*@* السنــع والذرابــة على الطريقة الخليجية *@*

[نور الحور]

السلام عليكم ورحمة الله وبركاته ،،


موضوعي عن السنع والذرابة يا أهل السنع :nice:

آداب الحديث والتصرف .. الاتيكيت .. بمعنى آخر :shy:

طبعاً في جمل وعبارات يتبادلها الناس في مناسبات ومواقف كثيرة ..

نبي نتعرف عليها ونتعرف بعد على شلون نرد عليها باللي يناسبها ..

لأن أحياناً نتوهق ونجيب العيد في الرد أو التصرف المناسب :shy:



وبعد هالموضوع فرصة لتوضيح بعض التصرفات والسلوكيات اللي تعبر عن السنع والذرابة ..

مثل تقديم فنجان القهوة للضيف باليد اليمين ..

وطبعاً في مجتمعنا الخليجي عموماً والقطري خصوصاً ..


يعني مثلاً ..

لما يقول حد : (قرت عينك )

نرد عليه : (بشوفة نبيك) ..

ويا ليت نوضح وين ومتى تنقال مثل هالعبارات

أو حتى السلوكيات والتصرفات ..



يـــــلاااا .. هيا بنا لنتسنع بشغففففف :nice:

[white bird]

جميييييل الموضوع كصاحبته نور الحور ..
متااابعة ..

[توشيبا]

وعليكم السلام ورحمه الله وبركاته

عندج البعض

اذا قام من الاكل في العزيمه يقول اكرمك الله

المفروض عند خروجه يقول اكرمكم الله وصاحب المجلس يقول حياك الله

واذا قام من الاكل يقول اغناك الله او كثر الله خيرك ويرد عليه بالعافيه

[النهار]

اذا حد مد يده لك وقال منقوله ترد عليه وتقول مقبوله وتأخذها ( هذي من المحبه الزائده لك عند الاكل )

[توشيبا]

للعلم فيه كلمات متداوله بيننا من ناحيه الذرابه والاصول واهي ماتجوز

(الله لايهينك) لأن الله سبحانة لا يهين احد
فيجب علينا الانتباه لما نقوله.. لان الامر خطير كما قال الرسول عليه الصلاة والسلام فيما معناه (( رب كلمه لا يلقي لها الانسان بالاََ يهوي بها في النار سبعين خريفاََ ))

[العلم]

مثلا :

تفضل .. ينرد عليها :زاد فضلك

سم .. ينرد عليها :كفيت السم

ولايهونون الربع .. إذا كنت تكلم ناس وخصيت واحد منهم بتوجيه الحديث .. ينرد عليها : قايل مايهون

والمعونة .. ينرد عليها : كفيت المهونة

[بوحارب]

اشكرج نور ع الطرح الحلو ذكر تينا في بنت النوخذه وبنات المنتدى الأوليين

في بعض المجالس بيجيك واحد يقولك
والمعونه وترد عليه الله يعينك


ع العموم اذا حد توهق في الرد وماعرف وش يقول !

يقول
الله يجزاك خير
او
الله يرحم والديك

ومنكم نستفيد ياللي بعدي ;)

[نور الحور]

جميييييل الموضوع كصاحبته نور الحور ..
متااابعة ..


حبيبتي أنتي ..

أبيج تشاركين بعد .. بليييييز :shy:

[نور الحور]

تسلمون كلكم توشيبا والعلم والنهار وبوحارب على المشاركات الحلوة .. الذربة والسنعة مثل أصحابها :nice:

توشيبا .. صح أنا معاك .. من زمان أحس إن عبارة (الله لا يهينك ) ومثلها ( الله لا يضرك) غير لائقة مع الحق جل وعلا ..

جزاك الله خير على التنبيه ..

بو حارب الله يرحم والديك على هالكلام الذرب والمجاملة الحلوة << شرايك فيني وأنا أطبق فووووري ؟ :shy:

[ضوى]

موضوع جميل يالغالية

علوم السنع تعلمناها من امهاتنا وابائنا وجدتنا الله يرحمها يااارب

بس مافهمت شنهو المطلوب من الموضوع عزيزتي

[العلياا]

تدرين نور موضوعج ذكرني بموقف طريف
مرة بنت اخوي الصغيرة ردت على تلفون البيت وكان يوم العيد
الرجال يقول لها عيدج مبارك ردت عليه وانت مبارك هههههههههههههههههه

فشلتنا فشيله والله هههههههههههههههههه

هيا بنا لنتسنع :nop:

[المهاجر]

للعلم فيه كلمات متداوله بيننا من ناحيه الذرابه والاصول واهي ماتجوز

(الله لايهينك) لأن الله سبحانة لا يهين احد
فيجب علينا الانتباه لما نقوله.. لان الامر خطير كما قال الرسول عليه الصلاة والسلام فيما معناه (( رب كلمه لا يلقي لها الانسان بالاََ يهوي بها في النار سبعين خريفاََ ))

يعطيج العافيه اختي نور على الموضوع

ويسمح لي اخوي توشيبا انقل له راي الشيخ بن عثيمين في هذا الامر

قال الشيخ ابن عثيمين رحمه الله تعالى في ( مجموع الفتاوى ج3 /77 ) :
هذه العبارة صحيحة ، والله سبحانه وتعالى قد يهين العبد ويذله ، .....
ثم قال : وقال تعالى :" ومن يهن الله فما له من مكرم " ، والإنسان إذا أمرك فقد تشعر بأن هذا إذلال وهوان ، فيقول :" الله لايهينك "

[نور الحور]

موضوع جميل يالغالية

علوم السنع تعلمناها من امهاتنا وابائنا وجدتنا الله يرحمها يااارب

بس مافهمت شنهو المطلوب من الموضوع عزيزتي


فديتج يالغالية ..

المطلوب تكتبين لنا بعض عبارات السنع والذرابة .. وشلون نرد عليها ..

وبعد ممكن تحطين لنا بعض التصرفات السنعة والذربة ..

بنتقذين أمة من وراج يا ضوى هههههه

يلا هيــا بنا لنتسنع :nice:

[نور الحور]

تدرين نور موضوعج ذكرني بموقف طريف
مرة بنت اخوي الصغيرة ردت على تلفون البيت وكان يوم العيد
الرجال يقول لها عيدج مبارك ردت عليه وانت مبارك هههههههههههههههههه

فشلتنا فشيله والله هههههههههههههههههه

هيا بنا لنتسنع :nop:


هههههههههه .. يحليلها ..

يحيها ما عليها شرهه ..

أنا لما أتوهق أتم أفكر اممممم ..أبي أتذكر شلون يردون ..

عاد يدتي الله يحفظها فنانة بس ما خذت منها كل شي .. فيه كلام أنسى شلون أرد عليه هههههه

آخرتها جزاكم الله خير أو شكراً .. أو رحم الله والديكم :shy:

[نور الحور]

يعطيج العافيه اختي نور على الموضوع

ويسمح لي اخوي توشيبا انقل له راي الشيخ بن عثيمين في هذا الامر

قال الشيخ ابن عثيمين رحمه الله تعالى في ( مجموع الفتاوى ج3 /77 ) :
هذه العبارة صحيحة ، والله سبحانه وتعالى قد يهين العبد ويذله ، .....
ثم قال : وقال تعالى :" ومن يهن الله فما له من مكرم " ، والإنسان إذا أمرك فقد تشعر بأن هذا إذلال وهوان ، فيقول :" الله لايهينك "


الله يعافيك يالمهاجر ..

وجزاك الله خير على التوضيح ..

أنا حزات بعد أقول عبارة (الله لا يضرك) يمكن جاية من اسم الله (الضار) ومقابله (النافع)

لكن أرد وأقول أحسها مو لائقة ..

مادري عاد شالتوضيح الشرعي فيها !

[العلم]

نكمل

عيدك مبارك .... علينا وعليك يتبارك

من العايدين .... من الفايزين

في أمان الله ..... في أمان الكريم

شحالك ..... زان حالك

[ضوى]

فديتج يالغالية ..

المطلوب تكتبين لنا بعض عبارات السنع والذرابة .. وشلون نرد عليها ..

وبعد ممكن تحطين لنا بعض التصرفات السنعة والذربة ..

بنتقذين أمة من وراج يا ضوى هههههه

يلا هيــا بنا لنتسنع :nice:


هيا بنا نتسنع ، عجبتني الجملة جدا

بنتي الله يحفظها تموتني من الضحك ، يوم فطنت شوي وديتها معاي عزا الله يطول باعماركم جميعا ، والصج اني ماقلت لها وش شتقولين وانتي تسلمين ، وماسمعتني انا شاقول ، وهي وراي اسمعها تقول ماتشوفون شر ، من داخلي ابتسم واقول ياللا زين دبرت نفسها ، بس لما طلعنا علمتها شتقول عظم الله اجركم واحسن الله عزاكم ومن هالكلام

[المهاجر]

احياننا الواحد اذا نحج او تولى منصب او رجع من السفر

يقولون له ( الحذيه ) فنرد عليه ونقوله ( ابشر بالعطيه)

واذا طلب منا واحد شيء معين نرد عليه ونقوله (على الخشم ) والرد عليها ( عليه الشحم)

واذا الواحد مرض او تعب من شي نقوله ما (عليك شر) والرد عليه ( الشر ما يجيك او ولا تواجهه)

[العلم]

ضوى ضحكتيني الله يضحكج هههههههههههههه


لما واحد يدش على ناس وهم يأكلون .. يقولهم ( هنّهم ) .... وهم يردون عليه ويقولون له ( وأنت منهم )

[العلم]

لما واحد يمرض ينقال له ( خطاك السوء ) وينرد عليها ( خطاك اللاش )

[العلم]

إذا واحد قالك ( والنعم ) ... ترد عليه ( والنعم بحالك ) أو ( ماعليك زود )

[المهاجر]

الله يعافيك يالمهاجر ..

وجزاك الله خير على التوضيح ..

أنا حزات بعد أقول عبارة (الله لا يضرك) يمكن جاية من اسم الله (الضار) ومقابله (النافع)

لكن أرد وأقول أحسها مو لائقة ..

مادري عاد شالتوضيح الشرعي فيها !

ويجزاج بمثله نور

كلامج واحساسج صحيح وهو من التادب مع الله ان لاننسب الشر اليه ولكن لو قيلك لا حرج فيها كما قرأت

سؤال تم طرحه على الشيخ محمد المنجد حفظه الله
ما حكم قول : الله لا يضرك ؟ هل هو من المناهي اللفظية؟


الحمد لله
قول الإنسان : الله لا يضرك ، لا حرج فيه ؛ لأن الله تعالى هو النافع الضار سبحانه ،
كما قال تعالى : ( قُلْ أَفَرَأَيْتُمْ مَا تَدْعُونَ مِنْ دُونِ اللَّهِ إِنْ أَرَادَنِيَ اللَّهُ بِضُرٍّ هَلْ هُنَّ كَاشِفَاتُ ضُرِّهِ
أَوْ أَرَادَنِي بِرَحْمَةٍ هَلْ هُنَّ مُمْسِكَاتُ رَحْمَتِهِ قُلْ حَسْبِيَ اللَّهُ عَلَيْهِ يَتَوَكَّلُ الْمُتَوَكِّلُونَ )
الزمر/38 ،
وقال تعالى : ( وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يَمْسَسْكَ بِخَيْرٍ فَهُوَ عَلَى كُلِّ شَيْءٍ قَدِيرٌ )
الأنعام/17
، وقال تعالى : ( أَأَتَّخِذُ مِنْ دُونِهِ آَلِهَةً إِنْ يُرِدْنِ الرَّحْمَنُ بِضُرٍّ لَا تُغْنِ عَنِّي شَفَاعَتُهُمْ شَيْئًا وَلَا يُنْقِذُونِ ) يس/23 .




وسئل الشيخ ابن عثيمين رحمه الله عن هذه العبارة : "أعطني الله لا يهينك" .
فأجاب : "هذه العبارة صحيحة ، والله سبحانه وتعالى قد يهين العبد ويذله ،
وقد قال الله تعالى في عذاب الكفار: (فَالْيَوْمَ تُجْزَوْنَ عَذَابَ الْهُونِ بِمَا كُنْتُمْ تَسْتَكْبِرُونَ فِي
الْأَرْضِ بِغَيْرِ الْحَقِّ وَبِمَا كُنْتُمْ تَفْسُقُون) الأحقاف/20 ،
فأذاقهم الله الهوان والذل بكبريائهم واستكبارهم في الأرض بغير الحق.
وقال تعالى : (وَمَنْ يُهِنْ اللَّهُ فَمَا لَهُ مِنْ مُكْرِمٍ) الحج/18 ، والإنسان إذا أمرك فقد تشعر بأن هذا إذلال وهوان لك فيقول: "الله لا يهينك" انتهى من "مجموع الفتاوى" (3/77) .

ولو دعا بقوله : الله يسلمك أو يحفظك أو يعافيك ، لكان أولى وأحسن ، لما فيه من كمال التأدب مع الله تعالى
، وعدم نسبة الشر إليه ، كما قال إبراهيم عليه السلام :
( الَّذِي خَلَقَنِي فَهُوَ يَهْدِينِ * وَالَّذِي هُوَ يُطْعِمُنِي وَيَسْقِينِ * وَإِذَا مَرِضْتُ فَهُوَ يَشْفِينِ) الشعراء/78-80 ، فنسب المرض إلى نفسه ولم ينسبه إلى الله كما فعل في الخلق والإطعام ،
وإن كان لا يقع شيء إلا بمشيئته وإرادته سبحانه .
وقال صلى الله عليه وسلم تأدبا مع ربه : (لَبَّيْكَ وَسَعْدَيْكَ ، وَالْخَيْرُ كُلُّهُ فِي يَدَيْكَ ، وَالشَّرُّ لَيْسَ إِلَيْكَ) رواه مسلم (771) .


قال النووي رحمه الله في شرح مسلم :
" قَالَ الْخَطَّابِيُّ وَغَيْره : فِيهِ الْإِرْشَاد إِلَى الْأَدَب فِي الثَّنَاء عَلَى اللَّه تَعَالَى , وَمَدْحه بِأَنْ يُضَاف إِلَيْهِ مَحَاسِن الْأُمُور دُون مَسَاوِيهَا عَلَى جِهَة الْأَدَب "

[العلم]

إذا دش عليك أحد وأنت تأكل وقربت تخلص ... تقوله ( قسمك في البايت مهب فالفايت )

[نور الحور]

ضوى ههههههه زين الله يحفظها دبرت عمرها ..

أنا من كثر ما أسمع ماركز .. مايمديني أعرف جملة وردها الا جاتني الثانية هههههههههه


المهاجر .. كل شي فهمته إلا الحذيه .. شمعناها ؟ وشلون تنطق ؟:secret:


العلم .. استمر الله يحفظك .. قاعدين نستفيد والله :nice:

[نور الحور]

ويجزاج بمثله نور

كلامج واحساسج صحيح وهو من التادب مع الله ان لاننسب الشر اليه ولكن لو قيلك لا حرج فيها كما قرأت

سؤال تم طرحه على الشيخ محمد المنجد حفظه الله
ما حكم قول : الله لا يضرك ؟ هل هو من المناهي اللفظية؟


الحمد لله
قول الإنسان : الله لا يضرك ، لا حرج فيه ؛ لأن الله تعالى هو النافع الضار سبحانه ،
كما قال تعالى : ( قُلْ أَفَرَأَيْتُمْ مَا تَدْعُونَ مِنْ دُونِ اللَّهِ إِنْ أَرَادَنِيَ اللَّهُ بِضُرٍّ هَلْ هُنَّ كَاشِفَاتُ ضُرِّهِ
أَوْ أَرَادَنِي بِرَحْمَةٍ هَلْ هُنَّ مُمْسِكَاتُ رَحْمَتِهِ قُلْ حَسْبِيَ اللَّهُ عَلَيْهِ يَتَوَكَّلُ الْمُتَوَكِّلُونَ )
الزمر/38 ،
وقال تعالى : ( وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يَمْسَسْكَ بِخَيْرٍ فَهُوَ عَلَى كُلِّ شَيْءٍ قَدِيرٌ )
الأنعام/17
، وقال تعالى : ( أَأَتَّخِذُ مِنْ دُونِهِ آَلِهَةً إِنْ يُرِدْنِ الرَّحْمَنُ بِضُرٍّ لَا تُغْنِ عَنِّي شَفَاعَتُهُمْ شَيْئًا وَلَا يُنْقِذُونِ ) يس/23 .




وسئل الشيخ ابن عثيمين رحمه الله عن هذه العبارة : "أعطني الله لا يهينك" .
فأجاب : "هذه العبارة صحيحة ، والله سبحانه وتعالى قد يهين العبد ويذله ،
وقد قال الله تعالى في عذاب الكفار: (فَالْيَوْمَ تُجْزَوْنَ عَذَابَ الْهُونِ بِمَا كُنْتُمْ تَسْتَكْبِرُونَ فِي
الْأَرْضِ بِغَيْرِ الْحَقِّ وَبِمَا كُنْتُمْ تَفْسُقُون) الأحقاف/20 ،
فأذاقهم الله الهوان والذل بكبريائهم واستكبارهم في الأرض بغير الحق.
وقال تعالى : (وَمَنْ يُهِنْ اللَّهُ فَمَا لَهُ مِنْ مُكْرِمٍ) الحج/18 ، والإنسان إذا أمرك فقد تشعر بأن هذا إذلال وهوان لك فيقول: "الله لا يهينك" انتهى من "مجموع الفتاوى" (3/77) .

ولو دعا بقوله : الله يسلمك أو يحفظك أو يعافيك ، لكان أولى وأحسن ، لما فيه من كمال التأدب مع الله تعالى
، وعدم نسبة الشر إليه ، كما قال إبراهيم عليه السلام :
( الَّذِي خَلَقَنِي فَهُوَ يَهْدِينِ * وَالَّذِي هُوَ يُطْعِمُنِي وَيَسْقِينِ * وَإِذَا مَرِضْتُ فَهُوَ يَشْفِينِ) الشعراء/78-80 ، فنسب المرض إلى نفسه ولم ينسبه إلى الله كما فعل في الخلق والإطعام ،
وإن كان لا يقع شيء إلا بمشيئته وإرادته سبحانه .
وقال صلى الله عليه وسلم تأدبا مع ربه : (لَبَّيْكَ وَسَعْدَيْكَ ، وَالْخَيْرُ كُلُّهُ فِي يَدَيْكَ ، وَالشَّرُّ لَيْسَ إِلَيْكَ) رواه مسلم (771) .


قال النووي رحمه الله في شرح مسلم :
" قَالَ الْخَطَّابِيُّ وَغَيْره : فِيهِ الْإِرْشَاد إِلَى الْأَدَب فِي الثَّنَاء عَلَى اللَّه تَعَالَى , وَمَدْحه بِأَنْ يُضَاف إِلَيْهِ مَحَاسِن الْأُمُور دُون مَسَاوِيهَا عَلَى جِهَة الْأَدَب "



جزاك الله خير على التوضيح ..

الحمدلله إحساسي في محله ..

إن كانت هالعبارات تقال للسنع والذرابة والتأدب مع الناس فالأولى أن نتادب مع الله ونختار الأحسن والأجمل من الألفاظ

إضافة وتوضيح جميييييل :victory:

[العلم]

إذا رجعت من السفر وقالك واحد ( سلامة الأسفار ) ... ترد عليه ( الله يسلمك من النار )

[العلم]

إذا طولت من شوفة واحد وقالك ( عاش من شافك ) .... ترد عليه ( عاشت أيامك )

[R 7 A L]

هنهم


وش تسوون هنا :)

[العلم]

وأنت منهم


حياك ... نبي نستفيد منك:nice:

[العلم]

إذا دخلت على أحد وقالك ( يالله حيه ) .... ترد عليه ( الله يبقيك )

وإذا قال (تفضل حياك الله) ..... ترد عليه ( تحيا وتدوم )

[R 7 A L]

ماشاء الله عليك يالعلم ماخليت لنا شي



وش حال الذود ؟ :)

[العلم]

ينرد عليها ( جعلك بزود )

[المهاجر]

ضوى ههههههه زين الله يحفظها دبرت عمرها ..

أنا من كثر ما أسمع ماركز .. مايمديني أعرف جملة وردها الا جاتني الثانية هههههههههه


المهاجر .. كل شي فهمته إلا الحذيه .. شمعناها ؟ وشلون تنطق ؟:secret:


العلم .. استمر الله يحفظك .. قاعدين نستفيد والله :nice:

الحذيه تنطق بفتح الحاء وكسر الذال وشدة الياء

ومعناها وين البشاره او وين هديتك بهالمناسبه

[نور الحور]

رحال والعلم .. ماشاء الله عليكم .. بس عاد ترجموا الكلمات بعد .. نبي نفهم شسالفة بليييز :secret:


المهاجر .. اهاااا يعني على وزن (الهَدِيّة) .. قالبين الهاء حاء والدال ذال << الله والاكتشاف اللي اكتشفته عاد هههههه:secret:

[توشيبا]

يقال للمريض ..(مأجور)
يرد عليه
(الله يجيرك من النار..أو يجيرك من العثور)
كذلك للمريض يقال (ماعليك شر)
يرد عليه(الشر مايجيك)



إذا احد مد حاجه بيده الشمال لإنشغال يمينه
يقول (شمالي ماتشناك)
فيرد عليه الثاني ويقول
(شمالك يمين وعجفاك سمين ولاتولاك مهين)



اذا دخل على جماعه يتناولوا الطعام
(هنّهم هنّم)
ويردوا ...(أنت منهم)
(عسى ماخلاف)...يرد
(كفّيت الخلاف والإتلاف)


سألك شخص عن إسمك
وقال لك: والــنــعـــم
ترد وتقول:ماعليك زود أو ينعم حالك

[رهج السنابك]

لما دخلت هالموضوع احس اني فرنسيه من اصول بوليفارية
انا كلش ماعرف السنع هاي اعرف شوي منه لكن مدري ليه ستايلي مايتقبل مهما اسمع هالكلام لساني ماياخذه ولا ينطقه وان توهقت رديت شكرا :)

الكلمه الي مختلفه فيها لين الحين هي مالك لوا
انا اقول مدحه وهم يقولون سبه

[رهج السنابك]

لما دخلت هالموضوع احس اني فرنسيه من اصول بوليفارية
انا كلش ماعرف السنع هاي اعرف شوي منه لكن مدري ليه ستايلي مايتقبل مهما اسمع هالكلام لساني ماياخذه ولا ينطقه وان توهقت رديت شكرا :)

الكلمه الي مختلفه فيها لين الحين هي مالك لوا
انا اقول مدحه وهم يقولون سبه

[عاهد بن علي]

[SIZE=5]مره كنت ممعزي واحد ميت اخوه في حادث سير اليم
لا شعوريآ قلت له ((((((( الفال لك ))))))) اشردescape

[العلم]

لما دخلت هالموضوع احس اني فرنسيه من اصول بوليفارية
انا كلش ماعرف السنع هاي اعرف شوي منه لكن مدري ليه ستايلي مايتقبل مهما اسمع هالكلام لساني ماياخذه ولا ينطقه وان توهقت رديت شكرا :)

الكلمه الي مختلفه فيها لين الحين هي مالك لوا
انا اقول مدحه وهم يقولون سبه

ارسطوا ( مالك لوا ) تعتبر أسلوب لبق فالرد .. يعني مثلا لو تبين تردين على أحد بكلمة ( لا ) من الأفضل تقولين ( مالك لوا ) بدالها ...


وشكرا

[الحياة الخالدة]

موضوع جميل يا نور .. استفدنا منه و من إضافات الأعضاء فيه

[العلم]

مثلا في الأعراس إذا جيت تسلم وتبارك لهم تقول .. ( مبارك ما دبرتوا )

[Aaziz]

لكل ناس طبايعهم و الفاظهم و ردودهم

من الاشياء الجميله ،، اذا جيت ناس في عزا او زرت مريض في مستشفى
و انت طالع تودعهم تقول لاعَقبنا شر كلمه شبيهه بالدعاء بمعنى اتمنى اخرج مايجيكم شر ،، شبيهه بكلمه اخر الاحزان :secret:

اذا دخل شخص على ناس ياكلون ،، يقول هنهم و يردون عليه وانت منهم
يعني الي داخل يقول الله يهنيكم و هم يردون شاركنا و تهنا معانا .

اذا شخص شرب ماء قدامك ،، تقول له هني وهو يرد هناك الله بالايمان و طاعة الرحمن .

اذا كان شخص مشغول في شي متعب او كان في ظروف صعبه و انتهت ... يقال له هانك المخلاص وهو يرد يهنيك خير . شبيهه بـ سلامات :secret:

[العلم]

عزيز ماكملتها .. إذا قال ( لا عقبنا شر ) ... يردون عليه ( ولا فاجاك )

[Dana’1]

مآجور تنقال مع السلام والتحفي ... الرد جارك الله او تتعمق وتقول تقول الله يجيرك من كل بآس.. إو جارك الله من النار الله يجيرك من النار كلها بهالصدد والي ذكرتها هي اشهر المتعارف:)


طيب
لما يقولك لاتعبت .... نقولة لاندمت

اذا مديت غرض بيدك الشمال لان اليمين مشغولة لأي سبب .. تقولة شمال (ن) ما تشناك... الرد شمالك يمينك
كنك أخذتها باليمين مابه خلاف :)


إذا احد تعثر والا بحديث وانقطع حديثة لسبب ماء وتبغون تردون ويكمل للسالفة تقولة ... اسلم ... يقولك من قال سالم

هذا ما يحضرني الآن

[بوخالد911]

هلا

لو حد قال :كفووو
الرد : كفوك الطيب
:nice:

[JN000N]

حلاااااتييين
خوش موضوع عالعوق
ماقصرو الجماعه ماخلولنا شي

مم زين بعد شيقولون
مثلا اكرمكم الله والا كثر الله خيركم والا نعم الله عليكم
> يوعانه


و بيض الله ويهج نور الحور

[الجـــوديّ]

وش حال طواحينك ؟
وش حال الي وراك ؟.

بصراحه ما تدور في المجتمع النسائي.

[white bird]

صباح الورد :o

ما شاءالله عليكم كفيتوا ووفيتوا ..

بضيف ..
خطاك الشر .. خطاك اللاش ..

..
إن شاءالله العلم ماقالها قبلي :( ههههه

[العلم]

امبلى قلتها خخخخخخخ:nice:



إذا واحد ناولك شيء مثلا .. يقولك ( منقوله ) .. ترد عليه ( مقبولة )

[العلم]

إذا واحد كان مضيع شيء وحصله .. نقوله ( يهنيك العقلان ) .. ويرد ( يهنيك خير )

[رهج السنابك]

وش حال الذود

[Miss]

طلبتك : ابشر بعزك
بيض الله وجهك : ووجهك أبيض أو ومن قال
سم :سم الله عدوك
تفضل : زاد فضلك

[Miss]

وش حال طواحينك ؟
وش حال الي وراك ؟.

بصراحه ما تدور في المجتمع النسائي.

امبلا تدور
انا ونونة قطر قد تكلمنا فيها


وش حال حوشكم : من يعرفها ههههههه

[النهار]

يآ جعلنيَ مآ أذوق حزنك وآنا حَي ................ يا جعلني ما افقدك

[تغلبية]

موضوع جميل

اللي انقال كله هل يشترك فيه البدو والحضر ... والا فيه تعابير بدوية وتعابير حضرية ؟

وتعابير نسائية وتعابير رجالية ؟

[زعبي]

اذا اضطريت تعطي واحد شي بايدك اليسار: شمال ما تشناك
الرد: شمالك يمين

[بـومحمد]

ليش ماتخلونا سوال والي وراه يرد عليه بتطلع احلى

[غير البشر]

وش حال طواحينك ؟
وش حال الي وراك ؟.

بصراحه ما تدور في المجتمع النسائي.



ههههههههههههههههه
احنا قبل كانت تدور عندنا


وش حال طواحينك ؟


اطحن ماجاها :p

وش حال الي وراك ؟.


الله يراك :thumbup1:

[غير البشر]

عندي قصه ظريفه صارت حق واحد من ربعي ممكن اذكرها
لها علاقه بالموضوع :secret::shy: ههههههههههههههههههههههههههه

[بصمة قطرية]

موضوع جميل

اللي انقال كله هل يشترك فيه البدو والحضر ... والا فيه تعابير بدوية وتعابير حضرية ؟

وتعابير نسائية وتعابير رجالية ؟

تدرين تغلبية
كنت برد نفس سؤالج ..
أغلب اللي انذكر سمعته و تعلمته يوم عشت بين البدو
الحضر يذكرون هالاشياء بس منبعها من المجتمعات البدوية
عشرين سنه و أنا معاشرتهم تعلمت أمور كثيرة منهم ..
نور تعالي بعلمج كل اللي ما تعرفينه ..

[غير البشر]

تدرين تغلبية
كنت برد نفس سؤالج ..
أغلب اللي انذكر سمعته و تعلمته يوم عشت بين البدو
الحضر يذكرون هالاشياء بس منبعها من المجتمعات البدوية
عشرين سنه و أنا معاشرتهم تعلمت أمور كثيرة منهم ..
نور تعالي بعلمج كل اللي ما تعرفينه ..



معظم الي انذكرت حاليا حضريه
وفيها منها بدويه

بس لحد الحين الي انذكر اكثرها حضريه
وبعظها مشتركه لكن الاختلاف في في الرد

[بصمة قطرية]

معظم الي انذكرت حاليا حضريه
وفيها منها بدويه

بس لحد الحين الي انذكر اكثرها حضريه
وبعظها مشتركه لكن الاختلاف في في الرد

لا يا غير
غالبيتها بدوية و الحضر صاروا يستخدمونها
لو ترجع لكم سنه ورا اغلب اللي انذكر الحضر ما كانوا يذكرونه
الفترة الأخيرة صاروا الحضر يستخدمونها أكثر ..

[غير البشر]

لا يا غير
غالبيتها بدوية و الحضر صاروا يستخدمونها
لو ترجع لكم سنه ورا اغلب اللي انذكر الحضر ما كانوا يذكرونه
الفترة الأخيرة صاروا الحضر يستخدمونها أكثر ..



لا بصمه معظم الي انذكر كنت اسمعها من شيبانا واحنا صغار
ومعظمهما انقرضت من قبل 25 سنه ماسمعتها


مثل الي ذكرتهم جاكلين

اشحال الي وراك
واشحال طواحينك

وبعد اشحال الفريج
نرد عليه يسرك ولا يضرك

[بصمة قطرية]

لا بصمه معظم الي انذكر كنت اسمعها من شيبانا واحنا صغار
ومعظمهما انقرضت من قبل 25 سنه ماسمعتها


مثل الي ذكرتهم جاكلين

اشحال الي وراك
واشحال طواحينك

وبعد اشحال الفريج
نرد عليه يسرك ولا يضرك
انقرضت من 25 سنة
و كنت تسمعها .. !!

يعني أنا لحقت عليهم وقت الانقراض
و سمعتهم يوم انتقلت وعشت في المجتمع البدوي ..

[غير البشر]

انقرضت من 25 سنة
و كنت تسمعها .. !!

يعني أنا لحقت عليهم وقت الانقراض
و سمعتهم يوم انتقلت وعشت في المجتمع البدوي ..


يمكن انتو ماتتداولونها كثير عندكم
بس كنا نتداولها بشكل يومي :victory:
انا عايش بمكان كله شيبان
وتقريبا كلنا من نفس العايله
يعني نقعد بمجلس متروس شيبان نسمعهم
وناخذ منهم ويعلمونا


الله يرحمهم برحمته

[بصمة قطرية]

يمكن انتو ماتتداولونها كثير عندكم
بس كنا نتداولها بشكل يومي :victory:
انا عايش بمكان كله شيبان
وتقريبا كلنا من نفس العايله
يعني نقعد بمجلس متروس شيبان نسمعهم
وناخذ منهم ويعلمونا


الله يرحمهم برحمته

الله يرحمهم ..
الشيبان يتداولون هالكلمات أكثر مثل ما ذكرت ..
و بينكم انتو الشباب أكثر من الحريم ..

[غير البشر]

الله يرحمهم ..
الشيبان يتداولون هالكلمات أكثر مثل ما ذكرت ..
و بينكم انتو الشباب أكثر من الحريم ..



صح عليج بصمه :victory:

للأسف جلينا لحق على اخر شي
واحنا صدنا الاخير وبعدها معظمها انقرضت :(

ونعم في البدو والحضر :nice:

[تغلبية]

بصمة حبيبتي منورة .. الله يجعلها آخر الأحزان







أحس ان فيه ديناصور في الموضوع :looking:













:tease:

[غير البشر]

بصمة حبيبتي منورة .. الله يجعلها آخر الأحزان







أحس ان فيه ديناصور في الموضوع :looking:








:tease:



هههههههههههههههه ياهلا ومرحبا تغلبيه
من طول الغيبات جاب الغنايم

لا توني صغير :shy: بس احاول اكبر نفسي ههههههههه

[توشيبا]

^
نفس احساسج

[غير البشر]

^
نفس احساسج



ترا كلشي والا بصمه ما ارضى عليها
لاتقولون انها ديناصور ههههه :rolleyes2:

[غير البشر]

الله يرحمك يا البديد :weeping:

[توشيبا]

ترا كلشي والا بصمه ما ارضى عليها
لاتقولون انها ديناصور ههههه :rolleyes2:

انا ماقلت بصمه :eek5::omg:

[غير البشر]

نسيت اقول الحمدلله على سلامتج بصمه
واحسن الله عزاكم وغفر لميتكم

[تغلبية]

لك طولة العمر غيروووو

البركة فيك :thumbup1:



اللي قلته كلام مهم وخطير ...

وودنا نعرف تعابير الحضر وتعابير البدو بس من باب ان كل تعبير من الموروثات البيئية لكل منا







بصمة ...

يعني لما تقولين عشتي بين البدو ... يعني عشتي في البادية ... في بيوت الشعر يعني <<< معليه احس السؤال ماله سنع بس ابي افهم :

:shy:

[غير البشر]

لك طولة العمر غيروووو

البركة فيك :thumbup1:



اللي قلته كلام مهم وخطير ...

وودنا نعرف تعابير الحضر وتعابير البدو بس من باب ان كل تعبير من الموروثات البيئية لكل منا







بصمة ...

يعني لما اقرليت عشاي بين البدو ... يعني غشتي في البادية ... في بيوت الشعر يعني <<< معليه احس السؤال ماله سنع بس ابي افهم :strong


الله يسلمج وعمرج ان شاء الله تغلبيووو << اول مره اقولها هههههه
وفيج ان شاء الله ماعليج قاصر


ايووه

البدو والحضر لهم تعابير
وفي تعابير مشتركه لكن الرد يكون مختلف اشوي
وفي تعابير خاصه بالبدو

اتمنى تتحفونا اكثر واكثر :telephone:

[تغلبية]

^


اتحفنا انت .. وطلع اللي في التجوري

يعني ما اتخيل اقول حق مديري وانا اقدم له ملف والا تقرير باليسار لاي سبب كان "شمال ما تشناك"

عاد والا الرد يقولي شمالج يمين !! <<< ذبحته مديري حد يعطيه شي باليسار ... انا اعرف انه مايجوز بس فيه بنات وايد مايعرفون هالشي

صح السناريو ؟؟

يصير ان التعابير الرجالية يستخدمونها الحريم ؟!

[توشيبا]

الله يسلمج وعمرج ان شاء الله تغلبيووو << اول مره اقولها هههههه
وفيج ان شاء الله ماعليج قاصر


ايووه

البدو والحضر لهم تعابير
وفي تعابير مشتركه لكن الرد يكون مختلف اشوي
وفي تعابير خاصه بالبدو

اتمنى تتحفونا اكثر واكثر :telephone:

صحيح حتي البدو كل قبيله لها تعابير تختلف عن قبيله ثانيه

بس في زماننا هذا صارت الكلمات موحده بين الحضر والبدو

حتي معاد صار بينهم اي فرق

[غير البشر]

^


اتحفنا انت .. وطلع اللي في التجوري

يعني ما اتخيل اقول حق مديري وانا اقدم له ملف والا تقرير باليسار لاي سبب كان "شمال ما تشناك"

عاد والا الرد يقولي شمالج يمين !! <<< ذبحته مديري حد يعطيه شي باليسار ... انا اعرف انه مايجوز بس فيه بنات وايد مايعرفون هالشي

صح السناريو ؟؟

يصير ان التعابير الرجالية يستخدمونها الحريم ؟!



تغلبيه هذا التعبير "شمال ما تشناك"

ماقد سمعته يمكن يكون تعبير بدوي ؟؟

بخصوص اني اتحفكم حاليا مايحضرني احس اني مغفل
ان شاء الله مع الموضوع راح تطلع التعابير بروحها :rolleyes2:

[تغلبية]

صحيح حتي البدو كل قبيله لها تعابير تختلف عن قبيله ثانيه

بس في زماننا هذا صارت الكلمات موحده بين الحضر والبدو

حتي معاد صار بينهم اي فرق

صحيح ...

انزين يعني نمشي على النمط الحديث والا الديناصوري ؟!

كلش مب عدل نتكلم بتعابير تخص قبيلة معينة من باب الجهل بالشيء ؟

نتمنى التوضيح من المخضرمين

وانا مايحضرني شي حالياً :shy:



كاني قريت انك من اهل الوادي توشيبا والا انا غلطانة :shy:

ننتظرك غيروووو .... وبرواية أخرى نحتريك :shy:

[رهج السنابك]

كل الي انذكر احسه بدوي ماسمعناه عند الحضر

[بصمة قطرية]

صح عليج بصمه :victory:

للأسف جلينا لحق على اخر شي
واحنا صدنا الاخير وبعدها معظمها انقرضت :(

ونعم في البدو والحضر :nice:
لا تصغر نفسك
أنا مب من جيلك
إسم الله علي .. :secret:


بصمة حبيبتي منورة .. الله يجعلها آخر الأحزان







أحس ان فيه ديناصور في الموضوع :looking:













:tease:

اللهم آمين ..
تسلمين حبيبتي ..

انا بعد لاحظت الديناصورات ..! :secret:






هههههههههههههههه ياهلا ومرحبا تغلبيه
من طول الغيبات جاب الغنايم

لا توني صغير :shy: بس احاول اكبر نفسي ههههههههه

قصدك فضحت نفسك .. :nice:


^
نفس احساسج

احساسك في محله صدقني ..:victory:






ترا كلشي والا بصمه ما ارضى عليها
لاتقولون انها ديناصور ههههه :rolleyes2:

صج عاد ..!!
مب كأن الكلام عنك مستر ديناصور ..!! :nice:




انا ماقلت بصمه :eek5::omg:

ما عليك منه
فضح نفسه و توهق ..


نسيت اقول الحمدلله على سلامتج بصمه
واحسن الله عزاكم وغفر لميتكم
الله يسلمك
جزاك الله خير و رحم الله والديك ،،

[بصمة قطرية]

لك طولة العمر غيروووو

البركة فيك :thumbup1:



اللي قلته كلام مهم وخطير ...

وودنا نعرف تعابير الحضر وتعابير البدو بس من باب ان كل تعبير من الموروثات البيئية لكل منا







بصمة ...

يعني لما تقولين عشتي بين البدو ... يعني عشتي في البادية ... في بيوت الشعر يعني <<< معليه احس السؤال ماله سنع بس ابي افهم :

:shy:

عاشرتهم من قريب
عشت بينهم ..
عرفت سنع البدو و عرفت عاداتهم ..

[بصمة قطرية]

كل الي انذكر احسه بدوي ماسمعناه عند الحضر

الديناصور يقول حضري ..!!

[تغلبية]

طيب بصمة ...

عطينا التعابير النسائية اللي تعرفينها .. البدوي واللي يرادفها بالحضري اذا ممكن

[بصمة قطرية]

طيب بصمة ...

عطينا التعابير النسائية اللي تعرفينها .. البدوي واللي يرادفها بالحضري اذا ممكن

ضاعت التعابير النسائية والرجالية
الحين تقريباً كل التعابير يستخدمها الجنسين ..

في عجوز كله أسمعها تقول ( بكيتك ) ..
طبعاً واضحة و مادري في لها مرادف حضري ..!!

جعل من جابك الجنة ..
يعني رحم الله والديك ..

[العلم]

بخصوص التعبيرات .. اتكلم عن اللي انا ذكرتها .. اغلبها ترجع لكلام البدو .. وفيها أشياء مشتركة وفي أشياء خاصة للحضر ...

[نور الحور]

أشكركم .. وبيض الله وجيهكم ..

وعسى النار ماتمسها .. وجعل من جابكم الجنة ..

وتسلم يمناكم .. وما قصرتوا رايتكم بيضا ..

اتحفتونا ماشاء الله بعبارات نادر ما اسمعها ..

وبعضها جديد علي ..

وبالفعل بعضها تميل للعبارات البدوية ..

وبعضها رجالي بحت بحت بحت هههههه

العلم ما شاء الله طلع لنا مواهبه الدفينة ..

أشوفه ما شاء الله عليه عرف كل العبارات

والرد عليها ..

ياليت تزيدون عليها السنع في التصرفات ..

سلوم العرب على قولتهم .. << مادري صح اللفظ ولا غلط هههه

[بوحارب]

صح صح يا ابلتي

واهم شي مستانسين

[العلم]

مثلا لو تبي تتحفى بواحد وتقوله مثلا ( نفداك أو فديتك ) .. يرد عليك ( يفداك اللاش ) بدوية .. وعند الحضر ( يفداك الردي )


لو لاقيت واحد بعد فترة إنقطاع وقلت له ( فقدناك ) ... يرد عليك ( ماتفقد غالي )

.. ولو لا قيت واحد وتبي ترحب به مثلا وقلت له ( يالله حيه ) .. يرد عليك ( حي نباك ) *

[بصمة قطرية]

مثلا لو تبي تتحفى بواحد وتقوله مثلا ( نفداك أو فديتك ) .. يرد عليك ( يفداك اللاش ) بدوية .. وعند الحضر ( يفداك الردي )


لو لاقيت واحد بعد فترة إنقطاع وقلت له ( فقدناك ) ... يرد عليك ( ماتفقد غالي )

.. ولو لا قيت واحد وتبي ترحب به مثلا وقلت له ( يالله حيه ) .. يرد عليك ( حي نباك ) *


الله يحييك و يبقيك ..

[العلم]

ههههههههههه بصمة ذكرتيني بعجايزنا القدامى الله يرحم الميت ويحسن خاتمة الحي .. كانوا يقولون كلمة وقصدهم يتحفون بنا ..

كانوا إذا يبون شيء مثلا ( جب هذا - قبرتني -) .... ههههههههههه

مثل مايقولون الشاميين ( تؤبرني )

[حمد 2002]

:oops:إذا واحد قالك هاي .. أترد عليه هايات :shy:

[بصمة قطرية]

العلم
كم مرة سمعت جعلك البلا خخخخخخخ

[النهار]

عندي قصه ظريفه صارت حق واحد من ربعي ممكن اذكرها
لها علاقه بالموضوع :secret::shy: ههههههههههههههههههههههههههه

ناطرين القصه الطريفه غيروووو
واحد من الافارقه خدم واحده خدمه كوننتال في احدى الاماكن الخدميه
الرجال بغى يشكره قال له انا اشهد انك ذيب ولاكل الذيابه
الا صاحبنا كشر وعلامات الاستغراب باديه على وجهه وزعل ......الريال حس ان الموظف خذ بخاطره بشي
سأله يافلان اشوفك زعلت رد عليه ههههههههه انت توسبوني ليش :eek5: متى سبيتك انت قولت زيب ليش انا هيوان :nice:
بداء الرجال يشرح له ان الكلمه هذه مدح عندنا وذكره بنادي السد وعبدالله عبيد وناصر كميل وشعار نادي السد
وقال انت تشع اي نادي :nice: قال السد ههههههههه ولعبية السد يسمونهم عيال الذيب
توته توته وخلصت الحدوته :nice:

[بوخالد911]

ومن ذرابتكم أستفيد
:nice:

[العلم]

العلم
كم مرة سمعت جعلك البلا خخخخخخخ

خخخخخخخخ بصمة لاتطلعين الفضايح .. :looking: الجماعة يبون الكلمات الذربة والسنعة بس بس بس

[النهار]

:oops:إذا واحد قالك هاي .. أترد عليه هايات :shy:

هاي توقف جدام كافتريا الورد وتقول له هاي يرد عليك كيساهي

[حمد 2002]

:shy:
هاي توقف جدام كافتريا الورد وتقول له هاي يرد عليك كيساهي

[بصمة قطرية]

خخخخخخخخ بصمة لاتطلعين الفضايح .. :looking: الجماعة يبون الكلمات الذربة والسنعة بس بس بس
خخخخخخخ
مي سوري :secret:

[بصمة قطرية]

فديتش :shy:
يا جعلني أفداش
عساني ما أذوق حزنش ..

[حمد 2002]

إذا حد قالك هلا .. أترد عليه هلا والله :shy:

[حمد 2002]

فديتش :shy:
يا جعلني أفداش
عساني ما أذوق حزنش ..

:shy:

[نور الحور]

فديتش :shy:
يا جعلني أفداش
عساني ما أذوق حزنش ..


اخبر العجمان يتكلمون بالشين ..

شلونش بصمة ؟

[بصمة قطرية]

:shy:

اش
شششش
يعني لي مب لك ..

[العلم]

وشوشووشووووشوشووووووششششش لهجتنا :shy: مره يقولون حلوه ومره يضحكون علينا :shy:

لبى قلبش :shy: يايمه :secret:

[بصمة قطرية]

اخبر العجمان يتكلمون بالشين ..

شلونش بصمة ؟

في غيرهم بعد اللي بتكلمون بالشين
و في اللي بالسين
و في اللي بالاتس ..

[بوخالد911]

في غيرهم بعد اللي بتكلمون بالشين
و في اللي بالسين
و في اللي بالاتس ..


بجذيه كم لهجة بقطر؟!؟!؟!؟:secret:

[العلم]

وفيه بالا ( ج) لهجة الحضر

[بصمة قطرية]

بجذيه كم لهجة بقطر؟!؟!؟!؟:secret:
شلونج
شلونش
شلونس
شلونتس
شلونك

الحسبة عندك ..

[تغلبية]

^

وفيه ناس يقولون اسلونت مع سكته لطيفه على التاء بس ما اعرف اي قبيلة

[بصمة قطرية]

^

وفيه ناس يقولون اسلونت مع سكته لطيفه على التاء بس ما اعرف اي قبيلة

اسلونت ..!
ما قد سمعتها
سمعت سلونتس ..

[توشيبا]

صحيح ...

انزين يعني نمشي على النمط الحديث والا الديناصوري ؟!

كلش مب عدل نتكلم بتعابير تخص قبيلة معينة من باب الجهل بالشيء ؟

نتمنى التوضيح من المخضرمين

وانا مايحضرني شي حالياً :shy:



كاني قريت انك من اهل الوادي توشيبا والا انا غلطانة :shy:

ننتظرك غيروووو .... وبرواية أخرى نحتريك :shy:

مراح اشقح بعيد يمكن يصير اختلاف في الردود بسبب ودي بس بحاول اطقطق علي الماشي
يمكن شخص من قبيله يسولف ويقول كلمه ويرد عليه واحد يمكن اخوه او ولد عمه اشفيك قلبت كانك من ...؟؟

كان بالاول يعرفون الشخص من لهجته ولو انه عاش مع قبيله عمره كله واخذ عداتها وتقليد هاذي القبيله فيه شي يميزه انه ماينتمي عن هاذي القبيله حتي لو من لبسه


في زماننا هذا مافيه سب اختلاف كلش حتي في المظهر والنطق وصار بعض الخضر يتكلم بمنطوق اهل الباديه وصار البدوي يتكلم بمنطوق اهل المدن

وهذا من الاختلاط والجيره الطيبه بين حضرنا وبدونا

وكان يميز البدو عن علي القبيله شيخ يرجعون له في كل مشاكلهم اما الحين صارت فيه دوله وقانون يشمل البدو والحضر

واكبر فخر لنا ان احنا ننطق الشهاده ونصلي علي نبينا محمد صلئ الله عليه وسلم


وذكرتي في ردج انت من الوادي ضنج حد في الوادي بيقولج اخبارج ؟ حتي مايقلون اخبارج يقلون اشلونتس

[تغلبية]

^

يمكن " تس" اختفت مع الاندماج الحاصل في قطر بين الحضر والبدو <<< اقول يمكن:omen2:

واتفق معاك في كل اللي قلته وهذا ماعنيته بالضبط ..




...... هل من مزيد من التعابير ؟

[توشيبا]

تغلبيه اقولها لج بختصار

لو احصل حد اقوله انتم تقلون كذا وكذا يزعل لا من قال

حتي الكثير صار يقول اصلنا نقول تس واهم بالاساس لهجتهم تختلف

الاحسن مانتطرف في مثل هالمواضيع

ان شاء الله فهمتي ويش اقصد

[نور الحور]

صح توشيبا .. بعض الناس يتفاخرون بالقبلية ..

ولا يحاولون ينتسبون لقبايل بالتعابير وتقليد اللهجة ..

في الاخير احنا حضر وبدو كلنا مختلطين ..

وفي علاقات نسب ومصاهرة خلت حتى اللهجات تتداخل

[تغلبية]

فاهمة جدا جدا جدا


وفي خاطري كلام بهالخصوص وايد وايد عليه بتقوم داحس والغبراء

لذلك انا اراقب الوضع من بعيد!


حلو ان فيه ناس محتفظة بموروثها اللفظي .... يسعدني جداً هذا الشي

لكن نلاحظ ان فيه لهجة بيضاء طفت على السطح خليط بين بدوي وحضري

بشكل عام حلوة بس ... صفينا على ان احنا مانفهم اكثر اللي ينقال ..!!:(

[بصمة قطرية]

الخليط بين الحضري والبدوي حلو ..
بالنسبة لي رفيقاتي البدويات اغلبهم يتكلمون بهاللغة الخليط ..
و تطلع منهم حلوة ..

[نور الحور]

تغلبية .. حلاته هالموضوع بالحوار العام ..

عاد انتي تمي بالحرب وانا بنتظرج عند بتان المنعطف هههههه

[تغلبية]

حلاته في الحوار العام لانه مفيد وشيق وممتع

بس فيه ناس تحب تشطح بالمواضيع لين تسكر ..


مافيني شدة حرب تراني متسببة ... خلي شياطيني راكدة :shy:
:

[توشيبا]

فاهمة جدا جدا جدا


وفي خاطري كلام بهالخصوص وايد وايد عليه بتقوم داحس والغبراء

لذلك انا اراقب الوضع من بعيد!


حلو ان فيه ناس محتفظة بموروثها اللفظي .... يسعدني جداً هذا الشي

لكن نلاحظ ان فيه لهجة بيضاء طفت على السطح خليط بين بدوي وحضري

بشكل عام حلوة بس ... صفينا على ان احنا مانفهم اكثر اللي ينقال ..!!:(

مره عصبت علي موظفه وكنت اتكلم بسرعه واصارخ عليها

راحت للمدير تقول له فلان معصب ويقول تس تس تس تس مب فاهمه اي كتاب يقصد يخص تس

المدير سلك فيها شوي قال تس النظام الجديد روحي حق فلانه يمكن تحصلين الكتاب اللي يخصه عندها

متصلي واهو منفحر ضحك ويقولي السالفه

[لاجل QT]

هلأ:nice:

يازين السنع واهلة:shy:

يالبا قلبهم:shy:

لبية = لبيت بمنى او لبيت حاجة

اشلون طواحينك = تطحن ماجها

الطواحين هي الاسنان:)..كانة يقولة ابشرك موجودة وتشتغل:nice:

ميرسي نور على موضوع السنع:)

[بصمة قطرية]

تغلبية
ناوية تسكرين الموضوع ..!!

[بصمة قطرية]

هلأ:nice:

يازين السنع واهلة:shy:

يالبا قلبهم:shy:

لبية = لبيت بمنى او لبيت حاجة

اشلون طواحينك = تطحن ماجها

الطواحين هي الاسنان:)..كانة يقولة ابشرك موجودة وتشتغل:nice:

ميرسي نور على موضوع السنع:)

نونا
لبيه بالهاء مش بالتاء المربوطة ..

لبى قلبك و روحك..

[نور الحور]

هلا وغلا ومرحبا بنونا وكل من سير علينا ..

يالبي قلبج :shy:

لبيه لول استثقلها .. اللحين سهله وحلوه وعلمتها عيالي ..

طبعا شيكون الرد عليها ..؟؟؟؟



لبيتي حاجه ..

[لاجل QT]

نونا
لبيه بالهاء مش بالتاء المربوطة ..

لبى قلبك و روحك..

عديها الاملاء لج علية:shy:

المهم النية ههههه

[تغلبية]

مره عصبت علي موظفه وكنت اتكلم بسرعه واصارخ عليها

راحت للمدير تقول له فلان معصب ويقول تس تس تس تس مب فاهمه اي كتاب يقصد يخص تس

المدير سلك فيها شوي قال تس النظام الجديد روحي حق فلانه يمكن تحصلين الكتاب اللي يخصه عندها

متصلي واهو منفحر ضحك ويقولي السالفه


مديرك سياسي نمبر ون

بس الموقف فاتني ... اكششششششن :nice:




تغلبية
ناوية تسكرين الموضوع ..!!



انا ما قلت بسكره بصمة :(

انا قلت لو راح العام بيتسكر لان فيه ناس بتشطح فيه بعيد

والكلام اللي عندي مايصلح اقوله هني

[لاجل QT]

هلا وغلا ومرحبا بنونا وكل من سير علينا ..

يالبي قلبج :shy:

لبيه لول استثقلها .. اللحين سهله وحلوه وعلمتها عيالي ..

طبعا شيكون الرد عليها ..؟؟؟؟



لبيتي حاجه ..

هلا بالمهلي

هلا بام الزين نور الحور

[نور الحور]

هلا بالمهلي

هلا بام الزين نور الحور

ايوااااا ..

بدا التوهق ..

فديتج نونا :shy:

غششيني شيردون؟

[بصمة قطرية]

هلا وغلا ومرحبا بنونا وكل من سير علينا ..

يالبي قلبج :shy:

لبيه لول استثقلها .. اللحين سهله وحلوه وعلمتها عيالي ..

طبعا شيكون الرد عليها ..؟؟؟؟



لبيتي حاجه ..

لبيتي بمنى
لبى قلبش
لبى قلبج

[بصمة قطرية]

ايوااااا ..

بدا التوهق ..

فديتج نونا :shy:

غششيني شيردون؟

المهلي ما يولي ..

يبي لج كورس مكثف يا نور ..

[بصمة قطرية]

مديرك سياسي نمبر ون

بس الموقف فاتني ... اكششششششن :nice:







انا ما قلت بسكره بصمة :(

انا قلت لو راح العام بيتسكر لان فيه ناس بتشطح فيه بعيد

والكلام اللي عندي مايصلح اقوله هني

الحوار العام مثل حبل المشنقة :(
ادلي بدلوك هنا يا أختاه ..

[بصمة قطرية]

عديها الاملاء لج علية:shy:

المهم النية ههههه

خخخخخخ
ايوه اهم شي النيه
مشكلتي الخطأ الإملائي يتراقص قدام عيني خخخخخ

[بصمة قطرية]

مره عصبت علي موظفه وكنت اتكلم بسرعه واصارخ عليها

راحت للمدير تقول له فلان معصب ويقول تس تس تس تس مب فاهمه اي كتاب يقصد يخص تس

المدير سلك فيها شوي قال تس النظام الجديد روحي حق فلانه يمكن تحصلين الكتاب اللي يخصه عندها

متصلي واهو منفحر ضحك ويقولي السالفه

خخخخخخخخ
اصلاً احلى شي وقت العصبية
يطلع المستخبي خخخخخخ

[توشيبا]

خخخخخخخخ
اصلاً احلى شي وقت العصبية
يطلع المستخبي خخخخخخ

بالكتابه اقدر اقول اخبارج > ج

بس بالنطق ماعرف حتي لو احاول اقولها تطلع مني غلط

الاقول اخبارتس

[تغلبية]

الحوار العام مثل حبل المشنقة :(
ادلي بدلوك هنا يا أختاه ..

مرة تكلمنا في موضوع مقارب ... رحنا نصلي وردينا الموضوع مسحوب للارشيف:weeping:

خلنا هنيه على موضوع السنع والذرابة أبرك


متابعة عن قرب ،،

[Dana’1]

اللهجة تتأثر بالي حولها
مثلا إلي بمنطقة وهجرة مافيها إلا ربعة تلاقيها لهجة قوية ماكتسب شي من الخارج
لكن لما تكون مدينة كبير وهذا يخالط هذاك عمر.. مو يوم ولا يومين سنييين وبنيين أكيد إلا ما تتأثر لهجتة لو شوي
وبصراحة التنوع باللهجات حلو وفية متعة..أنا ربيت بمنطقة سمعت وتكلمت أغلب لهجات السعودية اللي تطرأ على البال... طبعا عاشرتهم بجميع المراحل الدراسية ...لان الجبيل الصناعية وجهة لأغلب الناس من مناطق المملكة الثانية

الشرقية بمختلف مدنها ولهجة هل زبير
الشمال ولهجاتهم المختلفة بين شمر ورولة وعنزة
القصمان بمختلف مدنهم وقراهم .. ومختلف مدن نجد
الحجاز بإختلاف عروقهم أشراف وبدوا وحضر وجاوة وتكارنه
جيزان والجنوب عموما
وكانت أغرب لهجة وإلي مستحييييل أمسك شي منها أبدا وإن مسكت كلمة مافهمتها
هي لهجة أهل فيفا وبعض لهجات جنوب المملكة... حتى إني اضحك معهن وأقولهن مستحيل هذا عربي.. وهن يصرن إنها عربي!!
حتى هنا بقطر يوم كنت موظفةكان في حضر وبدو معي
اختلاف اللهجات بان معي حتى بين الحضريات وأحيان من نفس القبيلة لهجتهن تختلف من وحدة لوحدة
وكذالك البدويات.. وأتوقع لنفس السبب البيئة إلي حولهن لها دور

[العلياا]

استمتعت جدا بقراءة المشاركات

فعلا بعض الكلمات قليلة التداول بين النساء

متابعة .......

[شبح الصمت]

موضوع جميل ورائع

وما قصرتم كفيتم ووفيتم

[Dana’1]

لمن حد يرد على طلبك .. أنت تآمر .. او أمر تقول له تسلم ما يامر عليك عدو.. او مايامر عليك ظالم

عيدك مبارك= علينا وعليك يتبارك.. عساك من عوادة يارب وتكمل تحفي وتهنئة

من العايدين والفايزين= من الغانمين والسالمين

واحيان بس يقولك من العايدين = من الفايزين

[sweet qatar]

موضوع جميل والمشاركات رائعة

يعطيج العافية نور وكل من شارك

[بصمة قطرية]

بالكتابه اقدر اقول اخبارج > ج

بس بالنطق ماعرف حتي لو احاول اقولها تطلع مني غلط

الاقول اخبارتس
خخخخخخخخخخ
فعلاً في الكتابة سهل جداً
لكن اللفظ صعب على اللي تعود ..

[بصمة قطرية]

مرة تكلمنا في موضوع مقارب ... رحنا نصلي وردينا الموضوع مسحوب للارشيف:weeping:

خلنا هنيه على موضوع السنع والذرابة أبرك


متابعة عن قرب ،،

اي بالله خلينا هنا أبرك ..
ماحنا بناقصين أرشفة ..

[Dana’1]

قبل شوي في بول الفلبيني يتحفى وقالي من بن بينهن قال لي المعونة ...قلت له الله يعينك وممكن عانك الله
شكلة ماخذ كورس عند بدو :)

[R 7 A L]

قبل شوي في بول الفلبيني يتحفى وقالي من بن بينهن قال لي المعونة ...قلت له الله يعينك وممكن عانك الله
شكلة ماخذ كورس عند بدو :)



مافهمت الي بالأحمر

[Dana’1]

مافهمت الي بالأحمر

في مقهى بَول (paul) بفيلاجيو النادل الفلبيني...تحفاني يعني إستقبلي بكلامات الترحيب اهلا مرحبا صباح الخير ومن بين هالكلامات قالي المعوونة:) إستغربت الكلمه منه بصراحة

[غايه الطواش]

قبل شوي في بول الفلبيني يتحفى وقالي من بن بينهن قال لي المعونة ...قلت له الله يعينك وممكن عانك الله
شكلة ماخذ كورس عند بدو :)

ليكون بول فيلاجيو لانه نفس الشي فلبيني يتحفى ويتكلم بدوي سالته رفيجتي مشتغل فالسعوديه ؟؟!

[غايه الطواش]

توي اشوف ردج على رحال
كنت حاسه انه هو :)

[نور الحور]

اهلين سويت الله يعافيج ويعافي كل من شارك ..

ديور اي اعرفه هالفلبيني يحليله راعي سنع وذرابه هههه

[Dana’1]

ليكون بول فيلاجيو لانه نفس الشي فلبيني يتحفى ويتكلم بدوي سالته رفيجتي مشتغل فالسعوديه ؟؟!
صحيح فرع فيلاجيو...عجبني ترحيبة بحرارة ،،،وما استفسرت منه كيف عرف هالكلام أكتفيت بالرد عليه وكان مستعجل وجاتني الفلبينية تاخذ الطلب


يوم سألتة صديقتك..قالكم إنه إشتغل بالسعودية؟

[غايه الطواش]

صحيح فرع فيلاجيو...عجبني ترحيبة بحرارة ،،،وما استفسرت منه كيف عرف هالكلام أكتفيت بالرد عليه وكان مستعجل وجاتني الفلبينية تاخذ الطلب


يوم سألتة صديقتك..قالكم إنه إشتغل بالسعودية؟

قال لا :)

[Dana’1]

قال لا :)

أجل الكورس من بدوا قطر :)

[R 7 A L]

في مقهى بَول (paul) بفيلاجيو النادل الفلبيني...تحفاني يعني إستقبلي بكلامات الترحيب اهلا مرحبا صباح الخير ومن بين هالكلامات قالي المعوونة:) إستغربت الكلمه منه بصراحة


اشكرك على التوضيح

ترا اعرف معنى تحفاني (:

[Dana’1]

اشكرك على التوضيح

ترا اعرف معنى تحفاني (:

العفوا..هههههه حلوة

[بوحارب]

والبقا يا عيال ;)

[الجـــوديّ]

يعجبوني هالغرباء في محاولتهم للتقرب من الزباين في تعلمهم لثقافه الاخر ومخاطبته به

قمة الذكاء والمرونه للمحافظه علي لقمة العيش
في وقت الشاي. - المرخيه.
دار هالحوار
بعد الطلب والتسجيل.
احدهم.: ياولد نظارتك حلوه. ستايل وفاشون.
العامل : لااااااا هنننننتتت. :shy::shy:::shy::ok2::shy:
احدهم: سلمت. يحليلك.

[pink pearl]

شمعناة خطاك الااش؟؟؟

[توشيبا]

شمعناة خطاك الااش؟؟؟

الرجل الردئ


خطاك اللاش = ابعد الله عنك الرجل الردئ حتى لايؤذيك


بس هالجيل فاهمها خطاء من قلب علي باله خطاك السوء او الشر هههههههههه

[بوحارب]

يعجبوني هالغرباء في محاولتهم للتقرب من الزباين في تعلمهم لثقافه الاخر ومخاطبته به

قمة الذكاء والمرونه للمحافظه علي لقمة العيش
في وقت الشاي. - المرخيه.
دار هالحوار
بعد الطلب والتسجيل.
احدهم.: ياولد نظارتك حلوه. ستايل وفاشون.
العامل : لااااااا هنننننتتت. :shy::shy:::shy::ok2::shy:
احدهم: سلمت. يحليلك.

الحين جابوه عندنا في فرع الخريطيات

وعليه ردود ودك تقوله اشدخل

مثلا يعطيني الكرك وأقوله مشكور

يرد يقولي عز الله مقامك

اشدخل يالذيب :)

[white bird]

^

هههههههههههههههههههههههههههههههههه

توشيبا
اللي اعرفه اللاش = اللاشيء

[pink pearl]

حسبت معناة اللاش الشر :/

[R 7 A L]

شمعناة خطاك الااش؟؟؟



اللاش هو الردي كما ذكر الأخ توشيبا

[نور الحور]

سؤال ..

اللحين لو واحد مسوي لواحد عشا ..

وبعدين قال له هذا مب عشاك (يعني مو قدرك) ..

شيرد عليه الشخص الثاني المفروض ؟؟:secret:

[شبح الصمت]

عادي شوفي لو قالك مهب عشاك




قولي له الي ما يعرف الطير يشويه وبس













تردين عليه افا يا زا العلم ما يصير كل هزا ومهب عشاي عجل لو عشاي وش بتذبح لي ديناصور ..




المهم

هههههههههههههههههههههههههههههههههههههاي























ردي علي قولي له لا هنت على وكثر الله خيرك وانشهد انك ما قصرت وبيض الله وجهك

وش بتردين عليه بعد

[بوخالد911]

سؤال ..

اللحين لو واحد مسوي لواحد عشا ..

وبعدين قال له هذا مب عشاك (يعني مو قدرك) ..

شيرد عليه الشخص الثاني المفروض ؟؟:secret:


يقووول : كفيت ووفيت
بيض الله وجهك

:nice:

[عطر فرنسي]

مثل ماقال اخوي شبح هزا مو عشاك هههههههههه

[نور الحور]

عادي شوفي لو قالك مهب عشاك




قولي له الي ما يعرف الطير يشويه وبس













تردين عليه افا يا زا العلم ما يصير كل هزا ومهب عشاي عجل لو عشاي وش بتذبح لي ديناصور ..




المهم

هههههههههههههههههههههههههههههههههههههاي























ردي علي قولي له لا هنت على وكثر الله خيرك وانشهد انك ما قصرت وبيض الله وجهك

وش بتردين عليه بعد



هههههههههههههه

ومنكم نستفيد ..

حسبت ان في عبارة معينة نرد بها :shy:

عاد أنا للحين محد قال لي مب عشاج هههههههههههه

أبي أعرف تحسباً .. يمكن حد يذبح لي ذبيحة ولا كذا يعني هههههههه

[شبح الصمت]

بوخالد بيض الله وجهك


عطر صج وانا طالع ما قلت لك اكرمك الله على حسن الضيافة

وعلى اللقيمات والكرك العجيب والبيتزا والكنافه



كان باقي بس لقين ونضرب بالخمس انا والشلة الجميلة الي معاي وندعي لك واحنا راقدين


بس يلا مره ثانية تويس صغير

[نور الحور]

يقووول : كفيت ووفيت
بيض الله وجهك

:nice:


خلاص سجلتها ..

سهلة وحلوة وبسرعة تنحفظ ..

مو شبح كاتب لي معلقة :(

جزاك الله خير يا أبا خالد :nice:

[نور الحور]

مثل ماقال اخوي شبح هزا مو عشاك هههههههههه

ما قال جذي :anger1:

لا تألف بليز :anger1:

[شبح الصمت]

هههههههههههههه

ومنكم نستفيد ..

حسبت ان في عبارة معينة نرد بها :shy:

عاد أنا للحين محد قال لي مب عشاج هههههههههههه

أبي أعرف تحسباً .. يمكن حد يذبح لي ذبيحة ولا كذا يعني هههههههه




انزين لو اذبحوا لج سمك وش بتردين عليهم ..



شوفي الي بيذبح لج سمك ويقولك مهب عشاك

هذه تدرين شتسوين فيه لا تعطينه وجه حتى انعم الله عليك لا تقولينها له



مشي يدك في الكراسي وطلعي ركيض وركبي موترك


ههههههههههههاي

[عطر فرنسي]

بوخالد بيض الله وجهك


عطر صج وانا طالع ما قلت لك اكرمك الله على حسن الضيافة

وعلى اللقيمات والكرك العجيب والبيتزا والكنافه



كان باقي بس لقين ونضرب بالخمس انا والشلة الجميلة الي معاي وندعي لك واحنا راقدين


بس يلا مره ثانية تويس صغير

انت راعي المكان مايحتاج تقول والمكان مكانك

[نور الحور]

انزين لو اذبحوا لج سمك وش بتردين عليهم ..



شوفي الي بيذبح لج سمك ويقولك مهب عشاك

هذه تدرين شتسوين فيه لا تعطينه وجه حتى انعم الله عليك لا تقولينها له



مشي يدك في الكراسي وطلعي ركيض وركبي موترك


ههههههههههههاي


حسبالك مقصة أنا :anger1:

السمج ينذبح ؟





وأصلاً ماحبه .. بقوله أكرمك الله .. وين ذبيحتي :shy:

^


عشان محد يفكر يسويها فيني ههههههههه

[نور الحور]

انت راعي المكان مايحتاج تقول والمكان مكانك


انتظر رد شبح على هالجملة هههههههههههههه

[شبح الصمت]

انت راعي المكان مايحتاج تقول والمكان مكانك



اكيد ياخوي راعي مكان

ارحم الله والديك

[شبح الصمت]

انتظر رد شبح على هالجملة هههههههههههههه


ما لها رد معين خيتووو

[بصمة قطرية]

الرجل الردئ


خطاك اللاش = ابعد الله عنك الرجل الردئ حتى لايؤذيك


بس هالجيل فاهمها خطاء من قلب علي باله خطاك السوء او الشر هههههههههه

خطاك اللاش
ما تستخدم هني إلا قليل
ما سمعناها إلا في المسلسلات الكويتية ..
و إذا كان معاناها مثل ما ذكرته توشيبا
الرجل الرديء فهي رجالية بحته صح ..!!
صعبة تقولها الوحدة لوحدة خطاج اللاش ..!!!
لأن التعبير يخص الرجال ..

تعودنا يكون الرد في حالة
خطاك الشر ..
الشر ما يجيك ولا تواجهه ..

[نور الحور]

انزين ممكن توضيح لعبارات التهنئة برمضان والعيد

وشلون نرد عليها ؟

[توشيبا]

يناديج زوجج نور تقولين يالبيه يرد لبيتي في منئ


واذا شاعري يرد ويقول لبيييه يابو عيون وساع. محدن غيرك اللبيله



بس اهم شي مب يناديج وتقولي ها ويش تبي

[توشيبا]

قاعد ادور مقطع فيديو اشلون تبارك بالعيد هههههههه

[نور الحور]

يناديج زوجج نور تقولين يالبيه يرد لبيتي في منئ


واذا شاعري يرد ويقول لبيييه يابو عيون وساع. محدن غيرك اللبيله



بس اهم شي مب يناديج وتقولي ها ويش تبي


وت؟








جين .. اوك .. انا كلللش في معلوم :tease: