مستشفى حمد .. عالجوني فأنا إنسان .. وخلوا الوثيقة

[وتد]

" بسم الله توكلنا "

بداية : تحية عطرة إلى جميع منتسبي منتدى شبكة الاسهم القطرية

اليوم قررت أكتب لكم هالقصة اللي صار لها كثير تتعبني وتؤرق مضجعي

فلابد لي أن اعرف عن نفسي في البداية : أنا شاب قطري بين قوسين ( وثيقة قطرية ) .. فوالدي رحمه الله قطري بس بدون أوراق .. ووالدتي قطرية

http://im84.gulfup.com/PPK11j.jpg (http://www.gulfup.com/?YtDHkF)

ولن اخوض في الأصول ولا بالمطالبة بحقوقي كمواطن أصيل في هذه الارض ( أبى من أبى ورضي من رضي )

اليوم موضوعي جداً انساني وجداً مؤلم لمن يعرفني أو لمن هو قريب مني أو لمن ساعدني لغاية اليوم

أنا شاب في الثلاثينات وأعاني من سمنة مفرطة : ابتلاني الله بها ، او بليت روحي فيها ولم أنتبه على نفسي الا وانا في حال يرثى لها

حاولت اني اتعالج في الدوحة ولكن الابواب كلها أغلقت أمامي ( وليست لي القدرة على السفر للخارج لظروفي المعقدة )

رغم أني أكره العمليات لكن ماباليد حيلة فبدأت الذهاب للمستشفى وكانت معاناتي في المشي

فأنا لا استطيع المشي طويلا ، وليست لي القدرة على متابعة المواعيد : ولكني أجبرت نفسي على كل ذلك ..

طلبت من الاخوة في مستشفى حمد انقاذي

فقلت لهم بهذا النص

( يا دكتورة انقذيني دام اني قادر امشي )
( يادكتور انا حالتي صعبة وما اقدر اجي كل يوم ، فساعدوني وانقذوني )

ماقصرت الدكتورة وحاولت جهدها .. ولكن

طلبت مني الدكتورة اني اخفف وزني .. لكني ما قدرت لأني لو أقدر اخفف وزني جان ما رحت المستشفى بريولي

فعطتني الدكتورة تحاليل وفحوصات لازم اسويها .. والحمدلله خلصتها بعد عناء ومساعدة الاخرين لي على المشي وتسهيل دربي

ربي يجزيهم خير

والدكتورة كتبت لي ادوية .. حتى استخدمها لكن مافي فايدة

طلبت لي دواء من الخارج على نفقة مستششفى حمد .. وحتى اول مايوصل اني اترقد عندهم ويبدوأن علاجي

فتعذرت الصيدلية بأني لست قطريا .. ولا يحق لي العلاج وطلب الدواء

اوكي انا مش قطري لكني انسان .. وحالتي خطيرة وصعبة

فأخبرتهم ان امي قطرية وعلاجنا مجاني .. قالوا لازم تجيب امك ..

حسيت بالمهانة كثير .. أجيب امي ليش وهي كبيرة بالسن علشان تترجى المسؤول .. والله مايستحي هالمسؤول

بدأت مراحل التعب لي فطلبت منهم اني اشتري الدوا على حسابي .. علشان اكمل علاجي

لكن مافي فايدة .. فطلبت اسم الدوا من الدكتورة .. وخبرتني أني اول ما اجيبه من امريكا اتصل لها

المهم شاريت الدوا ووصل في اقل من اسبوع واتصلت لها ووعدتني بيوم وحددت تاريخ الرقدة في المستشفى

ورحت في اليوم الموعود

وانتظرت موعدي

والا يجيني اتصال منها تقولي يا فلان لا تجي اليوم

فخبرتها اني موجود بالمستشفى وجالس انتظرها ( فطلبت اني ادخل لها المكتب )

والله اني تعبي بهاليوم ما اقدر اوصفه حتى اني ودعت اهلي وكأني مسافر ومش راجع .. وحسايف ع دمعات امي وقتها

المهم

شوي الا الدكتورة تخبرني ان مستشفى حمد ماعندهم امكانية يعالجوني

ماكو ميزان

ماكو غرفة

ماكو سرير يشيلني

ماكو أدوية تساعدني

عرضت عليهم اني اشتري كل شي الا الغرفة طبعا :)

مافي فايدة

ليش ما يبون يعالجوني مش عارف ( كل هذا لان عندي وثيقة )

يعني اللي عنده وثيقة يموت .. والا يروح كوكب ثاني يتعالج

المهم

مع تكرار الاتصالات لهم .. مالقيت حل لمشكلتي

الى ان عرف بقصتي أحد زملاء العمل وأعده أخا لي .. وحاول يساعدني جزاه الله خير

الين وصل مكتب وزير الصحة ( مدير مكتبه حسب علمي ) وبعد عده محاولات منه

جاه الرد ( بدال ماتتوسطون لعيال الوثايق .. توسطوا لاهل قطر )

الظاهر نسى ان عيال الوثايق هم نفسهم اهل قطر هم نفسهم عيال هالارض

ع الاقل حسسني انك انسان وقول لي انسان لاتقول وثايق

بلادنا في خير ونعمة ، وبلادنا مامثلها بلاد موفرين لنا كل شي ( بس هالناس اللي بالاماكن الغلط ، متى بنتخلص منهم )

والله اشكثر تمنيت اني اتكلم واقول ( وين الصحة و التعليم ) اللي طالعين لنا فيهم

المشكلة في بعض المسؤولين الغلط اللي حاطينهم نسووا انهم مؤتمنين علينا من سمو الامير ربي يحفظه

وانا اليوم اكتب لكم وانا خلاص وزني زاد عن وقت بداية مراجعاتي

وصار لي سنة ونص على هالحال

وزين مني قادر اوقف على ريولي للحين

وزني تعدي الـ 300 بمراحل كثيرة

ولا جاني اي رد من المستشفى

وصادف يوم 25/05/2014 في جريدة الراية .. انهم معالجين حالات اوزانهم فوق ال600

طيب انا ويني .. ووين علاجي .. ووين لقيتو سرير

ونفس ماقالت لي الدكتورة انت اول واحد تجينا بهذا الوزن

يعني المفروض تكون لي اولوية دام اني اول واحد ووزني عالي

طيب هذا بو 600

وين لقيتوا له ميزان

ووين لقيتو له سرير

ووين لقيتو له دوا

ووين
ووين
ووين

والله مادري وش اكتب .. بس فيني حرة مو طبيعية .. وفيني قهر مو طبيعي .. وفيني الم موطبيعي .. وحالتي صعبة

شاسوي وشنو الدبرة

ناس اوزانهم 80 و70 سوتها وانا للحين :weeping:

وهاي صور من تقريري بالانجليزي وترجمته بالعربي ,ان حالتي صعبة ولازم اترقد ويتابعوني

http://im84.gulfup.com/nMu6Bb.jpg (http://www.gulfup.com/?8ZX4hd)



http://im84.gulfup.com/jMkTU7.jpg (http://www.gulfup.com/?BF2N4O)

وهذا التقرير الصحفي في الراية

http://im84.gulfup.com/il8v0b.jpg (http://www.gulfup.com/?SwWyLq)

وهذا الدكتور نفسه شافني وقال حالتك صعبة وتم يسألني .. بعض الاسئلة

بس وش فايدة الاسئلة دام ماكو علاج عندكم

وسامحوني يا اعضاء المنتدى طولت عليكم

مأساتي متى بتخلص ما ادري ؟؟؟

قصتي لكم مطروحة للنقاش .. ما ابي حد يروح لموضوع ثاني

أطلب دعواتكم يالغاليين

واطلبوا لنا ان ربي يسهل امورنا كلها

أخوكم

وتد

[عاهد بن علي]

عسى الله يكون في عونك وعون كل مسلم اللهم آمين

[العنيده]

الله يكون في عونك وان شاء الله يسخر لك اللي يعاونك ان شاء الله

[غايه الطواش]

حسبي الله ونعم الوكيل فيهم حسبي الله ونعم الوكيل فيهم ....
شوف عيني اجانب مسوين القص بس لانه يعرفون حد بالمستشفى .. و1 انت وثيقه وولد قطريه جيه يصير فيه ,,, يارب يسخر لك من عباده الله يوفقك وينفعك ...

وبعدين اعتقد ورقه من المحكه تكفي انك ولد قطريه تججيب امك ليش .. ممكن اعرف اسم الشخص الي قال جيب امك ؟؟

[pink pearl]

لاحول ولاقوة إلا بالله
الله يكون في عونك يارب

[سمو الروح]

الله يفرجها عليك عاجلا غير اجل

[يمامـة]

حسبي الله ونعم الوكيل فيهم حسبي الله ونعم الوكيل فيهم ....
شوف عيني اجانب مسوين القص بس لانه يعرفون حد بالمستشفى .. و1 انت وثيقه وولد قطريه جيه يصير فيه ,,, يارب يسخر لك من عباده الله يوفقك وينفعك ...

وبعدين اعتقد ورقه من المحكه تكفي انك ولد قطريه تججيب امك ليش .. ممكن اعرف اسم الشخص الي قال جيب امك ؟؟

ليش ورقة من المحكمة ؟

شهادة ميلاده + بطاقة الام تثبت انه ابن قطرية.. ولازم يحصل على استثناء في للعلاج
ويسجل هالاستثناء علشان يدخل السستم..

والله يكون في عونك يا اخوي ويخفف اللي فيك...

القطري اللي كان في الاردن من 14 يوم وزونه فوق 200 ما ادري 300
هذا بعد ولد البلد منقعينه وفي اللي يسوونهم عمليات و اوزانهم اقل بالواسطة
او انهم اجانب استفادوا من شغلهم في حمد..

[Noof_mz]

لا حول ولا قوة الا بالله ، راحت الانسانية و الرحمة من قلوبهم الله يرحمنا برحمته ، الله يساعدك يااخوي ويسر امورك

[Dana’1]

حسبنا الله ونعم الوكيل
الله يكون في عونك...في ناس كذا نفسيات .. بأغلب الوزارات ..وكأنك تطلب من جيبة شي
الله يريح الناس منهم

لا تستسلم لهم...وعسى إلي صار والتأخير يكون خيرة للك...لا تزعل
إلزم الإستغفار ففية البركة والرزق...وأسعى بالمطالة بحقك ..والله يسخر لك عباده الصالحين

[qatari 111]

الله يكون فعونك ويفرجها لك ...
لا حول ولا قوة الا بالله.. انعدمت الانسانيه من بعض المسؤولين

[أسد الجزيرة]

حالتك تستاهل العلاج و المفروض تكون الاولوية لك
الله يعينك و يشفيك

[راعي ال VXR]

لا حول ولا قوة الا بالله حسبي الله ونعم الوكيل
في فتره من الفترات عانيت منهم بسبب سوء علاج ابنتي ...وجرت الرياح بما لا تشتهي السفن
و معتز باشا كما هو مذكور اسمه في الجريده اقول له عامل لي فيها بشبش وبييه طبعا العدد المذكور ب 800 حاله اعتقد كذب
بالعقل يعني 800 حاله وهذا عندكم حاله يعاني ولا عالجتووه

اخي الفاضل اطلب لك من الله الشفاء العاجل واكثر من قول لااله الا انت سبحانك اني كنت من الظالمين ...

[كود نمبر]

الله يشافيك يارب ويفك محنتك بسرع وقت

اخوي ليه ليش ما تشوف مستشفى العمادي او الأهلي بيكون أسرع لك

[المحاميه]

القصه تعور القلب
لاحول ولاقوة الا بالله

يعني الريال حالته صعبه بشهادتكم يااطباء بس ماتقدرون تقدمونله العلاج
والاجانب اللي ماخذين حقوقهم بالطوب والعرض؟

وين القسم عيل
وين الامانه الطبيه
وين الانسانيه؟

اي واحد على هذي الشاكله لا يستحق الاحترام ابدا

[الحياة الخالدة]

لا حول و لا قوة إلا بالله العلي العظيم .. أستغفر الله العظيم من كل ذنب عظيم
خير قطر اللي من فضل الله واصل الشرق و الغرب .. و عيزانين عن علاج حالة إنسانية تخص واحد من عيالها

الله يفرجها عليك ياخوي من أوسع أبوابه و نتمنى من كل قلوبنا أن يصل صوتك إلى الجهات المختصة عبر منتدانا
حسبنا الله و نعم الوكيل

[العلياا]

شي يعور القلب والله
وتوني اعرف انهم محرومين من العلاج بصراحة شي مؤسف جداً
لان المساعدات قاعدة تروح برا وانتوا اولى ابها

الله يفرج عليك ويفك كربتك وتتشافى بأسرع وقت ممكن :(

[امـ حمد]

لاحول ولا قوة إلا بالله العلي العظيم
الله يسخر لك عباده الصالحين ويشفيك يارب

[يمامـة]

شي يعور القلب والله
وتوني اعرف انهم محرومين من العلاج بصراحة شي مؤسف جداً
لان المساعدات قاعدة تروح برا وانتوا اولى ابها

الله يفرج عليك ويفك كربتك وتتشافى بأسرع وقت ممكن :(

اصحاب الوثايق مب محرومين من العلاج ابدا يالعليا
يعامل معاملة القطري..

بس الظاهر المشكلة تخص عملية التكميم !!

نسأل الله انه يفرجها بفضله وكرمه على صاحب المشكلة..

[ضوى]

ان شاء الله العضو من المجلس الاعلى للصحة يتواصل معاك

حسبي الله ونعم الوكيل ولا بارك الله في كل مسؤل او اقل منه يحاول يذل عيال البلد الله عليهم الظلام

[الحاقول]

المشكله في مكتب الوزير لم يتجاوب مع هذه الحاله وكان رد الموظف هناك سلبي
الله يذكر الدكتوره غاليه بالخير كانت دائما تساعد الناس عند حضورهم الى مكتبها

[الخيالة]

أجانب جايين من برة معطينهم تأمين يعالجون ببلاش والله حرام جذيه الله يكون في عونه

[العلياا]

اصحاب الوثايق مب محرومين من العلاج ابدا يالعليا
يعامل معاملة القطري..

بس الظاهر المشكلة تخص عملية التكميم !!

نسأل الله انه يفرجها بفضله وكرمه على صاحب المشكلة..

يعني الادوية اللي اوصفته له كلها عشان تخفيف الوزن ؟
وحتى لو كان هالنوع من الادوية ليش ما يصرفونها له لان حالته استثنائية مو مثل ربعنا اللي اوزانهم 100

والله انه شي يقهر

[يمامـة]

يعني الادوية اللي اوصفته له كلها عشان تخفيف الوزن ؟
وحتى لو كان هالنوع من الادوية ليش ما يصرفونها له لان حالته استثنائية مو مثل ربعنا اللي اوزانهم 100

والله انه شي يقهر

الواضح من مشاركته انه مب مثبت في المستشفى انه امه قطرية..
فمجرد ما يثبت ان امه قطرية اعتقد تمشي له الأدوية..

اللهم هناك بعض الأدوية اللي ما تنصرف الا للقطري فقط،، فما ادري
هل هل الوثايق وذوي الاحتياجات الخاصة وابناء القطريات تمشي لهم ولا لا..

بخصوص كلامج اتفق معاج حالته خاصة والمفروض تنخذ بعين الاعتبار
حتى لو كان اجنبي ..

فالانسانية ما تعرف جنسيات وحالته تفوق الحالات الانسانية الملحة اللي المفروض
تنظر لها بعين الرحمة..

[بنت الجزيرة]

اخوي اذا ممكن ترسل لي رقمك عالخاص
بيكلمك أخوي وباذن الله يفيدك بالحلول

[الحياة الخالدة]

لكل من يسعى في حل مشكلة أخونا وتد .. جزاكم الله خير و عساها في ميزان حسناتكم يوم القيامة

[ALJokar]

حسبي الله عليهم وحسبي الله على كل مسوول ماساعدك


سؤال تقدر تعرض حالتك لجنه حقوق الانسان يمكن تساعدك بالموضوع ياليت لو فيه محامي في المنتدى يكفل بقضيه مع تقرير مع اداخل لجنه حقوق الانسان تسوون خير وجزاكم الله خير

[طبيب قطري]

http://www.qatarshares.com/vb/showthread.php?584951-%DD%ED%D1%E6%D3%C7%CA-%DF%DC%DC%DC%E6%D1%E6%E4%C7-(-%D8%D1%DE-%C7%E1%E6%DE%C7%ED%C9-%D8%D1%DE-%C7%E1%C7%E4%CA%DE%C7%E1-%C7%E1%C3%DA%D1%C7%D6-)

اخوي المجلس الاعلى للصحه مسجل معانا بالمنتدى وهذا الرابط فيه عنوانه .. ان شاءالله يفيدونك

[خالد البلوشي]

اسأل الله أن ينهي معاناتك و أن يفتح عليك جميع الأبواب المغلقه
و إن شاء الله الأخوة في المنتدى يقومون بالواجب معاك

[بصمة قطرية]

اللهم آمين ..
الله يفك عوقك ياخوي
و يسخر لك أبناء الحلال ..

[بوعلاوي]

الله يكون في عونك ان شاء الله مشكلتك لها حل قريب وترتاح .. ما تشوف شر

[النهار]

ان شاءالله صوتك يوصل الي اعلى مستوى والله يسخر لك اولاد الحلال

[@north_star@]

سبحان الله الله العظيم سبحان الله وبحمده ........ الله يكتبلك الشفاء العاجل ويشفيك ويعافيك ويسهل أمورك اللهم امين
ووكلها لله وحده اخوي والله يسخرلك من يساعدك .

[رجل الجزيرة]

الله يكتب لك الشفاء العاجل ويشفيك ويعافيك ويسهل أمورك اللهم امين يا رب العالمين.

[وتد]

اول شي حبيت اشكركم على وقفتكم ودعواتكم ومشكورين وماقصرتوا جميعا

وبخصوص الاستفسارات

اختي * غاية الطواش **

انا ماكتبت الموضوع لتصفية حساب مع اللي قالوا .. او ان اعرضهم للمسائلة .. انا ادور حل حق نفسي .. وبالنسبة حق بطاقة الوالدة قالوا لي البطاقة يمكن ماتفيدك لو هي تجي تكلم المسؤل احسن ..هذا كلامهم

اختي * يمامة *

السموحة منك بس انا موجديد ع الاجراءات ولا ولد امس ... انا مسجل عندهم .. وقلت لج ان في ادوية عطتني اياها الدكتوررة ومانفعتني .. بس الدوا اللي محتاجينه علشان يرقدوني عندهم ويتابعوني الين ينزل وزني هاي اللي لازم يطلبونه .. ومارضوا لاني مو قطري .. ويوم جبته تعذروا بأشياء ثانية .. انا عرفت هني ان عدم علاجي بسبة هالوثيقة او لازم واسطة قوية .. دعواتك خيتي

[نتفـه]

ما اقدر اقول الا حسبي الله ونعم الوكيل فيهم .. انقهرت قسم بالله .. نفس المعاناه رحت الطواري افرفر شوي واموت ويتعاملون بكل برود ولا كأن في حد روحه بتطلع!
ربي يسخر لك عيال الحلال اللي يساعدونك على حل هالمشكله ..

[وتد]

اختي * بنت الجزيرة *

ربي يجزيك خير اختي.. وابشري قريب بطرش رقمي والحين رافع الموضوع لجهة غير وانتظر رد منهم .. وانا اقول في رسالتي عن اللي صاير لي وعن حالتي معاهم .. يخلون الواحد .. بس ان ماحاني رد من هالجهة خلال اسبوعين بالكثير بطرش رقمي لج .. ومشكورة اختي مرة ثانية


والله عاجز جدا عن شكركم وكلكم تستاهلون الخير والله يحفظكم ويحميكم لاهاليكم والله لايخلينا منكم ياااارب

واااااايد مشكوربن يالغاليين مادري شلون اوصف لكم فرحتي بمشاركاتكم وتواصلكم ودعواتكم

ربي يبعد عنا وعنكم كل مكروه وكل شر ويحفظكم ياااارب

اخوكم وتد

[Locale]

الله يفرجها عليك ان شاء الله

[وتد]

اختي .. نتفة .

. ع طاري الطواري شنو شعورك يوم تدشين وعلى بالهم قطرية وتروحين صوب المواطنين وشوي يكتشفون انك وثيقة هههههههه .. صارت لي اكثر من مرة .. وآخر مرة رحت لهم رحت صوب المواطنين ... ويوم شافوا وثيقة .. نادوني يقولون الدكتور حيفحص عليك بمكان ثاني .. ويوم رحت وياهم .. الا مدخليني عيادة فحص الاجانب .. زين ما انتحرت من المنظر .. وقلت للدكتور طلعني وكتب لي ورقة انه مايتحمل مسؤوليتي واني اتحمل مسؤلية روحي ان طلعت من عندهم .. والله رحت ورحت تعالجت بفلوسي ولا هالمذلة .. من اللي ورا هالقرارات كل يوم لاعبين بحسبتنا .. وكل يوم قرار وكل يوم معاملة غير .. آآآآه ياوطني

[بوخالد911]

الله يسهل عليك
ويا ريت تلقى الحل

[al-obaidly]

وثيقه وقطري بالتجنس ماعرفنا السالفه الله يكون في عونكم يارب

[7llo]

الشيخ شتبي في مستشفى حمد تعبان ، خذ صوره من شهاده ميلادك وصوره من بطاقتك الشخصيه وصوره والباطاقه الاصليه لوالدتك واوقف عند كاونتر صحه وعطهم الاوراق بيدخلونهم بالسستم عندهم وعقب روح اي مستشفى خاص روح الاهلي ول العمادي او روح مستشفى الخور او روح مستشفى الوكره العوده ماعليك من مستشفى حمد لانه مستشفى حمد تعبانه دكاتره خرطي الوكره ممتازين بس انت سو التامين الصحي وامورك طيبه الدوله الله يجزاها خير ماقصرت في التامين الصحي

[إعلامي قطر]

..

الله يفك عوقك ويسخر لك عباده إن شاء الله..

للأمانه أعرف شباب حملة وثايق ويحزني وضعهم جداً..

طيبه وأدب وأخلاق ومن عوايل قطريه وأغلب جماعتهم
قطريين وبعضهم معروفين وماسكين مناصب بالبلاد
بس هم للأسف الشديد وثايق لسبب أو لآخر !

والله أتمنى حكومتنا الكريمه تشوف لهم حل
الله يفرجها عليهم ونفتك من سالفة الوثايق للأبد..

..

[كازانوفا]

لا حول ولاقوة الا بالله
ربي يكون بعونك
انا بنت اخوي بتزايد مستمر وللاسف رافضين يعالجوها يمكن لانه مش بني ادمه الله اعلم
وزنها قرب يسك 300

لكن لا نملك سوى الدعاء لك ولهاااا

[limited]

" توسطوا لاهل قطر بدل ماتتوسطون لعيال الوثايق "

قبل لا تجيكم الواسطه ليش انتوا ماتقومون بواجبكم تجاه المحتاجين للخدمات الصحيه سواء قطريين او حملة وثائق ؟؟؟

اتمنى من الدوله ان تضرب بيد من حديد اتجاه كل مسؤؤل لا يقوم بواجبه

لانه وبصراحه

مليون خط احمر تحت وزارة الصحه

او بالاخص


المكتب الطبي

[ضوى]

الشيخ شتبي في مستشفى حمد تعبان ، خذ صوره من شهاده ميلادك وصوره من بطاقتك الشخصيه وصوره والباطاقه الاصليه لوالدتك واوقف عند كاونتر صحه وعطهم الاوراق بيدخلونهم بالسستم عندهم وعقب روح اي مستشفى خاص روح الاهلي ول العمادي او روح مستشفى الخور او روح مستشفى الوكره العوده ماعليك من مستشفى حمد لانه مستشفى حمد تعبانه دكاتره خرطي الوكره ممتازين بس انت سو التامين الصحي وامورك طيبه الدوله الله يجزاها خير ماقصرت في التامين الصحي

هذا الكلام المفيد ، باشر بهالامور وان شاء الله تتضبط امورك

[هيلو كيتي]

الله ايكون في عونك ,, ولاتنسى دعوة صادقة من القلب ترجو فيها الله تعالى,, تسوى الدنيا ومافيها .

[شبح الصمت]

لا حول ولا قوة الا بالله

ياخوي البلى كله في الناس الي مأمنينهم على آرواح الناس وعلى كل شيء اهم راس البلاوي وتصعيب الامور وترى الدولة الحمد لله ما قصرت وفرت كل شيء من وإلى بس الانسان اهو السبب في تصعيب هالاشياء ..

الي يبي يساعد بيساعد وإلا يبي يلف ويدور بيلف ويدور


الله معاك وصوتك باذن الله بيوصل وراح تتشافى بأذن الله

الله يشفيك شفاء عاجل غير آجل
الله يقومك بالسلامة ويلبسك ثوب الشفاء

وتذكر اخوي انه الي فيك هذا ابتلاء وآجر من رب العالمين

يختبر فيه عبده وإن شاء الله انك ما تيأس من رحمة الله ..


الله يشفي جميع مرضى المسلمين آجمعين

[Right]

لا حول ولا قوة إلا بالله العلي العظيم


الله يعينك ويشفيك ، آمين


للأسف أن الأمور بمستشفى حمد ماشيه على الواسطات عيني عينك

وخاصةً الأجانب لاعيبن لعبتهم صح ، يخلصون بعضهم بعض

والقطريين مآكلين ... !!



للأسف ، أن معظم القطريين يسوون العمليات خارج قطر

مع أنه من حقهم يسوونها في مستشفى حمد التابع لبلادهم

والذي ينعم به الأجانب من كل حدب وصوب !!

[قلوب قطر]

الله يشفيك شفاء عاجل غير آجل
الله يقومك بالسلامة ويلبسك ثوب الشفاء

الله يكون في عونك اخوي ...

[فلتة زمانها]

لا حول ولا قوة الا بالله
الله يكون في عونك اخوي ويسهل امورك يااااارب

بصراحه الوضع ما يطمن الناس محتاجه زيادة وعي وتثقيف صحي عن اهمية
زيادة النشاط الحركي وترى العملية حل سريع واخير لكن ما تناسب الكل

[أخت الكل]

الله يسخر لك اللي ينفعك أخوي ويشفيك

الشكوى لله

[توشيبا]

http://www.qatarshares.com/vb/showthread.php?584951-%DD%ED%D1%E6%D3%C7%CA-%DF%DC%DC%DC%E6%D1%E6%E4%C7-(-%D8%D1%DE-%C7%E1%E6%DE%C7%ED%C9-%D8%D1%DE-%C7%E1%C7%E4%CA%DE%C7%E1-%C7%E1%C3%DA%D1%C7%D6-)

اخوي المجلس الاعلى للصحه مسجل معانا بالمنتدى وهذا الرابط فيه عنوانه .. ان شاءالله يفيدونك

اهو وينه للحين مادش الموضوع

حد يرسله رابط الموضوع

ابغي اشوف رده


اخوي صاحب الموضوع الامور طيبه وان شاء الله تتعالج واشوفك في سباير تلعب كوره وتخرب الحشيش

[توشيبا]

للحين متابعين للموضوع

وين عضو الصحه

[وتد]

السلام عليكم جميعا

مشكورين على تفاعلكم يالغاليين والله لايخلينا منكم

والله يحفظكم ويحفظ لكم غاليينكم

والصراحة انا مافيني حيل مراكض والا روح حق هذا وتعال حق هذا وكل واحد ينقلك من شخص الين شخص

وحاليا انتظر رد من جهة معينة خاطبتهم وان شاء الله بدعواتكم تنحل الامور

لكم الف شكر

اخوكم

وتد

[Commando]

ان شاء الله تتيسر امورك

[kitmat]

حسبي الله ونعم الوكيل مخلين الاولويه للأجانب وين المسؤولين مايجوفون مايسمعون حرام عليهم اللي قاعد يصير والله

[ضوى]

اتمنى رئيس مجلس الوزراء يشوف هالموضوع والموضوع الثاني عشان يحارب هالفساد المستشري في المؤسسة

[Right]

واسطات الأجانب أقوى حتى في مستشفى حمد ،

مادري شنو يقدمون من خدمات للحصول على مآربهم ؟!

[العنيده]

الله يكون بعونك ان شاء الله

[طلعة الروح]

الله يسهل أمورك يارب.

بالنسبة حق اللي عاد نفسه مسؤول ويقول (توسطوا لأهل قطر بدل أهل الوثايق) شكله فاهم الحالات الانسانية والمستعجلة خطأ ومب مقدر الامور حق قدرها.
ولما يقول توسطوا للقطري فهو يثبت على نفسه تهمة الفساد الإداري( حتى لو افترضنا انه قصده شريف وقلبه ع القطريين) ، لأن بهالطريقة قاعد يثبت لنا ان الامور تمشي بواسطة حتى في العلاج الطبي!!!!!!

[نفسي عزيزه]

الله يفتحها عليك عاجلا وليس اجلا

[abdalla]

الاخ العزيز وتد فرج الله همك وفك ضيقك ان احببت حل لمشكلتك بالامكان مساعدتك لعمل تكميم المعده عند دكتور محمد خريص ان وجدت انك محتاج لذلك بامكانك ارسال رقمك على الخاص للتواصل وربي يجيب اللي فيه الخير. بالنسبه لما كتبت انا متأكد انها اجتهادات من اناس لا يقدرون المسؤوليه لان الواضح من توجهات الدوله المساواه بين الجميع ويجب ان يعلم هؤلاء كما ان هناك قانون ايضا هناك روح القانون فلا يكون التعامل بكلام مكتوب فقط ولكن بالنظر لكل حاله على حده.

[سهم مضطرب]

ممكن تبعث لي رقمك عالخاص ..

[نفسي عزيزه]

ونعم ف كل من ساهم بمساعدة اخونا

كثر الله امثالكم يامن تحبون المساعده ابتغاء لوجه الله

الله يحرسكم ويغنيكم بفضله ويستر عليكم ويدخلكم جنات النعيم بغير حساب

[kitmat]

الاخ العزيز وتد فرج الله همك وفك ضيقك ان احببت حل لمشكلتك بالامكان مساعدتك لعمل تكميم المعده عند دكتور محمد خريص ان وجدت انك محتاج لذلك بامكانك ارسال رقمك على الخاص للتواصل وربي يجيب اللي فيه الخير. بالنسبه لما كتبت انا متأكد انها اجتهادات من اناس لا يقدرون المسؤوليه لان الواضح من توجهات الدوله المساواه بين الجميع ويجب ان يعلم هؤلاء كما ان هناك قانون ايضا هناك روح القانون فلا يكون التعامل بكلام مكتوب فقط ولكن بالنظر لكل حاله على حده.

كثر الله من أمثالك

[دوحة الجميع]

ليش الجمعيات الخيرية القطرية مثل جمعية قطر الخيرية وجمعية عيد الخيرية ومؤسسة راف الإنسانية ومؤسسة الأصمخ للأعمال الخيرية ماتساهم في علاج مشكلة الأخ ( وتد ) ، اتمنى منهم التدخل السريع وحل مشكلته بسرعه .

[..er..]

امر مؤسف ومخزي انهم يتحججون بالوثيقه او مهما كانت حججهم ..
خيرنا وخير بلادنا يغرق البعيد واللي انولد وتربى وعاش وكل من خير هالبلاد ينقال له مثل هالكلام ..
و إن شاء الله بيعيش اللي عشته هالمدير او السكرتير اللي رده للأسف مافيه ذره انسانيه

أسأل الله العلي العظيم ان يفك كربتك وتتسهل امورك ..
بأذن واحد احد

[مبرمج QA]

الله يكون في عونك وان شاء الله يسخر لك اللي يعاونك ان شاء الله

[AHMED27]

الله يسهل امورك ان شاء الله

[بـويوسف]

لا حول ولا قوة الا بالله

الله يكون بعونك ي اخوي

ذكرتني بسالفه صارت في مستشفى حمد

كنا في غرفة الاقامة القصيرة

ورجال كبير مرقد وشكله قطري وعياله معاه ..

جاه الدكتور وقال له انت حالتك الحين افضل وبناخذك غرفة ثانيه

الرجال قال له يادكتور احس بوجع ... رد عليه الدكتور بناخذك الغرفة الثانيه ونكمل علاجك ان شاء الله

عقب 5 دقايق رجع وتهاوش مع الدكتور

قال ليش تعاملني هالمعاملة ليش توديني عند الاجانب وانا عندي وثيقة ومن هل البلد وتم يقول كلام لدرجة اني حسيت بمعاناته وان هالشي اهانه له

قال للدكتور انا مب قاعد فالمستشفى واحملك انت المسؤلية

والقهر اخر شي الدكتور تم يضحك

الله يكون بعونكم ..

[أم محمد 90]

اخوي انا اقول لو تحط حسابك وكل منا نتبرع بمبلغ بسيط وتروح الاردن تسويها ب 18 الف افضل لك ,,

المنتدى مليان ناس ولو فرضنا كل شي بيحط 500 ريال يعني محتاجين 36 شخص يتبرعون لك وتروح تسويها , مادري اذا اصحاب الوثايق عادي يروحون الاردن ولا لازم تاشيرة ماعرف فهالامور ..


الناس للناس ,, وانا والله لو اقدر ودي اساعدك ..


500 مبلغ تافه جدا جدا بالنسبة لنا كقطرين .. مع احترامي اغلبنا يحطه ف عشا او غدا يوميا ..

والله يوفقك يا اخوي وييسر امرك جد جد تألمت لموضوعك انا وزني قرب من ال100 وكنت مكتئبة جدا ويوميا اصيح ف مابالك حالك ..

الله يشفيك ان شاء الله

[وتد]

يسعد لي مساكم جميعا

والله يديمكم ذخر ماقصرتوا على دعاويكم يالغاليين

واللي اطلبو يساعدوني هم انتوا ماقصرتو وعساكم ع القوة

وبغيت اقول اني بغيت من ورا موضوعي صوتي يوصل والقى حل

وبخصوص محمد خريص انا ارسلت تقريري له مع واحد من الجماعة وتعذر انه مايقدر يسويلي بسبة وزني الزايد واني لازم اضعف

اما سالفة اني اطلب مساعدة مادية فهذا بعيد جدا عن بالي .. اختي ام محمد ماقصرتي ادري انك تبين الاجر

والحمدلله من الناحية المادية كل شي مقدور عليه

وربي ادريبكم انكم مابتقصرون ان طلبت

ربي يعطيكم الصحة والعافية

تقبلوا مني كل التحايا

اخوكم

وتد

[فلتة زمانها]

اخوي وتد لو عرضت مشكلتك في اليوتيوب وبرامج التواصل الاجتماعي وطلبت المساعده صدقني
بيتجاوبون معاك امهر الجراحين في العالم بيتكفلون بعلاجك وبتجيك طياره خاصه والله اتكلم جد

[يمامـة]

وتد خريس سوى عمليات حق بولدزرات و أكثر.. وليش انت طلب منك تنزل ووزنك علشان يسوي لك العملية ؟

واذا الموضوع بالفعل يستدعي تنزل وزنك ورفض خريس هالشي..

مستشفى حمد بيوافقون يسوون لك العملية من غير ما تنزل وزنك؟