لماذا يسمح للنساء بدخول اماكن العائلات ؟؟

[غير البشر]

السلام عليكم ورحمة الله وركاته

بخصوص دخول النساء الى اماكن العائلات في كثير من الاماكن

سبب طرحي للموضوع ليس نقدا لجميع النساء او مجرد موضوع ضد النساء
ولكن لأبداء الرأي حوله


بعض الاماكن تحدد ان هاليوم للعائلات والنساء
ولكن في بعض الاماكن يقول لك اماكن للعائلات
ولكن يسمح بدخول النساء

يكون الريال قاعد مع زوجته او معاهم عيالهم
والطاولات المحاوطته كلها نساء
حتى الرجل يكون محرج وماياخذ راحته
يتقيد حتى مايقدر يرفع راسه
عشان مايشوف او ان يحاول يغض البصر


والمشكله الثانيه ان يكون في المكان الاخر مكان مخصص للنساء وفاضي
ويفضلون بعض النساء الجلوس في الاماكن المخصصه للعائلات
ويحرمون بعض العائلات من الحصول على طاوله

بما ان يوجد مكان مخصص للنساء ليس مايروحون ويقعدون فيه
بالعكس حتى هم ياخذون راحتهم اكثر
والطرف الثاني ياخذ راحته اكثر

في سنه 2011 نزلت موضوع بهذا الخصوص
عن مكان معين وموقف معين


اتمنى قبل الرد ان تفتحون هذا الرابط

http://www.qatarshares.com/vb/showthread.php?463735-%D8%E1%C8%CA-%E3%E4-%E3%CF%ED%D1-%C7%E1%DF%E6%DD%ED-%C7%E4%ED-%C7%DE%DA%CF-%DD%ED-%C7%E1%E3%DF%C7%E4-%C7%E1%E3%CE%D5%D5-%E1%E1%E4%D3%C7%C1-%E1%ED%D4-%ED%D1%DD%D6


لكن الان
حبيت اعرض لك الموضوع نشوف اراء الاعضاء والعضوات
بخصوص هذا الموضوع من مؤيدين ومعارضين مع ذكر الاسباب


وارجو المشاركه بعيدا عن الشخصنه لأي عضو بكل حياديه
يعني بدون هجوم الرجال على النساء او العكس


لتعم الفائده


مع خالص شكري

[ولي العهد]

اتفق معاك وهذي الظاهرة متواجده وبكثره وللاسف احيانا يسببون لك نوع من الاحراج بسبة بعض التصرفات الي تطلع منهم سواء من ضحك بصوت عالي او بلبسهم الي اعتبرة غير اخلاقي

[R 7 A L]

الاماكن ضيقة
زين انهم خصصوا مكانين منفصلين
الاول للعموم
والثاني للعائلات
وصعب يخصصون اماكن جديدة للنساء بتشغل حيز كبير من الاماكن

تخيل
كل الاماكن للعموم

[همر]

حريه غير محدودة الكيلومترات !

ضمان ممدد للجلوس في قسم العام او العائلات

او النساء ...

خدمات مابعد البيع ...


كل هذا ويطالبون بالمساواه !


صرنا احنا اللي نطالب بالمساواه ...

[حمد 2002]

خلنا نحلل الموضوع شوي مم من ناحيه قانونيه الموضوع يأخذ شقين :-

مدامه مكتوب للعائلات فقط

فالمفروض الي يدخلون الحديقه العائلات فقط only for family ، ولكن

يمكن يكونوا هالنساء من افراد العائله الواحده يعني ام مع بناتها او مجموعه خوات وبنات عم وخال وهكذا ،


الخلاصه ورأي الشخصي

بأن تنظيم وإداره الحدايق هنا بقطر غير منظم ، يعني هم يحطون لهم سيكيروتي مع احترامي لهم وراتبه مايتعدى 1000 ، هو شبيقدر عليه وبعدين مب من صلاحيته ياخذ البطاقه الشخصيه للداخل والخارج من الحديقه وو الى آخره .

فأنا اجوف الوضع الحالي بان النساء يدخلون بروحهم عادي اجوف مافيها شيء وكذلك لو اب يدخل مع اولاده اجوف بعد مافيها شيء .. والحمد لله ان الدنيا للحين بخير ..

مع فائق تحياتي ..

[غير البشر]

اتفق معاك وهذي الظاهرة متواجده وبكثره وللاسف احيانا يسببون لك نوع من الاحراج بسبة بعض التصرفات الي تطلع منهم سواء من ضحك بصوت عالي او بلبسهم الي اعتبرة غير اخلاقي


اي والله بصراحه احراج
الواحد وهو قاعد مع هله يحط وعينه بس على الطاوله
مايقدر يلتفت يمين او يسار

ومرات تحصل جنب هذا المكان مكان مخصص للنساء
وفاضي او شبه فاضي

[غير البشر]

الاماكن ضيقة
زين انهم خصصوا مكانين منفصلين
الاول للعموم
والثاني للعائلات
وصعب يخصصون اماكن جديدة للنساء بتشغل حيز كبير من الاماكن

تخيل
كل الاماكن للعموم



اخوي رحال
افتح الرابط الي انا حاطه في الموضوع
ووعطني رايك
وغيره في اماكن كثيره بنفس الطريقه

[حمد 2002]

سؤال فرعي وماله علاقه بالموضوع او يمكن له علاقه شوي ..

هل انت اتروح الحدايق مع هلك بالفعل وصادفك هالموقف وخجلت = استحيت ، ولا نزلت هالموضوع انتقاما من النساء فقط ؟

[غير البشر]

حريه غير محدودة الكيلومترات !

ضمان ممدد للجلوس في قسم العام او العائلات

او النساء ...

خدمات مابعد البيع ...


كل هذا ويطالبون بالمساواه !


صرنا احنا اللي نطالب بالمساواه ...




صح همر ضمان الدخول لقسم العوام والعائلات
خلنا نطالب احنا بالمساواه يمكن يكون لنا نصيب في بعضه :rolleyes2:

[غير البشر]

سؤال فرعي وماله علاقه بالموضوع او يمكن له علاقه شوي ..

هل انت اتروح الحدايق مع هلك بالفعل وصادفك هالموقف وخجلت = استحيت ، ولا نزلت هالموضوع انتقاما من النساء فقط ؟



حمد ارجع لموضوعي وافتح الرابط الموجود
بتعرف كلشي
موضوع خفيف وشيق اتمنى تتطلع عليه وتعطيني رايك

[قطريه22]

صح كلام حمد2002 ،
اذا مخصصين مكان للعائلات وثاني عام في حريم يتغطون ومايبون يقعدون في المكان العام مافيها شي اذا قعدو في مكان العائلات

[R 7 A L]

اخوي رحال
افتح الرابط الي انا حاطه في الموضوع
ووعطني رايك
وغيره في اماكن كثيره بنفس الطريقه

فتحت الرابط وحصلت اسامي ونكات قديمة :weeping:



نرجع للموضوع
فعلاً الوضع صار مايطاق
تصدق حتى في الاماكن الشبابيــة البحته مسوين زحمة :rolleyes2:

[قطريه22]

اما بالنسبة لكلامك عن المكان المخصص للحريم ومحد يقعد فيه فصحيح كلامك
وايد الاحظ هالشيء يقعدون في المكان المخصص لعائلات والمكان المخصص للنساء يخلونه

تهقى ليش؟؟

[غير البشر]

صح كلام حمد2002 ،
اذا مخصصين مكان للعائلات وثاني عام في حريم يتغطون ومايبون يقعدون في المكان العام مافيها شي اذا قعدو في مكان العائلات



انزين قطريه واذا في بنفس اماكن للنساء وفاضيه
اشرايج وين الافضل يقعدون
مكان النساء او العائلات ؟؟

[قطريه22]

فتحت الرابط وحصلت اسامي ونكات قديمة :weeping:



نرجع للموضوع
فعلاً الوضع صار مايطاق
تصدق حتى في الاماكن الشبابيــة البحته مسوين زحمة :rolleyes2:

مكان شبابي بحت :con2: تقصد خياط الرياييل الي يفصل صراويل ؟
اي وبعد الكراجات ، والمكان الي يحفصون فيه اقصد الحلبه.

وين بعد :con2:

[غير البشر]

اما بالنسبة لكلامك عن المكان المخصص للحريم ومحد يقعد فيه فصحيح كلامك
وايد الاحظ هالشيء يقعدون في المكان المخصص لعائلات والمكان المخصص للنساء يخلونه

تهقى ليش؟؟



هذا الي ابي اعرف ليش

والله اني ماقلته من فراغ او سمعت او حد قال لي

انا شفته وجربته وعايشته في كذا مكان

ليش

[قطريه22]

انزين قطريه واذا في بنفس اماكن للنساء وفاضيه
اشرايج وين الافضل يقعدون
مكان النساء او العائلات ؟؟

اكيد مكان النساء افضل
بس تدري الغلط مب منهم الغلط من الي في المطعم ليش يوم يشوفونهم مايقولون لهم في مكان مخصص للنساء ويودونهم غصب واذا ارفضو يقولون مانقدر ندخلكم مكان العائلات..

[غير البشر]

فتحت الرابط وحصلت اسامي ونكات قديمة :weeping:



نرجع للموضوع
فعلاً الوضع صار مايطاق
تصدق حتى في الاماكن الشبابيــة البحته مسوين زحمة :rolleyes2:



هههههههه زين من فوائد الموضوع يا الغالي ذكرناك ببعض الاعضاء الله يذكرهم بالخير

صح في الاماكن الشبابيه مسووين زحمه وتكلمنا قبل في هالموضوع
بس ليش اماكن العائلات
وفيه اماكن للنساء بجنبه
ولا يقعدون فيها
وكثير عائلات ترجع وماتحصل لها اماكن
ومكان النساء فاضي مايقدرون يدخلونه

[قطريه22]

هذا الي ابي اعرف ليش

والله اني ماقلته من فراغ او سمعت او حد قال لي

انا شفته وجربته وعايشته في كذا مكان

ليش


يمكن يبون ينكدون على الريال وهله ههههههههههههه

[R 7 A L]

مكان شبابي بحت :con2: تقصد خياط الرياييل الي يفصل صراويل ؟
اي وبعد الكراجات ، والمكان الي يحفصون فيه اقصد الحلبه.

وين بعد :con2:




وبعد محلات الكرك الي اكثر الشباب يصفون عندها يسولفون ويكركون لوقت طويل

[غير البشر]

اكيد مكان النساء افضل
بس تدري الغلط مب منهم الغلط من الي في المطعم ليش يوم يشوفونهم مايقولون لهم في مكان مخصص للنساء ويودونهم غصب واذا ارفضو يقولون مانقدر ندخلكم مكان العائلات..



انا تكلمت معاهم وطحت فيهم ماسكت
ولو شفتي بدايه موضوعي
اني طلبت منه اقعد بمكان النساء ورفض
وفعلا انا طلبت منه كتنبيه ورفضي للشي الي صاير

ولكن الموضوع تكرر وفي اكثر من مكان

[غير البشر]

مكان شبابي بحت :con2: تقصد خياط الرياييل الي يفصل صراويل ؟
اي وبعد الكراجات ، والمكان الي يحفصون فيه اقصد الحلبه.

وين بعد :con2:



لالا مانقصد هالشي
الله يعلم بظروفهم
يمكن ماعنده حد يفصل حق عيالها ثياب
او ريلها ناخ مايتحرك

لكن موضوعي هذا غير
هالحريم مجبورين بالعكس ماعليهم نقد او كلام

[قطريه22]

معاك حق في الي قلته بس ترى الحين في هالوقت نادر وجود الاماكن المخصصه للنساء الظاهر شافو محد يقعد فيها كنسلوها

المطاعم تكون عائلات ، عام

هذا ان لقيت عائلات بعد

[مهرة]

over again

[المحاميه]

مكرر الموضوع مره ثانيه

نفس الفكره والمضمون


الحل لاتروح مكان واقعد ف بيتك

[qatara]

هل الحريه عندنا محدوده فقط
في الامور السيئه

المساوواه الاختلاط التبرج الصياعه للجنسين تفلت من العائله
الاخذ من الدين فقط ما يبرر افعالنا وترك الباقي والاستهتار بالعادات والتقاليد

هل هاذي هي الحريه

؟

[غير البشر]

over again



عندي خبر انه مكرر ماقلتي شي جديد
انا حاط رابط الموضوع السابق يعني مادري انه مكرر ههههههههههههه

بس للحين الموضوع نفسه متكرر
وبأكثر من مكان
كان موضوعي سابقا اول موقف صادفني بمكان معين
مادري لين متى يعني

[غير البشر]

مكرر الموضوع مره ثانيه

نفس الفكره والمضمون


الحل لاتروح مكان واقعد ف بيتك


ونفس الخطأ يتكرر منهم
اما الحل اقعد في بيتنا هههههههههههه

سبحان الله مغير الاحوال :rolleyes2:
الي على حق يقعد في بيتهم
والي على خطأ هم الصح

[عاشق العديد]

هو اصلن عاد باقي اماكن للعائلات .؟


انا مادري والله لو تعرفون قولو لي

[بن مفتاح]

باقول كلمة ويمكن البعض يزعل مني .. البنات اللي من غير رجال ويقعدون في مكان العائلات للاسف الشديد يحبون يَعرضون نفسهم .. عيل كل هالكشخة والتعدل واخرتها في مكان ما يشوفنا فيها رجال !!! ويش الفايدة ؟؟؟؟؟؟؟؟؟؟

[العلياا]

انا اللي اعرفه ان يكون مكان عام ومكان عائلات او مكان عام ومكان سيدات
نادر تلاقي 3 اماكن مع بعض
واكيد اللي بتروح مع امها واختها من حقها تقعد في مكان العائلات

مساكين الحريم !!!

[مهرة]

ونفس الخطأ يتكرر منهم
اما الحل اقعد في بيتنا هههههههههههه

سبحان الله مغير الاحوال :rolleyes2:
الي على حق يقعد في بيتهم
والي على خطأ هم الصح

التكرار مو بس طرحك للموضوع بعد حق هالفئة البايخة مو بس انت تعاني فيه كثير نفس حالتك ..

[العنيده]

العائله يعني :-

1- رجل وزوجته وعياله
2- رجل وزوجته وخواته
3- الام مع بناتها
4- اخ وامه وخواته
( اي تجمع في نطاق مسمى العائله )
القصد عائلي والعايله مش بس وجود رجل فيها يعني اذا خوات رايحين استر لهم مكان العايله لان اللي موجودين في قرابه عائليه ..
حسيت نفسي اقول " بطتنا بطت بطن بطتكم هههههههههههههههههههههههههههه
انا عني اروح مع امي وخواتي عادة ولما ندخل قسم العائلات اذا في عائله معاهم رجل نقعد بعيد عنهم طبيعي اريح لنا ولهم ..

وشكرا ..

[بوخالد911]

صحيح يالجميل

مثل ما يمنعون الرجال دخول الأيام المخصصة للعوايل
بعد نبي يمنعون دخول الحريم لو بروحهم بدون يهال في الأيام المخصصة للعوايل

هذه بتلك !!!

[دااانة قطر]

باقول كلمة ويمكن البعض يزعل مني .. البنات اللي من غير رجال ويقعدون في مكان العائلات للاسف الشديد يحبون يَعرضون نفسهم .. عيل كل هالكشخة والتعدل واخرتها في مكان ما يشوفنا فيها رجال !!! ويش الفايدة ؟؟؟؟؟؟؟؟؟؟



صدقت مااله معنى ثااني

[دااانة قطر]

على طااري 3 اقساام ماشفت او مانتبهت
امس كنت فيه ودخلنا قسم مانتبهت اذا هو للنساااء او للعائلاات
بس في اللاند مارك قسمين





الحين القهر اللي يجيبون شغالتهم معاهم ويخلونها في طاولة بروحها
تعطلنا بسبتها لان ماافي طاوله والشغاله جالسه على طاوله حق 4 وحااطه الاغرااض فوقهم وتطلعهم ياكلون :eek5:

[R 7 A L]

المفروض الي ما معها عيال اوووت

[كازانوفا]

صح كلامك دام في مكان مخصص للنساء ليش قاعدين بقسم العائلات وبالفعل مكانهم فاضي

[qrt_trading]

نحاسة الله وكيلك، المشكلة لما اتروح وتبي مكان في منطقة العائلات وتلقاها متروسه حريم بروحهم ومنطقة النساء فاضية، اوكي أنا وزوجي والعيال وين أنروح في العام مثلا!!!!!!!!!

[فيصل99]

يمكن في بعض الإحراج إذا أكثروا الحريم في مكان خاص للعائلات ويكون الإحراج للرجل
بس أظن بكون الرجاال مشغول مع هله مب فاضي يتلفت يشوف العالم
لكن واحد شيسوي إذا يبي يودي امه وخواته مكان يتمشون فيه مافي حل إلا تنزلهم مكان مخصص للعائلات عشان ياخذون راحتهم وانت تكون مطمئن

يعني في إجابيات وفي سلبيات

[النهار]

اي والله غيرو تحصلها تدرعم على طول لا احم ولادستور بس خل ريال يبي يدش وقف ممنوع اليوم مخصص للعائلات

[شيخ الديرة]

نحتاج بديل لعبارة للعائلات فقط, لكي تعطي المعنى الحقيقي لما نريد, وهو أن العائلة تكون على الأقل من رجل وأمرأة, وليس أمرأتين

[غير البشر]

هو اصلن عاد باقي اماكن للعائلات .؟


انا مادري والله لو تعرفون قولو لي


اخوي عاشق اذا مكان للعئلات فقط
معليه مانقدر نقول حق الحريم يدخلون لان استر لهم لو مكان كله شباب
لكن القصد لو في مكانين عائلات ونساء
ويقعدون مكان العائلات ومكان النساء يكون فاااضي
وعائلات تجي ابي اماكن ماتحصل
كذا مره صادفني هالموقف وفي كذا من مكان

[غير البشر]

باقول كلمة ويمكن البعض يزعل مني .. البنات اللي من غير رجال ويقعدون في مكان العائلات للاسف الشديد يحبون يَعرضون نفسهم .. عيل كل هالكشخة والتعدل واخرتها في مكان ما يشوفنا فيها رجال !!! ويش الفايدة ؟؟؟؟؟؟؟؟؟؟



اخوي بن مفتاح مابي احط بذمتي انهم للعرض
يمكن بعظهم فيهم لقافه

لكن الباقي عذرهم ان هذا المكان اشرح من مكان النساء

والسبب ان المكان المخصص للنساء مكتوم وممل ومافيه فيو حلو :eek5:

[غير البشر]

انا اللي اعرفه ان يكون مكان عام ومكان عائلات او مكان عام ومكان سيدات
نادر تلاقي 3 اماكن مع بعض
واكيد اللي بتروح مع امها واختها من حقها تقعد في مكان العائلات

مساكين الحريم !!!



مرحبا العليا
معليه مساكين ماقلنا شي
بس انا اتكلم عن شي موجود وغلط ومسبب ازعاج
وانا ماحطيت الموضوع لمجرد النقد فقط

بس ابغي اعرف ليش
وشنو السبب بالضبط لان الحريم ادرى في بعض
يمكن يقنعوني

لا في اماكن للنساء ومكان ثاني للعائلات جنب بعض
واذا تبين اعطيج الاماكن وتتأكدين من كلامي

[غير البشر]

التكرار مو بس طرحك للموضوع بعد حق هالفئة البايخة مو بس انت تعاني فيه كثير نفس حالتك ..


مهره انا ماتهمني هالفئه الي تقولين عنها بايخه
كثر مايهمني الموضوع نفسه
لو تشوفين العائلات بعيالهم اشكثر يرجعون مايحصلون اماكن
صدقيني راح تنقهرين من هالشي

او تشوفين عائله تنجبر تروح وتقعد في المكان العام
لان صعبه يطلعون ويروحون مكان او مطعم ثاني

[غير البشر]

العائله يعني :-

1- رجل وزوجته وعياله
2- رجل وزوجته وخواته
3- الام مع بناتها
4- اخ وامه وخواته
( اي تجمع في نطاق مسمى العائله )
القصد عائلي والعايله مش بس وجود رجل فيها يعني اذا خوات رايحين استر لهم مكان العايله لان اللي موجودين في قرابه عائليه ..
حسيت نفسي اقول " بطتنا بطت بطن بطتكم هههههههههههههههههههههههههههه
انا عني اروح مع امي وخواتي عادة ولما ندخل قسم العائلات اذا في عائله معاهم رجل نقعد بعيد عنهم طبيعي اريح لنا ولهم ..

وشكرا ..


حوش خميس خوش حوش قوليها عشر مرات هههههههههه

اختي العنيده

ابغيكم تعرفون مقصدي

نساء بروحهم نعم عائله
نساء مع امهم عائله
وايضاء الي ذكرتيهم

لو هالفئتين وجد مكان للعائلات وجنبه مكان للنساء
الافضل لهم ولغيرهم يقعدون بأي مكان ؟؟

[@ بوفيصل@]

سؤال للخوات المعترضات على الموضوع

الحين الرجال مع اخوانه او قرايبه الشباب يعتبرون عائله او لا

او اب مع اولاده الشباب

بنفس قياس البنت مع خواتها او بنات عمها تعتبر عائله في نضركم

صدق الاخ الي يقول قمنى نطالب بحقوقنا

الله المستعان

[دااانة قطر]

سؤال للخوات المعترضات على الموضوع
الحين الرجال مع اخوانه او قرايبه الشباب يعتبرون عائله او لا
او اب مع اولاده الشباب
بنفس قياس البنت مع خواتها او بنات عمها تعتبر عائله في نضركم
صدق الاخ الي يقول قمنى نطالب بحقوقنا
الله المستعان


يعني سؤالك غريب شوي
الحين رجال مع خواانه او عياااله شنو تبون المسمى لهم؟؟!!

[العلياا]

مرحبا العليا
معليه مساكين ماقلنا شي
بس انا اتكلم عن شي موجود وغلط ومسبب ازعاج
وانا ماحطيت الموضوع لمجرد النقد فقط

بس ابغي اعرف ليش
وشنو السبب بالضبط لان الحريم ادرى في بعض
يمكن يقنعوني

لا في اماكن للنساء ومكان ثاني للعائلات جنب بعض
واذا تبين اعطيج الاماكن وتتأكدين من كلامي

غيروو الله يطول بعمرك
تعيش وتشوف العجب ما تدري بكرا كل شي بيكون عام ويلغون هالاقسام

تبي الصراحة انا ما قد شفت هالفئة اللي تتكلم عنها لذالك ماعرف الاسباب
لكن كون على يقين مافي بنت محترمه بترضى على نفسها تقعد جنب عايلة وعارفه انها بتسبب لهم ازعاج

فالحالتين اقول اللي يتضايق من هالوضع ياخذ اكله ويرجع البيت وياكل براحته
لاحد يضايقه ولا يضايق احد

[العنيده]

حوش خميس خوش حوش قوليها عشر مرات هههههههههه

اختي العنيده

ابغيكم تعرفون مقصدي

نساء بروحهم نعم عائله
نساء مع امهم عائله
وايضاء الي ذكرتيهم

لو هالفئتين وجد مكان للعائلات وجنبه مكان للنساء
الافضل لهم ولغيرهم يقعدون بأي مكان ؟؟

تحديد الاماكن والالتزام فيها مهم :victory:
يعطيك العافيه على الموضوع

[تغلبية]

صباح مساء الخير غيروووو


انا صار لي وقت ابي استوعب ليش الحريم قاعدين في قسم العائلات ... ومخلين قسم النساء مهجور !

وشفت هالشي مرة في اوبرا لاندمارك ... ومالقيت له تفسير !!

هو صج مكان العائلات اشرح لكن موب استر من قسم النساء...

مادري ايهما أولى في أخذه بالحسبان :rolleyes2:

[دااانة قطر]

صباح مساء الخير غيروووو


انا صار لي وقت ابي استوعب ليش الحريم قاعدين في قسم العائلات ... ومخلين قسم النساء مهجور !

وشفت هالشي مرة في اوبرا لاندمارك ... ومالقيت له تفسير !!

هو صج مكان العائلات اشرح لكن موب استر من قسم النساء...

مادري ايهما أولى في أخذه بالحسبان :rolleyes2:



معليش اختي وين قسم العائلات بالضبط انا ماشوف غير قسم النساء وقسم عام

[غير البشر]

صباح مساء الخير غيروووو


انا صار لي وقت ابي استوعب ليش الحريم قاعدين في قسم العائلات ... ومخلين قسم النساء مهجور !

وشفت هالشي مرة في اوبرا لاندمارك ... ومالقيت له تفسير !!

هو صج مكان العائلات اشرح لكن موب استر من قسم النساء...

مادري ايهما أولى في أخذه بالحسبان :rolleyes2:


ياهلا ومرحبا تغلبيه

يعني انتي ملاحظه هالشي صح تغلبيه
انا رحت بوقت كذا مره زحمه والعوايل قاعدين عند الشباب من الزحمه
والحريم مسيطرين على 3 ارباع الطاولت وقسمهم فاضي

اشرايج في السالفه :(

[غير البشر]

معليش اختي وين قسم العائلات بالضبط انا ماشوف غير قسم النساء وقسم عام



موجود 3 اقسام في اللاند
اول ماتروحين فوق ويفتح المصعد تروحين سيده في الزاويه بتشوفين مدخل لقسم النساء
والمكان الي قبل هذا المدخل المفتوح هذا المكان العام

ولما تنزلين من المصعد وتروحين يسار وتروحين داخل اخر شي
بتحصلين مدخل العائلات على يسارج

[كازانوفا]

معليش اختي وين قسم العائلات بالضبط انا ماشوف غير قسم النساء وقسم عام

قسم النساء باللاند مارك مدخله من ورا الكاشير يعني مش باين مثل فرعه اللى بالمطار

[تغلبية]

معليش اختي وين قسم العائلات بالضبط انا ماشوف غير قسم النساء وقسم عام

مثل ماقالوا الاخوان ...

وتوني أعرف منج ان في قسم عام .... يخلونه "قسم رجال" افضل

[دااانة قطر]

موجود 3 اقسام في اللاند
اول ماتروحين فوق ويفتح المصعد تروحين سيده في الزاويه بتشوفين مدخل لقسم النساء
والمكان الي قبل هذا المدخل المفتوح هذا المكان العام

ولما تنزلين من المصعد وتروحين يسار وتروحين داخل اخر شي
بتحصلين مدخل العائلات على يسارج

اول مرة ادري بمر بشوف المكاان

[ضوى]

بصراحة سويتها مرتين مع رفيقتي بس لانه قسم العايلات ماكان فيه احد وماطولنا ، ليش مارحنا صوب النساء كان زحمة ومافي مكان

[زبرجد]

لو رجل بيمنعونه من دخول قسم العائلات لكن المرأة شلون بيمنعونها ؟!

[چواهر]

لو مو مسوين زحمة وقاعدين بإحترام مو مشكلة أخوي.

[تغلبية]

ياهلا ومرحبا تغلبيه

يعني انتي ملاحظه هالشي صح تغلبيه
انا رحت بوقت كذا مره زحمه والعوايل قاعدين عند الشباب من الزحمه
والحريم مسيطرين على 3 ارباع الطاولت وقسمهم فاضي

اشرايج في السالفه :(

لزوم نعلم الشيخ بالسالفة :victory:



أنا اللي شفته كان غزو على المكان .... ماحبيته كلش كلش ...

لسبب ...

مثل ما أنا أحب آخذ راحتي ... أحط اعتبار لراحة غيري

ليش أقعد بمكان مب لي .. والمكان المخصص لي موجود !

خلوا العوايل مع بعض لو كان الحريم فاضي ..

ولو افترضنا انه مزحوم اطلب من المطعم يسوون لي مكان في العوائل للحريم صاد شوي ويكون كله حريم

مب القى الحريم منثرين .... بين العوائل وبين الرجال .. وافرض نفسي فرض واضايق غيري وانت منهم الحين !!

[حسن]

تعرف شغل الحسد وايد زايد عندنا في البلاد
يادافع البلا

مايحبون يخلون الواحد ياخذ راحته في كل مكان حسبي الله عليك ياللي في بالي

لا ويقلون لك الرومانسيه انا قايلها هذه موجوده في المسلسلات الواقع غير

شوف ياخوك انت وش مشكلتك يعني خربو عليك الجو الرومانسي انت والمدام
ولا ايه الحكايه وخلصنا

شوف انا بعد اقتحام النساء علينا في كل مكان

فصرت ماعاد ابالي من اللي قدامي

لان وقتنا الحالي اصبحن الغالبيه العضمى والصغرى

قوات عيون

فاكل المدام وحط الشوكه في حلجها ياغيرو ولا عليك من حد
ولا كانك تشوف

:telephone:

[يمامـة]

لزوم نعلم الشيخ بالسالفة :victory:



أنا اللي شفته كان غزو على المكان .... ماحبيته كلش كلش ...

لسبب ...

مثل ما أنا أحب آخذ راحتي ... أحط اعتبار لراحة غيري

ليش أقعد بمكان مب لي .. والمكان المخصص لي موجود !

خلوا العوايل مع بعض لو كان الحريم فاضي ..

ولو افترضنا انه مزحوم اطلب من المطعم يسوون لي مكان في العوائل للحريم صاد شوي ويكون كله حريم

مب القى الحريم منثرين .... بين العوائل وبين الرجال .. وافرض نفسي فرض واضايق غيري وانت منهم الحين !!
مع هالرأي

[غير البشر]

صحيح يالجميل

مثل ما يمنعون الرجال دخول الأيام المخصصة للعوايل
بعد نبي يمنعون دخول الحريم لو بروحهم بدون يهال في الأيام المخصصة للعوايل

هذه بتلك !!!



مرحبا بالجميل
هذي قضيه ثانيه

لكن مع وجود اماكن للحريم بمتنعون عنها
ويقعدون مع العوايل والموضوع هذا تكرر واايد

والعوايل مايقدرون يدخلون مكان النساء
ويرجعون لا عشى ولا معشى :rolleyes2:

[غير البشر]

على طااري 3 اقساام ماشفت او مانتبهت
امس كنت فيه ودخلنا قسم مانتبهت اذا هو للنساااء او للعائلاات
بس في اللاند مارك قسمين





الحين القهر اللي يجيبون شغالتهم معاهم ويخلونها في طاولة بروحها
تعطلنا بسبتها لان ماافي طاوله والشغاله جالسه على طاوله حق 4 وحااطه الاغرااض فوقهم وتطلعهم ياكلون :eek5:


اي والله صادقه بخصوص الشغاله
ولو كلمتيها طلع لج اللسانهم نص متر :rolleyes2:

الله المستعان اختي
الحمدلله على كل حال
اتمنى يراعون الناس ويقعدون بالمكان المخصص لهم

[غير البشر]

صح كلامك دام في مكان مخصص للنساء ليش قاعدين بقسم العائلات وبالفعل مكانهم فاضي


اختي كازا اتمنى انج لاحظتي نفس ملاحظتي
تبريرهم ان مكان النساء مافي فيو حلوو :eek5::secret::rolleyes2:
ان مكان العوايل مكانه حلوو مفتوح ويتفرجون على الي رايح والي جاي تحت هههههههه
يمكن حق العقره :tease:

[غير البشر]

نحاسة الله وكيلك، المشكلة لما اتروح وتبي مكان في منطقة العائلات وتلقاها متروسه حريم بروحهم ومنطقة النساء فاضية، اوكي أنا وزوجي والعيال وين أنروح في العام مثلا!!!!!!!!!



مرحبااا اختي
الحمدلله ان الي لاحظو ها الملاحظه كثر
عشان مايقولون جايب الكلام من عندي او اني سامع به
فعلا هالشي عشته كذا مره

بيقولون لج من سبق لبق يعني مالكم مكان
وهم سامحين للنساء بدخول مكان العوايل

بس في شي اسمه الذوق العام

الله يهديهم يارب

[abu m7md]

احب البقاع عند الله التي يذكر فيه اسمه
وابغض البقاع عند الله الاسواق