طلب استشارة من المتقاعدين والمتقاعدات

[الصايغة]

السلام عليكم,,,,,,

انا افكر بالاستقالة التقاعدية لاني مليييييت فعلا من الشغل, صار لي 17 سنة خدمة وما تنطبق علي شروط التقاعد بس لما سألت بهيئة التقاعد
قالو لي عن الاستقالة التقاعدية وانا بصراحة وااايد مترددة لاني بخسر حول 40% من راتبي طبعا من الاساسي والاجتماعية بس ومثل ما انتو
عارفين باقي العلاوات رايحة...........
أصغر عيالي عمره سنة والباقيين في ابتدائي واعدادي, واخاف اني امل من قعدة البيت مع العلم اني نشيطة وحركية بس خلالالالاص كرهت الشغل
احس اني ايي الشغل مجبورة واشتغل بس عشان احس اني راتبي حلال وارضي ربي وضميري, لهالسبب حابة اي متقاعد او متقاعدة يقولون
لي عن حياة بعد التقاعد هل تحسفوا او حسوا بالملل علما بان عندي بيت ملك مستاجر بايجار بسيط وعندي ارض وزوجي يقول لي ان هذا
قراري هو ما عنده مانع سواء كنت اشتغل او قاعدة بالبيت
ارجوكم محد يبخل علي برايه لاني خلاص واصلة حدي:weeping:

وجزاكم الله خير

[w.qatar]

دام عندج ارض اقول ابني الارض فلتين و اجريهم و تحملي كم سنه هالشغل و عقبها تقاعدي

ولا انقلي مكان ثاني اذا مكانج الحالي مب عاجبج

[ضوى]

اختي الغالية

استخيري وشوفي ربج وين كاتب لج الخير

[Aaziz]

السلام عليكم

اختي بسطي الامور على نفسج ،، ترى دام الانسان صحته طيبه كل امور الدنيا الباقيه تعتبر امور تافهه ،، لو انج تشوفينها كبيره ولكن بمجرد انها تنتهي او تتغير بتلقين نفسج معطتها اكبر من حجمها .

شوفي الشيخه ،، اعتقد والله اعلم ان شغلج صاير فيه شي مضايقج (بغض النظر عن السبب ممكن يكون اشخاص و ممكن يكون قوانين ، مايهم)

بيضل عندج حل وسط (اول) و هو بمثابه فرصة اخيره ،، الي هو تقدمين استقالتج و تبدين في جهة عمل اخرى ،، احيانا تغيير طبيعه العمل و تخصص المهنه يغير النفسيه و الاقبال على العمل .

ايضا حل وسط (ثاني) انج تقدمين اجازه طويله بدون راتب كـ بروفه لتجربه حياه المتقاعد

قرار الاستقاله التقاعديه الي تفكرين فيه ،، هذا قرار انتي تقيسينه حسب الظروف الي انتي تشوفينها (انبهج لموضوع الاستخاره لاكثر من مره)

شخصيا انا من المؤيدين لموضوع التقاعد المبكر .. الدنيا مافيها شي يسوى استمتع بالدنيا و انا بصحتي دامني مأمن الاساسيات

الي متاكد منه ان الانسان اذا تقاعد عقب الوظيفه يحس بفراغ و اعتقد ان الفراغ بالنسبه للمره امر هين << تركز اكثر في تربيه الاولاد داخل البيت و تهتم بشؤون بيتها و زوجها (عندها شي تسويه) اما الرجل كونه يقظي وقت اكثر خارج البيت (مش متعود مثل المره على قعده البيت) فا الفراغ يسبب له اشكاليه اذا ما احسن استغلاله .

الله يكتب لج الي فيه الخير ،، و الاستخاره ثم الاستخاره

[الصايغة]

ما قصرتوا يا اخواني وخواتي على ردودكم وتفاعلكم واخوي Aaziz انا كنت اشتغل بمجال تخصصي لان شهادتي فنية يعني تخصص طبي وكنت حابة شغلي
بس بسبب ظروف البيت والعيال ودوامي كان جدا طويل حسيت انه اثر على بيتي غيرت عملي من اربع سنوات لعمل اداري ماله علاقة بشهادتي وحبيت الشغل
وتميزت فيه خلال 6 اشهر فقط ولله الحمد حتى قسمي متمسك فيني جدا بس المشكلة فيني انا صرت احس اني مليت من شغل الروتين وحابة اسوي لي شغل
ما يقيدني بدوام معين خصوصا ان العيال كبرو ومشاغلهم زادت وصرت حابة اتفرغ لهم وزوجي دايما يقول لي اني لو اشتغلت باي شغلة بكون متميزة فيها
ويشجعني على العمل الحر بشرط انه ما يشغلني عن البيت, مع العلم ان كان عندي صالون نسائي قبل ما اتزوج فتحته وانا صغيرة بس عشر شهور واضطريت ابيعه
لان اخواني ما كانو راضيين عن المشروع يدخل عندهم فيه الحلال والحرام لاني من اسرة متدينة ووالدي الله يرحمه كان خطيب جمعه وراقي شرعي فكانت
المسالة بالنسبة لهم كبيرة وانا ما حبيت ازعلهم والحين حابة ارجع نفس ما كنت, قولو لي هل تفكيري صح تأيدوني فيه ولا انا غلطانة لاني فعلا خلاص
متضايقة من الدوام,,,

[Aaziz]

الي تفكرين فيه صحين مش صح واحد

هذا من وجهة نظري ... الله يوفقج و يكتب لج الخير .

اعتقد حتى موضوع التقاعد لو قدمتي عليه ممكن تتفاهمين مع شغلج و تشرحين لهم الاسباب و انج احتمال ترجعين مستقبلا .

موفقه خير الله يبارك لج في حالاج و بيتج و زوجك

[alsoq]

اذا راتبك الاساسي قوي اخذي تقاعد
واهم شي راحه نفسيه والحمدلله بتكونين جنب اولادك وبيتك وهذي بحد ذاتها نعمه

[تأملات]

نصيحة قبل التقاعد أستخيري وممكن تطلبين اجازة تشوفين نفسج

[العلياا]

ماشاءالله عليهم الاعضاء ماقصروا
بالنسبة لي اشوف قعدتج فالبيت مع اعيالج وابوهم بالدنيا كلها وخصوصا انكم مرتاحين مادياً

هذا ما يمنع انج تستخرين اولاً قبل اتخاذ أي قرار
وللأمانة موضوع تقدمين اجازة بدون راتب كتجربة اعجبتني وممكن تكون احدى الخيارات اللي راح تسهل لج عملية اتخاذ القرار

اتمنى لج حياة سعيدة وموفقة ان شاءالله

[Qa10]

أنا رجل و أفكر بالتقاعد المبكر من فترة طويلة ، الدنيا ماتسوى
زحمة واحس ان الشغل مأثر على حياتي الإجتماعية بشكل كبير ، ولايكلف الله نفساً إلا وسعها

إذا مش ملتزمة مادية ولا معسره وفي سعة استخيري وتريثي
ومثل ماقالوا الاخوان قدمي على اجازة بدون راتب كتجربة
حطي السلبيات والايجابيات للخيارين وشوفي شالأصلح

[شمس المغيب]

مرحبا اختي
باقول لچ عن تجربتي

انا ياني البند المركزي من ثلاث سنوات قعدت في البيت
تفرغت فيهم لعيالي وبيتي ونفسي
دخلت مركز تحفيظ قرءآن يومين في الاسبوع
اتابع عيالي في مدارسهم بسهولة من غير ترجي مديرة أو استأذان
لما يانا الاستدعاء شهر 12 وعطوني الخيارات قدمت استقالة تقاعدية
بما ان الشروط تنطبق علي ووضعي المادي جيد ولله الحمد
صح راح نص الراتب
بس الحمد لله أهم شي راحتي النفسية

واتمنى لچ التوفيق أختي سواء استمريتي أو تقاعدتي
ومثل ماقلتي تجربين في البداية إجازة بلا راتب لو فترة بسيطة
وشوفي شلون الوضع

[لما]

رأيي
1- اخذي اجازة بدون راتب سنة مثلا
2- أفتحي أي مشروع حر مايلزمج بوقت مثل الصالون مع تحري استبعاد عمل الأشياء المحرمة فيه
3- اذا شفتي نفسج مرتاحة كملي المشوار واستخييييييييييييييييييييييييييييييييييري أهم شئ

[الصايغة]

أشكر جميع اللي تفاعلوا معاي وعطوني افكارهم خصوصا الاخت شمس المغيب اللي نقلت لي تجربتها وعجبني موضوع الاجازة بدون راتب للتجربة
وفعلا راح اجرب هالتجربة واشوف نفسي خصوصا اني الحين ارتب لمشروعي البسيط والمتواضع عسى ربي يوفقني فيه ويوفق الجميع