ترى ندري الاجانب مب محتاجين السلندر ساكنيين في مجمعات سكنيه وعندهم افران كهرباء يعني لازم القطري ينذل في بلاده في كل مكان يروح ترى عيب والله اكتب من القهر الي فيني حتى ياجماعه امس حلمان اني شاري فرن كهرباء شوفوا لين وين وصلنا قمنا نحلم في بلادنا الشعب يبغي سلندرات غاز وشكرا:mad:

[BIG-VEGA]

سبحان الله
شكلك كنت تدور في الشوارع امس معاي

والله انا امس مشطت منطقه المعموره وبوهامور وخط سلوى والعزيزيه ولا حصلت

جد شي يقهر

اهني المسؤول العبقري الي نزل القرار بدول وضع بدائل

[ولد العرب]

نفس الكلام الاسبوع اللي طاف مسحت الخيسه الخريطيات ازغوى لمدةاربع ايام

[بوخالد911]

هلا بكم

السيارات اللي تبيع سلندرات الغاز لما تبييها ما تحصلها

ولما ما تبييها بتشوف السيارة تمر جدام بيتك !!!!

صج قهرررررررررررررررررر

[حسن]

اعتبره قرار متسرع وخاطى

لماذا تمنع السلندرات الخاصه في محطات الوقود
والتابعه لهم

نتمنى نسمع رد من السبيعي مديرهم

[@north_star@]

والله هذي وهقة اللي يخلص عنده الغاز ويلف الكرة الارضية وما يحصل سلندر غاز ونتمنى من المسؤولين توفير الغاز في أسرع وقت

[الزعفراني]

رحلة البحث عن سلندر وقود شفاف :rolleyes2:

يقولون مافي الا في الصناعية .. في مكان التوزيع الخاص بوقود ..

عاد وين في الصناعية اللي عنده خبر ينورنا .. لان شكلي بعد كم يوم محتاج ابدأ رحلة بحث عن سلندر غاز وقود الشفاف

محتاجين ( شفافية ) من الشركة في الرد على استفسارات الناس

[ولد شرق]

وقود من الشركات اللي ماشية على البركة
يجب تمشيط هذه الشركة واسناد المهام للكفاءات التي تولي اهتماما واضحا بالأمن والسلامة
وبعد تغيير المدير العام واسناد المهمه للسيد ابراهيم جهام الكواري انني على يقين تام بأن الامور سوف تسير للأفضل وهذا ليس انتقاصا من قدر المدير السابق
لكن ارى ان شركة وقود فيها الكثير من المشاكل خصوصا ادارة المشاريع

نسأل الله ان يوفقهم لما فيه الخير

[عابر سبيل]

فعلا..القرار يبدوا انه ارتجالي...
او بالعامي (ترقيعي)...

و الوضع على ما هو..

يجب ان تتدخل بحزم و سرعة..\وزارة الاقتصاد و التجارة..
ممثلة في قسم (حماية المستهلك)..
و تجبر وقود على توفير الغاز..
كون انها المزود المعتمد و (المحتكر) لهذه السلعة الاستهلاكية الأساسية!!

بأن تزود نقاط التوزيع الاخرى..
كالمجمعات الكبرى و البقالات و السوبرماكت
اللي خارج محطات البترول..
بكامل الكميات اللي كانت توزع في الدولة ..
و حتى اللي عن طريق نقاط لتوزيع الملغية (محطات البترول)!!

بل و ان امكن..ان تفوم وقود بنفسها ..
بتوفير نقاط بيع آمنة (و مؤقتة) في اماكن متفرقة
عبر الدولة.. لحين وضع حل جذري لهذه المشكلة

[حسن]

وقود من الشركات اللي ماشية على البركة
يجب تمشيط هذه الشركة واسناد المهام للكفاءات التي تولي اهتماما واضحا بالأمن والسلامة
وبعد تغيير المدير العام واسناد المهمه للسيد ابراهيم جهام الكواري انني على يقين تام بأن الامور سوف تسير للأفضل وهذا ليس انتقاصا من قدر المدير السابق
لكن ارى ان شركة وقود فيها الكثير من المشاكل خصوصا ادارة المشاريع

نسأل الله ان يوفقهم لما فيه الخير


:omg:

المدير العام تغير

متى وليش وشحقى

زين المدير الجديد خله يلغى قرار المدير السابق

ويكون فيه خير للبلاد والعباد

:victory:

[حسن]

المفروض وقود تقوم بالغاء خزانات البترول اللي في المحطات لانها
خطره وتدمر بلد

المفروض لجنه المواصفات والمقاييس يصدرون قرار
بمنع السيارات البتروليه في البلاد
ويجيبون سيارات على الطاقه الشمسيه ولا على البطاريات
لان السيارات فيها خزانات وهذه كنها قنابل موقوته واخرها
الحادث التصادم

المفروض السيارات تسبب حوادث فيجب اصدار قرار بمنع جميع السيارات
وعوده الحمار والمطيه والخيل
لدورهم في خدمه المجتمع

يجب من الكهرباء لانها طاقه خطره وتقتل الناس فلازم
نصدر قرار بقطع التيار الكهربائي عن البلد كلها
وعوده الفنر والسراج والجوله للخدمه واحياء تراثنا المجيد

واخيرا نستمع الى اللكلمات الجميله واللحن المميز

ابجي على البمبره وابجي على التينه

:weeping:

[حياة]

انا من اسبوعين محتاسه عندي ثلاث شفاف وثنين عادي والشفاف ماخلينا مكان
مافيه وكله نعبي العادي..
ويقولون للسايق خلاص بيتكنسل الشفاف والحل يعني شارينه الواحد450
والحين بيغيرونه .... وال450 اللي اندفعت للاسطوانه الوحده راحت بلوشي
القرارات من تخبط في تخبط وحنا اللي ندفع ونخسر ع القرارات الفاشله

[Rider]

زين شنو ذنب الناس الحين شلون يطبخون على حطب شكلي بفك نفسي وبشتري فرن كهرب

[سعادة الوزير]

لا حول ولا قوة الا بالله ، يا اخوان احنا مانبي معجزات ولا نبي شي صعب تحقيقه! ، كل الي نبيه سلندر غاز عشان نأكل عيالنا بس!!

تكفون يا حكومة ، تكفى يا رئيس مجلس الوزراء ، شوف لنا حل مع هالقوانين المتخبطة ، الي عشان دكان واحد انفجر رحنا بهدلنا شعب كامل!! ، ترى السالفة والله ماتسوى! ، معقولة انا صارلي 3 ايام مب لاقي سلندر غاز والحين ام العيال متصلة لي تقول جيب لنا غدا من المطعم!! ،،، اتقوا الله فينا!!!

[Rider]

شفت ياخوي سعادة الوزير نذلينا علشان سلندر غاز لا وراعي الدكان يقولي دخل هند ماجي سيم سيم هذي مشكلة

[مرتبش]

اليوم في الجرايد وقود تحظر استعمال الغاز في مطاعم المجمعات.!

الحين صارت محطات البترول + المجمعات بدون غاز.. الله اعلم بيوقفون لهذا الحد او المنع مستمر الى ان يطال البيوت

[@north_star@]

ولا زال البحث جاري عن عبوات غاز شفاف وبانتظار تعليق المسؤولين عن فقدان مادة استهلاكية أساسية

[الحرف العنيد]

http://www.woqod.com.qa/net/arb/busi...fstores_a.aspx

[Rider]

الحمد الله بفضل الله عز وجل لقيت امس سلندر وتحس الهندي كان متردد يعطيني الظاهر الهنود بيرفعون سعره وبيخشونه عندهم واذا بيغيت سلندر لازم تكلم الهندي تالي الليل وتجي تهرب السلندر اخر الليل
وقود وبعدين معاكم لا تعليق على الموضوع والناس حايسه ياتوفرون السلندرات يا نحذفها في وجيهكم بروح اشتري حطب ونطبخ عليه ابرك

[همر]

http://www.woqod.com.qa/net/arb/busi...fstores_a.aspx


حتى الموقع مايشتغل

خوش شركه...

[Rider]

حتى الموقع مايشتغل

خوش شركه...


يارجال ممكن تدخل على الموقع من قوقل بس مافيه فايده حاطين المحلات الي فيها السلندرات بس ماعندهم الا سلندرات فاضيه !!!!!

[@north_star@]

حتى الموقع مايشتغل

خوش شركه...


يقولك صيانه مافي قطع غيار

[همر]

يارجال ممكن تدخل على الموقع من قوقل بس مافيه فايده حاطين المحلات الي فيها السلندرات بس ماعندهم الا سلندرات فاضيه !!!!!



خل يردون على تلفونهم اللي رازينه على الصناديق الفاضيه اول !!!


يبيله غاز من الحسا ...

[همر]

يقولك صيانه مافي قطع غيار


معذورين مساكين خصوصاً ان ارباحهم العام بعد تعبانه

بس مليار وربع

[Rider]

خل ينفعونهم الهنود واذا رد عليك واحد مايعرف تكلم عربي

[@north_star@]

ولا زال مصير أماكن توزيع الغاز الشفاف مجهول

[Rider]

ولا زال مصير أماكن توزيع الغاز الشفاف مجهول

لا مجهول ولا شي اخوي الى اهل الدكاكيين سوا سوق سوداء للبيع غير الي يخشونه حق ربعهم واذا جاء قطري وتفأجا انه في غاز قاله الهندي بس سلندر واحد تاخذ بقرار من اخذ واحد وانا عندي اكثر من سلندر

[@north_star@]

لا مجهول ولا شي اخوي الى اهل الدكاكيين سوا سوق سوداء للبيع غير الي يخشونه حق ربعهم واذا جاء قطري وتفأجا انه في غاز قاله الهندي بس سلندر واحد تاخذ بقرار من اخذ واحد وانا عندي اكثر من سلندر

نتمنى يكون في رقابة وتفتيش على كافه محال التوزيع

[المرحب]

بشرونا يا جماعة إن شاء الله حصلتوا غااااز ؟؟؟؟

[حسن]

عليكم بالحطب ترا طباخه احلى

ياامه ضحكه سندرات الغاز الشفاف منها

عاد هذه حاله ولا علشان خطا نمنع العالم كلها

اذا على الغاز يهون

لكن لو انفجر البترول في المحطات وش تسون

شي يضحك

:)

[@north_star@]

بشرونا يا جماعة إن شاء الله حصلتوا غااااز ؟؟؟؟

انا الى الان اشوف اغلب المحلات الكبيرة الي كانوا حاطين الغاز الشفاف مال وقود ما عندهم غاز

[Rider]

امس والله ياجماعه وانا طالع من الدوام رحت صوب اللقطة الا شفت في الشارع الثاني سيارة وقود شايله سلندرات والله اني بغيت اركب الرصيف والحقه صادرتنا حالة يذكرون انه الوكرة فيها سلندرات متوفره

[حسن]

امس والله ياجماعه وانا طالع من الدوام رحت صوب اللقطة الا شفت في الشارع الثاني سيارة وقود شايله سلندرات والله اني بغيت اركب الرصيف والحقه صادرتنا حالة يذكرون انه الوكرة فيها سلندرات متوفره

شوف المحلات اللي على الشارع في دخان يمكن تلقى
ولا محل في ابو ظلوف في الشمال

بتحصل اكيد

[أسد الجزيرة]

حصلت مكانين في مدينة خليفة الشمالية صوب المركز الصحي عنده و صوب مخابز الغرافة بعد عنده

[Rider]

صار الواحد ماعاد عنده شغل الي شايل هالسلندر ويحوم فيه يعني تقدم اجازة عارضة من الشغل علشان دور سلندر

[باراكودا]

عدم توفر الاسطوانة الشفافة شىء يدعو للدهشة والاستغراب لين متى يلين راس صاحب القرار الذي لايشعر بالمعاناة في البحث

[همر]

عليكم بالحطب ترا طباخه احلى

ياامه ضحكه سندرات الغاز الشفاف منها

عاد هذه حاله ولا علشان خطا نمنع العالم كلها

اذا على الغاز يهون

لكن لو انفجر البترول في المحطات وش تسون

شي يضحك

:)



بيمنعون محطات البترول تبيع بترول :)

عقب شغل النيسان على حطب :waiting:

[حسن]

بيمنعون محطات البترول تبيع بترول :)

عقب شغل النيسان على حطب :waiting:




مافي الى نشتغل على الطاقه الشمسيه

ياهمر

لك خاطر في هامور على حطب وقريب مهب هناك

:victory:

[همر]

مافي الى نشتغل على الطاقه الشمسيه

ياهمر

لك خاطر في هامور على حطب وقريب مهب هناك

:victory:



الهامور الميت ولا غيره ؟!! :rolleyes2:

[ANONYMOUS]

الحين ش المنقرض

عبوة غاز جديده تشتريها

ولا اعادة التعبئه

[ANONYMOUS]

في وقت ورقم قياسي..

رحت بدلت العبوه الشفافه الفاضيه ب مليانه والحمد لله سهالات ..

خرعتونا ع الفاضي

[ahmed1111]

انزين اخذوا كهربه ... ليش مكبرين الموضوع

[Rider]

الحمد الله موضوعنا جاء بفائدة سلندرات الغاز الشفاف متوفره وايضا رجعوها في محطات وقود

[باراكودا]

الحمد الله موضوعنا جاء بفائدة سلندرات الغاز الشفاف متوفره وايضا رجعوها في محطات وقود

الحمدلله يستاهل التحية والتقدير والاحترام كل مسئول يسهل الامور للمواطنيين ويعمل على راحتهم الحين باقي ارجاع العمل بالغاز للمطاعم خارج
محطات البترول أصبحنا لانستمتع بالطعام في المطاعم مثل قبل .