المصرف والنزول الذي كان متوقع او الانهيار

[متوهق في البورصة]

السلام عليكم ياشباب وشابات

هل لاحظتوا المصرف اليوم؟

يعني ماشا الله , مع ان الكل توقع انه ينزل نزول قوي علشان اسهم الاكتتاب اللي انزلت لكنه كان ثابت وبقوة , ومادري شنو السبب

لكن في اعتقادي ان معظم اللي اكتتبوا (واخوكم اللي هو انا منهم) ماكان ايهمهم الربح كثر ماكان ايهمهم تعديل متوسط السعر لان معظمنا متعلق:eek3: :eek3: :eek3: :eek3: :eek3: :eek3:
فيقول اصبر اشوي على السهم علشان اقدر افتك منه بسرعة بعد وافك التعليقة , مع ان الربح حلو , احنا شريناه على سبعين ريال واليوم اعلى سعر 131 وادنى كان تقريبا 128


وشرايكم؟؟؟

[قناص قطر]

سهم قوي ان شاء الله

[أبوتركي]

أخوي متوهق..... سؤال: لو كان عندك فلوس اليوم بتشتري 128 أو 130 ؟
اذا جوابك نعم فلا تبيع.........
أنا عني ما أقدر أبيع الا فوق ال 152 لأن هاي متوسط السعر عندي بعد الأكتتاب

[متوهق في البورصة]

أخوي متوهق..... سؤال: لو كان عندك فلوس اليوم بتشتري 128 أو 130 ؟
اذا جوابك نعم فلا تبيع.........
أنا عني ما أقدر أبيع الا فوق ال 152 لأن هاي متوسط السعر عندي بعد الأكتتاب

لو كان عندي فلوس بصراحة يمكن شريته هو او شريت في اي سهم ثاني

وبعدين ياخوي انا مثلك , ماني قادر ابيع الا اذا وصل فوق ال...... ( ولا خلاص ماراح اقول لك لاني ان قلت لك راح تتحطم ويمكن تطلب مني رقم حسابي في البنك علشان اتحول لي فلوس عليه !!!! راح اكسر خاطرك عدل)

لكن الله كريم ان شا الله , والصبر زين

[المستثمر22]

الله يرزق ملاك السهم

لكن اسهم الاكتتاب اليوم اضيفت

وفى ناس كثير مايدرون السهم والله العالم انه راح يلامس ال100 ريال

لحاجه البعض و بسبب اسمنت الخليج

راى متواضع يحتمل الخطأ

وجزاكم الله خير

[حمد911]

الله يرزق ملاك السهم

لكن اسهم الاكتتاب اليوم اضيفت

وفى ناس كثير مايدرون السهم والله العالم انه راح يلامس ال100 ريال

لحاجه البعض و بسبب اسمنت الخليج

راى متواضع يحتمل الخطأ

وجزاكم الله خير
صعبة جدا ان يلامس ل 100 ريال لسبب بسيط احسب كم بيكون مكرر ربح السهم ولاتنسى ان فية ناس وايد ينتظرون السهم 120

[مقيم]

صعبة جدا ان يلامس ل 100 ريال لسبب بسيط احسب كم بيكون مكرر ربح السهم ولاتنسى ان فية ناس وايد ينتظرون السهم 120
انا اؤيدك اخي حمد ... كثيرون ينتظرون السهم عند 120

[المستثمر22]

انا معاكم بكل اللى تقولونه اخوى حمد واخوى مقيم

وفعلا اسعار السهم حاليا جيده جدا للشراء

ولا تستغربون انه يلامس ال100

لان سوقنا الشركات الربحانه فيه منسيه والخسرانه لمت اب واقرب مثال المخازن

والعقاريه ربحانه وكل يوم السعر فى تراجع بعدين اكيد راح يصير بيع كثيف على السهم

لانه يعتبر طالع على الملاك بلاش بعد الاكتتاب وتوجيه السيوله لريان والاسمنت لانه بحسبه

بسيطه ممكن يصيدونهم بأ سعار راح اتدوبل خلال مرتين ثلاث خلال شهرين ثلاثه

والافضل لللى يبى يشترى المصرف هو الشراء على دفعات

والله اعلم

وجزاكم الله خير

[الصيـاد]

اعتقد اللي حاصل بالمصرف هو رفع السعر مع تصريف اسهم الاكتتاب ( احد طرق التموية)

لانة الربح الحاصل 60 ريال قبل ما يهوي السهم ل 100

[خسران ومتوهق]

اعتقد اللي حاصل بالمصرف هو رفع السعر مع تصريف اسهم الاكتتاب ( احد طرق التموية)

لانة الربح الحاصل 60 ريال قبل ما يهوي السهم ل 100
100 ريال مرة وحدة حرام عليك السهم مرغوب وجيد لو ينزل لين ل 100 بشتري فية وبقوة بس استبعد هاذا الشي مثل ماذكرو الاخوان مقيم وحمد911

[الزاجل]

اعتقد اللي حاصل بالمصرف هو رفع السعر مع تصريف اسهم الاكتتاب ( احد طرق التموية)

لانة الربح الحاصل 60 ريال قبل ما يهوي السهم ل 100

اتفق معاك.. اللي احسه انه اللي حاصل في المصرف طريقة ذكية لتصريف
اسهم الاكتتاب من ناس لهم وزنهم .. يدعمون السهم بطلبات تقدر ب 5000 سهم
ومن ثم يصرفون اسهم الاكتتاب على 130 وقريب منه ..

مع انني اتمنى حصول المصرف على 100 ريال
الا انني اقول ليس كل ما يتمناه المرء يدركه تجري الرياح بما لا تشتهي السفن

فالمصرف سهم قوي .. ومااعتقد انه ممكن يوصل 100 ريال
لكن خلونا نتابع امانينا انشوف وين بتوصلنا ..

[Abu Omar]

هذا الاسبوع سيكون حاسم في هبوط او ارتفاع المصرف
فعلى الجميع المراقبه في هذا الاسبوع

[ahmed_alshiba]

هل هذا سبب استقرار سعر المصرف الاسلامي؟

--------------------------------------------------------------------------------

هل هذا سبب استقرار سعر المصرف الاسلامي

مع اعلان موعد الاكتتاب في اسهم الزيادة بسعر 120 ريال كان السعر مستقر على متوسط 180 ريال انخفض السعر الى متوسط 130 ريال ومع تغيير سعر الاكتتاب الى 70 ريال ارتفع السهم الى متوسط السهم 160 ريال ثم عاد الى المتوسط السابق 130 ريال وهذا يعني ان المضاربين في الاسهم اخذوا حقهم مقدما" ولن يبيعوا السهم تحت 130 ريال ومن باع اعتقد انه سوف يبيع بخسارة مالم يكن مستثمر طويل المدى اشترى اسهمه قبل فترة طويلة بسعر اقل من الاسعار الحالية والله اعلم
مع تمنياتي للجميع بالخير الوفير

العفو منك

[bu shhab]

صعب انه يوصل لــ 100 ريال

129 اشتريت و انطر اخر شرى عليه الاسبوع هذا او بالكثير اول الاسبوع الجاي

وبعدها على حسب تقديري صعب حد يحصله اقل من 130 ممكن ينزل هذه الايام

بشكل طفيف،،،

يعطيك العافيه

[رهيب]

يا اخوان ليش التخويف ؟ ترى هذا ما يخدم الا الهوامير ...
المصرف ارباحه تشغيلية و ممتازة و التجميع عليه على قدم و ساق و قريبا ان شاء الله يكون ال 130 مع كان و اخواتها ... ارجوا من الاخوان عدم ترديد "اسهم الاكتتاب و اسهم الاكتتاب" ترى الاكتتاب كان 20% فقط يعني ماله تأثير كبير و الي بغى يبيع باع و خلص

و سلامتكم

[أبوتركي]

المصرف سيكون السهم الذهبي بنهاية العام .... فنصيحة لا تفرطون فيه بالبيع الا اذا مضطر.... واللي عنده كاش .... يشتري هالأيام