4 قطريين فقط من بين 34 ؟!!!

[لاجئ عاطفي]

http://im48.gulfup.com/Poox86.png

استغربت الرقم وانا اتصفح جريدة الشرق اليوم معقوله فقط هالعدد من القطريين الاطباء؟؟
ليش وشنهي الاسباب لعدم انخراط القطريين في مهنة الطب؟؟
هل هناك تعجيزات وعوائق لانخراط القطريين في مهنة الطب؟؟
قطر في طفرة في كافة مجالاتها وتحتاج لكوارد قطرية في كافة المجالات والتخصصات ومنها الطب فإلى متى سنستعين بالاطباء الاجانب؟؟؟
تساؤلات كثيرة دارت في بالي وساختمها باخر سؤال .. هل الدولة تشجع القطريين وتقدم لهم كل الدعم والجذب للعمل في هذا المجال؟؟

[ضوى]

دراسة الطب صعبة جدا يبي لها قلب قوي يبي لها اهتمام مفرط ، يبي لها شدة حيل غير عن كل التخصصات ، بس اخوي لاجئ انت اعتمدت على خريجين كورنيل ، فيه اطباء وايد يدرسون برع وماشاء الله طلبة مشهود لهم ، يمكن كورنيل عراقيلها اكثر من الجامعات خارج قطر

[مختلفة عقليا]

السلام عليكم ,’

هالجامعه غاليه وايد ., اتوقع في قطرين في اماكن ثانيه .,

بس منطقيا ., شبابنا ما يميلون للطب ., اتحس تفكيرهم صوب العسكريه ., او البترول .,

لان رواتب اكثر وراحه اكثر .,

يعني الدكتور متي يصير دكتور عقب كم سنه ؟؟ بس العسكري متي يصير ضابط ؟؟ جوف فرق السنوات وفرق الرواتب ,’

ويسلموو .,

[R 7 A L]

ليش مستغرب عددنا الاجمالي قليل
واغلبنا يتجه الي جهات معينه وصاير فيها تكدس

ولكن لعل وعسى السنين الجاية نشوف عدد أكبر
خصوصاً انه من التأسيس بالثانوية اصبح لدينا مساريين علمية ( هندسي و طبي )

[فلتة زمانها]

ما انصح اي قطري يدرس طب
الي يشوف وضع الدكاتره القطريين في حمد يتحسف بصراحه
رواتبهم ما تسوى هالتعب يداومون 80 ساعه اسبوعيا بدون اوفر تايم ولا حتى بدل خطر
وللي يضحك انه المسعف القطري خريج الشمال الاطلنطي راتبه يعادل راتب الدكتور وبنفس الدرجه 112
واذا طالبوا بتعديل رواتبهم او علاوات مثل الاجانب قالوا لا انتوا مهنتكم انسانيه

[شيخ الديرة]

ما انصح اي قطري يدرس طب
الي يشوف وضع الدكاتره القطريين في حمد يتحسف بصراحه
رواتبهم ما تسوى هالتعب يداومون 80 ساعه اسبوعيا بدون اوفر تايم ولا حتى بدل خطر
وللي يضحك انه المسعف القطري خريج الشمال الاطلنطي راتبه يعادل راتب الدكتور وبنفس الدرجه 112
واذا طالبوا بتعديل رواتبهم او علاوات مثل الاجانب قالوا لا انتوا مهنتكم انسانيه

وينك طبيب قطري؟ يحطون ملح على الجروح

[همر]

كم رواتب الاطباء ؟!!

[Right]

يمكن قصدهم 40 ، بس الصحفي نسى يحط الصفر (0) فصارت 4 !!

[BIG-VEGA]

والله اعلم بس نسبه القطريين بالشيبان بالاطفال بكل شي ماتتجاوز ال 18% من اجمالي العدد السكاني

ونسبه الطلاب القطريين الي في الخبر حوالي 12%

فلما نقارن عدد القطرين مع الاجانب اكيد كل سنه بنشوف عدد مايتجاوز عدد الاصابع يتخرجون في التخصصات الصعبه او النادره

بس من ناحيه اقتصاديه هل يسوى افتح جامعه بهاي الضخامه والتكلفه عشان 4 قطريين كل سنه !!

[رهج السنابك]

صديقتي طبيبه بحمد راتبها نص راتبي ههههه

[فلتة زمانها]

وينك طبيب قطري؟ يحطون ملح على الجروح

يمكن يتغير الوضع عقب ما ضموهم لقانون الموارد البشريه

[عاشق العديد]

..

المشكله وانا اخوك القطري يروح مصر والاردن وغيرها من الدول ويدرس طب بحسابه الخاص ..

بينما هنالك ناس يجون عندنا ويدرسون .. ومافي قطرين تعرف ليش .؟
لانه اخوك القطري المدير بهالمكان مايبي قطرين يبي اجانب ..

[حسن]

كم مره كتبت هني وهناك
ليش مانبعث طلبه لدراسه الطب وين الاهتمام وين الحوافز وين الخطط
الحمدلله بلدنا فيها خير كثير
ليش ماابعث 20 طالب سنويا هل يعقل مااقدر اطلع 20 بين هل الالاف
واعطيها حوافز وغيرها

شي مؤسف وسوف يحاسبون عليه المسؤلين من الاجيال القدمه

وين خطط وزاره الصحه في ذالك

[همر]

صديقتي طبيبه بحمد راتبها نص راتبي ههههه



انا اتوقع راتبي راتب مدير مستشفى !

وش الحوافز بمقابل دراسه صعبه وتخصص

صعب ومرهق ؟!!


صراحه اللي بيدرس غير طب

الاسنان والجراحه التجميليه

له الجنه...

[چواهر]

ما فيه تشجيع للدخول لهذا المجال / والأطباء القطريين يطفشوونهم في حياتهم لين يقطونهم في المراكز الصحية .

[7llo]

ياشيخ مافي اطباء قطريين عددد الاطباء القطريين ينعدون على الاصابع مع انه اذا دخلو وايل كورنيل يدخلون على حساب مستشفى حمد تدعمهم ويعطونه الراتب الاساسي مال الدكتور , بس دراسه الطب وايد صعبه يبيلها واحد يحب الدراسه شبابنا يدورون السهل نفس الاداره بالنسبه لي اشوف الاداره افضل من الطب الطب تعب ومسووليه

[الامير]

واين الخطه ياوزير الصحه للدكاتره القطريين ......
والله تعبنا لا خطه ولاخمسيه ولا عشريه ولالا
والله الدوله مش مقصره

[QTR-1978]

صديقتي طبيبه بحمد راتبها نص راتبي ههههه

في فرق اللي بمدينه حمد الطبيه والاطباء ومستشفى حمد عندهم كادر يستلم على الموارد البشريه والكادر الثاني لائحه خاصه بمستشفى حمد ورواتبهم اعلى ب كثير من الموارد البشريه

[QTR-1978]

ما انصح اي قطري يدرس طب
الي يشوف وضع الدكاتره القطريين في حمد يتحسف بصراحه
رواتبهم ما تسوى هالتعب يداومون 80 ساعه اسبوعيا بدون اوفر تايم ولا حتى بدل خطر
وللي يضحك انه المسعف القطري خريج الشمال الاطلنطي راتبه يعادل راتب الدكتور وبنفس الدرجه 112
واذا طالبوا بتعديل رواتبهم او علاوات مثل الاجانب قالوا لا انتوا مهنتكم انسانيه

اللي يتخرجون من الاطلنطي هذلين حق الاسعاف صح نفس الراتب بس في علاوه للدكتور فوقها اخبرها كانت قبل 7 الاف قبل الزياده ورواتبهم ماتتبع الموارد البشريه الهيكل في حمد الطبيه قسمين

[رجل الجزيرة]

دراسة الطب صعبة جدا يبي لها قلب قوي يبي لها اهتمام مفرط ، يبي لها شدة حيل غير عن كل التخصصات ، بس اخوي لاجئ انت اعتمدت على خريجين كورنيل ، فيه اطباء وايد يدرسون برع وماشاء الله طلبة مشهود لهم ، يمكن كورنيل عراقيلها اكثر من الجامعات خارج قطر


يا ليتها دراسة وبس، دراسة ومراجعة كتب الطب والنشرات الطبية ومتابعة من المسؤولين الأطباء.

[kitmat]

[QUOTE=الارستقراطية;9536152][FONT="Times New Roman"][COLOR="DarkOrchid"]صديقتي طبيبه بحمد راتبها نص راتبي ههههه[/
وين تشتغلين

[abu m7md]

انا طبيب واشتغل غير شهادتي
وين المشكله

[خليفـة]

المسألة نسبة وتناسب اخوي
شوف عدد المقيمين مقارنه مع عدد المواطنين
بتلقاها لا تقل عن 10:1
دام ان الخريجين الغير قطريين درسوا
على حسابهم .. ودفعوا رسوم كاملة
وشدوا حيلهم .. الله يبارك لهم ويوفقهم
خذوها بجهدهم وتعبهم

خليفة

[رهج السنابك]

بو محمد انت مره طبيب مره لاعب كره قدم ههههه

[رهج السنابك]

تتوقعون لو قالوا بنعطي بعثات مع دراسة لغه بيكون في اقبال على الطب؟

[خليفـة]

تتوقعون لو قالوا بنعطي بعثات مع دراسة لغه بيكون في اقبال على الطب؟

اكيد
وانا اول واحد بغير تخصصي من صياد تماسيح .. الى طبيب حواجب

[احب قطر]

أنتو لين الحين مصدقين كذبة "تقطير" والبحث عن الكفاءات "القطرية" ...

[hanayen]

الجامعه ذي جامعه تعجيزية اسأل كم قطري دخل في هذه الدفعه وصفى منهم كم على السنه الاخيرة في شباب ينطردون بعد سنتين او ثلاث سنوات ما يتم فيها الا الأجانب اللي الانجليزي عندهم ممتاز

[بوحارب]

ياريال قول الحمدلله فيه 4 قطريين بينهم ههههههه

[معماري قطري]

الله يعين ال 4 القطريين مساكين بيعانون وايد ورواتب قليلة .. أَما الباقي فبيتخصصون في مستشفيات عالمية ويمكن يرجعون برواتب أَضعاف زملاؤهم القطريين.

انا بديت ادرس طب في دبلن - ايرلندا والحمد لله زين اني غيرت رايي من البداية وحولت هندسة.

[بوخالد911]

وأتمنى ينقلب الوضع
ويصير عدد القطريين أكثر من المقيميين

[معماري قطري]

أنتو لين الحين مصدقين كذبة "تقطير" والبحث عن الكفاءات "القطرية" ...

آشوف الوزير حاط عينه على كم طبيب " قطري "

[بوخالد911]

أنتو لين الحين مصدقين كذبة "تقطير" والبحث عن الكفاءات "القطرية" ...

وأفضل مثال

قطر للبترول
أُريدُ

[sultan01]

في عراقيل كثيره بالنسبة للقطري ابني هاذي ثاني سنه اقدم له في اكاديمية القادة اول مره لم يتم القبول وهالمره الله يستر !!! اغلب الي بالقادة غير قطريين " أجانب " الله المستعان

[بـن عدوان]

مافي اي تعجيزات بس للأسف عندنا بمجرد ما الواحد يعرف دراسة الطب شوي طويلة وصعبة نوعا ما يشوف له مجال ثاني سهل

اللي يتخرجون من الطب دراستهم ماتوقف يعني حتي بعد التخريج في امور يدرسها ويتابعها

الشخص هو مخير ومايصير الحكومة تجبر القطريين يدخلون الطب

[مليونيرة مفلسة]

وأتمنى ينقلب الوضع
ويصير عدد القطريين أكثر من المقيميين

الله يسمع منك و خصوصاََ الفلبنيين و الهنود نبي الدولة تخفف من وجودهم و يرفعون الشروط لجلب عوايلهم و كفالة أقربائهم

[cavok]

واه يا العنابي ( واللة قهر )

[طبيب قطري]

وينك طبيب قطري؟ يحطون ملح على الجروح

الموضوع مب موضوع فلوس .. عيال البلد بيكون قلبهم على المرضى اكثر من أي احد
اتمنى اشوف قطريين يدخلون طب.. كل مازاد عددنا كل ماصار صوتنا مسموع اكثر، عندنا بالمستشفى جمعية الاطباء القطريين ماقصروا في توصيل صوتنا واقتراحاتنا للنور

[رهج السنابك]

شنو بنظرك اسباب احجام القطريين عن دخول الطب يا دكتور

[الزعفراني]

مهنة الطب والطيران والتدريس .. مش مهن للعب او الواحد يفكر يتخصص فيهم عشان الراتب .. هذي مهن وتخصصات تحتاج لرغبة لدى الشخص بالتخصص فيها .. وحب لممارستها لاجل الممارسة مش لأجل كم يعطوني راتب اذا تخصص فيها .

يعني استغرب انه الواحد يتخصص في تخصص معين عشان الراتب وش هالمنطق الغريب العجيب :)

اما بالنسبة لعدد 4 قطريين في حفل التخرج .. السبب ان نسبة المواطنين للاجانب في قطر تكاد ترى بالعين المجرده :)

عوضا على ان هذا التخصص يحتاج لشغل ومجهود وشخص يحب هالمهنة .. يعني مش نفس تخصص الادارة او الهندسة اللي الواحد يقدر يقزر نفسه فيهم ويمشي حاله

[استغفرالله]

هذا يدفعنا للسؤال عن مدى جدوى وجود جامعات المدينة التعليمية اللي ما يستفيد منها المواطن واللي تكلف الدولة مبالغ يمكن من خلال توفر نفس المبالغ تعليم قطريين في جامعة قطر او الخارج واستقدام عمالة مؤهلة في الطب وغيره

ويجب ان نفكر في قطر بجامعة وطنية يكون الغالبية العظمى من الطلاب مواطنين
وتخدم سوق العمل

[احب قطر]

أنا ما أقول الا الله يستر علينا احنا يا أهل قطر بالذات ، الحمد لله عايشين في نعمة ، وياخوفي انها تنقلب نقمة ، ماعاد في احد عندنا يفكر ان يكون له اسم يدخل التاريخ ، لان أصبحت الثقافة العامة ان كل شي ينشرى ، الله يذكر يوم كنا صغار ، ابهاتنا كان حلم عندهم ان احد من العيلة يطلع طبيب او مهندس ، ومن يوم صغار يزرعون فينا هالفكرة ، مش علشان راتب وإنما فخر بعلم أبناءة ، والحين عايشين في زمن اللي ثقافة المجتمع تغيرت بالكااااامل فيه ، وأصبح العلم في صوب وسوق العمل في صوب ، وأصبحنا في وقت اللي اهم شي فيه شلون تلمع علشان توصل بغض النظر عن علمك او قدراتك ، وهذا دليل على الفساد المبطن اللي في المجتمع واللي قاعد ينخر فيه ، ومايندرئ لي وين راح يوصل.

[احب قطر]

هذا يدفعنا للسؤال عن مدى جدوى وجود جامعات المدينة التعليمية اللي ما يستفيد منها المواطن واللي تكلف الدولة مبالغ يمكن من خلال توفر نفس المبالغ تعليم قطريين في جامعة قطر او الخارج واستقدام عمالة مؤهلة في الطب وغيره

ويجب ان نفكر في قطر بجامعة وطنية يكون الغالبية العظمى من الطلاب مواطنين
وتخدم سوق العمل

طيب هالسؤال حق من ينسأل ، ومن اللي راح يجاوبك ، ومن اللي راح يحلل لك بالأرقام ، احنا عيب عندنا ان يكون في احد غلطان ، لازم نكابر ونمشي في الغلط ولا نقول ان احنا غلطانين

[طبيب قطري]

شنو بنظرك اسباب احجام القطريين عن دخول الطب يا دكتور


مااظن في سبب معين ، يعتمد على اجتهاد الطالب وقدرته على التحصيل العلمي من وهو بالمرحلة الثانويه.. ولاننسى ان الوظائف والتخصصات تعتمد على كل واحد ورغبته وطموحه

[ضوى]

أنا ما أقول الا الله يستر علينا احنا يا أهل قطر بالذات ، الحمد لله عايشين في نعمة ، وياخوفي انها تنقلب نقمة ، ماعاد في احد عندنا يفكر ان يكون له اسم يدخل التاريخ ، لان أصبحت الثقافة العامة ان كل شي ينشرى ، الله يذكر يوم كنا صغار ، ابهاتنا كان حلم عندهم ان احد من العيلة يطلع طبيب او مهندس ، ومن يوم صغار يزرعون فينا هالفكرة ، مش علشان راتب وإنما فخر بعلم أبناءة ، والحين عايشين في زمن اللي ثقافة المجتمع تغيرت بالكااااامل فيه ، وأصبح العلم في صوب وسوق العمل في صوب ، وأصبحنا في وقت اللي اهم شي فيه شلون تلمع علشان توصل بغض النظر عن علمك او قدراتك ، وهذا دليل على الفساد المبطن اللي في المجتمع واللي قاعد ينخر فيه ، ومايندرئ لي وين راح يوصل.

كلامك صحيح ميه ميه ، ولا زال عندي هالحلم احد من عيالي طبيب او صيدلي او مهندس وان شاء الله ربي يحقق امنيتي

[استغفرالله]

طيب هالسؤال حق من ينسأل ، ومن اللي راح يجاوبك ، ومن اللي راح يحلل لك بالأرقام ، احنا عيب عندنا ان يكون في احد غلطان ، لازم نكابر ونمشي في الغلط ولا نقول ان احنا غلطانين
اتفق معك
واتمنى ان اجد حد يجاوب على مدى جدوى وجود الجامعات التعليمية التي لا يتعلم بها عيالنا الا بعدد قليل لا يسمن ولا يغني من جوع
ولا يؤدي الى وجود قوة عاملة منتجة تخدم البلد

الحكومة المفروض تقيم التجربة ومدى جدوتها

[بحر شرق]

السلام عليكم ,’

هالجامعه غاليه وايد ., اتوقع في قطرين في اماكن ثانيه .,

بس منطقيا ., شبابنا ما يميلون للطب ., اتحس تفكيرهم صوب العسكريه ., او البترول .,

لان رواتب اكثر وراحه اكثر .,

يعني الدكتور متي يصير دكتور عقب كم سنه ؟؟ بس العسكري متي يصير ضابط ؟؟ جوف فرق السنوات وفرق الرواتب ,’

ويسلموو .,



مساله انها غاليه هي فعلا رسوم السنه 140000ريال تقريبا لكن هيئه التعليم العالي تتكفل بدفع الرسوم كامله غير الراتب الشهري للطالب ومكافآت التفوق حتى العيديه يوم العيد :shy: .وتتكفل بدفع مصاريف الدراسه في الجامعه الام في نيويورك كل تيرم صيفي للأبحاث هناك مؤسسه حمد الطبيه ومركز السدره للأبحاث مع راتب شهري 22000او درلسه المواد ،جامعه وايل كورنيل لدراسه الطب صعبه جداً وهناك الكثير من الطلاب بعد دراستهم ثلاث سنوات ما قبل الطب هناك مقابله هامه امام اهم المسؤولين والأطباء المشهود لهم ويتم اختيار الطالب لإتمام السنوات الأربع الباقيه له في الطب والتدريب في المستشفيات وهذه المقابلة هامه لتحديد تكمله الطالب في الطب ام لا

[تغلبية]

أنا ما أقول الا الله يستر علينا احنا يا أهل قطر بالذات ، الحمد لله عايشين في نعمة ، وياخوفي انها تنقلب نقمة ، ماعاد في احد عندنا يفكر ان يكون له اسم يدخل التاريخ ، لان أصبحت الثقافة العامة ان كل شي ينشرى ، الله يذكر يوم كنا صغار ، ابهاتنا كان حلم عندهم ان احد من العيلة يطلع طبيب او مهندس ، ومن يوم صغار يزرعون فينا هالفكرة ، مش علشان راتب وإنما فخر بعلم أبناءة ، والحين عايشين في زمن اللي ثقافة المجتمع تغيرت بالكااااامل فيه ، وأصبح العلم في صوب وسوق العمل في صوب ، وأصبحنا في وقت اللي اهم شي فيه شلون تلمع علشان توصل بغض النظر عن علمك او قدراتك ، وهذا دليل على الفساد المبطن اللي في المجتمع واللي قاعد ينخر فيه ، ومايندرئ لي وين راح يوصل.



أحييك على هذا الرأي والمداخلة...

كان ولا زال .. الطب أشرف علوم الدنيا ...

وأن يكون الإنسان طبيباً هذا شرف بحد ذاته وفخر.. له ولجماعته





لكن الحين .. انقلبت الآية !