مستشفى حمد والسراير !!

[دانوو]

السلام عليكم

اكتب لكم الموضوع وانا في قمه القهر على مستشفى حمد

الوالده سوت عمليه قبل شهرين ونص تفتيت حصى وركبوا لها هوز وقال الدكتور تعالوا بعد شهر عشان اشيله

مر الشهر والوالده تعاني من التهاب وعوار بسبب الهوز رحنا للدكتور وعطانا موعد للعمليه

وكل ما نروح على الموعد يقولون مافي سراير !!

شدعوه مستشفى بهالحجم مافيه سراير !!

قالوا لنا تعالوا بعد اسبوع وكل ما نروح يقولون لنا مافي سراير صار لنا شهر ونص على هالحاله

لين متى يعني

الوالده تنتظر الموعد بسبب التعب اللي مسببه لها الهوز واهم ولا على بالهم حاله المريض ؟

عطوني الحل لأني فكرت اروح واتهاوش معاهم لأن مب معقوله شهر ونص وللحين ما حصلوا سرير !

[غير البشر]

ماتشوف شر الوالده ان شاء الله
ربي يشافيها ويعافيها يارب

هذي مشكله ازليه
والمشكله المجلس الاعلى للصحه ما استفاد من منشأت الاسياد لحل هالمشكله
بالرغم من المنشأات الكثيره الي جاتهم من بعد الاسياد

الله يكون بعونكم
واتمنى توصل لوزير الصحه لحل مشكلتكم ومشكله غيركم
وخاصه المرضى المفروض يتجاوبون مع مشاكلهم بأسرع وقت

[newwife76]

لا حول ولا قوة إلا بالله

الله يشفي الوالده

[طلعة الروح]

الله يشفيها الوالدة ويسهل أمورها يارب.
دايما نسمع عن مشاكل نقص الأسرة في هالمستشفى، دايما عندنا مشكلة نقص ف العقول اكثر من الامكانيات (مسألة التنظيم)
إن شالله حد يفيدج من الاعضاء بخصوص من المسؤول اللي مفروض تتواصلين وياه بهالخصوص.

[فلتة زمانها]

اذا الوالدة تعبانه وااايد وما تتحمل وديها طواري حمد
وكلمي الدكاترة عن العمليه
والله يشفيها ويعافيها يااااارب

[وزارة الصحة العامة]

العضو دانوو

يرجى التواصل مع قسم رضا العملاء في المجلس الأعلى للصحة على الأرقام التالية 44070233-44070725

[بوخالد911]

الله يسهل عليكم
ويتعدل الوضع

[دانوو]

الله يجزاكم خير على التفاعل والردود
ورحم الله والديكم
وان شاء الله اليوم بتصل على الرقم المذكور فوق

[القطرية1]

ياريت اتخبرينا ايش صار لج مع رضا العملاء

[عاهد بن علي]

عسى الله يشفيها

[رجل مثالي]

لا حول ولا قوة إلا بالله

الله يشفي الوالده

[إعلامي قطر]

العضو دانوو

يرجى التواصل مع قسم رضا العملاء في المجلس الأعلى للصحة على الأرقام التالية 44070233-44070725

المفروض تسمونه قسم سخط العملاء !
أي رضا الله يجزاكم خير..

وبالنسبه لصاحب الموضوع بختصر لك الموضوع:

الحقوق يبي لها حلوق !

هذا حق لكم وكفله لكم الدستور والله لو إنها أم حد
من هالمسؤولين إنهم يخترعون لها سرير أو على
أقرب طياره تتعالج بأفضل مستشفى بلندن
مع المصرف والمرافق وإلخ..

شلون تنتظر كل هالمده أساساً ووالدتك تعبانه !

روح وأدخل مكاتب المدراء عندهم وأحشرهم
وصدقني فيه أمور ماتمشي إلا بهالطريقه
مع بعض الجهات الخدميه للأسف الشديد..

والحمد لله على كل حال..

..

[النهار]

ماتشوف شر الوالده ان شاء الله
ربي يشافيها ويعافيها يارب

هذي مشكله ازليه
والمشكله المجلس الاعلى للصحه ما استفاد من منشأت الاسياد لحل هالمشكله
بالرغم من المنشأات الكثيره الي جاتهم من بعد الاسياد

الله يكون بعونكم
واتمنى توصل لوزير الصحه لحل مشكلتكم ومشكله غيركم
وخاصه المرضى المفروض يتجاوبون مع مشاكلهم بأسرع وقت

صبرا جميلا والله المستعان
بعد نقل مستشفى الولاده الي المبنى الجديد يتم تحول مستشفى الولاده وضمه لمستشفى حمد
النقل خلال الشهور القليله ان شاءالله

[نوفا91]

الله يشفي الوالده ان شاء الله ..


انا يوم رحت طواري الولاده وعقب الفحص قالوا ولادة الحين بندخلج الغرفة وعقب قالوا نطري شوي مافي غرفة!!! وعقب ساعة يمكن نظفوا الغرفة وودوني :rolleyes2:

ولادة ومافي غرفة وين تربي فالممر ,لازم يعيدون النظر بأزمة الغرف مب حالة والله :anger1:

[koketa]

للأسف اداره مؤسسه حمد اداره بعقليه محدوده وغير مبتكره

[القطو السمين]

الله يشافي لكم الوالدة وانا بنتي عمرها اربع سنوات تعاني من نزيف كل فترة من ثﻻث شهور وتم تحويلها باصرار مني ﻻن بنتي نقصت نص وزنها نطرت شهرين لين شافها الدكتور طلب لها عاجل فحص إشعاع إحالتها مريبة صار لي شهر ابحث لبنتي سرير تدرون ايش تقولي الممرضة السودانية مافيه اﻻ بعد شهر يعني انتظر شهر ثاني وبنتي تعاني تدرون ليش احنا نعاني ﻻن اللي يحجزون الغرف هم الممرضات وانا انطر والممر مليان من الجاليات السودانية هاي اللي شفته مالكم في الطويل حاجة قلت لهم والله مطلع لين تسوون فحص بنتي وانا أولى من المقيمين والحمدلله بس لي رجعه ثانية الاخلصت بنتي ثﻻث شهور انطر في بلدي والاجانب مايتاخرون نبي حل

[الدوحه1]

لو هالسيناريو في اوروبا او امريكا كان وزير الصحه طار من زمان!!!

[خريجة 2011]

الله يشفيها ويعافيها لكم حبيبتي ان شاءالله

[يمامـة]

العضو دانوو

يرجى التواصل مع قسم رضا العملاء في المجلس الأعلى للصحة على الأرقام التالية 44070233-44070725

طيب واللي عنده مشكلة ومب مشارك في المنتدى اشلون ممكن تنحل له مشكلة قلة السراير؟


وسلامة الوالدة يا صاحب الموضوع وربنا يقومها بالسلامة يارب

[R 7 A L]

المشكلة اغلب العالم عندنا
المواطنين والمقيمين والزائرين
مايعرفون الا مستشفى حمد !!


المستشفيات الأن في الفترة الحاليــــة اكثرت مو شرط تروحون لمستشفى حمد
عندكم الخور والكوبي والوكرة والعمادي والاهلي والدوحة بالاضافة الي عشرات العيادات

ياليت هالعالم يخلون مستشفى حمد للحالات الصعبة
مثل حالة ام صاحبة الموضوع وغيرها


والله يشافي ام صاحبة الموضوع



cc للمجلس الاعلى للصحة لتثقيف الناس وين تروح !!

[معماري قطري]

لو هالسيناريو في اوروبا او امريكا كان وزير الصحه طار من زمان!!!




:nice:

[بـن عدوان]

لو هالسيناريو في اوروبا او امريكا كان وزير الصحه طار من زمان!!!



صااااادق

[Azizuk]

ايش تقول الوالدة جات من العلاج في الخارج وتم ترتيب جميع الإجراءات لاستقبالها من قبل السفارة وزارة الصحة والمستشفى وإرسال التقارير الطبية لهم والتأكد قبل الوصل بتوفير غرفة لملاحظة حالتها عند الوصول وبالفعل تم إرسال سيارة الإسعاف الى الطائرة ونقلها مع الرضيعة الى المستشفى في سيارت الإسعاف

النقطة رقم واحد خلوها تنتظر في المطار قريب الساعة عشان مفتش الجمارك يجئ يفتش قبل الخروج

والصدمة الكبرى سيارة الإسعاف وده الوالده الى قسم الطوارئ وهي المفروض ماتخالط المرضى
والأدهى من ذلك ان قسم الطوارئ مب راضي يستقبلها
وانا كنت استقبل الوالد و أخذ الأغراض والشنط من المطار وأخوي راح لهم المستشفى لين وصل لهم مع الزحمه قد خلاص الوالده تعبت
والمفروض غرفتها تكون جاهزة
في الأخير الطوارئ دخلها وكل حين دكتور يجيها يسألها أسئلة بايخه وأخوي والولد تهاوش معاهم

يوم رحنا نستفسر من قسم الدخول يقول احنا ما عندنا غرفة ومب مستعدين لها وماندري عنها انها بتوصل اليوم أقول له شلون ماتدرون ومراسلين سيارة إسعاف
وانتو لازم في تكتب كتب رسمية وتصاريح دخول وخروج مريض من المطار

دخلنا على مدير المستشفى يقول انا شايف الايميل من أسبوع والمفروض كل جهة وقسم يقوم بواجبه

الرجال ما قصر جه قسم الطوارئ وشاف تقريرها وقال اذا حالتها الصحية زينه راح انرخصها تروح البيت المهم ماطولها في الأخير كلم قسم الدخول وتم تدبير غرفة لها بس قالو صبر وبعد ساعة عشان التنظيف والتعقيم من المريض القبلي بعد ساعة رحنا نشوف الغرفة الا المريضة مب راضية تطلع من الغرفة تقول انا تعبانة ومربي اطلع

راجعنا قسم الدخول مره ثانية وبعد جهدا جهيد تم توفير غرفة في قسم القمة المشكلة ما نقدر نوديها اي مستشفى خاص لان لازم دكتورها أهو بنفسه يشرف على صحتها والتأكد من الاعلاج اللي في الخارج تم بنجاح وخاصة لما يتغير عليها الجو من بلد الى بلد

تخيلو أنزلت من الطيارة الساعة 6 وربع في الإسعاف وغير انها وصلت المستشفى 7 ونص وقعدة في سيارة الإسعاف عند باب الطوارئ بعد ساعة لين دخلت ولين وصلت وحصلنا لها غرفة الساعة 12 الظهر هذا غير وقت الرحلة 9 ساعات وخروجها من المستشفى في بلد العلاج وصولهم المطار قبلها ب 4 ساعات وتأخر الإقلاع ساعة يعني من خروجها من المستشفى لين وصولها الدوحة كملت 24 ساعة

الحين ابي اعرف من الغلاطان وين الخطاء

اذا السفارة ما قصرت وقامت بواجها والمستشفى يقول احنا استقبلنا الفاكسات والايميلات وموعد والوصول المريض وقسم الدخول قبلها تم التأكد انهم مستعدين وهذا يقولي مب اول مريض يجينه من الخارج والإسعاف تم ارساله

من يتحاسب قسم الدخول ؟؟؟؟؟