لندن بداية شهر 6 شلون جوها واجوائها ؟؟ فيدوني

[مختصة]

السلام عليكم ورحمة الله وبركاته
اعضاء المنتدى الغاليين
حبيت استفسر منكم عن اجواء لندن بداية شهر 6
بتكون حلوه
ووين الاماكن الامان للسكن..وهل فيه حمايه هناك او شي
والحلوه
ووين الاماكن الممتعه
وهل بتكون غاليه
فيدوني لو حد بيروح منكم في هالوقت
وهل كفايه اسبوع فيها
ول شوي؟؟
يليت الي عنده اي نصايح يفيدنا..وجزاكم الله الف خير ...

[غير البشر]

السلام عليكم ورحمة الله وبركاته

عليكم السلام ورحمه الله وبركاته


اعضاء المنتدى الغاليين
حبيت استفسر منكم عن اجواء لندن بداية شهر 6
بتكون حلوه

اذا قصدج الطقس
ايوه بكون الجو حلو ولطيف
ودرجه الحراره بين العظمى 19 والصغرى 10
لكن ممكن ترتفع او تنزل
لكن هذا الافرج لهذا الوقت


اما اذا قصدج الاجواء بصفه عامه
اذا بدايه شهر 6 بتكون لندن هاديه ومافيها زحمه كثير خبرج امتحانات
وكذلك نص شهر 6
اما من 20 - 6 تبدأ الناس بالتوافد لها الى بدايه رمضان






ووين الاماكن الامان للسكن..وهل فيه حمايه هناك او شي
والحلوه

طبعا لندن في الفنادق امان بس الناس قامت تخاف من بعد الحادثه الي حصلت
وطبعا أمن من الشقق
والأمن منهم الفنادق الراقيه ذات الخمس نجوم
افضل المناطق للسكن
1- نايتس برج ( صوب هارودز )
فندق شيراتون بارك تاور

2- البارك لين
فندق ماريوت بارك لين
فندق غروفنر هاوس بارك لين
فندق هيلتون بارك لين
فندق الانتر
فندق دوشستر
كل هالفنادق خمس نجوم واسعارهم مرتفعه

3- اكسفورد
فندق كمبرلاند
فندق ثيستل
فندق تشرشل خلف سلفردج ( سعره مرتفع )
فندق راديسون بلو خلف تشرشل
فندق ذا مونت كالم قريب من راديسون بلو


4- اجور رود
فندق ماريوت ماربل ارش
هلتون متروبول





ووين الاماكن الممتعه

اماكن كثيره اختي
اذا اول مره تروحين بقولج الاماكن بشكل سريع

1- مجمع ويستفيلد
2- شارع اكسفورد
3- بيكاديلي ( ومحل ام اند ام )
4- لندن اي london eye
5- الهايدبارك
6- شارع النايتس برج
7- هارودز
8- مجمع بريمارك في شارع اكسفورد حق الاشياء العمليه الرخيصه
9- مجمع سلفردج
10- مدام توسو متحف الشمع
11- شبربوش :rolleyes2:
12- شارع اجور رود حق المطاعم العربيه
واذا بغيتو جمعيه عندها كل الي نستخدمه عندنا في الخليج هو سوبر ماركت الوادي الاخضر
في شارع اكسفورد مع لفه مطعم مروش
ويجي بعد مطعم زعفران
13- اذا تبغون الماركات تحصلونهم في شارع سلون ستريت
ويكون مكانه من شارع اكسفور ويكون سلفردج على اليسار
تمشون يجي على يمينك محل زارا مع زاره تاخذون الشارع الفرعي يكون هذا بدايه الشارع
14- قصر باكنغهام ( قصر الملكه اليزابيث )
15- جوله بالباص المفتوح يتشوفون معظم الاماكن السياحه
مكانه مقابل فندق كمبرلاند ومن جنب فندق ماريوت بارك لين في بدايه شارع اكسفورد
جنب الماربل ارش
في مكتب صغير لهم على الرصيف نفس الكابينه
16- الاوت لت ويستفيلد تقريبا من لندن 45 دقيقه بالقطار



وهل بتكون غاليه

نفس الاسعار تقريبا طول السنه
الفرق فقط في اسعار الفنادق



فيدوني لو حد بيروح منكم في هالوقت
وهل كفايه اسبوع فيها

اسبوع كفايه نوعا ما
لكن الافضل عشر ايام


ول شوي؟؟
يليت الي عنده اي نصايح يفيدنا..وجزاكم الله الف خير ...


مافي نصايح غير التخفيف من التعامل مع العرب هناك
وخاصه الاكراد ( معظمهم اعرفهم ههههه )
الشوارع الصغيره الي هي من خلق شارع اجور رود
يعني من خلف المطاعم وخلف فندق ماريوت ماربل ارش لا تتمشون فيها اخر الليل
للحيطه والحذر فقط


وحاجه ثانيه بالنسبه لكروت الهواتف
انصحج في خط شركه ليبارا للمكالمات الدوليه والبلاك بيري عشان يكون في تلفون واحد
اما خط الانترنت انا استخدم فودافون
وتاخذينهم من اجور رود محلات تلفونات كثيره وكلهم عرب


بالنسبه للمواصلات الافضل والارخص الباصات
وفي كل مكان مواقف للباصات
والافضل تاخذون بطاقه الباص الاسبوعيه ارخص بكثير
واماكن الحصول على البطاقات في محطات الاندر غراوند
وفي محل يبيع في اجور رود
مكانه تكونين في صف مطعم ماكدونالدز يكون على يمينج
وتمشين تقريبا 300 متر بكون على يمينج قبل الاشاره الضوئيه
وهذي صوره المحل

http://im63.gulfup.com/YmKRnC.png (http://www.gulfup.com/?3phKxu)


او تدفعون كاش عند الركوب ويفضل عندكم باوندات حديد او عملات ورقيه صغيره




ويجزاج بمثله
رحله سعيده وموفقه
الاجابه فوق باللون الاحمر

واي استفسارات ثانيه انا حاضر :victory:

[Khaled Qatar]

اخوي غير البشر
سؤال خارج عن الموضوع

هل عندك معلومات عن مدينه portsmouth

[غير البشر]

اخوي غير البشر
سؤال خارج عن الموضوع

هل عندك معلومات عن مدينه portsmouth



ياهلا ومرحبا اخوي خالد
بصراحه ماعمري زرتها
زرت مانشستر وبلاك بول وبرايتون
وهالمدينه قريبن من برايتون

بس شنو بغيت تستفسر عنها امرني

[Khaled Qatar]

ياهلا ومرحبا اخوي خالد
بصراحه ماعمري زرتها
زرت مانشستر وبلاك بول وبرايتون
وهالمدينه قريبن من برايتون

بس شنو بغيت تستفسر عنها امرني

مايامر عليك ظالم
لاني بدرس فيها فكنت ابي معلومات شامله عنها

[hamad-007]

بخصوص برطانيا بشكل عام الجو الحين تغير وزان لاكن الجو متغلب وهذا معروف عن برطانيا... شمسهم اتحرق من قلب انصح لليهال كريم شمس ينباع في الصيدليات ,, وينزل مطر خفيف ماتحس فيه يسمونه رشات الصيف .

[hamad-007]

اخوي غير البشر
سؤال خارج عن الموضوع

هل عندك معلومات عن مدينه portsmouth

يسملحي اخوي غير البشر عن المداخله

بورمث هي جنوب ومعروف شعب الجنوب ودود ولكنته سهله عكس الشمال الكنه صعبه ماتفهم هو شيقول لازم يكرر للك اكثر من مره واهل الشمال تعبانيين.
معظم الطلاب الي يرحون لغه فقط يروحون بورمث واصلا العوايل في هل المنطقه عندها خبره سابقه مع الطلاب.

[بصمة قطرية]

بالنسبة لجو لندن بارد
يعني صيف لندن نفس شتانا ..
رحتها في الصيف و رحتها في الشتا في الحالتين باردة
بس شتاهم وايد بارد ..

[مختصة]

شكرا لكم عالافاده
شكرا اخوي غير البشر
اشكرك جدا

[زورق]

اذا عندكم يهال ودوهم ليقولاند تبعد عن لندن يمكن ساعه الاربع حلوه وأيد تشبه ديزني فيها فندق لان اليهال في لندن مالهم الا الهايدبارك

[مختصة]

شكرا لكم..

[مختصة]

شكرا جزيلا ..

[بوخالد911]

ما يقصر اخونا غير البشر
عساه ع القوووووووة

[طبيب قطري]

اذا مب معاكم يهال روحوا مدينه باث ، منطقه طبيعتها خلابه وهاديه وراقيه وفيها اماكن معقوله للتسوق والاكل