&& جيل الأمس .. جيل اليوم .. جيل الغد &&

[خليفـة]

السلام عليكم

تكاليف الحياة اليوم اختلفت عن الأمس ..

الحين .. الأرض لحالها يوصل سعرها قريب المليونين ريال
غير قيمة البنيان والفرش الخ الخ ..
في الماضي احسن قطعة أرض تاخذها بـ 20.000 ريال وبالكثير 40.000 ريال

الحين .. الكروزر العادي سعره قريب الـ 300.000 ريال
وكل شهر لازم مبلغ للوكالة للصيانة عشان ما يروح الضمان
وفي الماضي كان الكروزر يطلع بـ 45.000 و 50.000 ريال
وما يشوف الوكالة مدى الحياة .

الحين .. تدخل مطعم عادي .. تدفع لك قرابة الـ 400 ريال
لشخصين .. وفي الماضي كان اسمن هرفي تاخذه بـ 450 ريال
زيد عليها 150 قيمة الطبخ وامورك في اللبن .

الحين الزواج صار يكلف فوق النص مليون ريال
وفي الماضي كان ما يتعدى الـ 80.000 ريال شامل وكامل


السؤال :

اذا كانت الحياة للجيل الحالي فيها من الصعوبة ما يندى
لها الجبين .. فكيف ستكون الحياة مع الأجيال القادمة ؟

خليفــة

[رهج السنابك]

لحظه البس نظارتي

احم

استاذي الكريم

في علم الاقتصاد يعرف هذا بالعلاقه الطردية بالقوة الشرائية او قوة العملة

في السابق الريال كان يجيب لك وايد اشياء
ثم بدأت قيمته تنخفض وتنخفض لانه زاد وكثر

ببساطه

ريالات كثير = قيمة اضعف

لما تطبع فلوس زيادة قيمتها تنقص

هل لو خذت شخص في الثمانينات شاري سياره مرسيدس بقيمة ثلاثين الف ريال من الوكاله
وخذت شخص في الوقت الحالي شاري مرسيدس بثلاثميه الف

معناها اللي من عصر الثمانيات شراها بسهوله؟ او كانت عليه رخيصه؟؟ طبعا لا

هي نسبة وتناسب

قبل عشر سنوات كنت ابي اشتري بيت وكل البيوت اسعارها ميتين وثلاث ميه الف ولا قدرت اشتري
اليوم نفس البيت وصل ثلاث مليون واقدر اشتريه رغم لاحظ تضخم السعر
بس لان صاحبه ايضا تضخم في الدخل


فأنا ما اشوف الدنيا غلت
اشوف ان الوضع اقتصاديا طبيعي

[خليفـة]

كلامج سليم 100%
ولكن هذا لا ينكر ان الغلاء فاحش
في أيامنا الحالية

خلاص .. شيلي كشمتج
ههههه

شكرا للمشاركة

[بصمة قطرية]

كل ما زادت الرواتب زادت الأسعار
و غلت المعيشة ..
ذكرتني بأسعار الأراضي بداية زواجي ..!!
يا ما إنسأبت هالسؤال ..!!
ليش ما خذتوا أرض أيام الرخص ..!!
ما توصل 50,000
وقتها كانت الرواتب 6000 و 7000
يعني كانت الأرض بالنسبة للأغلبية حلم ..!!

دايماً أقول الله يستر على عيالنا ..
شلون بيعيشون وسط الغلا ..!!

[بوحارب]

صادق صادق يابودعي

على طاري صيانة المواتر توني مستلم فاتورة
قطع غيار لموتري ب 53000

هالمبلغ في الماضي أتزوج فيه حرمتن سنعه تسدح التيس لحالها

مب حريم اليوم مافيهم شده يغسلون السمج
يقولون وع ماحب ريحة الزفره :)<<<< هجمة سريعه

أشكرك ع الطرح وكلامك سليم وكلام السقراطية غلطط

[رهج السنابك]

زين و هل في الماضي كان عندك 53الف عشان تاخذ حرمتين يسدحون التيس ؟؟؟
في الماضي يمكن مافي مخباك الا ام خرفان مشقوقه بعد


كلام بوحارب غلططط < ثلاث طاءات بعد

[خليفـة]

كل ما زادت الرواتب زادت الأسعار
و غلت المعيشة ..
ذكرتني بأسعار الأراضي بداية زواجي ..!!
يا ما إنسأبت هالسؤال ..!!
ليش ما خذتوا أرض أيام الرخص ..!!
ما توصل 50,000
وقتها كانت الرواتب 6000 و 7000
يعني كانت الأرض بالنسبة للأغلبية حلم ..!!

دايماً أقول الله يستر على عيالنا ..
شلون بيعيشون وسط الغلا ..!!
صدقتي يا صدفة
سنة 2000 مثلاً .. شريت فيلا في العزيزية
غرفها ماستر .. وبركة سباحة .. ومساحة زينه
وبمكان مميز ب 550.000 ريال

وفي سنة 2013 .. شريت فيلا في ام صلال محمد
اصغر .. ومواصفات متوسطة ب 2.450.000 ريال

والقادم اصعب


صادق صادق يابودعي

على طاري صيانة المواتر توني مستلم فاتورة
قطع غيار لموتري ب 53000

هالمبلغ في الماضي أتزوج فيه حرمتن سنعه تسدح التيس لحالها

مب حريم اليوم مافيهم شده يغسلون السمج
يقولون وع ماحب ريحة الزفره :)<<<< هجمة سريعه

أشكرك ع الطرح وكلامك سليم وكلام السقراطية غلطط

تعال بزوجك خدامتنا ماري
تنظف السمج .. وتشتغل عن اربع رجاجيل
ومهرها بسيط
ههههه

[بوحارب]

ماذكر اذا كان عندي او لا بس كلامج غلطططط :)



خليفة الله يبارك لك ويزيدك

وبفكر في موضوع ماري >>> ما يفرط ههههههههه

[بوخالد911]

خلاااااص الماضي وطرٍ مضى

كل وقت له جيله وسعره

بس الله يعين الأجيال اللي جاية بالطريج

[meme-93]

هذا يعتمد على اقتصاد الدوله اخوي خليفه
كل ماتوسعت الدوله في الاقتصاد كل ما زاد الدخل عند الافراد وكل مازاد الدخل عند الافراد كل مازاد الطلب على السلع والخدمات وكل ما زاد الطلب زاد السعر
والعكس صحيح
اذا صار انكماش في اقتصاد الدوله يقل الطلب على السلع وفي المقابل تقل الاسعار
مثل ماصار في الازمه الماليه من كم سنه وتدهور دبي وانخفاض اسعارها لان صار انكماش في الاقتصاد

دولة قطر تمر في مرحله التوسع الاقتصادي حاليا
والمحللين الاقتصادين يتوقعون لدولة قطر في 2016 بتكون اعلى نقطه في التوسع الاقتصادي يشهده العالم ان شاء الله
وغالبا بعد التوسع الاقتصادي تليها مرحلة الانكماش الاقتصادي ...
ادري طولت عليك فـ الشرح خخخخخخخ

لكن بفسر لك بوجهة نظري ليش فلوسك ماتكفي بالنسبه لـ امس واليوم
سعر السوق تمام يماشي الدخل والسلع هـ الوقت
لكن زادت التكاليف الاضافيه مثلا زادت طلعاتنا للمطاعم ،، زادت السفرات ،، زادت الملابس لو تفكر فيها في اشيا طلعت لك في هذا الزمن ماكانت موجوده امس ،، تغيرت اسلوب المعيشه بـ النسبه لـ امس واليوم هذا الي زاد لنا التكاليف

واسفه على الأطاله أخ خليفه