كيف نترك ابنائنا يستمتعون بحياتهم دون الخوف عليهم من هالدنيا

[حمد 2002]

السلام عليكم ورحمه الله وبركاته


كيف نترك ابنائنا يستمتعون بحياتهم دون الخوف عليهم من هالدنيا

قد يمر عليك يوم ويخبرك احد ابنائك بنيته للسفر للخارج مع اصدقائه !! . وقد يمر عليك يوم ويخبرك فيه احد ابنائك برغبته بالذهاب مع ربعه بالسياره لوحدهم !! . وقد يأتيك يوم ويخبرك ابنك برغبته بالذهاب للتخيم او للعزبه مع ربعه ؟ .

فكيف تنشىء ابنك عزيزي القارىء منذ الصغر بحيث ماتخاف عليه مهما راح بعيد عنك ، وخصوصا مع كثرت المغريات والامور المفسده بهذا الزمان ؟

وهل سوف تسمح له بالذهاب ام لا ؟ وماهي الظوابط لذلك ؟

ابي رايكم بشكل عام حول هذا الموضوع ..


بالتوفيق ..

[qatara]

البارح ولدي طالب مني بيروح الشليهات ويا ربعه قلت له حب الارض

قال ربعي بيروحون يوم شفت احوال ربعه

قلت مسكين الي ابوه بعيد

عز الله انه ضايع

الافيما ندر

[قطريه22]

اولاً: يعتمد على التربيه الصحيحه والي معتمده على الدين الاسلامي بس ممكن اصدقاء السوء يزينون له هالشيء.
ثانياً : المراقبه والقرب من الأبناء وتذكيرهم بعقوبة الله سبحانه.

بس لاتنسى ان الشيطان حي مامات اذا الكبار يغلطون اشلون الصغار وهو توهم ماشافو شي من الدنيا وفي عينهم ان كل شيء حلو

[قطريه22]

البارح ولدي طالب مني بيروح الشليهات ويا ربعه قلت له حب الارض

قال ربعي بيروحون يوم شفت احوال ربعه

قلت مسكين الي ابوه بعيد عز الله انه ضايع
دلع الحريم ضيع جيل

اشلون ابوه بعيد وتقول دلع الحريم؟؟

[حسن]

انا شقلت

حمد موضوع الرومانسيه هملته رغم ان ماصار له 24 ساعه
وكان مهم جدا ان الانسان يراجع ويعيد حساباته

ياخي خل نستفيد منه على الاقل

زين جذيه هذه قطريه شبت الحين ولعت

[قطريه22]

انا شقلت

حمد موضوع الرومانسيه هملته رغم ان ماصار له 24 ساعه
وكان مهم جدا ان الانسان يراجع ويعيد حساباته

ياخي خل نستفيد منه على الاقل

زين جذيه هذه قطريه شبت الحين ولعت

ههههههههههههههههه موضوع الرومنسيه مانجح
كله منك حمد يقول انت خربت موضوعه

[qatara]

اشلون ابوه بعيد وتقول دلع الحريم؟؟

عيل تربية و دلع مين الخدامه

ولا يهمج تربية خدامات

[عثرة جواد]

صباح الخير اخوي حمدمتالق كل عاده ف مواضيعك

موضوع رائع

انا من تجاربي الخاصه اني اربي عيالي ع الاعتمادع النفس وعطيهم الثقه المقننه واعطيهم حريه القرار

مع تربيتي لهم ع القيم الدينيه والاجتماعيه ولاكن((( مانسى انهم لازم يخطون حتى يتعلمون))) وان الله خلقنا ع هذه الفطره
ايضا تعودو ع الصراحه والوضوح ولله الحمدلي معهم ..جلسات مصارحه وتقبل كل واحدمنا لطرف الاخر وفي حال تكررنفس الخطاء هناك >>>عقاب<<< مهما كان احيانا قاسي ولاكن الحمدلله يكون بعدها رضى بل عقاب وبلعكس يشكروني عليه ويقولون <<الحمدلله يمه العقاب كان خيرلي >>....صدق الرسول الكريم """ماكان الرفق ف شي الازانه """

[حسن]

ههههههههههههههههه موضوع الرومنسيه مانجح
كله منك حمد يقول انت خربت موضوعه

متى ومن يقول وشوله وشحقى

هو نزل وشل عليه
نفس هذا الموضوع

المهم
وينه وين راح انحذف !!

[العنيده]

يعتمد على التربيه .. القصد تربية الشخصيه له من الصغر .. يعني يعرف الخطا من الصح والاهم يعرف شلون يتصرف
طبيعي انه بيخطا يوم بس لازم يتعلم منا يكون قريب من ابوه او من امه اذا احنا الكبار نغلط ..
هاي الدنيا لازم بيكبر وبيطلع ويشوف واوقات مابنكون معاهم .. هنيه شخصيته بتحدد تصرفاته حتى في اختياره لربعه

اميمتي علمتنا وتعودنا نسمعها قبل اي طلعه حتى وقت النوم " امنتكم الرحمن ياعيالي " والله يحفظهم ان شاء الله

[قطريه22]

عيل تربية و دلع مين الخدامه

ولا يهمج تربية خدامات

انت تقول ابوه بعيد وعقب دلع الحريم يخرب جيل
مايصير

التربيه معتمده على الاب والم مب على شخص معين

[qatara]

انت تقول ابوه بعيد وعقب دلع الحريم يخرب جيل
مايصير

التربيه معتمده على الاب والم مب على شخص معين

صادقه وبيض الله ويهج بهل الكلمة الصادقه

دام التربيه اساسها معتمد على الاب

والام لاكن اذا ابعد الاب واضعف دوره

بحجج مختلفه وياكثر هل الحجج الي طلعو لنا بها

فهل تعتقدين تبقى تربيه

الا نادر النادر
؟

[ضوى]

اربيه نعم ، لكن اهمله لا ، يطلع مع ربع يسهر اول شي اعرف منهم اصحابه ومنهم اللي بيسهر معاهم ، ومنهو اللي بيسافر معاه طبعا اتكلم عن 20 ومافوق ، ادور على اهله اعرفهم والا لا ، معروف عنهم الصلاح والا لا تالي اوافق والا لا ، وهذا مايخصه بالثقة وهالخرابيط

[حسن]

صادقه وبيض الله ويهج بهل الكلمة الصادقه

دام التربيه اساسها معتمد على الاب

والام لاكن اذا ابعد الاب واضعف دوره

بحجج مختلفه وياكثر هل الحجج الي طلعو لنا بها

فهل تعتقدين تبقى تربيه

الا نادر النادر
؟


لا ياكتارا

الحجج هذه منذ الازل انت لازم تعرف ان هناك فروقات عقليه
بين وبين

انت ياولي الامر تحدد وماعليك القوامه للرجل

عاد اذا هو حاط نفسه ذكر هذه شخصيته

مالنا دخل فيها

البعض يفكر التربيه بس هي من راسه شلون انا تعلمت باعلم
لا يبا
يبيلها ثقافه وتطور جديد ومواكبه العصر
بالطرق الصحيحه
انا اقولك

احنا شعوب تتبع الراعي ولا تبتكر يعني سياسه القطيع في كل شي
اذا ماتبون تفكرون هذه مشكلتكم
لاتقولون جراءه وجراءه

لا لا
هناك خطوط لا تتعدي

والحياه جهاد وكفاح وفرج

[قطريه22]

صادقه وبيض الله ويهج بهل الكلمة الصادقه

دام التربيه اساسها معتمد على الاب

والام لاكن اذا ابعد الاب واضعف دوره

بحجج مختلفه وياكثر هل الحجج الي طلعو لنا بها

فهل تعتقدين تبقى تربيه

الا نادر النادر
؟

الله يسلمك ويبيض وجهك

محد ينكر ان الدور الاكبر في التربيه معتمد على الأم بحكم طبيعة عمل الأب وانشغاله
بس لاننسى أن الأم نفس ماقلت تدلع وهالشيء مغروس في كل ام قلبها يحن اكثر من الاب ممكن هالشيء تكون له سلبيات كثيره
فاذا الام دلعت لازم الاب يوقف هالدلع ويتصرف التصرف الصحيح

كل شيء له حدود والدلع الزايد يدمر الواحد

[قطريه22]

اربيه نعم ، لكن اهمله لا ، يطلع مع ربع يسهر اول شي اعرف منهم اصحابه ومنهم اللي بيسهر معاهم ، ومنهو اللي بيسافر معاه طبعا اتكلم عن 20 ومافوق ، ادور على اهله اعرفهم والا لا ، معروف عنهم الصلاح والا لا تالي اوافق والا لا ، وهذا مايخصه بالثقة وهالخرابيط

صحيح كلامج وهالشيء الي تسوينه هو الصح والله يخلي لج عيالج ويخليج لهم.

[عاشق العديد]

اربيه نعم ، لكن اهمله لا ، يطلع مع ربع يسهر اول شي اعرف منهم اصحابه ومنهم اللي بيسهر معاهم ، ومنهو اللي بيسافر معاه طبعا اتكلم عن 20 ومافوق ، ادور على اهله اعرفهم والا لا ، معروف عنهم الصلاح والا لا تالي اوافق والا لا ، وهذا مايخصه بالثقة وهالخرابيط

والله ياختي الواحد فعمر العشرين يكون مخير في اختيار ربعه ..
ومفروض هو يعرف الصح من الغلط وانتي فقط تنصحينه ..
لكن موضوع اني اسئل عن ربعه ومن هله وشو هو .. اتوقع هذا مب شي

[عثرة جواد]

غريبه علقت عليهم كلهم الا انا ليش

[قطريه22]

غريبه علقت عليهم كلهم الا انا ليش

ههههههههههههههه صاحب الموضوع ماعلق على اي حد فينا

[ضوى]

والله ياختي الواحد فعمر العشرين يكون مخير في اختيار ربعه ..
ومفروض هو يعرف الصح من الغلط وانتي فقط تنصحينه ..
لكن موضوع اني اسئل عن ربعه ومن هله وشو هو .. اتوقع هذا مب شي

مرحبا ياخوي

صدقني ياخوي ماخذت هالاجراءا الا لما شفت وسمعت بلاوي ، والاحوط اني اعرف اهل ربعهم شنو وضعهم بدل ماقط عيالي بينهم ، يعني ولدي الكبير الله يحفظه ويوفقه ويرده مرفوع الراس ، العام بس اللي سافر بروحه مع واحد من ربعه ، وهالرفيج امه شخصيا كلمتني عشان اوافق ولدي يسافر مع ولدي هي تثق فينا وانا اثق فيهم وعارفة ولدها مب راعي خرابيط ، سافروا واستمتعوا وردوا والكل مبسوط ، لكن يجيني يبي يسافر مع واحد توه يعرفه من مسنجر والا بي بي مانعرف شنهو هذا الولد شنهي اخلاقه لو عمره 22 والا اكبر ترا الصاحب ساحب وانا اختك انت تربي صح وتوجه صح ويجي واحد مب مربى عدل يضيع ولدك تنقهر وتحس بالظلم ، عشان جذي نتجنب هالشي بمعرفة اصدقاء عيالنا واهلهم والله يحفظ عيالنا وعيال المسلمين ، وارد واكرر هذا ماله دخل بالثقة ، نعطيه الثقة ونأمنه على بيت كامل ويتصرف بعقل وحكمة ، لكن مثل ماقلت كل شي بحذر

[ضوى]

صحيح كلامج وهالشيء الي تسوينه هو الصح والله يخلي لج عيالج ويخليج لهم.

اللهم امين حبيبتي

تسلمين

[عاشق العديد]

مرحبا ياخوي

صدقني ياخوي ماخذت هالاجراءا الا لما شفت وسمعت بلاوي ، والاحوط اني اعرف اهل ربعهم شنو وضعهم بدل ماقط عيالي بينهم ، يعني ولدي الكبير الله يحفظه ويوفقه ويرده مرفوع الراس ، العام بس اللي سافر بروحه مع واحد من ربعه ، وهالرفيج امه شخصيا كلمتني عشان اوافق ولدي يسافر مع ولدي هي تثق فينا وانا اثق فيهم وعارفة ولدها مب راعي خرابيط ، سافروا واستمتعوا وردوا والكل مبسوط ، لكن يجيني يبي يسافر مع واحد توه يعرفه من مسنجر والا بي بي مانعرف شنهو هذا الولد شنهي اخلاقه لو عمره 22 والا اكبر ترا الصاحب ساحب وانا اختك انت تربي صح وتوجه صح ويجي واحد مب مربى عدل يضيع ولدك تنقهر وتحس بالظلم ، عشان جذي نتجنب هالشي بمعرفة اصدقاء عيالنا واهلهم والله يحفظ عيالنا وعيال المسلمين ، وارد واكرر هذا ماله دخل بالثقة ، نعطيه الثقة ونأمنه على بيت كامل ويتصرف بعقل وحكمة ، لكن مثل ماقلت كل شي بحذر

ماهو اختي ..

الي ينزرع الشي في قلبه ..
لو مب صاحب لو من مايكون مايقدر يجره للغلط او الحرام .. فالسفر ..
بدال مارفيجه يجره للحرام هو يجر رفيجه للحلال .. وللصلاه والامور طيبه

[ضوى]

ماهو اختي ..

الي ينزرع الشي في قلبه ..
لو مب صاحب لو من مايكون مايقدر يجره للغلط او الحرام .. فالسفر ..
بدال مارفيجه يجره للحرام هو يجر رفيجه للحلال .. وللصلاه والامور طيبه

احترم جدا وجهة نظرك اخوي

بس ماننكر ابدا انه افضل العيال ممكن ينحرف ، صحيح ماراح يطول في هالغلط وبيرده دينه وبترده تربيته بس ماخلي ثغرات في تربيتي لهم

[Rider]

امسك العصا من النص فيه حزات لازم تكون صارم وفيه حزات لين على حسب الموقف وطبعا الدور مشترك بين الاب والام الواحد فينا لازم يكسب عياله مايخليهم حق الشارع شارع مايربي عيالنا

[qatara]

الله يسلمك ويبيض وجهك

محد ينكر ان الدور الاكبر في التربيه معتمد على الأم بحكم طبيعة عمل الأب وانشغالهبس لاننسى أن الأم نفس ماقلت تدلع وهالشيء مغروس في كل ام قلبها يحن اكثر من الاب ممكن هالشيء تكون له سلبيات كثيره
فاذا الام دلعت لازم الاب يوقف هالدلع ويتصرف التصرف الصحيح

كل شيء له حدود والدلع الزايد يدمر الواحد




انا وكل عاقل ينكر ذالك فالدور الاكبر للحفاض والتربيه للاب

اين دور الام نسمع عنه ولم نراه من عقدين
شعارات وتطبيل هي تركت دورها الحقيقي في البيت
وخرجت لوظيفه لم يكلفها الله ولم يطالبها بها.
وتركت الوظيفه الاهم ( كربة بيت وام)



كمثال توضيحي

ففي بعض الدول تطبخ للناس بمطعم في حين ببيتها ولعائلتها لا تطبخ !

تطيع مسئولها في العمل في حين تتذمر و تعاند وتجادل الزوج بالبيت

هل هذا التطور ؟ ام التدمر

تكرف في الوظيفه لاكن ببيتها لا تمسح حتى طاوله

الدور الطفولي للام لحد 7 وبعد السابعه للاب ان لم يصلي
زجره وبعد العاشره ضربه و ان لم يسنع سنعه وان تشاطن ردعه
وحافظ عليه من حركات المياعه والصياعه وووو الخ
سوا بنت او ولد
ولما ابعد بعض الاباء بشتى الحجج شفنا بعيونا الخيبه ورا خيبه

وتقولين انشغال الاب خارج البيت

لا يعني مقصر هذا دوروه ما سن الله له وسخره لهذا

طيب واين دورها الحقيقي وانشغالها هي بالبيت

وما سخرها الله له هل هو خارج البيت ؟


اغلب الاطفال مهملين و لعبة بيد الخدم وهذه حقيقه لاينكرها الا مكابر

واليتيم من مات ابوه وليس من ماتت امه

الاهم الاب وهو عمود البيت وسوره سوا لها او للاطفال
ولا ننكر دور الام ان كانت ربة بيت لاكن بيت بدون رجل ضايع

فبدون الاب الولد يخرج مته ماحب ومع من احب
المراه تخرج مته ماحبت رجعت والبنت كذالك

لا حارس ولا سور

الا من رحم ربي

[بشائر]

موضوع مهم اخوي حمد وكبير في نفس الوقت
الأم والأب بيواجهون صعوبة أكيد في بداية الأمر مع ابنهم المراهق
لأنها مرحلة التأثر بالأصدقاء والميل للانتماء إلى الجماعات ذات الفئة العمرية المتقاربه ..
من المهم جدا أن ينتقي الوالدين أصدقاء أبناءهم ويلتقون بهم ويتعرفون عليهم ويستحسن لو يصادقونهم
طبعا إن كانوا أبناء أسر طيبة ولا يمنع أن يشاركهم الأب في رحلاتهم وفي هواياتهم ..
أهم شيء أن يكون الأب أو الأم على دراية تامة بنوعية الصحبة التي تلازم أبناءهم ..فالصاحب ساحب
ويفترض أن يجنب أبناءه عن الأصدقاء المدخنين ( فلا خير فيهم ) وعن كثيري السهر على الفاضي والمليان
ومن يتجمعون في القهاوي ( تدخين ولعب ورقة خرابيط) ومؤخرا قمنا نسمع عن تجمعات طربية يعني باختصار ابعدهم عن الاصدقاء الفارغين ..
أولاً كن قدوة أنت لهم في البداية بحسن اختيارك لمن حولك ..
ثم كبر تصرفاتهم السيئة أمام أبناءك وانتقدها بهدوء واسأله عن رأيه ..
خذه معك للمجالس ..
راقب صلاته فمن حفظ الله حفظه الله ..
وأخيرا الدعاء له بالصحبة الصالحة والهداية ..
وتوكل على الله .. فالله خير حافظ له ..
المهم انك جنبته المخاطر اللي انت تشوفها وتلتمسها ..
وفقك الله .

[بوحارب]

الله يعينا عليهم :)

[alsoq]

يجب ان يكون لك دور في اختيار ربع ابنك وتعرف من الصالح والطالح
روحات شليهات وسفر برا ما فيه لحد ما يتزوج ويعقل بدايه الخراب تجي من الربع وروحه الشليهات والسفر وهم عادهم في طيش الشباب

مجلسه عنده يجيونه ربعه واذا بيروح مجالس ربعه ما فيه مشكله اما يقعد يطامر من شليه للسفره الى مجمعات غير مسموح بذلك ابدآ

[saeed2005]

موضوع دقيق ورائع ورأي أن الحرية المطلقة مفسدة مطلقة يجب العناية بالتربية الذاتية للولد وتنشئته على اجتناب الخطأ ذاتيا وليس رقابيا ومع ذلك يجب الحزم في بعض المواضع بالمنع ويجب معرفة أصحاب الولد سلوكيا وأخلاقيا فالصاحب ساحب كما يقال

[يمامـة]

والله ياختي الواحد فعمر العشرين يكون مخير في اختيار ربعه ..
ومفروض هو يعرف الصح من الغلط وانتي فقط تنصحينه ..
لكن موضوع اني اسئل عن ربعه ومن هله وشو هو .. اتوقع هذا مب شي

اميل لهذا الرأي ،، لكن هذا بعد ما يمنع ان الأب مثلا يكون حرص على معرفة من يصاحب ولده
في عمر ال 20 والأم بعد يكون لها دور في نصحه وثنيه عن مصاحبة اللي مب زينين..